Gàla 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pɔɔ̀ sìwè, nàŋ yaà sìngìè wɔŋ fɛi wɛɛ̀ŋ. Wo Dayà naim nyààŋ wèè ka nɔ̀ŋ wo keela tàeɗùù wèè Jisɛ̀ Kulaì, yèè e nyàaŋ mɛ gò e yìwìà nyùùŋ kpùuŋ ɔ̀ɔ̀ è gààŋ nyuùŋkpùuŋ sùà, kɛɛ è naŋ yìwìè wo Jisɛ̀ Kulaì yaà wo Dèdaà Dayà wo yèɔ naùŋ gè e fàaà dìì wɔ.

² Anyuùŋ hààwe nyàŋ gbiŋ yaà kià nyaŋ naim sìè jɛwɛ wèè ka tùàŋ e zùùmo koɓɛ̀ anyuùŋ hààwe nyaŋ maŋ sààŋ Dayàa màŋ dìì ko Gàlatìà.

³ Tɔ̀ wo Dayà wo Dèda wiɔ̀ yèè wo Kanaà Jisɛ̀ Kulaì kiɛ̀iŋ e tɛ̀ɛ̀tɛ̀ɛ̀ yèè ke jii fàa.

⁴ Wo Jisɛ̀ Kulaì naŋ wa jɔ̀ɔ̀lɔ̀ wo Dèda wiɔ̀ wo Dayà dìì, yèè wò naŋ kiɛ̀ŋ wuŋ bi wèè wo nɔ̀ŋ e nɛ̀ŋ saàà wèè maŋ jùumù wi màŋ, wèè wo joeyè wi e yìwìà e ɗuunyaŋ naanààŋ lɛɛ̀ sùà.

⁵ E jòòwo e nɔ̀ŋ koɓɛ̀ Dayài wèè julɔfɔ yèè julɔfɔ! Àmiinàŋ.

Ke mìè gbìàŋ Ebò Siaàŋ yaà nɔŋ kè guùŋ

⁶ È naim foonò wèè naŋ fè wo Dayà jɛwɛ fiò, wo yeɔ̀ naiŋ nyààŋ e yìwìà e tɛ̀ɛ̀tɛ̀ɛ̀ Jisɛ̀ Kulaìɛ sùà wɔ, yèè nìŋ naŋ jàà ebò siaŋ joo kùàŋ dìì.

⁷ Tɔɔɓaa, ebò siaŋ joo bà gbiŋ fè, kɛɛ mìŋ naŋ tɛɛ woò esaɓù nàŋ yaà kɛ̀ anyùùŋ nyaŋ bà nyiŋ yaà kààmè ɗewe wèè aŋ gɔ̀àgɔ̀à maŋ jiiŋ màŋ sùà yèè aŋ vɔ̀ɔ̀nɔ̀ŋ Ebò Sìàŋ Jisɛ̀ Kulaìɛ.

⁸ Mìŋ zoolà wèè wo Dayà nìmìlà wo nyùnɔ̀ɔ̀ŋ yèɔ gbiŋ doiŋ naŋ dàànè ebò joo eɓìèmàŋjɛ̀wɛ̀ ke mìè gbìàŋ Ebò Siaŋ wilɛ̀ wɔ! Miŋ gò kpɛɛ̀ŋ sèè pɛɛ wò naŋ nɔ̀ŋ wo bàwibà ɔ̀ɔ̀ wo màìkà e yìwìà ko àìjɛnɛ̀ŋ.

⁹ Èiŋ niŋ wa woò jiɛ̀, yèè mìŋ do niŋ ɓɛìŋ nàŋ woò. Sèè wo nyùnɔ̀ɔ̀ŋ yèɔ gbiŋ do naŋ dàànè ebò joo eɓìèmàŋjɛ̀wɛ̀ ebò siaàŋ niŋ naŋ jàà kùàŋ dìì lɛ, wo Dayà douŋ nàŋ jèè e kei ko jàhamaŋ.

¹⁰ Mùŋ gongà mààŋ mìŋ yaà kààmè e ɗewe wèè ka kìɛ̀ŋ anyùùŋ maŋ jii fàa? Tɔɔɓaa kpele! E yèɛ wo Dayà naŋ mɔ̀nɔ̀ŋ yèè wò naŋ jàà kùàŋ dìì lɛ tiŋ mìŋ manaŋ! Ɓàà mìŋ yaà kààmè e ɗewe wèè anyùùŋ aim nyìmàŋ? Sèè ka weè nɔ̀ŋ kààmè ɗewe wèè ka yɛi nyɛ̀nɛ̀ŋ, miŋ fè weè ɓɛ̀nɛ̀ŋ nɔ̀ŋ wo ɓɔìjɔ̀à wèè wo Jisɛ̀ Kulaì.

E ɗeweɛ̀ wo Pɔɔ̀ naŋ nɔ̀ŋ wo keela tàeɗùù lɛ

¹¹ Tɔ̀ miŋ woòiŋ, nyɛiŋ nààŋ wùìyaim nyàŋ, kɛ̀ Ebò Siaàŋ mìŋ daanàŋ lɛ, e gò e yìwìà wo nyuùŋkpùuŋ sìwè.

¹² Wo nyuùŋkpùuŋ nààŋ goim wa wòò Ebò Siaŋ lɛɛ̀ ɔ̀ɔ̀ wo miŋ kaà. Ke mìè gbìaŋ miɛ̀ŋ naŋ wa yìwìè wo Jisɛ̀ Kulaì wuŋ bi sìwè e teengaà wò naim fòlò feìŋ nɛ.

¹³ Nàŋ nyìmàŋ e ɗeweɛ̀ mìŋ yaà wa wɔŋ nyiiŋ gèe miɔ̀ŋ sùà mààŋ wo Juùù nyuùŋ lɛ̀. Miŋ gò wa kɛ̀ɛ̀nɛ̀ŋ kè nyowo wèè anyuùŋ hààwè Dayà nyaŋ, yèè mìŋ hewa kàmè e ɗeweɛ̀ gbiŋ mìŋ naŋ ɓɛnɛ̀ŋ lɛ wèè ka nyiŋ nimilà.

¹⁴ Mìŋ sia wa aŋ Juùù sèène dàwiim nyàŋ zimgbe nyiŋ feìŋ e kèè Dayà zòòloɛ̀ sùà, yèè mìŋ naŋ wa haamìŋ wèè ka jɔ̀ɔ̀lɔ̀ maŋ sàwà maŋ gbiŋ aŋ nèwàènèwe wi nyàŋ naŋ wi wa kiɛ̀ŋ maŋ dìì.

¹⁵ Kɛɛ wèè paŋ aŋ kòmàim wa, wo Dayà naim wa tàeɗùù e yìwìà e tɛ̀ɛ̀tɛ̀ɛ̀uŋ nɛ̀ sùà,

¹⁶ wèè woim tɔ̀ɔ̀ wo Jɔ̀àfelaauŋ nɔɔ̀ŋ, yèè ka wòò ke mìè gbìàŋ Ebò Siauŋ nɛ̀ koɓɛ̀ anyùùŋ nyaŋ fè àŋ Juùù nyaŋ. Miŋ gò wa kà koɓɛ̀ wò nyùùŋ gbiŋ wèè kè mìè gòo.

¹⁷ Miŋ gò wa kà kò Jùlusɛ̀làm kòɓɛ̀ àŋ yè nyaŋ yaà wa aŋ keela tàeɗùù paŋ ngàà mìŋ naŋ wa nɔ̀ŋ wo keela tàeɗùù lɛ. Kɛɛ, mìŋ naŋ wa kɔ̀ maŋ kpàlàùŋ kpàlàùŋ maŋ sùà ko Àlàbià, yèè eɓìèmàŋjɛ̀wɛ̀ tii, mìŋ naŋ kɔ ko jawaì gbeeì Dàmakɔ̀.

¹⁸ Nààŋ maŋ dòà taai naŋ mààŋ, mìŋ naŋ kɔ̀ ko Jùlusɛ̀làm ko jààmè wo Pììlɛ, yèè mìŋ naŋ wa nɔ̀ŋ ko nɛ̀ɛ̀uŋ niìŋ wèè e gɔ̀ɛ̀ɛ̀ zììyà jɛ̀wɛ nɔɔnɔŋ.

¹⁹ Wo keela tàeɗùùɔ nɔŋ mìŋ naŋ wa yɛmɛ̀ wɔ nàŋ yaà wo Jìiiŋ, wo wùìya Kanaà Jisɛ̀ɔ.

²⁰ E yèɛ mìŋ naŋ sìngè lɛ è yaà e tɔ̀ɔ̀nyaàŋ. Wo Dayà nyìmàŋ kɛ̀ miŋ fè tòa sùà!

²¹ Eɓìèmàŋjɛ̀wɛ̀ tii, mìŋ naŋ kɔ̀ wɔŋ fùɔ̀ŋ Siilìàa yèè wɔŋ fùɔ̀ŋ Sèlesìà.

²² E teenga lii sùà aŋ yè nyaŋ yaà wa aŋ bà nyiŋ bà wèè ke gbòò anyuùŋ hààwe nyàŋ wo Jisɛ̀ Kulaì sùà ko Jùdià lɛ, aŋ nyimààìm wa sengei.

²³ Àŋ naŋ nyìmè e yèɛ anyuùŋ joo yaà wa woo lɛ̀. “Wo felaà yèɔ he wi wa nimìlà wèè e hààweɛ̀ wɔ, kòò wò yaà naàŋ wòò ke mìè gbìàŋ Ebò Siaàŋ wò yaà wa kààmè ɗewe wèè wo pɔɔpɔ̀ɔ̀ lɛ!”

²⁴ E kìlà esaɓù mɛ̀ sùà, àŋ naŋ jòòwò e dèè Dayàa.