Gàla 2 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ yèè aŋ keela tàeɗùù gbànaŋ nyàŋ

¹ Maŋ dòà zììyà jɛ̀wɛ tiinàŋ naŋ mààŋ, yàwi Bànaŋɓà naŋ kɛ̀ɛ̀ maŋjɛ̀wɛ ko Jùlusɛ̀làm, kɛɛ è naŋ wa kɔ̀ɔ̀ wo Taitɔ̀.

² Kɛɛ mìŋ nao kɔ̀ esaɓù kɛ̀ wo Dayà naim wa tɔɔ̀ wèè kao ka. E dèènè titi sùà yàwiiŋ nààŋ sìèfèìŋ nyuùŋ hààwe nyàŋ, mìŋ naŋ kɛ̀ɛ̀nɛ̀ŋ ke jii gbài e nyaàìŋ dè ke mìè gbìàŋ Ebò Siaàŋ mìŋ yaà wa dàànè sùà koɓɛ̀ anyùùŋ nyaŋ fè àŋ Juùù nyaŋ lɛ̀. Miŋ manàŋ wa wèè ka nyìmàŋ tɔɔɓaa kɛ̀ e tòmoɛ̀ mìŋ naŋ wa nyɛ̀nɛ̀ŋ e gɔuo sùà lɛ, yèè e tòmò ko dòmàŋfeìŋ mɛ̀ naàŋ nɔ̀ŋ è wèè foo.

³ Wo Taitɔ̀ naim wa jèè maŋjɛ̀wɛ e kà ko Jùlusɛ̀làm. Jòòpɛɛ wò yaà wa wo Guliì nyuùŋ, kɛɛ aŋ gòuŋ wa kùwìà màŋ gàangàaŋ wèè auŋ jàà kpùa.

⁴ È naiŋ noo wa kɔ̀ esàɓù anyùùŋ nyaŋ naŋ jàà e fɛ̀ɛ̀ wèè aŋ nɔ̀ŋ anyùùŋ hààwe nyàŋ, yèè àŋ naŋ wi wa sɛ̀ɛ̀ e tɛɛ mààŋ anyuùŋ gbɛ̀ɛ̀ gbɛ̀ɛ̀ nyùùŋ. Àŋ naŋ wa hnè wèè aŋ gèe e bìlɛɛ̀ŋ wo Jisɛ̀ Kulaì naŋ wi wa kiɛ̀ŋ lɛ ko sìwè, yèè àŋ yaà wa kààmè e ɗewe wèè aŋ kuwìè wi e gààŋ diɛŋ mààŋ aŋ ɗo nyiŋ.

⁵ Kɛɛ è manaŋ wa wèè naŋ kɛ̀ɛ̀nɛ̀ŋ Ebò Sìàŋ tɔ̀ɔ̀nyaàaŋ. Tɛɛ̀ naŋ nyɛ̀nɛ̀ŋ e gò nyiŋ wa nyimèè wèè è teenga kpuu pɛɛ.

⁶ Aŋ bà nyiŋ do wa weè nàŋ nɔ̀ŋ aŋ sìèfeìŋ kɛnɛ, kɛɛ miŋ gò wa kpɛɛ̀ŋ kɛ̀ ɓòò nàŋ yaà nyiìŋ. Wo Dayà fè nyangè! Aŋ tèènè aŋ sìèfeìŋ titi nyɛɛ̀ŋ bà gbiŋ gò wa tòòyà è nɛ̀ŋ bà gbiŋ kòɓɛ̀ kè miè gbìaŋ miɛ̀ŋ.

⁷ Àŋ naŋ wa jàà jii kɛ̀ wo Dayà naim wa tùɔ̀ŋ wèè ka dàànè ke mìè gbìàŋ Ebò Siaàŋ koɓɛ̀ anyùùŋ nyaŋ fè àŋ Juùù yèè aŋ fè kè kpùà jàa nyàŋ, yèè wò naŋ wa tùɔ̀ŋ wo Pììlɛ wèè wo dàànè ke mìè gbìàŋ Ebò Sìàŋ guùŋ bi koɓɛ̀ aŋ Juùù jàà kpùa nyàŋ.

⁸ Wo Dayà, naŋ wa tùɔ̀ŋ wo Pììlɛ yèè wò nauŋ nyɛ̀nɛ̀ŋ wo keela tàeɗùù koɓɛ̀ aŋ Juùù jàà kpùa nyàŋ, yèè wò yààìm naàŋ tòòmo sùà wèè ka dàànè ke mìè gbìàŋ Ebò Siaàŋ koɓɛ̀ anyùùŋ nyaŋ fè àŋ Juùù nyaŋ.

⁹ Wo Jìiiŋ, wo Pììlɛ, yàà wo Jɔ̀ɔŋ, aŋ yè nyaŋ yaà wa mààŋ aŋ sìèfeìŋ ke gbòò anyuùŋ hààwe nyàŋ, naŋ wa nyìmè kɛ̀ wo Dayà naŋ wi kìɛ̀ŋ e dɛ̀ɛ̀kɛ titi lɛɛ̀, yèè àŋ naŋ wi hɔ̀ɔ̀ kùàŋ sìwè yàwi Bànaŋɓà, wèè e tɔɔ̀ kɛ̀ yàwi nààŋ gbiŋ è yààìŋ anyùùŋ guùŋ. Yàwi Bànaŋɓà naŋ wa nyimèè wèè e tòòmò anyùùŋ nyaŋ fè àŋ Juùù nyaŋ tɛɛ e kìlà anyuùŋ gbànaŋ nyàŋ aŋ tòòmò aŋ Juùù jàà kpùa nyaŋ tɛɛ.

¹⁰ Àŋ naŋ wi wa nɔŋ dawè wèè eiŋ jàà anyùùŋ pɔ̀ɔ nyàŋ jii ke gboò nyiŋ nɛɛ̀ŋ sùà, yèè tɛɛ̀ nàŋ yaà e keìɛ è naŋ wa gongò wèè eiŋ nyɛ̀nɛ̀ŋ lɛ̀.

Wo Pɔɔ̀ naŋ gbùùyè wo Pììlɛ ko Aŋtiɔ̀

¹¹ Kɛɛ nààŋ wo Pììlɛ naŋ wa hnè ko Aŋtiɔ̀, mìŋ nauŋ wa pɔ̀ɔ̀ e keì ko ɓài.

¹² Wo Pììlɛ, yaà anyuùŋ hààwè Kanaà Jisɛ̀ Kulaì nyaŋ anyùùŋ nyaŋ fè àŋ Juùù nyaŋ, jiiyà wa e nɛ̀ŋje koɓɛ̀ guùŋ, e jèèsùà wo Jìiiŋ tùàŋ aŋ Juùù hààwe nyàŋ bà. Wo Pììlɛ duɔŋ wa aŋ Juùù jàà kpùa nyàŋ, yèè yaà anyùùŋ nyaŋ fè àŋ Juùù nyaŋ naŋ hɔ̀ànè jììyà e nɛ̀ŋjè koɓɛ̀ guùŋ.

¹³ Aŋ Juùù hààwe gbànaŋ nyàŋ, naŋ wa tɔ̀ɔ̀tù maŋ kpèè naanààŋ nyɛ̀nɛŋ mààŋ anyuùŋ jàà fɛ̀ɛ̀ keì. Yèè e jùù naŋ nyɛ̀nɛ̀ŋ wo Bànaŋɓà wèè wo gììyà maŋ kpèè naanààŋ nyiŋ màŋ maŋhɛɛ.

¹⁴ Kɛɛ nààŋ mìŋ naŋ wa yɛmɛ̀ kɛ̀ aŋ fè kààiŋ sùà kè dòmàŋ jìlɛɛ̀ŋ è nyaàiŋ dè è tɔ̀ɔ̀nyààŋ Ebò Siaàŋ lɛ, mìŋ naŋ wa woò wo Pììlɛ ko fɛ̀ɛ̀fèìŋ anyùùŋ nyaŋ gbiŋ mìàŋ, “Mùŋ yaà wo Juùù nyuuŋ, yèè màŋ wa nɔ̀ŋ wɔŋ nyiiŋ gèe mɔɔ̀ŋ sùà mààŋ wo nyùnɔ̀ɔŋ fè wò Juùù wɔ. Kɛ̀ dièsɔa mùŋ naŋ ɓɛ̀nɛ̀ŋ hììyà anyùùŋ nyaŋ fè àŋ Juùù nyaŋ wèè aŋ nɔ̀ŋ wɔŋ nyiiŋ gèe nyiŋ nɔɔ̀ŋ sùà mààŋ aŋ Juùù nyuuŋ?”

Anyùùŋ nyaŋ gbiŋ naŋ hààwè wo Jisɛ̀ Kulaì nyaŋ naŋ yɛ̀mɛ̀ e jòèye

¹⁵ Tɔɔɓaa, è yààìŋ aŋ Juùù e kòmò kii wilɛ̀ sùà yèè e feìŋ “ànyùùŋ màŋ jùumù” mààŋ ànyùùŋ nyaŋ fè àŋ Juùù nyaŋ, màànààŋ àŋ woà lɛ.

¹⁶ Kɛɛ èiŋ nyìmàŋ kɛ̀ anyùùŋ nyaŋ nɔŋ wo Dayà jàà kùàŋ dìì wèè aŋ nɔ̀ŋ anyùùŋ tɔ̀ɔ̀nyaàŋ nyaŋ nàŋ yaà, aŋ yè nyaŋ naŋ sìè e hààwe nyiŋ nɛ wo Jisɛ̀ Kulaì sùà nyaŋ. E kìlà e jɔ̀ɔ̀lɔ wilɛ̀ ke Sàwàa dìì nààŋ fè fɔ̀ɔ̀yɛ̀ wo Dayà kè jii. Weè niŋ è naŋ sìè e hààwe wilɛ̀ Jisɛ̀ Kulaì sùà, yèè wo Dayà naŋ wi jàà kùàŋ dìì wèè eiŋ nɔ̀ŋ anyùùŋ tɔ̀ɔ̀nyaàŋ esàɓù e hààwe wilɛ̀.

¹⁷ Nààŋ yàwi nààŋ Juùù nyaŋ naŋ wa tɔ̀ɔ̀tù e ɗewe kàme wèè e nɔ̀iŋ e tɔ̀ɔ̀nyaàŋ sùà koɓɛ̀ Dayài, è naŋ yɛmɛ̀ kɛ̀ è yààìŋ wa anyùùŋ maŋ jùumù. Tɛɛ̀ naŋ tɔɔ̀ kɛ̀ wo Jisɛ̀ Kulaì naŋ wa nyɛ̀nɛ̀ŋ wèè eiŋ nɔ̀ŋ anyùùŋ maŋ jùumù? Kpele, e fè yɛi!

¹⁸ Kɛɛ sèè ka ɓɛìŋ nyɛ̀lɛ̀ manɛ̀ŋ màŋ mìŋ naŋ gɔɛgɔ̀ɛ̀ɛ̀ maŋ, kɛ̀ kà tɔ̀ɔ̀ miàŋ bi wèè ka nɔ̀ŋ wo nyuùŋ pɔ̀ɔ̀ ke Sàwà.

¹⁹ Ke Sàwàa kiiŋ bi naim wa jìwè, yèè kè naim joeyè e yìwìà e gaàŋ nyiŋ nɛ̀ dìì, wèè ka nɔ̀ŋ wɔŋ nyiiŋ gèe miɔ̀ŋ sùà wèè wo Dayà. E kìlà àŋ naŋ wi jìwìè wɔŋ vànèkpaa diɛŋ yàwi nààŋ Jisɛ̀ Kulaì.

²⁰ Jòòpɛɛ kà naàŋ fà, kɛɛ wo Jisɛ̀ Kulaì yaà wɔŋ nyiiŋ gèe miɔ̀ŋ sùà. E kìlà mìŋ yaà naàŋ wɔŋ nyiiŋ gèe e hààwe wo Jɔ̀àfelàà Dayàa sùà, wo yèɔ naim mɔ̀nɔ̀ŋ yèè wò naŋ kìɛ̀ŋ wɔŋ nyiiuŋ nɔɔ̀ŋ e weèim wɔ̀.

²¹ Mìŋ naŋ gangà wèè ka gììyà e tɛ̀ɛ̀tɛ̀ɛ̀ Dayà maŋhɛɛ. Kɛɛ sèè wo Dayà naŋ ɓɛ̀nɛ̀ŋ jàà wo nyùùŋ kùàŋ dìì wèè wo nɔ̀ŋ nyùùŋ tɔ̀ɔ̀nyaàŋ ko nɛ̀ɛ̀uŋ niìŋ e yìwìà ke Sàwàuŋ nɛɛ̀ŋ dìì, è do naŋ tɔɔ̀ kɛ̀ wo Jisɛ̀ Kulaì naŋ wa fɔ̀ e wèè foo!