2 Kɔliìŋ 9 - WƆŊ FƐ̀Ì EBÒ SÌÀŊ DAYÀA

E kpùùmaŋ wèè anyuùŋ hààwe gò kùwìè nɛ̀ŋ nyaŋ

¹ Esaɓù kɛnɛ ɓà gbiŋ fè wèè kaiŋ sìngà wɔ̀ŋ fɛi nyaàiŋ dè è tòmò kpùùmaàŋ nìŋ naŋ ɗewè wèè naŋ tùàŋ koɓɛ̀ anyùùŋ nɛɛmaŋ nyàŋ ko Jùdià lɛ.

² Kà nyìmàŋ kɛ̀ è yààìŋ jii wèè naŋ kpuumàŋ, yèè kà kɛ̀ɛ̀ maŋ nyòngà koɓɛ̀ anyùùŋ Mɛsèdonìà nyaŋ e nyaàiŋ eiŋ dè kɛ̀, “Anyuùŋ hààwe nyàŋ ko Àkaayà, àŋ wa banebànè wèè aŋ kpuumàŋ e yìwìà doa bà mɛ̀iŋ.” E wùànàŋ kpùùmaiŋ nɛ̀, è sìà aŋ zimgbe nyiŋ ke di.

³ Wèètii mìŋ yaà tùaŋ sùà aŋ wùìya kùwìè hààwe nyɛɛ̀ŋ, wèè kɛ̀ maŋ nyongà kɛ̀ɛ wi màŋ è keì lɛɛ̀ sùà maŋ naàŋ nɔ̀ŋ màŋ miè foo. Kɛɛ màànààŋ nɔŋ mìŋ naŋ woò lɛ, nìŋ do nàŋ banebànè wèè e kpùùmaiŋ nɛ̀.

⁴ E ɗewe gbiŋ, sèè aŋ fèlàà Mɛ̀sèdonià nyaŋ hnàŋ yàwiiŋ nyiŋ aŋ yɛmɛ̀ kɛ̀ niŋ fè è bànèbaneiŋ, e sàngè do wi nàŋ kùwò wèè e gbòaà nyaàiŋ eiŋ dè, kɛɛ e jeiŋ nɛ̀ nìàŋ esaɓù kɛ̀ è naiŋ weè naàŋ sìè e hààwe sùà.

⁵ Wèètii mìŋ naŋ gongò kɛ̀ è yaà tɛ̀ɛ̀ wèè eiŋ dàwè anyuùŋ hààwe nyàŋ aŋ kà feìŋ ko nɛ̀ɛ̀ŋ noo wèè naŋ bànèbànè e kìɛɛ̀ŋ nìŋ naŋ ɓèmè e ɗààhiì weè niŋ nɛ̀. Kɛ̀ è do nàŋ nɔ̀ŋ e bànèbaneiŋ tɛ sèè mìŋ hnàŋ, kpeiŋ kɛ̀ è tɔɔ̀ kɛ̀ nìŋ naŋ kiɛ̀ŋ esaɓù kɛ̀ nìŋ manaŋ wèè naŋ kiɛ̀ŋ, e fè kɛ̀ è yaà è kpaŋ wèè naŋ kiɛ̀ŋ.

⁶ Jàaìŋ jii kɛ̀ wo nyùnùɔŋ naŋ nyùɔ̀ŋ manɛ̀ŋ je jɔa wɔ̀, wò do nàŋ kpàà manɛ̀ŋ je jɔa, wo yèɔ naŋ nyùɔ̀ŋ zimgbe wɔ̀, wò do nàŋ kpàà manɛ̀ŋ je zimgbe.

⁷ Wo nyùùŋ gbiŋ kiɛ̀ŋ e yèɛ gbiŋ wò naŋ ɗewè wèè wo kiɛ̀ŋ lɛ, ɓɔ̀ mùŋ kiɛ̀ŋ wèè kè jii muɛ̀ŋ ke jòò fùùŋ ɔ̀ɔ̀ e nɔ̀ŋ mààŋ è kpàŋ è kɔɔ, wo Dayà manaŋ wo nyùnùɔŋ naŋ kiɛ̀ŋ ke jii fàa diɛŋ wɔ̀.

⁸ Wo Dayà wòum ɓɛ̀nɛ̀ŋ kìɛ̀ŋ e nìàŋ e yèɛ mùŋ naŋ kpɛɛ̀ŋ weè niŋ zimgbe lɛ̀, e wèè kɛ̀ e teenga gbiŋ muŋ kɛɛnɛ̀ŋ e keì sìàaŋ mùŋ naŋ kpɛɛ̀ŋ weè niŋ lɛ̀ wèè muàŋ bi, e kìlà màŋ ɓɛ̀nɛ̀ŋ kpùùmàŋ anyùuŋ bà.

⁹ Màànààŋ wɔŋ fɛ̀ì Dayàa naŋ woò lɛ kɛ̀, “Wò gè nɛ̀ŋ kùàŋ wèè anyùùŋ nyaŋ naŋ kpɛɛ̀ŋ weè niŋ nyàŋ, yèè e tɔ̀ɔ̀nyaàuŋ nɛ̀ è yaà wèè julɔfɔ.”

¹⁰ Wo Dayàa wo yèɔ goonàŋ manɛ̀ŋ koei màŋ koɓɛ̀ anyuùŋ nyùaŋ miŋ nyàŋ yèè e nɛ̀ŋje wèè aŋ jè wɔ, wò do ɓɛìŋ nɔŋ nàŋ tòòyè manɛ̀ŋ koei màŋ nìŋ kuwa màŋ, e kìlà wo miŋ nyɛ̀nɛ̀ŋ maŋ wùìyà yèè maŋ kòmàŋ zimgbe e nɛ̀ŋ kìɛiŋ nɛ̀ e dɛ̀ɛ̀ sùà wèè naŋ kìɛ̀ŋ anyuùŋ gò kɛ̀ɛ̀nɛ̀ŋ nɛ̀ŋ nyaŋ.

¹¹ E wèètii, e teenga gbiŋ wò nyɛ̀nɛ̀ŋ naŋ banè tɛ̀ɛ̀ kaiŋ wèè naŋ gè nɛ̀ŋ kùàŋ e teenga gbiŋ sùà, e wèè anyuùŋ zimgbe aŋ gè wo Dayà ke sɛ̀ wèè e nɛ̀ɛŋ nìŋ naŋ wi kiɛ̀ŋ wèè e nyiŋ fè lɛ.

¹² E ɗeweɛ̀ nìŋ yaà ko nyìnìè e tòmo lɛɛ̀ e tòmò Dayàa sùà lɛ, e fè nɔŋ kɛ̀ nìŋ yaà yɛ̀ɛ̀mɛ̀ è kèè màŋ kpɛ̀ɛ̀ŋ kɔ̀ɔ̀ ànyùùŋ nɛɛmaŋ nyàŋ dììò sùà, kɛɛ è yaà hìàŋ sùà maŋ sɛ̀ gèe zimgbe koɓɛ̀ Dayài.

¹³ Esàɓù e tɔ̀ɔ̀màŋseìɛ e tòmo kiiiŋ nɛɛ̀ e tòmò Dayàa sùà è yaà hìaŋ sùà lɛ, anyuùŋ zimgbe do nàŋ kìɛ̀ŋ wo Dayà e ɓɛ̀ɛ̀jàa, yèè e tɛ̀nɛŋ, wèè e jɔ̀ɔ̀lɔiŋ nɛ̀ koɓɛ̀ ke mìè gbìàŋ Ebò Sìàŋ Jisɛ̀ Kulaìɛ, ke yèɛ nìŋ naŋ nyimèè yɛ, yèè wèè e nɛ̀ŋ gè kùàiŋ nɛ̀ nìŋ goonàŋ naŋ nyiŋ kiɛ̀ŋ ke gbòò anyuùŋ hààwe nyàŋ e kpùlìà anyuùŋ gbànaŋ nyàŋ gbiŋ lɛ.

¹⁴ E wèètii e mànaŋ zimgbe sùà àŋ do nàŋ zoolò weèiŋ, esàɓù e tɛ̀ɛ̀tɛ̀ɛ̀ gbeeɛ̀ wo Dayà naiŋ tɔɔ̀ lɛ.

¹⁵ Gè wiìŋ wo Dayà ke sɛ̀ wèè e kìɛŋ siaŋ gbeeuŋ nɛ̀ e fèiŋ ɓɛ̀nɛ̀ŋ gbɛ̀ɛ̀nɛ̀ŋ è nɛ̀ŋ gbiŋ lɛ̀!