Ɛfesɔ̀ 4 - WƆŊ FƐ̀Ì EBÒ SÌÀŊ DAYÀA

Dièsɔa è naiŋ nɔ̀ŋ ke kpùnàŋ guùŋ wo Jisɛ̀ Kulaì sùà

¹ Nààŋ miàim Pɔɔ̀, mìŋ yaà wo nyùùŋ màŋ keì wèè Kanaà lɛ, mìŋ yààìŋ pɔ̀wɔ sùà, nààŋ wo Dayà naiŋ nyààŋ wèè nauŋ haawè maŋ nyiiŋ gèeiŋ màŋ sùà lɛ.

² Dèèyeìŋ nyɛ̀iŋ bi e teenga gbiŋ sùà, niŋ kuwìè maŋ jii tɔumtɔ̀ùm, yèè niŋ nɔ̀ŋ anyuùŋ kùwìè e ɓɛ̀ɛ̀jàa. Tɔ̀ɔìŋ e mànaiŋ nɛ̀ ke jii siaŋ diɛŋ koɓɛ̀ aŋ wùìyaiŋ nyàŋ e hààweɛ̀ sùà.

³ Fɛ̀ɛìŋ, wèè wo Jìnàŋ Nɛɛmaàŋ gbìàŋ maŋ jiiiŋ màŋ koɓɛ̀ guùŋ. Nyɛ̀nɛìŋ tɛɛ̀ esàɓù ke jii fàaà naiŋ jàànè koɓɛ̀ guùŋ nɛ.

⁴ Ke kpùnaàŋ kè yaà kè guùŋ, wo Jinàaŋ yaà wò guùŋ màànààŋ nɔŋ wo Dayà naiŋ wa kìɛ̀ŋ ke jìì tùlìà guùŋ e teengaà wò naiŋ wa tàeɗùù wèè naŋ nɔ̀ŋ anyunùuŋ lɛ̀.

⁵ Wo Kanaà yaà wò guùŋ, e hààweɛ̀ è yaà è guùŋ, yèè e gùà kiiɛ̀ è yaà nɔŋ è guùŋ.

⁶ Wo Dayà yaà nɔŋ wò guùŋ yèè wo Dèdaà wèè nyuùŋkpùuŋ gbiŋ, wo yèɔ yaà wo Kana wèè nyuùŋkpùuŋ gbiŋ wɔ̀, wò toomàŋ aŋ gbiŋ sùà, yèè wò yaà aŋ gbiŋ sùà.

⁷ Wo Jisɛ̀ Kulaì naŋ gòònò maŋ keì sìàŋ titiuŋ màŋ ko nɛ̀ɛ̀ŋ wiì.

⁸ Wɔŋ fɛ̀ì Dayàa naŋ woò wààŋ, “E teengaà wò naŋ jòwò ko dìà ke nyiliɛ̀ lɛ, wò naŋ wa kɔ̀ɔ̀ aŋ ɗò ɗùà zimgbe, wò naŋ fè anyùùŋ maŋ kìɛŋ.”

⁹ Kpeiŋ nɛ̀, ke mìè gbòaà naŋ woò wààŋ, “wò naŋ jòwò,” kiìŋ nàŋ yaà e fàsai nyiŋ nɛ̀? E fasàì nyiŋ nɛ̀ nàŋ yaà kɛ̀ wo Jisɛ̀ Kulaì naŋ dèyè ɗuunyaŋ wo hàì ko nyùùm sɔ̀.

¹⁰ Yèè è naŋ ɓɛìŋ fasàì kɛ̀ wo nyùnɔ̀ɔŋ nɔŋ naŋ wa dèyè wɔ, wo nyùùŋ guùŋ bi nɔŋ naŋ wa jòwò ke nyiliɛ̀ dìmɛ̀ wèè e fɛɛ̀uŋ kpɛ̀lɛ̀ manɛ̀ŋ bànè Dayà maŋ gbiŋ diɛŋ.

¹¹ Yèè wuŋ naŋ “fè anyùùŋ maŋ kìɛŋ.” Wò naŋ tà aŋ bà nyiŋ ke ɗùù wèè aŋ nɔ̀ŋ aŋ keela tàeɗùù, aŋ bà nyiŋ wèè aŋ nɔ̀ŋ aŋ wɛ̀ijì, aŋ bà nyiŋ nɔ̀ŋ anyuùŋ fè ke mìè seì wèè Dayà, aŋ bà nyiŋ nɔ̀ŋ anyuùŋ gbòà ke mìè Dayà, yèè aŋ bà nyiŋ nɔ̀ŋ aŋ kààmɔɔŋ.

¹² Wò naŋ tɛɛ̀ nyɛ̀nɛ̀ŋ wèè wo bànèbànè anyùùŋ nɛɛmaŋ nyàŋ gbiŋ wèè e tòmò Dayàa nyɛ̀nɛŋ, e wèè aŋ nyɛ̀nɛ̀ŋ anyùùŋ màŋjɛ̀wɛ̀ Jisɛ̀ Kulaì nyaŋ aŋ kɛɛnɛ̀ŋ gààŋ ke kpùnàŋ guùŋ sùà.

¹³ Yèè e wèètii, yàwi nààŋ gbiŋ doiŋ nàŋ hnè ɓɛ̀ guùŋ, koɓɛ̀ e mìèsùàguùŋ nɛ e hààwe wilɛ̀ sùà, yèè e jiikɛ̀ɛ wilɛ̀ sùà nyaàiŋ dè wo Jɔ̀àfèlàà Dayàa, è doiŋ nàŋ nɔ̀ŋ anyuùŋ kàmaiŋ màànààŋ nɔŋ wo Jisɛ̀ Kulaì yaà lɛ, yèè è doiŋ nàŋ nɔ̀ŋ mààŋ wuŋ bi.

¹⁴ Kpeiŋ ɓɔ̀ è tomoiŋ ɓɛìŋ mààŋ àŋ jɔ̀à kaiŋ, ɓɔ̀ è nyimèèiŋ wèè ànyuùŋ tòa aŋ wi kaaɓì màŋ kàà tòa nyiŋ màŋ sùà, màŋ yè maŋ yaà mààŋ wɔŋ dùfòìɔ, duladùlà wì fàà maŋ gbiŋ wɔ̀ŋ.

¹⁵ Kɛɛ gbàì wiìŋ tɔ̀ɔ̀nyaàŋ e mànaŋ sùà, kɛ̀ è doiŋ nàŋ dɛɛ̀ maŋ dòmaŋ nyaaŋ màŋ gbiŋ sùà koɓɛ̀ Jisɛ̀ Kulaìi, wo yèɔ yaà wo ɓɛ̀èɗìɔ wɔ̀.

¹⁶ E yìwìà e gaàuŋ nɛ̀ dìì, manɛ̀ŋ è kɔ̀ɔ̀ ke kpùnaàŋ gbiŋ màŋ naŋ ɓɛ̀ɛ̀nɛ̀ŋ koɓɛ̀ guùŋ. Yèè maŋ sunosuno màŋ wo Jisɛ̀ Kulaì naŋ fè ke kpùnaàŋ sùà maŋ, naŋ jàànè ke kpùnaàŋ gbiŋ koɓɛ̀ guùŋ. Wèètii sèè e nɛ̀ŋ è kɔ̀ɔ̀ ke kpùnaàŋ bà gbiŋ nyɛnɛŋ e tòmo nyiŋ nɛ̀ nààŋ è kanaŋ lɛ̀, ke kpùnaàŋ gbiŋ kè dɛɛ̀ ke nyɛ̀nɛ̀ŋ kiŋ bi ke nyìngà sùà esàɓù e mànaŋ.

Wɔŋ nyiiŋ gèe jɛi wo Jisɛ̀ Kulaì sùà

¹⁷ Mìŋ yààìŋ fèe sùà e gòo e dèè Kanaà sùà, wèè naŋ hɔ̀ànè nɔ̀ŋ maŋ nyiiŋ gèeiŋ màŋ sùà mààŋ anyùùŋ nyaŋ fè àŋ Juùù nyaŋ, aŋ yè nyaŋ maŋ gòngo nyiŋ màŋ yaà maŋ foo miŋ lɛ̀.

¹⁸ Maŋ gòngo màŋ maŋ jii nyiŋ màŋ sùà naŋ kùwò nyìwì. Aŋ fè àŋ bà nyiŋ bà gbiŋ kòɓɛ̀ wɔ̀ŋ nyiiŋ gèeɔ̀ wò Dayà kiɛ̀ŋ wɔŋ, aŋ nyimààŋ è nɛ̀ŋ bà gbiŋ, yèè àŋ naŋ nyìngè e ɗì.

¹⁹ E sàngè gbiŋ fè nyiŋ wa ɓɛìŋ nyɛ̀nɛ̀ŋ wèè màŋ kpèè naanààŋ maŋ àŋ nyɛnɛŋ màŋ, àŋ gè nyiŋ bi nyààŋ diɛŋ wèè maŋ kpèè naanààŋ nyɛ̀nɛŋ, yèè àŋ nyɛnɛŋ maŋ keì kùwà ninaŋ gɛ̀wɛɛ̀ gbiŋ.

²⁰ Tii nààŋ niŋ gò gbeè wèè nyaàiŋ dè Jisɛ̀ Kulaì!

²¹ Nìŋ naŋ kòmò e kiiuŋ, yèè nààŋ nìŋ yaà anyùùŋ màŋjɛ̀wɛ̀uŋ nyàŋ lɛ, àŋ naiŋ kàà e tɔ̀ɔ̀nyaàaŋ è yaà wo Jisɛ̀ Kulaì sùà lɛ.

²² Àŋ naiŋ woò kɛ̀ maŋ ɗèwè e ɓàaɓàa màŋ nìŋ kuwa màŋ, doiŋ nàŋ pɔ̀ɔ̀pɔ̀ɔ̀ e wèètii gèeìŋ kùàŋ wɔŋ nyiiŋ gèe gɔuiŋ nɔɔ̀ŋ sùà, yàà maŋ kpèè naanààŋ wuŋ màŋ gbiŋ.

²³ Tɔ̀ wo Jìnàŋ Nɛɛmaàŋ vɔɔnɔ̀ŋ e ɗewe kiiɛ̀ nìŋ gongà lɛ,

²⁴ yèè wo nyɛ̀nɛ̀ŋ niŋ nɔ̀ŋ anyuùŋ jɛ̀ì. Wo Dayà naiŋ wa banè wèè naŋ nɔ̀ŋ mààŋ wuŋ, wèètii sɔɔ̀ naŋ nyɛ̀nɛ̀ŋ ke jiiuŋ nɛɛ̀ŋ fàa yèè naŋ nɔ̀ŋ anyùùŋ nɛɛmaŋ e tɔ̀ɔ̀nyaàŋ sùà.

²⁵ E wèètii, dàngeìŋ e tòaà, wo nyùùŋ gbiŋ sɔɔ̀ maŋ gbààì wo nyuùŋ hààwe dàwi mɔɔ̀ŋ e tɔ̀ɔ̀nyaàŋ, esaɓù kɛ̀ yàwi nààŋ gbiŋ è yààìŋ aŋ bàwibà Jisɛ̀ Kulaì sùà.

²⁶ Sèè mìŋ tuù, ɓɔ̀ nìŋ dangè è wuàiŋ nɛ̀ eiŋ gbìàŋ è jùumù sùà, yèè ɓɔ̀ nìŋ nɔ̀ŋ è tùùiŋ è gɔɛɛ̀ doò jùà fùùŋ.

²⁷ Ɓɔ̀ nìŋ kiɛ̀ŋ wò Dɛwìɔ è ɗewe bà gbiŋ.

²⁸ Sèè mùŋ nɔ̀ŋ wo nyuùŋ wùa, gè kùàŋ e kèè wùa sùà, muŋ tomo nyìnga wèè muŋ kàmè e nɛ̀ŋ wèè muàŋ bi e ɓɛ̀ɛ̀jàa sùà, e kìlà muŋ ɓɛnɛ̀ŋ wèè maŋ nyɛ̀nɛ̀ŋ e keì sìàŋ, koɓɛ̀ anyùùŋ nyaŋ kuwà è nɛ̀ŋ bà nyaŋ.

²⁹ Maŋ mìè gbòa naanààŋ ɓɔ̀ màŋ fòlàiŋ nyààŋ kòɓɛ̀ ànyuùŋ kpùuŋ dàwiiŋ nyàŋ, sɔɔ̀ maŋ yè maŋ kuwa e kpùùmaŋ, wèè maŋ nyɛ̀nɛ̀ŋ wo nyùùŋ nyìngà sùà e kìlà maŋ hìàŋ e nɛ̀ɛŋ wo nyùùŋ manaŋ lɛ̀, kɛ̀ e nɛ̀ɛŋ mùŋ woà lɛ è do nàŋ nɔ̀ŋ e keì sìàŋ koɓɛ̀ anyùùŋ nyaŋ komo e nɛ̀ɛŋ nìŋ woà lɛ.

³⁰ Yèè ɓɔ̀ mùŋ nyɛ̀nɛ̀ŋ wò Jìnàŋ Nɛ̀ɛ̀màŋ Dayàa kè nyowo douŋ nyɛ̀nɛ̀ŋ, esaɓù kɛ̀ wo Jìnàŋ Nɛɛmaŋ nàŋ yaà e feeɛ̀ yààùm kɔɔ sùà, e yèɛ naŋ tɔɔ̀ kɛ̀ wo Dayà nàŋ kànàùm lɛ. Wuŋ nàŋ yaà ke jii tùliaà kɛ̀ ke ɗɔɔ bà do wa nàwèè nàŋ hnè, wo Dayà woum joeyè wèè foo yèè wo fòum kùwìà màŋ jùumùum màŋ bà gbiŋ.

³¹ E wèètii gè kùàŋ e kèè e keì sìà jii sùà, ɓɔ̀ mùŋ wùàŋ nyùùŋ, dàngè e kèè tùu yèè e keì jèla. Ɓɔ̀ mùŋ kpiinyàŋ nyùùŋ, gbeeiŋ ngèè wèè maŋ dìɛ̀ŋ nyùùŋ, ɔ̀ɔ̀ maŋ keì miiŋ bà gbiŋ.

³² Kɛɛ nɔ̀ɔìŋ tɛ̀ɛ̀, yèè niŋ kuwìè maŋ jìì nyowo wèè aŋ dàwiiŋ nyàŋ niŋ juuyà anyùùŋ hakɛ̀ màànààŋ wo Dayà naiŋ jùùyè hakɛ̀ esàɓù Jisɛ̀ Kulaì sùà lɛ.