Ɛfesɔ̀ 5 - WƆŊ FƐ̀Ì EBÒ SÌÀŊ DAYÀA

Sɔɔ̀ eiŋ nɔ̀ŋ gbolòùŋ nɛ sùà

¹ Nààŋ nìŋ yaà aŋ jɔ̀à è jìì Dayà lɛ, fɛ̀ɛìŋ niŋ nyɛ̀nɛ̀ŋ mààŋ Dayà nyɛnɛŋ lɛ̀.

² E mànaŋ kuwìè gààŋ maŋ nyiiiŋ màŋ diɛŋ, màànààŋ Jisɛ̀ Kulaì naŋ wi mɔ̀nɔ̀ŋ, yèè wò naŋ fè wɔŋ nyiiuŋ nɔɔ̀ŋ wèè wɔŋ nɔ̀ŋ e nɛ̀ŋ saaà e yèɛ naŋ fɔ̀ɔ̀yɛ̀ Dayà jii lɛ̀.

³ Nààŋ nìŋ yaà anyùùŋ nyaŋ wo Dayà kanaŋ nyàŋ, e fè tɔ̀ɔ̀nyaàŋ wèè è kèè màŋ kpèè hmɔŋtu nyɛ̀nɛŋ, yàà màŋ kpèè kùwà ninaŋ, yèè e wùànàŋ nɛ̀ŋ keekèè nyɛ̀nɛŋ e gbɛ̀ɛ̀ ànyùùŋ nɛɛmaŋ kɔɔ tòloò pɛɛ.

⁴ Gbeeiŋ ngèè wèè naŋ gbòà maŋ mìè gbòa naanààŋ, maŋ mìè gbòà sàngè kà tinàŋ gbiŋ, ɔ̀ɔ̀ maŋ mìè gbòa gò kùwìè jiikɛ̀ɛ, kɛɛ naŋ gè wo Dayà ke sɛ̀.

⁵ Kùwieìŋ e hààwe lɛɛ̀ kɛ̀ wo nyuùŋ nyɛ̀nɛ̀ŋ ke yɛɛ̀ naanààŋ gbiŋ, ɔ̀ɔ̀ wo nyuùŋ kùwìè ke jii kùwà ninaŋ, ɔ̀ɔ̀ wo nyùnùɔŋ naŋ nyɛ̀nɛ̀ŋ e wùànàŋ keekèè wèè e nɛ̀ŋ gbiŋ wɔ̀, e yaà nɔŋ mààŋ maŋ goò zòòlo, wo naàŋ wa nàwèè nàŋ kɛ̀ɛ̀nɛ̀ŋ è nɛ̀ŋ bà gbiŋ è gààŋ Kànà Jisɛ̀ Kulaìɛ yaà Dayàa dìì.

⁶ Ɓɔ̀ nìŋ nyimèè wèè wò nyùùŋ gbiŋ woiŋ zùùwò màŋ mìè gbòà foo kpàna. Esàɓù maŋ kèì guùŋ mɛɛ̀ŋ sùà, wo Dayà do nàŋ nyìnìè anyùùŋ nyaŋ fòuŋ kòmàŋ è mìè nyaŋ e wùàŋ.

⁷ E wèètii, e keì bà gbiŋ ɓɔ̀ è nɔ̀ŋ fèèmàŋ nyɛ̀iŋ nààŋ nyùùŋ mààŋ nyiiŋ.

⁸ Nyɛ̀iŋ bi nìŋ yaà wa ke nyiwì sùà, kɛɛ nààŋ wo Kanaà naŋ naàŋ nɔ̀ŋ wo kɛ̀ɛ̀nɛiŋ nɔɔ̀ŋ lɛ, nìŋ yaà e gbolòùŋ sùà.

⁹ E gbolòùŋ nɛ è tɔɔ̀ maŋ nɛ̀ŋ siaŋ e yìwìà maŋ nɛ̀ŋ siaŋ kà tinàŋ gbiŋ sùà, e tɔ̀ɔ̀nyaàŋ, yèè e keì sìàŋ.

¹⁰ Fɛ̀ɛìŋ niŋ gbeè e yèɛ fɔ̀ɔ̀yɛ̀ Dayà jii lɛ̀.

¹¹ Ɓɔ̀ nìŋ nɔ̀ŋ àŋ bàiŋbà kòɓɛ̀ màŋ keì naanààŋ maŋ anyùùŋ nyaŋ nyɛnɛŋ màŋ, maŋ keì maŋ kaaàŋ ke nyìwìɛ sùà maŋ. Kɛɛ fùlià miŋ ko gbolòùŋ.

¹² Tɔɔɓaa è yaà ngèè pɛɛ e kèì sàngè, wèè aŋ wòò manɛ̀ŋ maŋ àŋ nyɛnɛŋ ke gbùnu sùà lɛ.

¹³ Kɛɛ sèè manɛ̀ŋ maŋ gbiŋ àŋ nyɛnɛŋ màŋ folo ko gbolòùŋ, kɛ̀ àŋ yɛ̀mɛ̀ e nɔ̀ŋ kii kɛnɛ kɛ̀nɛ̀ nyiŋ nɛ̀ janjai.

¹⁴ E gbolòùŋ nɛ nàŋ tɔɔ̀ e nɛ̀ŋ gbiŋ janjai. E wèètii è yaà e wòò niŋ, “Kɛ̀ɛ̀yɛɛ̀, nyùùŋ maŋ jàwèɔ, e kìlà muŋ fòlà e fàa dìì. Kpeiŋ kɛ̀ wo Jisɛ̀ Kulaì nɔ̀ŋ e gbolòùŋ ko diɛum.”

¹⁵ E wèètii yɛ̀mɛìŋ maŋ nyiiŋ màŋ diɛŋ. Ɓɔ̀ nìŋ nɔ̀ŋ fuɔŋ mààŋ ànyuùŋ gò kùwìè jiikɛ̀ɛ, kɛɛ nɔ̀ɔìŋ fuɔ̀ŋ mààŋ anyuùŋ kùwìè kɛ̀ɛ̀jii. Tòòmoìŋ e teenga siaàŋ gbiŋ nìŋ kuwa lɛ̀ tɛ̀ɛ̀.

¹⁶ E wèètii, sèè e ɗewe gbiŋ naiŋ nɔ̀ŋ, tòòmoìŋ niŋ tɛ̀ɛ̀ kaiŋ, esaɓù kɛ̀ maŋ niìsìa mɛɛ̀ŋ maŋ fè tɛ̀ɛ̀.

¹⁷ Sèè è nɔ̀ŋ yɛi, kɛ̀ ɓɔ̀ nìŋ nɔ̀ŋ ànyuùŋ gò kɛ̀ɛ̀nɛ̀ŋ jiikɛ̀ɛ, kɛɛ fɛ̀ɛìŋ niŋ nyìmàŋ kɛ̀ kiìŋ wo Kanaà manaŋ wèè naŋ nyɛ̀nɛ̀ŋ.

¹⁸ Ɓɔ̀ nìŋ tìà maŋ tala muaŋ màŋ wèè maiŋ kùwà, e yèɛ kɛ̀ màŋ pɔɔ̀ìŋ nɔŋ lɛ̀, kɛɛ wo Jìnàŋ Nɛɛmaàŋ nɔ̀ìŋ sùà.

¹⁹ Sèè nìŋ deenàŋ koɓɛ̀ guùŋ, gbòaìŋ aŋ dàwiiŋ nyàŋ kɔɔ maŋ nùŋ Dayà tɛ̀nɛŋ sùà, yaà maŋ nùŋ nɛɛmaŋ wo jinàaŋ sùà, gbèèmeìŋ maŋ nùŋ Dayà tɛ̀nɛ̀ŋ koɓɛ̀ Kanaà, yèè e tɛ̀nɛŋ maŋ jiiiŋ màŋ sùà.

²⁰ Tòòmoìŋ e dèè Kanaà Jisɛ̀ Kulaìɛ e teenga gbiŋ niŋ gèe wo Dayà, wo Dèda wiɔ̀ sɛ̀ wèè e nɛ̀ŋ gbiŋ.

Wo jɔ̀ùŋ nèè yɛ̀ɛ̀ɔ yaà fanuuŋ nɔɔ̀ŋ

²¹ Jɔ̀ɔ̀lɔìŋ aŋ dàwiiŋ nyàŋ dìì esàɓù e dùàŋ Jisɛ̀ Kulaìɛ sùà.

²² Nyɛ̀iŋ nààŋ jɔ̀ùŋ nèè yɛ̀ɛ̀ nyaŋ, jɔ̀ɔ̀lɔìŋ aŋ faniŋ nyàŋ dìì màànààŋ nìŋ jɔɔlɔ̀ Kanaà dìì lɛ.

²³ Esaɓù kɛ̀ wo felaaà kuwa e gààŋ wo jàwè diɛŋ màànààŋ wo Jisɛ̀ Kulaì kuwa e gààŋ ke gbòò anyuùŋ hààwe nyàŋ diɛŋ lɛ̀. Yèè wo Jisɛ̀ Kulaì wuŋ bi nàŋ yaà wo Nyuùŋ Jòèyeɔ̀ wèè ke gbòò anyuùŋ hààwe nyàŋ, nyiŋ zà nàŋ yaà ke kpùnauŋ nɛɛ̀ŋ.

²⁴ E wèètii aŋ jɔ̀ùŋ nèè yɛ̀ɛ̀ nyaŋ sɔɔ̀ aŋ jɔ̀ɔ̀lɔ̀ àŋ faiŋ nyiŋ nyàŋ dìì màànààŋ nɔŋ ke gbòò anyuùŋ hààwe nyàŋ jɔɔlɔ̀ Jisɛ̀ Kulaì dìì lɛ.

²⁵ Felaa kùwìè jɔùŋ nyaŋ, mànaìŋ aŋ jawèiŋ nyàŋ màànààŋ wo Jisɛ̀ Kulaì naŋ mɔ̀nɔ̀ŋ ke gbòò anyuùŋ hààwe nyàŋ e jèèsùà wo fè wɔŋ nyiiuŋ nɔɔ̀ŋ e weè nyiŋ lɛ̀.

²⁶ Wò naŋ tɛɛ̀ nyɛ̀nɛ̀ŋ wèè wo tulìà ke gbòò anyuùŋ hààwe nyàŋ wo Dayà e yìwìà ke mìè gbòauŋ nɛɛ̀ŋ sùà, nààŋ wò naŋ nyiŋ gùùyè e wùìyè àŋ naŋ zɛ̀nɛ̀ŋ lɛ.

²⁷ Wò naŋ yɛi nyɛ̀nɛ̀ŋ wèè wo kɛɛnɛ̀ŋ ke gbòò anyuùŋ hààwe nyàŋ e jòòwo yèè e nɛɛmaŋ sùà, wèè ɓɔ̀ kè kuwìè lè fee ɔ̀ɔ̀ è tɔ̀mɛ bà gbiŋ.

²⁸ Aŋ felaa kùwìè jɔùŋ nyaŋ gbiŋ sɔɔ̀ aŋ kùwìè mànaŋ wèè àŋ jawè nyiŋ nyàŋ màànààŋ nɔ̀ŋ àŋ manaŋ màŋ kpùnaŋ nyiŋ màŋ lɛ. Wo felaaà manaŋ wo jàwè wɔ, wò manaŋ wuŋ bi.

²⁹ Yàwi nyɛɛ̀ŋ bà gbiŋ kòò è wùɔ̀ŋ wa màŋ kpùnaŋ wi màŋ. Kɛɛ, è gɔɔyɛ̀ìŋ maŋ kpùnaŋ wi màŋ eiŋ miŋ kùwà tɛ̀ɛ̀tɛ̀ɛ̀ kaiŋ, màànààŋ nɔŋ wo Jisɛ̀ Kulaì kuwo ke gbòò anyuùŋ hààwe nyàŋ lɛ,

³⁰ Esaɓù kɛ̀ è yààìŋ aŋ bàwibà ke kpùnauŋ nɛɛ̀ŋ sùà.

³¹ Nààŋ wɔŋ fɛ̀ì Dayàa naŋ woò wààŋ, “E wèè esaɓù lɛɛ̀, wo felaa do nàŋ jòòwo dèdauŋ nɔɔ̀ŋ yaà wo yèyeuŋ nɔɔ̀ŋ, yaà wo jawèuŋ nɔɔ̀ŋ nyiŋ tìyèe àŋ nɔ̀ŋ maŋ kèìŋ guùŋ.”

³² Ke gbùnù tɔ̀ɔ̀nyaàŋ kpɔtukpɔ̀tù naŋ fòlò ke mìè yɛɛ̀ sùà, ke yèɛ mìŋ naŋ nyìmè kɛ̀ kè sɔ̀à wo Jisɛ̀ Kulaì yaà ke gbòò anyuùŋ hààwe nyàŋ lɛ.

³³ Kɛɛ è yaà wèè nyɛ̀iŋ pɛɛ, wo fèlàà jɔùŋ gbiŋ sɔɔ̀ maŋ mànàŋ wò jawè mɔɔ̀ŋ màànààŋ nɔŋ mùŋ manaŋ muàŋ bi lɛ̀, yèè wo jɔ̀ùŋ felaa gbiŋ sɔɔ̀ wo kùwìè è ɓɛ̀ɛ̀jàa è wèè fanuuŋ nɔɔ̀ŋ.