2Time 3 - WƆŊ FƐ̀Ì EBÒ SÌÀŊ DAYÀA

Maŋ ɗɔɔ dìàmaŋ màŋ

¹ Jàa jii kɛ̀ e keì nyìnga do wa nàwèè nàŋ nɔ̀ŋ maŋ ɗɔɔ dìàmaŋ màŋ sùà.

² Anyùùŋ do nɔŋ nàŋ mɔ̀nɔ̀ŋ nyiìŋ bi, aŋ mànàŋ nɛɛnɛŋ, aŋ ɓèmè nyiiŋ bi gbee, yèè maŋ nyaàŋ gbeegbèè gbòa. Àŋ do nàŋ gbòò maŋ mìè ɓɛ̀ɛ̀pɔ̀ɔ, aŋ naàŋ kɛ̀ɛ̀nɛ̀ŋ è ɓɛ̀ɛ̀jàa wèè ànyuùŋ kòmaŋ nyiŋ nyàŋ, aŋ nɔ̀ŋ anyuùŋ gò nyìmàŋ saɓù, yèè aŋ naàŋ nyìmè wo Dayà.

³ Àŋ do nàŋ kùwìè maŋ jii naanààŋ, aŋ nɔ̀ŋ anyuùŋ gò jùùyà ànyùùŋ hakɛ̀, aŋ fìèfìè aŋ dàwi, anyùùŋ ɗanga, yèè aŋ nììngè ànyùùŋ fɛ̀ɛ̀, e kìlà àŋ do nàŋ wùɔ̀ŋ keì sìàŋ.

⁴ Àŋ do nàŋ nɔ̀ŋ anyùùŋ kàaɓì, anyuùŋ gììyà keì kɛ̀ɛ̀ɛ, yèè aŋ ɓèmè nyiŋ bi gbee, e kìlà àŋ do nàŋ kɛ̀ɛ̀nɛ̀ŋ e mànàŋ gbana e nìàŋ e mànàŋ Dayàa.

⁵ Àŋ do nàŋ jàà e kèè Dayàa fɛ̀ɛ̀ sùà, kɛɛ aŋ gììyà e gaàŋ niŋ nɛ̀ maŋhɛɛ. Ɓɔ̀ mùŋ dè ànyùùŋ mààŋ nyiiŋ màŋjɛ̀wɛ.

⁶ Aŋ bà nyiŋ kɔ̀à maŋ sààŋ anyuùŋ joo dìì, wèè aŋ kùwie e gààŋ aŋ jɔ̀ùŋ kɛ̀ɛ̀nɛ̀ŋ zɔ̀kpɔ̀ nyaŋ diɛŋ wèè aŋ nyiŋ kàà e kàà kàaɓì nyiŋ nɛ̀ aŋ yè nyaŋ yaà aŋ ɗo maŋ jùùmù nyiŋ màŋ dìì yèè maŋ jùùmù bi nàŋ toomàŋ nyiìŋ wèè aŋ nyɛ̀nɛ̀ŋ maŋ keì naanààŋ zimgbe maŋ kpùnaŋ nyiŋ màŋ sùà.

⁷ Aŋ jɔ̀ùŋ nyaŋ kamàŋ ɗewe wèè aŋ gbeè kɛɛ aŋ fè ɓɛ̀nɛ̀ŋ hnàaŋ wèè aŋ nyìmàŋ è tɔ̀ɔ̀nyaàaŋ.

⁸ Màànààŋ nɔŋ wo Janìŋ yèè wo Jamɓùlù naŋ wa gììyè wo Mòòze maŋhɛɛ lɛ̀, yɛi nɔŋ anyùùŋ nyɛɛ̀ŋ gììyà e tɔ̀ɔ̀nyaàaŋ maŋhɛɛ, anyùùŋ nyaŋ maŋ jii nyiŋ màŋ fè toomo tɛ̀ɛ̀ yèè àŋ naŋ sooò e hààweɛ̀ sùà.

⁹ Aŋ naàŋ kɔ̀ koɓɛ̀ dii, e fèfoo anyùùŋ nyaŋ gbiŋ do nàŋ yɛ̀mɛ̀ e zùwo nyiŋ nɛ̀. Tii nàŋ yaà e yèɛ naŋ wa kààìŋ koɓɛ̀ Janìiŋ yaà wo Jamɓulù lɛ.

E go dìàmaàŋ

¹⁰ Mùŋ naŋ dè e kàa mɛ̀, ke kpèè miɛ̀ŋ, yèè esàɓù wɔŋ nyiiŋ gèe miɔ̀ŋ maŋjɛ̀wɛ, màŋ tùàŋ e hààwe mɛ̀, ke jii tɔumtɔ̀ùm miɛ̀ŋ, e mànàŋ mɛ̀, yèè ke jii nyìngè miɛ̀ŋ wèè e keì nyìnga kuwa mɛ̀ gbiŋ maŋ nɔnɔŋ.

¹¹ Màŋ nyìmàŋ maŋ keì nyìnga màŋ yaà e mɔ̀ɔ̀nɛɛ̀ŋ gbiŋ mìŋ naŋ kɔ̀ dìì ko Aŋtiɔ̀, ko Ìkɔniɔ̀ŋ, yaà ko Lesità maŋ, yèè maŋ keì mèè nyìnga màŋ naim kaaìŋ maŋ. Kɛɛ wo Kanaà naim joeyè woim gè màŋ gbiŋ sùà.

¹² Wo nyùnɔ̀ɔŋ gbiŋ manaŋ wèè wo nɔ̀ŋ wo nyùùŋ tɔ̀ɔ̀nyaàŋ yèè wo bàuŋbà wo Jisɛ̀ Kulaì sùà wɔ, wò do nàŋ kùwò e nìmìlà e yìwìà anyuùŋ joo sìwè.

¹³ Anyùùŋ maŋ kpèè naanààŋ nyaŋ aŋ yè nyaŋ manaŋ aŋ tɔɔ̀ kɛ̀ aŋ fè ànyùùŋ mààŋ nyiiŋ nyàŋ, maŋ kpèè naanààŋ nyiŋ màŋ naŋ nìè maŋ gɔu màŋ, yèè àŋ zuwà nyiìŋ bi yaà anyuùŋ joo.

¹⁴ E weèum, jèèe e tɔ̀ɔ̀nyaàaŋ àŋ naum wa kaà lɛ sùà, yèè muŋ sìà niŋ e hààwè tɔ̀ɔ̀nyaàŋ sùà. Màŋ nyìmàŋ ɓòò nyiŋ nàŋ yaà wa aŋ kààmɔɔiŋ nyàŋ,

¹⁵ yèè màŋ jàà jii kɛ̀ e gɔuo sùà, mùŋ yaà wa wo jɔ̀à, màŋ nyìmàŋ maŋ miè sìnga màŋ wɔŋ fɛ̀ì Dàyà sùà, wɔŋ yèɔ naum ɓɛ̀nɛ̀ŋ fè e jiikɛ̀ɛ naum ɓɛ̀nɛ̀ŋ jòèye yɛ̀, esàɓù e hààwe mɔ̀ɛ̀ wo Jisɛ̀ Kulaì sùà.

¹⁶ Maŋ mìè gbòa màŋ gbiŋ wɔŋ fɛ̀ì Dayàa sùà, màŋ yewe wo Dayà sìwè yèè màŋ yaà tɛ̀ɛ̀ wèè tòòmo, wèè e tɔ̀ɔ̀nyaàaŋ kàa, maŋ gè maŋ keì naanààŋ pɛɗì, maŋ dè nyùùŋ ke dòmaŋ siaŋ diɛŋ sèè wò nyɛnɛŋ keì ɓàa, yèè maŋ kàà nyùùŋ wo nɔ̀ŋ tɛ̀ɛ̀ wɔŋ nyììŋ gè e tɔ̀ɔ̀nyaàŋ sùà,

¹⁷ wèè kɛ̀ wo nyùnɔ̀ɔ̀ŋ naŋ hààwè Dayà wɔ, wo ɓɛnɛ̀ŋ yèè wo nyìmàŋ ɗèwè e keì sìàŋ ziì gbiŋ nyɛ̀nɛŋ.