Fèle 3 - WƆŊ FƐ̀Ì EBÒ SÌÀŊ DAYÀA

E tɔ̀ɔ̀nyaàaŋ yewe koɓɛ̀ Dayài lɛ̀

¹ Ko dìèmè e keì wòo lɛɛ̀ nyɛ̀iŋ nààŋ wùìyaim nyàŋ, nɔ̀iŋ zɔlɔ̀ sùà esaɓù kɛ̀, nìŋ yaà aŋ bàiŋbà wo Kanaà Jisɛ̀ sùà. Ke jii miɛ̀ŋ naàŋ mɔɔnɛ̀ŋ, sèè ka ɓɛìŋ sìngà ka wòò e kèì guùŋ nɛ mìŋ naiŋ wa woò lɛ, yèè ngèè è do nàŋ nɔ̀ŋ wèè kèì sìàŋ nyɛiŋ biɛ̀ sèè mìŋ nyɛnɛŋ yɛi.

² Yɛ̀mɛìŋ nyɛ̀iŋ bi diɛŋ, wèè anyùùŋ maŋ kpèè naanààŋ nyaŋ, aŋ yè nyaŋ tuwà mààŋ aŋ sùùŋ. Maŋ je nyiŋ tòmo màŋ naŋ yaà nɔŋ wèè aŋ jàà aŋ dàwi nyiŋ maŋ keì keekèè e nyaàiŋ dè nyuùŋ jàà kpùa.

³ Kɛɛ yàwi nàŋ yaà anyuùŋ jàà kpùa kɛnɛ nyàŋ, esaɓù kɛ̀ è zoolàìŋ Dayà e yìwìà e gààŋ Jìnàŋ Nɛɛmaàŋ sùà, yèè è gèìŋ zɔlɔ̀ maŋ nyiiŋ gèe wi màŋ sùà, nààŋ è yààìŋ aŋ bàwibà wo Jisɛ̀ Kulaì sùà. E fèiŋ sìà màŋ jii tùlia wi màŋ kòɓɛ̀ mànɛ̀ŋ maŋ è nyɛ̀nɛ̀ìŋ màŋ kpùnaŋ wi màŋ sùà maŋ.

⁴ Kà weè ɓɛ̀nɛ̀ŋ sìà ke jii tùlia miɛ̀ŋ koɓɛ̀ maŋ langi mààŋ miiŋ ke kpùnaŋ miɛ̀ŋ sùà. Sèè nyɛ̀iŋ nààŋ bà guùŋ gbiŋ maŋ gongà kɛ̀ wò kuwa esaɓù wèè wo kɛ̀ɛ̀nɛ̀ŋ jii tùlia koɓɛ̀ manɛ̀ŋ maŋ wò nyiniàŋ ke kpùnauŋ nɛɛ̀ŋ maŋ, kɛ̀ mìŋ kuwa ngèè esaɓù zimgbe wèè ka yɛi gongò miàŋ pɛɛ.

⁵ Mìŋ yaà wa maŋ ɗɔ̀ɔ̀ nɔɔnɔŋ le taai nààŋ àŋ naim wa jàà kpùa. Anyuùŋ kòmaim nyàŋ àŋ yaà wa anyùùŋ fùɔ̀ŋ Ezɔ̀ɛ̀ɔ, e yìwìà e zìì Bɛ̀njìmaiŋ nɛ̀ sùà, yèè mìŋ kuwa maŋ sɛ̀ìŋ aŋ Hiɓulù nyuuŋ. Nààŋ mìŋ yaà wa wo Fɛlosiì lɛ, mìŋ naŋ wa jɔ̀ɔ̀lɔ̀ maŋ Sàwà Dayà maŋ gbiŋ dìì.

⁶ E wànàŋ zimgbe yààìm wa wèè ka nìmìlà ke gbòò anyuùŋ hààwe nyàŋ. Nààŋ nɔŋ wo nyùùŋ naŋ ɓɛ̀nɛ̀ŋ nɔ̀ŋ wo nyùùŋ tɔ̀ɔ̀nyaàŋ nààŋ wò jɔɔlɔ̀ maŋ keì maŋ wo Dayà naŋ woò maŋ ke Sàwàa sùà lɛ, miŋ gò wa nyɛ̀nɛ̀ŋ è keì naanààŋ.

⁷ Kɛɛ maŋ keì miiŋ maŋ gbiŋ mìŋ naŋ weè ɓɛ̀nɛ̀ŋ kpɛ̀nɛŋ wèè maŋ nɔ̀ŋ maŋ kɛnɛ ko nɛ̀ɛ̀ŋ miìŋ maŋ, mìŋ naŋ miŋ ɓemè wèè maŋ nɔ̀ŋ maŋ keì kpàna e nyaàiŋ dè wo Jisɛ̀ Kulaì.

⁸ E fè nɔŋ mànɛ̀ŋ miiŋ. Mìŋ naŋ ɓèmè manɛ̀ŋ maŋ gbiŋ maŋ nɔ̀ŋ manɛ̀ŋ foo wèè esàɓù e yèɛ kuwa e sɛmɛmaŋ gbee lɛ̀, e jiikɛ̀ɛɛ̀ e nyaàiŋ dè wo Kana miɔ̀ŋ Jisɛ̀ Kulaì. Wèè e saɓùuŋ nɛ̀ mìŋ gò manɛ̀ŋ maŋ gbiŋ. Mìŋ naŋ miŋ ɓemè wèè maŋ nɔ̀ŋ maŋ dɛɛ, wèè kɛ̀ mìŋ naŋ ɓɛ̀nɛ̀ŋ kɛ̀ɛ̀nɛ̀ŋ wo Jisɛ̀ Kulaì wo nɔ̀ŋ e sɛmɛmaŋ mɛ̀,

⁹ yèè wèè ka jàànè miàŋ bi koɓɛ̀ Jisɛ̀ Kulaìi. Miŋ kuwà ɓɛìŋ è tɔ̀ɔ̀nyààŋ miàŋ bi, e yèɛ nafàìm sèè mìŋ jɔɔlɔ̀ maŋ Sàwà maŋ dìì lɛ. E yèɛ mìŋ kuwa naàŋ lɛ nàŋ yaà, wo Dayà wòim jàà kùàŋ dìì wèè ka nɔ̀ŋ wo nyùùŋ tɔ̀ɔ̀nyaàŋ, e tɔ̀ɔ̀nyaàaŋ yewe wo Dayà sìwè yèè e nyaàiŋ naŋ dè e hààwe lɛ̀.

¹⁰ E yèɛ gbiŋ mìŋ manaŋ lɛ̀ nàŋ yaà, wèè ka nyìmàŋ wo Jisɛ̀ Kulaì, yèè e gààaŋ nauŋ gè e fàaà dìì wɔŋ nyiiŋ gèe sùà lɛ. Mìŋ manaŋ ka nɔ̀ŋ wo bàimbà wèè e keì nyìngaà wò naŋ kùwò, yèè e fàa wò naŋ kɔ̀ dìì lɛ,

¹¹ wèè kɛ̀ ke jii tùlia sùà, wo Dayà doim nàŋ gè e fàaà dìì wɔŋ nyiiŋ gèeɔ̀ sùà miàŋ pɛɛ.

Duàŋ muŋ haì ko dìaì

¹² Miŋ gò woò mìàŋ kà naàŋ kpɛ̀ɛ̀yɛ̀ nyɛ̀nɛ̀ŋ è yèɛ mìŋ manàŋ kà nyɛ̀nɛ̀ŋ lɛ ɔ̀ɔ̀ wèè ka nɔ̀ŋ wò nyuùŋ zɛ̀nɛŋ. Kòò mìŋ yaà kààmè ɗewe wèè ka ɓùlà e kìlà ka yɛ̀mɛ̀ e jìwààjɛ̀wɛ̀ɛ e nyaàiŋ dè e yèɛ wo Jisɛ̀ Kulaì naŋ ɓùlò nààŋ wò naim hìɛ̀ŋ koɓɛ̀ wuŋ biì lɛ.

¹³ Nyɛ̀iŋ nààŋ wùìyaim nyàŋ, miŋ gò haawè kɛ̀ kà niŋ naàŋ ɓùlà tɛ. Kɛɛ e kèì guùŋ mìŋ yaà nyinie, tiŋ nàŋ yaà wèè ka nyɛ̀ɛ̀nɛ̀ŋ e kèè e yèɛ yààìm ko jɛ̀wɛ̀ lɛ, yèè ka nyɛ̀nɛ̀ŋ e tɛ̀ɛ̀tɛ̀ɛ̀ gbiŋ mìŋ naŋ ɓɛ̀nɛ̀ŋ nyɛ̀nɛŋ lɛ̀ wèè ka hàì koɓɛ̀ e yèɛ yààìm ko feìŋ lɛ.

¹⁴ Weètii mìŋ duɔŋ ka kà e tèèngà ko dìà dùaàŋ, wèè ka ɓùlà ka yɛ̀mɛ̀ e jìwààjɛ̀wɛ̀, tiiŋ zà nàŋ yaà e nyàànè Dayàa e yìwìà wo Jisɛ̀ Kulaì sùà wèè koɓɛ̀ wɔŋ nyiiŋ gèe ko àìjɛnɛ̀ŋ.

¹⁵ Yàwi nààŋ gbiŋ naiŋ kamàìŋ maŋ nyiiŋ gèe wi màŋ sùà nààŋ è yààìŋ anyuùŋ hààwe nyàŋ, kuwa eiŋ kɛ̀ɛ̀nɛ̀ŋ e gòngo mààŋ tɛɛ̀. Kɛɛ sèè nyɛ̀iŋ nààŋ bà guùŋ kɛɛnɛ̀ŋ e gòngo joo bà, wo Dayà do niŋ nàŋ nyɛ̀nɛ̀ŋ e nɔ̀ŋ janjai ko nɛ̀ɛ̀ŋ muìŋ.

¹⁶ E ɗewe gbiŋ è do nàŋ nɔ̀ŋ, kùùnò wiìŋ kà ko feìŋ e nyaàiŋ dè maŋ kpèè guùŋ miiŋ è naiŋ wa gbeè maŋ e jèèsùà e hàì nàaŋ.

¹⁷ Nyɛ̀iŋ nààŋ wùìyaim nyàŋ, mìŋ manaŋ naŋ dè e tɔ̀ɔ̀màŋseì mɛ̀ maŋjɛ̀wɛ maŋ nyiiŋ gèeiŋ màŋ sùà. Deìŋ e tɔ̀ɔ̀màŋsèì anyùùŋ nyaŋ naŋ wa nyɛ̀nɛ̀ŋ maŋ kèì tɔ̀ɔ̀nyaàŋ maŋ è naiŋ wa jàà e ɓula e weèiŋ lɛ̀.

¹⁸ Kàiŋ tɛɛ̀ woò e teenga zimgbe, yèè mìŋ yààìŋ niìŋ ɓɛìŋ woo e sɔ̀ngɔ̀ kà weè ɓɛ̀nɛ̀ŋ gòla. Anyuùŋ zimgbe kòò àŋ yaào aŋ yè nyaŋ esàɓù maŋ keì nyɛ̀nɛŋ nyiŋ màŋ maŋ nyiiŋ gèe nyiŋ màŋ sùà, nyɛnɛŋ aŋ kìlà aŋ joo nyiŋ e nyaàiŋ dè e fà Jisɛ̀ Kulaì lɛ wɔŋ vànèkpaa diɛŋ lɛ̀.

¹⁹ Àŋ do nàŋ kɔ̀ ko jàhamaŋ, esaɓù kɛ̀ maŋ keì nyɛ̀nɛŋ nyiŋ màŋ maŋ kpùnaŋ nyiŋ màŋ sùà nàŋ yaà aŋ dayà nyiŋ nyàŋ. Àŋ joowà nyiŋ bi e sangè nyiŋ nɛ̀ sùà, nààŋ àŋ gongà nɔŋ e kèè manɛ̀ŋ maŋ e ɗuunyaŋ lɛɛ̀ sùà.

²⁰ Kɛɛ yàwi, è yààìŋ anyùùŋ ko àìjɛnɛ̀ŋ, yèè è fòlòìŋ wo Nyuùŋ Jòèye wiɔ̀, wo Kanaà Jisɛ̀ Kulaì, e wànàŋ gbee sùà wèè wo hnàŋ e yìwìà ko àìjɛnɛ̀ŋ.

²¹ Wò do nàŋ kìlè maŋ kpùnàŋ zɔ̀kpɔ̀ wi màŋ, wo miŋ nyɛ̀nɛ̀ŋ maŋ nɔ̀ŋ mààŋ e ɗeweɛ̀ ke kpùnàŋ e jòòwò gaàŋ gbeeuŋ nɛɛ̀ŋ yaà lɛ. Wò do nàŋ tòòmò e gààaŋ wò kuwa lɛ̀ wo hìàŋ manɛ̀ŋ maŋ gbiŋ e kanauŋ nɛ̀ dìì.