Fèle 4 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ naŋ kìɛ̀ŋ anyuùŋ hààwe nyàŋ e gòo

¹ Nyɛ̀iŋ nààŋ wùìyaim nyàŋ, mìŋ mànàiŋ zimgbe, yèè nìŋ naŋ nyɛ̀nɛ̀ŋ e zɔlɔ̀ naim diè zimgbe. Nyɛ̀iŋ nàŋ yaà mààŋ ke ɓɔ̀ɗì kana miɛ̀ŋ. Jèeìŋ e hààwe sùà koɓɛ̀ wo Kanaà.

² Mìŋ yààìŋ daawe, Ɛwudià yèè Santekà, wèè naŋ kɛ̀ɛ̀nɛ̀ŋ e gòngò guùŋ nɛ wo Kanaà sùà.

³ Muàŋ pɛɛ nyuùŋ hààwe dàwi tùlìà jii miɔ̀ŋ, mìŋ dawàùm wèè maŋ kpùùmàŋ aŋ jɔùŋ nyɛɛ̀ŋ. Aŋ jɔùŋ nyɛɛ̀ŋ, naŋ tòòmò yàwi wo Kilɛmɛ̀ŋ kùàŋ sùà, e kpùlìà anyuùŋ tòmo dàwi gbànaŋ wi nyàŋ wèè eiŋ ɓààyè Ebò Siaàŋ. Maŋ deè nyiŋ màŋ yaà naàŋ sìnga miŋ wɔŋ fɛ̀ì Dayàa sùà, wɔŋ yèɔ wo Dayà naŋ sìngè maŋ dèè anyùùŋ nyaŋ do nàŋ nɔ̀ŋ wɔŋ nyiiŋ gèeɔ̀ sùà wèè julɔfɔ nyàŋ.

⁴ Nɔ̀iŋ e zɔlɔ̀ sùà e teenga gbiŋ nààŋ nìŋ yaà aŋ bàiŋbà wo Kanaà Jisɛ̀ sùà. Tɔ̀ miŋ woò niŋ ɓɛìŋ, nɔ̀iŋ e zɔlɔ̀ sùà.

⁵ Tɔ̀ɔ̀ ke kpèè ɓɛ̀ɛ̀jàa koɓɛ̀ anyùùŋ nyaŋ e teenga gbiŋ. Wo Kanaà kòò wò yaà hinie e teenga kpuu sùà.

⁶ Ɓɔ̀ mùŋ dangè è gòngo mɔ̀ɛ̀ è doum jìwà, kɛɛ sèè mùŋ zoolà koɓɛ̀ Dayài, wòòuŋ kɛ̀ kiìŋ mùŋ manaŋ wo nyɛ̀nɛ̀ŋ weèum. Yèè e teenga gbiŋ sèè mùŋ zoolà, gè wo Dayà ke sɛ̀.

⁷ Kpeiŋ nààŋ nìŋ yaà aŋ bàiŋbà wo Jisɛ̀ Kulaì sùà lɛ, wo Dayà doiŋ nàŋ kpuumò yèè woiŋ kìɛ̀ŋ jii fàa, ke yèɛ wo nyùùŋ gbiŋ fè ɓɛ̀nɛ̀ŋ nyìmaŋ lɛ̀. Yèè wo Dayà do nàŋ nyɛ̀nɛ̀ŋ maŋ jii wi màŋ maŋ jɛi.

⁸ Ko diemeì wèè e yèɛ mìŋ yaà hinie ka woò lɛ, nyɛ̀iŋ nààŋ wùìyaim nyàŋ, jàaìŋ maŋ jiiiŋ màŋ maŋ keì mɛɛ̀ŋ maŋjɛ̀wɛ, e nɛ̀ɛŋ yaà e tɔ̀ɔ̀nyaàŋ lɛ, e yèɛ yaà e nɛ̀ŋ tɛ̀nɛŋ lɛ̀, e yèɛ yaà sengei lɛ̀, e yèɛ yaà nɛɛmaŋ lɛ̀, e yèɛ yaà e nɛ̀ŋ siaŋ lɛ̀, e yèɛ yaà e ɓɛ̀ɛ̀jàa lɛ̀, yèè e nɛ̀ɛŋ gbiŋ siaŋ tɛ̀nɛŋ lɛ̀.

⁹ Nàŋ nyìmàŋ e nɛ̀ɛŋ mìŋ naiŋ wa kaà lɛ, yèè nàŋ nyìmàŋ e nɛ̀ɛŋ nìŋ naŋ kòmò mìŋ naŋ woò yèè nìŋ naŋ yɛmɛ̀ mìŋ naŋ nyɛ̀nɛ̀ŋ lɛ. Weètii, deìŋ e tɔ̀ɔ̀màŋsèì ke kpèè siaŋ miɛ̀ŋ maŋjɛ̀wɛ̀. Kpeiŋ wo Dayà, wo yèɔ kiɛ̀ŋ ke jii fàa wɔ̀, doiŋ nàŋ nɔ̀ŋ maŋjɛ̀wɛ.

Ɓaikà wèè e kìɛɛ̀ŋ

¹⁰ Nààŋ mìŋ nyiniàŋ wɔŋ nyiiŋ gèe miɔ̀ŋ wo Kanaà Jisɛ̀ sùà, e zɔlɔ̀ gbee naim diè, wèè ka nyìmàŋ kɛ̀ nìŋ naŋ ɓɛìŋ kɛ̀ɛ̀nɛ̀ŋ e gòngo e weèim e yìwìà e teenga mùnlaŋ. Tɔɔɓaa, nìŋ hewa gòngò kiim, kɛɛ niŋ kuwà wa è ɗewe wèè naŋ niŋ tɔɔ̀ janjai.

¹¹ Ɓɔ̀ nìŋ gongò kɛ̀ ke jii gòim fà wèè mànɛ̀ŋ maŋ mìŋ kuwa màŋ. Mìŋ naŋ kɔ̀ e gɔ̀ɔ̀yɛ dìì wèè ka kɛ̀ɛ̀nɛ̀ŋ ke jii fàa wèè e yèɛ mìŋ kuwa lɛ̀.

¹² Kà nyìmàŋ kɛ̀ kiìŋ è naŋ tɔɔ̀ wèè maŋ nɔ̀ŋ wo nyuùŋ pɔ̀ɔ, ɔ̀ɔ̀ wèè maŋ kɛ̀ɛ̀nɛ̀ŋ e zimgbe niŋ. Yèè kà gbeè, e kìlà kà nyìmàŋ ke gbùnuɛ̀ wèè maŋ keì mɛɛ̀ŋ gbiŋ.

¹³ Kà ɓɛnɛ̀ŋ wèè ka kɔ̀ɛ̀ e keì ɗewe gbiŋ sùà, esaɓù kɛ̀ wo Jisɛ̀ Kulaì nyɛnɛŋ kà kɛ̀ɛ̀nɛ̀ŋ e gààaŋ wèè ka tii nyɛ̀nɛ̀ŋ.

¹⁴ Kɛɛ nìŋ naŋ wa nyɛ̀nɛ̀ŋ e keì sìàŋ, wèè naŋ nɔ̀ŋ àŋ bàiŋbà wèè naim kìɛ̀ŋ e kpùùmaŋ, e teengaà mìŋ yaà wa kɔ̀ɔ̀yɛ̀ e keì nyìnga dìì lɛ.

¹⁵ Nyɛ̀iŋ nààŋ nyùùŋ Fèlepì nyaŋ, nàŋ nyìmàŋ kɛ̀ dièsɔa maŋ keì kààìŋ kii màŋ yaà wa, yèè nyɛ̀iŋ nɔŋ naŋ wa nɔ̀ŋ aŋ bàiŋbà ke gbòò anyuùŋ hààwe nyàŋ tɛɛ, wèè naŋ kìɛ̀ŋ e kpùùmaŋ e teengaà mìŋ naŋ wa tɔ̀ɔ̀tù wòò Ebò Siaàŋ ko Mɛ̀sèdonià lɛ.

¹⁶ E teengaà pɛɛ mìŋ yaà wa ko Tɛsèlonikà lɛ, nìŋ naim wa kpuumò e nìàŋ sùà guùŋ.

¹⁷ Mìŋ fè kààmè ɗewe wèè kaìŋ gè è nɛ̀ŋ sìwè, kɛɛ mìŋ manaŋ wèè naŋ yɛ̀mɛ̀ e kpùùmaàŋ wo Dayà doiŋ nàŋ kiɛ̀ŋ lɛ sèè nìŋ kiɛ̀ŋ.

¹⁸ Wɔŋ fɛ̀ì ke sɛ̀ gèe miɔ̀ŋ wɛɛ̀ŋ, wèè manɛ̀ŋ maŋ gbiŋ nìŋ naim kiɛ̀ŋ maŋ, yèè manɛ̀ŋ bi naŋ gàŋ zimgbe. Ke jii miɛ̀ŋ naŋ fɔ̀ wèè manɛ̀ŋ maŋ gbiŋ nìŋ naŋ kìɛ̀ŋ wo Ɛ̀pàfoditɔ̀ wèè woim hiàŋ maŋ. Manɛ̀ŋ kìɛŋ mɛɛ̀ŋ, màŋ yaà mààŋ manɛ̀ŋ kɛnɛ àŋ naŋ gììyè saaà koɓɛ̀ Dayài.

¹⁹ Wo Dayàa mìŋ zoolà wɔ, doiŋ nàŋ kìɛ̀ŋ manɛ̀ŋ maŋ gbiŋ nìŋ naŋ kpɛɛ̀ŋ weè miŋ màŋ, e yìwìà e bàneɛ̀ wò kuwa lɛ̀ esàɓù e nɛ̀ɛ̀màŋ Jisɛ̀ Kulaìɛ sùà.

²⁰ Tɔ̀ e jòòwo nɔ̀ŋ koɓɛ̀ Dayài wo Dèda wiɔ̀ wèè julɔfɔ yèè julɔfɔ! Àmiinàŋ.

E zùùmò dìàmaàŋ

²¹ E zùùmo yaà koɓɛ̀ anyùùŋ nɛɛmaŋ nyàŋ gbiŋ wèè wo Dayà esàɓù Jisɛ̀ Kulaì sùà. Miàŋ yèè anyùùŋ màŋjɛ̀wɛ̀ Kanaà Jisɛ̀ nyaŋ kià ko nɛ̀ɛ̀ŋ miìŋ, naiŋ tùɔ̀ŋ zùùmo.

²² Anyùùŋ nɛɛmaŋ nyàŋ gbiŋ naiŋ tùɔ̀ŋ zùùmo, ɓɔɔɓɔɔ aŋ yè nyaŋ toomàŋ ko sààŋ gbèè Kanaà Siisɔ̀ nyaŋ.

²³ Mìŋ zoolà wèè e tɛ̀ɛ̀tɛ̀ɛ̀ wo Kana wiɔ̀ Jisɛ̀ Kulaì eiŋ nɔ̀ŋ maŋjɛ̀wɛ.