2Time 2 - WƆŊ FƐ̀Ì EBÒ SÌÀŊ DAYÀA

Wo kààlòòɗùà jɔ̀ɔ̀lɔ wèè Jisɛ̀ Kulaì

¹ Muàŋ, jɔ̀àfelaa miɔ̀ŋ Timetè, nyìngà sùà e yìwìà e tɛ̀ɛ̀tɛ̀ɛ̀ è kànàìŋ nààŋ è yààìŋ aŋ bàwibà wo Jisɛ̀ Kulaì sùà lɛ.

² E yèɛ mùŋ naim kumìè mìŋ naŋ kaà ko fɛ̀ɛ̀fèìŋ aŋ seì zimgbe lɛ̀, kàà niŋ anyuùŋ tùlìà jii aŋ yè nyaŋ do nàŋ ɓɛnɛ̀ŋ wèè aŋ kàà anyuùŋ joo lɛ̀.

³ Kuwa e jeum keì nyìngaà, mààŋ wo kààlòòɗùà jɔ̀ɔ̀lɔ wèè wo Jisɛ̀ Kulaì.

⁴ Wo kààlòòɗùàa yaà ke di e tòmouŋ nɛ̀ diɛŋ wɔ̀, manaŋ wo kìɛ̀ŋ ke jii fàa koɓɛ̀ kaaloɔ̀ sìaùŋ feìŋ wɔ, weètii wo fè kpùlìà kè nyɛ̀nɛ̀ŋ nyiiŋ gèeuŋ nɔɔ̀ŋ kè jè ànyuùŋ nyaŋ fè àŋ kààlòòɗùà nyaŋ.

⁵ Wo nyùnɔ̀ɔŋ naŋ sie wèè wo dùàŋ wèè e jìwààjɛ̀wɛ̀ wɔ, wo fè ɓɛ̀nɛ̀ŋ ɓùlà è jìwààjɛ̀wɛ̀ sèè wo gò jɔ̀ɔ̀lɔ̀ maŋ sàwà maŋ dìì.

⁶ Wo nyuùŋ tòmò ɓùɔ naŋ nyɛ̀nɛ̀ŋ e tòmo nyìnga wɔ, wuŋ nàŋ kɛɛnɛ̀ŋ e nɛ̀ŋje jiɛ̀jiɛ̀ɛ àŋ goonàŋ e yìwìà ko ɓùi lɛ̀.

⁷ Gòngò wèè e yèɛ mìŋ yaà woo lɛ̀, e fèfoo, wo Kanaà do nàŋ nyɛ̀nɛ̀ŋ maŋ nyìmàŋ e gbiŋ.

⁸ Jaà wo Jisɛ̀ Kulaì jii, wo yèɔ wo Dayà naŋ wa gèe e fàaà dìì wɔ, wo yèɔ yaà wa jɔ̀ɛ̀jɔ̀ɛ̀ wèè Dèèwe wɔ̀, màànààŋ è yaà woo niŋ ke mìè gbìàŋ Ebò Siaàŋ mìŋ woà lɛ̀ sùà.

⁹ Esàɓù Ebò Siaàŋ mìŋ woà lɛ, mìŋ kuwo e keì nyìnga yèè aim sìà maŋ jɔ̀ɔ̀ɔ mààŋ wo nyuùŋ nyɛ̀nɛ̀ŋ e keì naanààŋ. Kɛɛ ke mìè Dayà ke fè màŋ jɔ̀ɔ̀ɔ sùà,

¹⁰ weètii mìŋ kɔ̀à maŋ keì nyìnga mɛɛ̀ŋ dìì, wèè esàɓù anyùùŋ Dayà nyaŋ wò naŋ tàeɗùù nyaŋ, wèè kɛ̀ nyiiŋ pɛɛ aŋ yɛmɛ̀ e jòèyeɛ̀ naŋ hnè esàɓù Jisɛ̀ Kulaì sùà lɛ, yèè e hìàŋ e jòòwo gò jùà.

¹¹ E keì woo lɛɛ̀ è yaà tɔ̀ɔ̀nyaàŋ, “Sèè yàwi nààŋ Jisɛ̀ Kulaì eiŋ fɔ̀ɔ̀yɛ̀ koɓɛ̀ guùŋ, wuŋ e kpùlìà yàwi nààŋ gbiŋ è doiŋ nàŋ nɔ̀ŋ wɔŋ nyiiŋ gèeɔ̀ sùà.

¹² Sèè è naiŋ jèè kɔ̀ɔ̀yɛ̀ keì nyìnga dìì, yàwiiŋ nyiŋ doiŋ nàŋ nɔ̀ŋ e kana kɛ̀ɛ̀uŋ nɛ̀ sùà. Sèè euŋ gììyà maŋhɛɛ, wò do wi nàŋ gììyè maŋhɛɛ.

¹³ Sèè è goiŋ kùwìè e hààwe, wò jeeyà wo nyuùŋ tùlìà jii nɔ̀ɔŋ, e fèfoo wo fè ɓɛ̀nɛ̀ŋ nɔ̀ŋ è kàaɓì sùà wèè wuŋ bi.”

Wo nyuùŋ tòmoɔ̀ wo Dayà naŋ jaa kùàŋ dìì wɔ

¹⁴ Dè maŋ jìì anyunùum nyàŋ koɓɛ̀ e keì wòo lɛɛ̀, yèè muŋ kiɛ̀ŋ nyiŋ e gòo nyìngàà sùà ko fɛ̀ɛ̀fèìŋ Dayài, wèè ɓɔ̀ àŋ sumiàŋ màŋ mìè gbòa. E nàfa bà gbiŋ fè miìŋ sùà, sɔɔ̀ nɔŋ maŋ pɔ̀ɔ̀pɔ̀ɔ̀ anyùùŋ nyaŋ kumiàŋ miìŋ nyaŋ.

¹⁵ Nyɛnɛ̀ŋ e tɛ̀ɛ̀tɛ̀ɛ̀ɛ gbiŋ mùŋ naŋ ɓɛ̀nɛ̀ŋ nyɛ̀nɛŋ lɛ̀ wèè wo Dayà jààum kùàŋ dìì, mààŋ wo nyuùŋ tòmoɔ̀ e sàngè fè wèè è tòmouŋ nɛ̀ wɔ, wo yèɔ kaà ke mìè gbìàŋ Dayàa e tɔ̀ɔ̀nyaàŋ sùà wɔ̀.

¹⁶ Gè kùàŋ maŋ mìè gbòà ɓɛ̀ɛ̀pɔ̀ɔ, yèè maŋ dì ɓùlà ɓàaɓàa sùà, maŋ yè maŋ nyɛnɛŋ anyùùŋ fè gbɛ̀ɛ̀ Dayà lɛ.

¹⁷ Maŋ kàa ziì mààŋ mɛɛ̀ŋ màŋ yaà mààŋ e nɛ̀ŋ jèla yìle, e yèɛ gbile e kèìŋ nɛ lɛ̀. Aŋ fèlàà tìyèe aŋ yè nyaŋ naŋ wa kàà e kàa lɛ nyaŋ nàŋ yaà wo Hèmɛnàè yaà wo Feletù.

¹⁸ Àŋ naŋ yèwè ke dòmàŋ tɔ̀ɔ̀nyaàaŋ diɛŋ, yèè àŋ yaà gɔ̀àà gɔ̀àà sùà maŋ hààwè anyuùŋ hààwe nyàŋ bà miŋ sùà, esaɓù kɛ̀ àŋ yaà wa woo nyààŋ wo Dayà ngèè naàŋ gè anyuùŋ fàa nyàŋ dìì.

¹⁹ Kɛɛ e kpèe nyìngàà sùàa wo Dayà naŋ heè lɛ, e fè ɓɛ̀nɛ̀ŋ mɛ̀ɛ̀mɛɛŋ, yèè e kpèe bi diɛŋ wò naŋ sìngìè maŋ fee mɛɛ̀ŋ, “Wo Kanaà Jisɛ̀ Kulaì nyìmàŋ anyùùŋ nyaŋ wò kanaŋ nyàŋ” yèè “Anyùùŋ nyaŋ woà nyààŋ àŋ yaà wèè wo Kanaà Jisɛ̀ Kulaì nyaŋ, sɔ̀ɔ̀ aŋ kɛ̀ɛ̀ maŋ kpèè naanààŋ nyɛ̀nɛŋ màŋjɛ̀wɛ.”

²⁰ Ke saaŋ gbee dìì kuŋ maŋ nɛ̀ŋfoo yèè maŋ jàgbà gɛ̀wɛɛ̀ màŋ nɔ̀ŋ. Àŋ naŋ bàànè maŋ bà miŋ e kaiŋ fua yèè e gòoò, aŋ bàànè maŋ bà miŋ maŋ kuù gɛ̀i yèè e ɓoo, maŋ bà miŋ màŋ yaà wèè maŋ keì titi, yèè maŋ gbànaŋ mɛɛ̀ŋ màŋ yaà wèè maŋ saɓù joo.

²¹ Anyùùŋ nyaŋ naŋ nyɛ̀nɛ̀ŋ nyiŋ bi naŋ zɛ̀nɛ̀ŋ esaɓù kɛ̀ àŋ fòlà maŋ keì naanààŋ mɛɛ̀ŋ gbiŋ sùà nyaŋ, àŋ do nyiŋ nàŋ toomò wèè maŋ saɓù titi, e fèfoo àŋ yaà e ɓula jàa nyiŋ, yèè wo Kana nyiŋ nɔɔ̀ŋ wò nyiŋ ɓɛ̀nɛ̀ŋ tòòmo, e kìlà àŋ yaà bànèbane nyiŋ wèè aŋ nyɛ̀nɛ̀ŋ e tòmo siaŋ gbiŋ.

²² Duàŋ maŋ keì maŋ tawà wo nyuùŋ bɔwɔɔ̀ ke jii sùà maŋ, fɛɛ̀ wèè e tɔ̀ɔ̀nyaàaŋ, e hààwe e mànaŋ, yèè ke jii fàa, nyɛiŋ nààŋ nyùùŋ nyaŋ kuwa maŋ jii sengèì nyaŋ niŋ dawè wo Kanaà Jisɛ̀ Kulaì wèè e kpùùmaŋ.

²³ Kɛɛ gè kùàŋ maŋhɛɛ gèe zùwo gò kùwìè jiikɛ̀ɛ maŋ kùàŋ sùà. Màŋ nyìmàŋ kɛ̀ ko jèè ɗì miŋ niìŋ è yaà e nyaàŋ tàaŋ.

²⁴ Nààŋ mùŋ yaà wo ɓɔ̀ìjɔ̀à wèè wo Kanaà Jisɛ̀ Kulaì lɛ, ɓɔ̀ mùŋ nyɛ̀nɛ̀ŋ è nyaàŋ tàaŋ. Mùŋ kuwa maŋ nɔ̀ŋ tɛ̀ɛ̀ koɓɛ̀ nyùùŋ gbiŋ, yèè maŋ nɔ̀ŋ wo kààmɔ̀ɔ̀ŋ ke jii tɔumtɔ̀ùm,

²⁵ ɓòò nàŋ yaà nyuùŋ tɔ̀ùmtɔ̀ùm jiiɔ̀ wèè wo dè wo joouŋ nɔɔ̀ŋ ke dòmaŋ diɛŋ sèè wò nyɛnɛŋ e keì ɓàa wɔ̀, è do nàŋ nɔ̀ŋ mààŋ kɛ̀ wo Dayàa naŋ nyiŋ kìɛ̀ŋ e ɗeweɛ̀ wèè aŋ fè maŋ tùwo naanààŋ nyiŋ maŋ jɛwɛ yèè aŋ hnàŋ koɓɛ̀ e tɔ̀ɔ̀nyaàaŋ.

²⁶ E jiikɛ̀ɛ do nyiŋ nàŋ dè aŋ fòlà ke gbàù Dɛwìɔ sùà, wo yèɔ naŋ nyiŋ wa kùwò yèè wò naŋ nyiŋ nyɛ̀nɛ̀ŋ wèè aŋ jɔ̀ɔ̀lɔ̀ e gaàuŋ nɛ̀ dìì nyaŋ.