2Pììlɛ 2 - WƆŊ FƐ̀Ì EBÒ SÌÀŊ DAYÀA

Aŋ kààmɔɔŋ tòa nyàŋ

¹ E gɔuo sùà aŋ wɛ̀ijì tòa naŋ wa hnè anyùùŋ nyaŋ e tɛɛ, yèè e ɗèwè guùŋ bi sùà aŋ kààmɔɔŋ tòa doiŋ nàŋ hnè e tɛɛ. Àŋ do nàŋ hìɛ̀ŋ e kàa gɔ̀àgɔ̀à keì sùà, e kàa gò kùwìè tɔ̀ɔ̀nyaàŋ, yèè àŋ do nàŋ gììyè wo Kɛ̀ɛ̀nɛŋ nyiŋ nɔɔ̀ŋ naŋ nyiŋ bilɛ̀ŋ wɔ maŋhɛɛ, kɛ̀ àŋ hìàŋ e fàa fòòno nyiŋ bi diɛ̀ŋ.

² Anyuùŋ zimgbe do nàŋ dè maŋ kpèè naanààŋ nyiŋ màŋ maŋjɛ̀wɛ, e nɔ̀ŋ saɓù anyùùŋ kùùnò gbòà maŋ mìè ɓɛ̀ɛ̀pɔ̀ɔ nyaàiŋ dè ke dòmàŋ tɔ̀ɔ̀nyaàŋ.

³ Àŋ do nàŋ nyɛ̀nɛ̀ŋ e kèè nyààŋ aiŋ kaaɓì maŋ mìè gbòa ɓuuyè sùà. Kɛɛ e gbàiɛ̀ wo Dayà kuwa weè nyiŋ nɛ̀ è yaà wa naàŋ bànèbane niŋ gɔu, yèè wo nyuùŋ jìwa nyiŋ nɔɔ̀ŋ fè màŋjàwè.

⁴ Wo Dayà gò wa yɛ̀mɛ̀ àŋ màikà nyaŋ naŋ wa sɛ̀ɛ̀ màŋ jùumù sùà nyaŋ kè nyowo, kɛɛ wò naŋ nyiŋ gbìɛ̀ŋ ko jàhamaŋ, ko yèi àŋ naŋ nyiŋ sìè maŋ pela ke nyìwìɛ sùà, àŋ yaà fùlìè ke ɗɔ̀ɔ̀ gbài kitiɛ̀ ke hnàŋ.

⁵ Wo Dayà gò wa yɛ̀mɛ̀ è ɗuunyaŋ gɔuɛ̀ nyowo, wò naŋ wa hìɛ̀ŋ e wuiyè jòwa e ɗùùnyàŋ nyuùŋ gò nyìmàŋ Dayà nyaŋ diɛ̀ŋ. Anyùùŋ nyaŋ nɔŋ wò nao wa gè nyaŋ nàŋ yaà wa wo Nòa, wo yèɔ naŋ wa wòò ke mìè gbìàŋ tɔ̀ɔ̀nyaàŋ e kpùlìà anyùùŋ nɔɔnɔŋ le tìyèe.

⁶ Wo Dayà naŋ wa hèè e kìtì hmɔ̀ɔ̀ŋ ko Sɔdɔ̀ùŋ yaà ko Gòmolà, maŋ jawa bi maŋ gbiŋ kìlà e duum, yèè wò naŋ miŋ nyɛ̀nɛ̀ŋ wèè maŋ nɔŋ e tɔ̀ɔ̀màŋseì wèè e nɛ̀ɛŋ do nàŋ kaaìŋ koɓɛ̀ anyuùŋ gò nyìmàŋ Dayà nyaŋ lɛ̀.

⁷ Wo Lɔɔ̀ wo yèɔ yaà wa wo nyùùŋ tɔ̀ɔ̀nyaàŋ wɔ, yèè wò yaà wa ke jii mɔ̀ɔ̀nɛŋ sùà wèè maŋ kpèè nàànààŋ anyuùŋ gò nɔ̀ŋ màŋ sàwà dìì nyaŋ wɔ̀, wo Dayà nauŋ wa joeyè.

⁸ Wo nyùùŋ tɔ̀ɔ̀nyaàŋ wɛɛ̀ yàà nyiìŋ wa e tɛɛ, yèè niìsìa gbiŋ wò kuwo wa keì nyìnga, e kìlà ke jiiuŋ nɛɛ̀ŋ hewa mɔɔnɛ̀ŋ zimgbe wèè maŋ keì naanààŋ maŋ kaaìŋ wa anyuùŋ gò nɔ̀ŋ màŋ sàwà dìì nyɛɛ̀ŋ sùà lɛ.

⁹ Kɛɛ wo Kanaà nyìmàŋ e ɗeweɛ̀ wò joeyà anyùùŋ Dayà nyaŋ maŋ keì nyìnga nyiŋ màŋ sùà lɛ, yèè wo kùwìè anyuùŋ gò nyìmàŋ Dayà nyaŋ e ngàìnɓu dìì wèè ke ɗɔ̀ɔ̀ gbài kitiɛ̀ diɛŋ wa nàwèè,

¹⁰ kaikai ngèè aŋ yè nyaŋ dè maŋ kpèè kùwà ninaŋ màŋ yaà maŋ kpùnaŋ nyiŋ màŋ sùà maŋ maŋjɛ̀wɛ aŋ kɔ̀ɔ̀yɛ̀ e gaàŋ Dayàa fɛ̀ɛ̀ sùà. Aŋ kààmɔɔŋ tòa nyɛɛ̀ŋ naŋ nyìngè ɗì e kìlà aŋ fè dùàŋ nyùùŋ, aŋ fè kìɛ̀ŋ àŋ jinàŋ kùwìè e gààŋ tòmo nyàŋ ko àìjɛnɛ̀ŋ è ɓɛ̀ɛ̀jàa, àŋ diɛ̀ŋ nyiìŋ.

¹¹ Aŋ màikà nyaŋ kàìŋ nyaŋ naŋ nyìngè sùà, yèè àŋ kuwa e gààŋ e pɛɛ nìàŋ aŋ kààmɔɔŋ tòa nyɛɛ̀ŋ nyaŋ, aŋ fè gè màŋ mìè ɓɛ̀ɛ̀pɔ̀ɔ nyààŋ koɓɛ̀ ànyùùŋ nyɛɛ̀ŋ kò fɛ̀ɛ̀fèìŋ Kana hàà kitiɔ̀.

¹² Aŋ kààmɔ̀ɔ̀ŋ tòa nyɛɛ̀ŋ yaà mààŋ aŋ yìlì ɓie gò kùwìè jiikɛ̀ɛ. Aŋ fè jàà keì jii. Àŋ kòmò nyiìŋ nɔ̀ŋ wèè anyuùŋ kpùuŋ aŋ nyiŋ jìwà. Àŋ fè maŋ mìè ɓɛ̀ɛ̀pɔ̀ɔ koɓɛ̀ e keì gbiŋ e yèɛ aŋ nyimààŋ keì bà wèè nyaàiŋ dè keì bi lɛ̀. Kɛɛ maŋ kpèè nàànààŋ nyiŋ bi màŋ do nyiŋ nàŋ jìwè.

¹³ Àŋ naŋ jàà e nànàŋ yèè e nànàŋ nàŋ do nyiŋ nàŋ mɛɛ̀ŋ wèè e jìwààjɛ̀wɛ̀ nyiŋ nɛ̀. E je nyiŋ gbanaà nàŋ yaà wèè aŋ nyɛ̀nɛ̀ŋ maŋ kèì kàaɓì gbiŋ maŋ gɔɛ janyai maŋ yè maŋ do nàŋ fɔ̀ɔ̀yɛ̀ e kɔɔ nyiŋ nɛ̀ jii lɛ̀. È yaà e sàngè yèè e ɓɛ̀ɛ̀pɔ̀ɔ nààŋ nyɛ̀iŋ nyiŋ nìŋ jiiyà nɛ̀ŋ koɓɛ̀ guùŋ, e teenga gbiŋ ko jììkà maŋ tùwò kàaɓì nyiŋ màŋ.

¹⁴ E gòngo nyiŋ nɛ̀ gbiŋ yaà nɔŋ wèè e hmɔŋtu nyɛ̀nɛŋ koɓɛ̀ aŋ jàwè aŋ bà nyaŋ, yaà aŋ fànààŋ bà nyaŋ, e wùànàŋ maŋ kèì jùumù nyɛ̀nɛŋ nyiŋ nɛ̀ fè jùà. Ànyuùŋ gò nyìngà sùà nyaŋ àŋ gbìɛ̀ŋ nyiìŋ maŋ gbàò keì sùà. Maŋ jii nyiŋ màŋ naŋ gbèè e kèèo nyààŋ nyɛ̀nɛ̀ŋ. Àŋ yaà e gbòònò Dayàa dìì.

¹⁵ Àŋ jòà ke dòmaŋ jìlɛɛ̀ŋ àŋ go, àŋ dè ke dòmaàŋ wo kèèlà Dayàa Bàlaàŋ wo jɔ̀àfèlàà Biɔ̀ɔ naŋ ɓemè yɛ, wo yèɔ manaŋ e nɛɛnɛɛ̀ŋ wò gè ke nyɛ̀nɛ̀ŋ kàaɓì sùà lɛ.

¹⁶ Kɛɛ wo ɗòsòo nauŋ dè ke dòmaŋ jìlɛɛ̀ŋ diɛŋ wèè ke kpèè naanààaŋ wò naŋ nyɛ̀nɛ̀ŋ lɛ. Wo yilìɔ naŋ gbùùyè wo kèèlà Dayàa ke mìè nyuùŋkpùuŋ kɛnɛ sùà, wouŋ nyɛ̀nɛ̀ŋ wo gè kùàŋ e ɓàaɓàa bi sùà.

¹⁷ Anyùùŋ mààŋ nɛɛ̀ŋ àŋ yaà mààŋ maŋ gòò maŋ màì wòòye, mààŋ ko fuùŋ kùwaì wɔŋ dùfòìɔ dulà lɛ, ko nɔ̀ŋ nyiŋ niìŋ kò yaà bàànè hàa wo Dayà sìwè ke nyiwì kpɔtu kpɔ̀tùɛ sùà ko jàhamaŋ weè nyiŋ.

¹⁸ Maŋ nyaàŋ gbeegbèè zùwo foo màŋ àŋ gboo màŋ, àŋ toomàŋ maŋ kpèè nàànààŋ kɔɔ nyiŋ màŋ wèè aŋ kùwà anyùùŋ nyaŋ maŋ gbaù sùà aŋ yè nyaŋ naŋ nɔŋ tɔ̀ɔ̀tù fòlà anyùùŋ nyaŋ yaà maŋ keì ɓàa dìì nyaŋ e tɛɛ.

¹⁹ Àŋ naŋ ɓèmè ɗààhiì kɛ̀ àŋ do nyiŋ nàŋ gè e ɗo dìì, e yèɛ nyiŋ bi àŋ yaà aŋ ɗo koɓɛ̀ e tàitài lɛ̀, è nɛ̀ŋ gbiŋ naŋ kùwìè e gààŋ wo nyùùŋ diɛŋ wò yaà wo ɗo koɓɛ̀ e nɛ̀ŋ bi.

²⁰ Sèè anyùùŋ dùàŋ aŋ fòlà e gààŋ kààkàà ɗuunyaàŋ dìì esàɓù e jiikɛ̀ɛɛ̀ àŋ kuwa e nyaàiŋ dè wo Kanaà yèè wo Nyuùŋ Jòèye wiɔ̀ Jisɛ̀ Kulaì, kpeiŋ maŋ kààkàà bi maŋ nyiŋ ɓɛìŋ kùwà maŋ nyiŋ gbùwò diɛŋ, anyùùŋ mààŋ nyiiŋ e nɔ̀ŋ kii nyiŋ nɛ̀ è nyɛnɛŋ naàŋ e nànàŋ e nìàŋ ko tɔɔtuì.

²¹ È hewa weè nàŋ nɔ̀ŋ tɛ̀ɛ̀ e wèè kɛ̀ ɓɔ̀ àŋ nyìmàŋ kè dòmàŋ tɔ̀ɔ̀nyaàaŋ, e wèè aŋ niŋ nyìmàŋ kpeiŋ aŋ fè ke sàwà nɛɛmaàŋ jɛwɛ ke yèɛ wo Dayà naŋ kiɛ̀ŋ lɛ̀.

²² E nɛ̀ɛŋ naŋ nyiŋ kaaìŋ nɛ naŋ tɔɔ̀ kɛ̀ maŋ sai màŋ yaà tɔɔɓaa, “Wo sunɔ̀ɔŋ kɛɛ̀ koɓɛ̀ e nyùɛ̀uŋ nɛ̀” yèè “Wo nyuàaŋ àŋ guo fo wɔ̀ wò kɛɛ̀ ɓɛìŋ e baà sùà wo ngeengèè.”