Fèle 2 - WƆŊ FƐ̀Ì EBÒ SÌÀŊ DAYÀA

E ɗeweɛ̀ wo Jisɛ̀ Kulaì naŋ jɔɔlɔ̀ lɛ yaà e gaàuŋ nɛ̀

¹ Maŋ nyiiŋ gèeiŋ màŋ wo Jisɛ̀ Kulaì toomàŋ sùà wo nyɛ̀nɛ̀ŋ naŋ kɛ̀ɛ̀nɛ̀ŋ maŋ jii nyingè, yèè e mànauŋ nɛ̀ nyɛnɛŋ naŋ kɛ̀ɛ̀nɛ̀ŋ jii fàa. Wo Jìnàŋ nɛɛmaàŋ nyɛ̀nɛ̀ìŋ naŋ nɔ̀ŋ koɓɛ̀ guùŋ ke gbòò anyuùŋ hààwe nyàŋ sùà, e kìlà naŋ kɛ̀ɛ̀nɛ̀ŋ gòngo yèè ke nyowo wèè aŋ dàwiiŋ nyàŋ.

² Mìŋ yààìŋ daawe, wèè naim nyɛ̀nɛ̀ŋ ka kɛ̀ɛ̀nɛ̀ŋ zɔlɔ̀ zimgbe. Kɛ̀ɛ̀nɛìŋ gòngo, tɔ̀ɔìŋ e mànaŋ, yèè niŋ nɔ̀ŋ ke gbòò guùŋ e kìlà niŋ kɛɛnɛ̀ŋ ke jìì guùŋ.

³ Ɓɔ̀ nìŋ gè lè koo ɔ̀ɔ̀ naŋ ɓèmè nyɛ̀iŋ bi gbee. Dèèyeìŋ nyɛ̀iŋ bi yèè niŋ ɓemè aŋ wùìyaiŋ nyàŋ aŋ nɔ̀ŋ anyùùŋ sɛmɛmaŋ e nìàŋ nyɛ̀iŋ bi.

⁴ Kɛ̀ɛ̀nɛìŋ gòngo wèè aŋ dàwiiŋ nyàŋ, kɛɛ ɓɔ̀ è nɔ̀ŋ nɔŋ wèè nyɛ̀iŋ bi.

⁵ Kɛ̀ɛ̀nɛìŋ è gòngò guùŋ nɛ wo Jisɛ̀ Kulaì kuwa lɛ̀.

⁶ Wò naŋ tèènè Dayà e teenga gbiŋ, kɛɛ wo gò wa ɓèmè wuŋ bi màŋ gàaŋ gàaŋ wèè yaà wò Dayà aŋ seenè.

⁷ E nɛ̀ɛŋ nyɛ̀nɛ̀ŋ tɛɛ̀ nɔ̀ŋ yɛi lɛ̀, e yìwìà e mànàŋ wuŋ biɛ̀ sùà, wò naŋ wa kìɛ̀ŋ ke kpùnauŋ nɛɛ̀ŋ gbiŋ koɓɛ̀ Dayài, yèè wò naŋ ɓèmè wuŋ bi wèè wo nɔ̀ŋ wo ɓɔìjɔ̀à. Wò naŋ ɓèmè wɔŋ kɔ̀ɔ̀ nyuùŋkpùuŋ, yèè wò naŋ nɔ̀ŋ wo nyuùŋkpùuŋ mààŋ yàwi bi.

⁸ Wo Jisɛ̀ Kulaì naŋ wa dèèyè wuŋ bi yèè wò naŋ kààìŋ ke dòmàŋ ɓɛ̀ɛ̀jàa diɛŋ wo hàì koɓɛ̀ e fàa, e fàauŋ nɛ̀ wɔŋ vànèkpaaà diɛŋ.

⁹ Wèè esaɓù lɛɛ̀, wo Dayà nauŋ kìɛ̀ŋ e jòòwo gbee, yèè wò nauŋ kìɛ̀ŋ e deè gbee e yèɛ naŋ nìè e dèè ɗewe gbiŋ lɛ̀.

¹⁰ Weètii, e yìwìà ɓɛ̀ɛ̀jàa gbee e nyaàiŋ dè e dèè Jisɛ̀ɛ, anyùùŋ nyaŋ gbiŋ ko àìjɛnɛ̀ŋ, e ɗuunyaàŋ, yèè e dììɛ dìì, do nàŋ dè maŋ gɛ̀ɛ̀nìŋ nyiŋ màŋ dìì ko fɛɛ̀fenùuŋ,

¹¹ yèè aŋ gbiŋ do nàŋ woò nyààŋ wo Jisɛ̀ Kulaì yaà wo Kana, koɓɛ̀ e jòòwò Dayàa wo Dèdaà.

Mɛ̀ɛìŋ mààŋ e gbolòùŋ

¹² Weètii nyɛ̀iŋ nààŋ wùìyaim nyàŋ, nààŋ nìŋ naim wa jɔ̀ɔ̀lɔ̀ dìì e teengaà gbiŋ mìŋ yaà wa ko nɛ̀ɛ̀iŋ niìŋ lɛ, è yaà ngèè pɛɛ naàŋ tɛ̀ɛ̀ wèè naim jɔ̀ɔ̀lɔ̀ dìì nààŋ miŋ fèìŋ ɓɛìŋ è tɛɛ lɛ̀. Weètii sìaìŋ ke di e kìlà niŋ tomo nyìnga e nyaàiŋ dè e jòèyeiŋ nɛ̀, wèè niŋ nyìmàŋ kɛ̀ kiìŋ è naŋ fasàì wèè naŋ wa nàwèè yɛ̀mɛ̀ e jòèye,

¹³ esaɓù kɛ̀ wo Dayà kòò wò yààìŋ tòòmò sùà, wèè woiŋ nyɛ̀nɛ̀ŋ naŋ nyimèè yèè naŋ ɓɛnɛ̀ŋ wèè nauŋ jɔ̀ɔ̀lɔ̀ dìì.

¹⁴ Ɓɔ̀ nìŋ gulià ɗìòsùà ɔ̀ɔ̀ nàŋ kpàànè kpàànè è fèemàŋ wèè è yèɛ gbiŋ nìŋ do nàŋ nyɛ̀nɛ̀ŋ lɛ,

¹⁵ wèè kɛ̀ nìŋ naŋ ɓɛ̀nɛ̀ŋ nɔ̀ŋ aŋ jɔ̀à gò kɛ̀ɛ̀nɛ̀ŋ tɔ̀mɛ nyàŋ, aŋ yè nyaŋ e keì gò jeè nyaŋ wèè wo Dayà. Nìŋ joà anyùùŋ e tɛɛ e ɗuunyaàŋ aŋ yè nyaŋ naŋ dìè kàaɓì yaà maŋ keì naanààŋ. Kàmeìŋ ɗewe niŋ mɛ̀ɛ̀ŋ mààŋ e gbòlòùŋ maŋ ɗu ke nyiliɛ̀,

¹⁶ nààŋ nìŋ kiɛ̀ŋ nyiìŋ ke mìè gbìàŋ nyiiŋ gèeɔ̀. Sèè nìŋ nyɛnɛŋ yɛi, e dɛ̀ɛ̀kɛ doim nàŋ nɔ̀ŋ e weèiŋ ke ɗɔɔɛ̀ wo Jisɛ̀ Kulaì do wa nàwèè nàŋ kɛ̀ɛ̀ maŋjɛ̀wɛ lɛ̀, esaɓù è do nàŋ tɔɔ̀ kɛ̀ ke di sìa miɛ̀ŋ yaà e tòmoɛ̀ mìŋ naŋ nyɛ̀nɛ̀ŋ lɛ, e gò nɔ̀ŋ wèè foo.

¹⁷ Maŋ sɛnìim màŋ wɛ̀i ɓɛ̀nɛ̀ŋ nɔ̀ŋ wùaŋ miŋ mààŋ e nɛ̀ŋ kìɛŋ manɛ̀ŋ saaà maŋ diɛŋ e nyaàiŋ dè e hààweiŋ nɛ̀ koɓɛ̀ Dayài. Sèè è nɔ̀ŋ yɛi, ke jii naim fɔ̀ wèè ka nɔ̀ŋ wo bàimbà e tòmouŋ nɛ̀ sùà, yèè nyɛ̀iŋ pɛɛ naŋ nɔ̀ŋ aŋ bàiŋbà zɔlɔ̀ gèe mɛ̀ sùà.

¹⁸ E ɗèwè guùŋ bi sùà, nyɛ̀iŋ pɛɛ nìŋ kuwa naŋ nɔ̀ŋ e zɔlɔ̀ sùà, yèè miàŋ pɛɛ ka nɔ̀ŋ wo bàimbà e zɔlɔ̀ gèiŋ nɛ̀ sùà.

Wo Timetè yaà wo Ɛ̀pàfoditɔ̀

¹⁹ Sèè è nɔ̀ŋ wèè esàɓù wo Kanaà Jisɛ̀, mìŋ kuwa ke jii tùlia kɛ̀ wò doim nàŋ gè nyààŋ diɛŋ wèè ka tùàŋ wo Timetè ko nɛ̀ɛ̀iŋ niìŋ e teenga kpuu sùà, wèè kɛ̀ mìŋ naŋ ɓɛ̀nɛ̀ŋ kɛ̀ɛ̀nɛ̀ŋ ke jii nyingè wèè ebò lɛ mìŋ naŋ kòmò lɛ e nyaàiŋ eiŋ dè.

²⁰ Wuŋ guùŋ nɔŋ nàŋ yaà wo bàimbà wèè e gòngo siaàŋ mìŋ kuwa yèè tɔɔɓaa wo yèɔ naŋ kpɛɛ̀ŋ weèiŋ wɔ̀.

²¹ Anyùùŋ nyaŋ gbiŋ gongà nɔŋ wèè e kèì sìàŋ nyiŋ bi lɛ̀, kɛɛ aŋ kuwà è gòngo è nyaàiŋ dè wò Jisɛ̀ Kulaì.

²² Kɛɛ nyɛ̀iŋ bi nàŋ nyìmàŋ e ɗeweɛ̀ wò naŋ tɔɔ̀ kɛ̀ wò yaà nyuùŋkpùuŋ kɛnɛ tùlìà jii lɛ̀. Wo Timetè naŋ nɔ̀ŋ mààŋ wo jɔ̀àfelaa ko nɛ̀ɛ̀ŋ miìŋ, yèè wòim tòòmò kùàŋ sùà wèè e ɓaayè Ebò Siaàŋ.

²³ Mìŋ kuwa ke jii tùlia wèè kauŋ tùàŋ ko nɛ̀ɛ̀iŋ nyiìŋ e teenga kpuu sùà, sèè mìŋ nyɛnɛŋ maŋ nɔnɔŋ tùaŋ mìŋ nyime kɛ̀ kiìŋ nàŋ do nàŋ kààìŋ ko nɛ̀ɛ̀ŋ miìŋ.

²⁴ Miàŋ bi mìŋ kuwa e hààweɛ̀ kɛ̀ wo Kanaà doim nàŋ gè nyààŋ diɛŋ wèè kaiŋ jaamè e teenga kpuu sùà.

²⁵ Mìŋ naŋ gongò kɛ̀ è yaà tɛ̀ɛ̀, wèè ka ɓɛìŋ tùàŋ wo wùìya wiɔ̀ yèè wo nyuùŋ tòmo dàwi miɔ̀ŋ Ɛ̀pàfoditɔ̀ ko nɛ̀ɛ̀iŋ niìŋ. Wò yaà wo ɓɔìjɔ̀à yèè wo nyùùŋ màŋjɛ̀wɛ̀ wèè wo Kanaà, wo yèɔ nìŋ naŋ tùɔ̀ŋ wèè woim wa kpuumàŋ wɔ.

²⁶ Wò yaà nyìnìè e wùànàŋ wèè woiŋ yɛmɛ̀, yèè wò kuwa ke jii mɔ̀ɔ̀nɛŋ esaɓù kɛ̀ nìŋ naŋ kòmò kɛ̀ wò yaà mɛ̀iŋ siinyɛŋ.

²⁷ E tɔɔɓaaà ngèè nàŋ yaà, wò naŋ mɛ̀iŋ sààŋ ebɛ̀ŋ fàa. Kɛɛ wo Dayà nauŋ yɛ̀mɛ̀ ke nyowo, e kpùlìà miàŋ bi pɛɛ, yèè wò naim gè ke nyòwò jii mɔ̀ɔ̀nɛŋ bi diɛŋ.

²⁸ Mìŋ yaà naàŋ e wànàŋ gbee sùà, wèè ka ɓɛìŋ tùàŋ wo Ɛ̀pàfoditɔ̀ ko nɛ̀ɛ̀iŋ niìŋ. Maŋ jiiŋ màŋ do nàŋ fɔ̀ sèè nìŋ yɛmɛ̀uŋ ɓɛìŋ, yèè ke jìì sɛ̀ɛ̀ nyowo miɛ̀ŋ dò nàŋ jùò.

²⁹ Jàa nùuŋ kùàŋ dìì e zɔlɔ̀ sùà, màànààŋ è naŋ tɛɛwɛ̀ wèè anyùùŋ nyaŋ naŋ hààwè Kanaà nyaŋ. Tɔ̀ɔìŋ anyùùŋ gbiŋ yaà mààŋ wuŋ nɛ̀ e ɓɛ̀ɛ̀jàa,

³⁰ esaɓù kɛ̀ wò naŋ joo tòloò wèè wo fà wèè e tòmò Dayàa wò yaà nyinie wèè wo Jisɛ̀ Kulaì lɛ, yèè wò naŋ jàà wɔŋ nyiiuŋ nɔɔ̀ŋ sɛɛ wèè woim kìɛ̀ŋ e kpùùmaàŋ nyɛ̀iŋ bi nìŋ fèim weè nàŋ kiɛ̀ŋ lɛ.