2Tɛsè 3 - WƆŊ FƐ̀Ì EBÒ SÌÀŊ DAYÀA

Zòòloìŋ weè wi

¹ Ko jèè e ɗìi nyɛ̀iŋ nààŋ wùìya wi nyàŋ, zòòloìŋ weè wi wèè ke mìè gbìàŋ Kanaà Jisɛ̀ ke kunò nɔŋ ɓààye keleiŋ, yèè ke yɛmɛ̀ kuàŋ jàà dìì e ɓɛ̀ɛ̀jàa sùà, màànààŋ nɔŋ è naŋ kaaìŋ e teengaà è yààìŋ e tɛɛ lɛ̀.

² Zòòloìŋ wèè wo Dayà joeyè wi e yìwìà anyuùŋ naanààŋ nyaŋ sìwè, esaɓù kɛ̀ anyùùŋ nyaŋ gbiŋ nààŋ gò hààwè kè miè gbìàŋ Dayàa.

³ Kɛɛ wo Kanaà yaà wo nyuùŋ tùlìà jii, yèè wò doiŋ nàŋ fè e gààŋ yèè woiŋ yɛ̀mɛ̀ diɛŋ anyùùŋ maŋ kpèè naanààŋ nyaŋ e tɛɛ.

⁴ Wo Kanaà naŋ nyɛ̀nɛ̀ŋ è naiŋ kùwìè ke jii tùlia sùà yèè è naŋ haawè kɛ̀ nìŋ yaà nyinie, yèè nìŋ do nàŋ nɔ̀ŋ nyìnìè e yèɛ è naiŋ woò lɛ.

⁵ Tɔ̀ wo Kanaà dèiŋ ke dòmaŋ diɛŋ wèè niŋ kuwìè e mànaŋ mààŋ Dayà yèè ke jii kùwaà wo Jisɛ̀ Kulaì kiɛ̀ŋ lɛ.

E gòo nyaàiŋ dè le kɔɔ fàa

⁶ Nyɛ̀iŋ nààŋ wùìya wi nyàŋ, è naiŋ naaà e dèè Kana wiɔ̀ Jisɛ̀ Kulaì sùà e wèè ɓɔ̀ nìŋ gbɛ̀ɛ̀ anyuùŋ hààwe nyàŋ gbiŋ àŋ yè nyaŋ yaà wɔ̀ŋ nyiiŋ gèe fà lè kɔɔ sùà, yèè aŋ fè nyɛ̀nɛ̀ŋ mànɛ̀ŋ maŋ è naŋ nyiŋ kiɛ̀ŋ wèè nyɛ̀nɛŋ maŋ.

⁷ Nyɛ̀iŋ bi nàŋ nyìmàŋ tɛ̀ɛ̀ kaiŋ kɛ̀ nìŋ kuwa nɔŋ naŋ dè maŋ kpèè wi màŋ maŋjɛ̀wɛ. E gòiŋ nyɛ̀nɛ̀ŋ è kɔɔ fàa è teengaà è yaà kò nɛ̀ɛ̀iŋ niìŋ lɛ.

⁸ E gòiŋ jàà è kpùùmàŋ nyùùŋ gbiŋ kùàŋ dìì wèè foo. Kɛɛ è naiŋ tomo nyìnga, e naiŋ nɔ̀ŋ toomo dùùm yaà maŋ gɔɛ wèè e goiŋ nàŋ gbìɛ̀ŋ è kèè nɛ̀ŋ màaŋ sùà.

⁹ È naiŋ tɛɛ̀ nyɛ̀nɛ̀ŋ,e fè wa guùŋ kɛ̀ e kuwàìŋ wa è gààŋ wèè eiŋ jàà è kpòònaà wèè naŋ wi kìɛ̀ŋ wɔ̀ŋ kùàŋ kpùùmaŋ wiɔ̀, kɛɛ è naiŋ nyɛ̀nɛ̀ŋ wèè e nɔ̀ŋ e tɔ̀ɔ̀màŋseì naŋ niŋ fɔɔnɔ̀ŋ.

¹⁰ E teengaà è yaà ko nɛ̀ɛ̀iŋ niìŋ lɛ, è heiŋ wa woò wìyàà, “Wo nyùnɔ̀ɔŋ gbiŋ naŋ gangà wèè wo tomo wɔ̀ ɓɔ̀ wò jènɛ̀ŋ.”

¹¹ È naŋ tɛɛ̀ woò e fèfoo èiŋ kòmàŋ kɛ̀ anyuùŋ fà le kɔɔ bà kòò àŋ yààìŋ tɛɛ aŋ yè nyaŋ fè nyɛ̀nɛ̀ŋ è nɛ̀ŋ bà gbiŋ sɔɔ̀ nɔŋ maŋ kèì aŋ bà gbìàŋ nyààŋ sùà.

¹² E dèè Kanaà Jisɛ̀ Kulaìɛ sùà, è nàà anyùùŋ nyɛɛ̀ŋ yèè è nyiŋ fè e gòo wèè aŋ dè maŋ nyiiŋ nyiŋ màŋ ke dòmaŋ kɛnɛ diɛŋ, e kìlà aŋ tomo aŋ kamè nɛ̀ŋ wèè nyiŋ bi.

¹³ Kɛɛ nyɛ̀iŋ nààŋ wùìya wi nyàŋ, ɓɔ̀ nìŋ yɔkpɔ̀ wèè è keì sìàŋ nyɛ̀nɛŋ.

¹⁴ È ɓɛ̀nɛ̀ŋ hɛ̀ɛ̀nɛŋ kɛ̀ anyùuŋ bà kui, aŋ naàŋ jɔ̀ɔ̀lɔ̀ kè miè gbìaàŋ è naŋ tùɔ̀ŋ wɔ̀ŋ fɛi wɛɛ̀ŋ sùà yɛ dìì. Sèè tɛɛ̀ è kaaìŋ yɛi, jàaìŋ nyiŋ jii niŋ gè kii nyiŋ kùàŋ sùà wèè e sàngè nyɛ̀nɛ̀ŋ nyiŋ.

¹⁵ Kɛɛ ɓɔ̀ nìŋ kùwà nyiŋ è kùwà è joo, kìɛìŋ nyiŋ e gòo mààŋ aŋ wùìya.

Maŋ mìè gbòa dìàmaaŋ màŋ

¹⁶ Tɔ̀ wo Kanaà Jisɛ̀ wuŋ bi, wo yèɔ yaà ke dòmàŋ jii fàa wiɛ̀ wɔ wo kiɛ̀iŋ jii fàa dòmaŋ nyaaŋ ɗewe gbiŋ sùà, yèè e teenga gbiŋ sùà. Wo Kanaà nɔ̀ŋ nyɛ̀iŋ gbiŋ maŋjɛ̀wɛ.

¹⁷ Wɔŋ kùàŋ miàŋ biɔ̀ naŋ tɛɛ̀ sìngè. E zùùmo e yìwìà miàim Pɔɔ̀ sìwè, e ɗeweɛ̀ lɛɛ̀ mìŋ tie wɔŋ fɛi gbiŋ kùàŋ jɛwɛ, yɛi mìŋ singe.

¹⁸ Mìŋ zoolà wèè e tɛ̀ɛ̀tɛ̀ɛ̀ wo Kana wiɔ̀ Jisɛ̀ Kulaì eiŋ nɔ̀ŋ maŋjɛ̀wɛ.