Ɛfesɔ̀ 6 - WƆŊ FƐ̀Ì EBÒ SÌÀŊ DAYÀA

Aŋ jɔ̀àkàiŋ nyàŋ yaà anyuùŋ kòmaŋ nyiŋ nyàŋ

¹ Jɔ̀àkàiŋ nyàŋ, nààŋ nìŋ yaà anyùùŋ màŋjɛ̀wɛ̀ Kanaà lɛ, jɔ̀ɔ̀lɔìŋ anyuùŋ kòmaiŋ nyàŋ dìì, tɛɛ̀ nàŋ yaà e keì tɔ̀ɔ̀nyaàŋ wèè naŋ nyɛ̀nɛ̀ŋ.

² “Fè wo dèda mɔɔ̀ŋ yaà wo yèye mɔɔ̀ŋ e ɓɛ̀ɛ̀jàa” kɛɛ̀ nàŋ yaà ke sàwà jiɛ̀jiɛ̀ɛ ke yèɛ àŋ naŋ hèè e ɗààhiì diɛŋ lɛ̀,

³ “e wèè kɛ̀ e keì gbiŋ nɔ̀ŋ tɛ̀ɛ̀ weèiŋ, e kìlà naŋ kùwìè nyiiŋ mùŋlaŋ e dììɛ diɛŋ.”

⁴ Nyɛ̀iŋ nààŋ nyuùŋ kòmaŋ nyàŋ, ɓɔ̀ nìŋ nyɛ̀nɛ̀ŋ àŋ jɔ̀àiŋ nyàŋ àŋ doiŋ tùù sìwè èsàɓù è ɗeweɛ̀ nìŋ gbòò nyiìŋ kɔɔ, ɔ̀ɔ̀ è ɗeweɛ̀ nìŋ kùwò nyiìŋ nɛ. Kɛɛ yɛ̀mɛ̀ nyiŋ diɛŋ tɛ̀ɛ̀ kaiŋ màànààŋ wo nyuùŋ kùwìè e hààwe wo Kanaà sùà nyɛnɛŋ lɛ̀, yèè niŋ tɔɔ̀ nyiŋ e nɛ̀ɛŋ àŋ kuwa wèè aŋ nyɛ̀nɛ̀ŋ lɛ.

Dièsɔa aŋ kɛ̀ɛ̀nɛ̀ŋ aŋ ɗo nyàŋ yaà aŋ ɗo nyàŋ kuwo aŋ dàwi nyiŋ

⁵ Ɗo nyàŋ, e kɔɔiŋ nɛ̀ jèlà kpàkpà e jùù sùà wèè niŋ jɔɔlɔ̀ aŋ kɛ̀ɛ̀nɛiŋ nyàŋ dìì, yèè niŋ nyinìàŋ niŋ ke jìì guùŋ, mààŋ nìŋ yaà nyinie wèè Jisɛ̀ Kulaì lɛ.

⁶ Nyɛ̀nɛìŋ tɛɛ̀ e teenga gbiŋ sùà wèè e fɔɔyɛ̀ nyiŋ jii, ɓɔ̀ è nɔ̀ŋ nɔŋ sèè àŋ nɔ̀ìŋ yɛɛmɛ. Nìŋ yaà aŋ ɗò Jisɛ̀ Kulaì, e wèètii, e nɛ̀ɛŋ gbiŋ wo Dayà manaŋ wèè naŋ nyɛ̀nɛ̀ŋ lɛ, nyìniaìŋ niŋ ke jiiiŋ nɛɛ̀ŋ gbiŋ.

⁷ Nyɛ̀nɛìŋ maŋ tòmoiŋ màŋ mààŋ aŋ ɗo e zɔlɔ̀ sùà, mààŋ nìŋ yaà toomo wèè Kanaà Jisɛ̀ Kulaì, e fè wèè ànyuùŋ kpùuŋ.

⁸ Jàaìŋ jii kɛ̀ wo Kanaà do wa nàwèè nàŋ pààwà wo nyùùŋ gbiŋ, nàŋ nɔ̀ŋ àŋ ɗo, niŋ gò nɔ̀ŋ àŋ ɗo, wèè e tòmò siaàŋ è naiŋ nyɛ̀nɛ̀ŋ lɛ.

⁹ Nyuùŋ kɛ̀ɛ̀nɛ̀ŋ ɗo nyàŋ, kùwaìŋ aŋ ɗoiŋ nyàŋ e ɓɛ̀ɛ̀jàa guùŋ nɛɛ̀ sùà, hùàneìŋ nyiŋ sìà e jùù. Jàaìŋ jii kɛ̀ nyɛ̀iŋ yèè aŋ ɗoiŋ nyàŋ, nìŋ kuwa wo kɛ̀ɛ̀nɛ̀ŋ guùŋ ko àìjɛnɛ̀ŋ, yèè wo fè nyangè.

Wo nyuùŋ hààweɔ̀ nɔ̀ŋ bànèbaneuŋ wèè wo sumìàŋ e keì naanààŋ

¹⁰ E gbio sùà, tòòyaìŋ e kɔɔ nyingèiŋ nɛ̀ nààŋ nìŋ yaà aŋ bàiŋbà Kanaà Jisɛ̀ Kulaì sùà esàɓù e gààŋ zùlù gbeeuŋ nɛ̀ sùà lɛ.

¹¹ Gɔ̀aìŋ manɛ̀ŋ sùmiaŋ màŋ gbiŋ wo Dayà naiŋ kiɛ̀ŋ maŋ, yèè niŋ dè gòlò jɛ̀wɛ̀ wèè e kààɓì Dɛwìɔ.

¹² E fèìŋ sùmiaŋ sùà màŋ kèìŋ yaà màŋ sɛ̀ìŋ, sɔɔ̀ aŋ jinàŋ naanààŋ nyaŋ e ɗùùnyàŋ àìjɛnɛ̀ɛŋ sùà, yaà anyuùŋ gbeegbèè nyiŋ nyàŋ, yèè maŋ gaàŋ gò kùwìè kò dìa nyiŋ màŋ e ɗùùnyàŋ ke nyìwì lɛɛ̀ dìì.

¹³ E wèètii, gɔ̀aìŋ naàŋ manɛ̀ŋ sùmiaŋ màŋ wo Dayà naiŋ kiɛ̀ŋ maŋ, wèè kɛ̀ sèè ke ɗɔ̀ɔ̀ ke gbòò aŋ jinàŋ naanààŋ nyaŋ sùmiaŋ kè haì, niŋ fè nyimèè wèè àŋ jooiŋ nyàŋ aiŋ ɓùlà, yèè sèè ke gùnɛɛ̀ŋ kè juo gbɛlɛiŋ, naŋ nɔŋ jèè e suà nyìngaiŋ.

¹⁴ Nɔ̀ɔìŋ e bànèbaneiŋ, ɓèmeìŋ e tɔɔɓaa gbài e nɔ̀ŋ mààŋ e tɛkì niŋ dèkà e tɛɛ kpaŋ, niŋ ɓemè e tɔ̀ɔ̀nyaàŋ nyɛ̀nɛŋ e nɔ̀ŋ mààŋ wɔŋ kaì fàà ɓɔwɔɔ̀ wo kààlò ɗùà gbuwo ke sɔɔ wɔ̀ŋ,

¹⁵ e wùànàŋ ke mìè gbìàŋ ebò siaàŋ nyaàiŋ dè ke jii fàa, e nɔ̀ŋ mààŋ maŋ ba gòlòiŋ màŋ.

¹⁶ E teenga gbiŋ sùà e hààweiŋ nɛ̀ e nɔ̀ŋ mààŋ wɔŋ kuu fàà ɓɔwɔɔ kìlìà maŋ gaaŋ kùàŋ feìŋ, kɛ̀ nìŋ do nàŋ ɓɛnɛ̀ŋ wèè naŋ kìlìà maŋ gaaŋ kɛ̀ɛ̀nɛ̀ŋ e hmɔ̀ɔ̀ŋ maŋ gbiŋ wo nyuùŋ nyɛ̀nɛ̀ŋ keì naanààaŋ doiŋ nàŋ tà maŋ kùàŋ feìŋ.

¹⁷ Jàaìŋ e jòèye kùàŋ dìì e nɔ̀ŋ mààŋ ke ɓɔ̀ɗì ɗùà, yèè ke mìè Dayà ke nɔ̀ŋ mààŋ e kòyà ɗùàa wo Jìnàŋ Nɛɛmaàŋ naiŋ kiɛ̀ŋ lɛ.

¹⁸ Nyìniaìŋ tɛɛ̀ gbiŋ e zòòlo sùà, nìŋ yaà dààwè Dayà wèè e kpùùmaŋ. Zòòloìŋ ke nyɛ̀nɛŋ gbiŋ sùà, nààŋ nɔŋ wo Jinàaŋ siàìŋ feìŋ nɛ. E wèè esaɓù lɛɛ̀, nɔ̀ɔìŋ fɛɛ̀ wòwò yèè e bɔ̀mɔ̀ŋ ɓɔ̀ è wùìyàiŋ, zòòloìŋ e teenga gbiŋ wèè anyùùŋ nɛɛmaŋ nyàŋ.

¹⁹ Yèè zòòloìŋ e weèim miàŋ pɛɛ, wèè Dayà kiɛ̀im ke miè gbìaŋ sèè mìŋ banaŋ bànàŋ wèè ke gbòà, e wèè ka gbùùyà ke jii nyingè, ka nyɛ̀nɛ̀ŋ aŋ nyìmàŋ ke gbùnuɛ̀ e nyaàiŋ dè ke mìè gbìàŋ ebò siaàŋ.

²⁰ Wo Dayà naim tùɔ̀ŋ wèè ka nyɛ̀nɛ̀ŋ e tòmo lɛɛ̀, yèè e wèè esaɓù lɛɛ̀, àŋ naim sìè maŋ jɔ̀ɔ̀ɔ ko sààŋ nyìwìi. E wèètii zòòloìŋ wèè miŋ kuwìè ke jii miŋ gbòà màànààŋ è kanaŋ lɛ̀.

E zùùmo dìàmaàŋ

²¹ Wo Tachikɔ̀ wo ɓɔìjɔ̀à yèè wùìya tùlìà jii wiɔ̀ e tòmò Kanaà Jisɛ̀ Kulaìɛ sùà doiŋ nàŋ gbàì jii nyaàiŋ dè e ɗeweɛ̀ e kɔɔ mɛ̀ yaà lɛ, yèè e nɛ̀ɛŋ mìŋ yaà nyinie lɛ̀.

²² Wèè esaɓù lɛɛ̀ mìŋ yàaùŋ tùaŋ sùà ko nɛ̀ɛ̀iŋ niìŋ wèè woiŋ gbàì jii e ɗeweɛ̀ yàwi nààŋ gbiŋ e kɔɔ wilɛ̀ yaà lɛ, yèè woiŋ nyììnè maŋ jii.

²³ Mìŋ zoolà wèè wo Dayà wo Dèdaà yaà wo Kanaà Jisɛ̀ Kulaì kiɛ̀ŋ aŋ wùìya kùwìè e hààwe nyàŋ gbiŋ ke jii fàa yèè e mànaŋ yaà e hààwe.

²⁴ Mìŋ zoolà wèè e tɛ̀ɛ̀tɛ̀ɛ̀ Dayàa e nɔ̀ŋ wèè anyùùŋ nyaŋ kinɛiŋ kuwa e mànaŋ gò jùà e wèè Kana wiɔ̀ Jisɛ̀ Kulaì nyaŋ.