2 Kɔliìŋ 8 - WƆŊ FƐ̀Ì EBÒ SÌÀŊ DAYÀA

E ɗeweɛ̀ wo nyùùŋ hààweɔ̀ kiɛ̀ŋ lɛ

¹ Wùìya wi nyàŋ, è manaŋ wèè naŋ nyìmàŋ e nɛ̀ɛŋ e tɛ̀ɛ̀tɛ̀ɛ̀ Dayà naŋ nyɛ̀nɛ̀ŋ è naŋ hɛɛnɛ̀ŋ maŋ gbòò anyuùŋ hààwe nyàŋ sùà ko Mɛ̀sèdonià lɛ.

² Àŋ naŋ kɔ̀ɛ̀ maŋ wɔ̀à keì nyìnga dìì tiwìtiwì kàìŋ, kɛɛ e zɔlɔ̀ nyiŋ nɛ̀ naŋ dɛ̀ɛ̀ zimgbe, e nɔ̀ŋ saɓù wèè àŋ gè nɛ̀ŋ kùàŋ e kìɛŋ nyiŋ nɛ̀ sùà jòòpɛɛ àŋ yaà anyuùŋ pɔ̀ɔ.

³ Kà ɓɛ̀nɛ̀ŋ nɔ̀ŋ wo seì kaiŋ wòò mìàŋ, àŋ naŋ kiɛ̀ŋ màànààŋ àŋ manaŋ wèè aŋ kiɛ̀ŋ lɛ, yèè àŋ naŋ ngèè pɛɛ kiɛ̀ŋ e nìàŋ e gààŋ kìɛŋ nyiŋ nɛ̀. E yìwìà maŋ jìì nyiŋ bi màŋ diɛŋ

⁴ àŋ naŋ wi pɔwɔ̀ wèè e nyiŋ nyìnìàŋ keì sìàŋ, aŋ tomo aŋ nɔ̀ŋ aŋ bà nyiŋ bà wèè manɛ̀ŋ kìɛŋ màŋ koɓɛ̀ ke gbòò anyùùŋ nɛɛmaŋ nyàŋ ko Jùdià.

⁵ È naŋ nìè e yèɛ è he weè nàŋ kùwìè jii tùlia weè niŋ lɛ̀. Jiɛ̀, àŋ naŋ fè nyiŋ bi wo Kanaà, yèè esàɓù e gààŋ Dayàa sùà àŋ naŋ wi ɓɛìŋ fè nyiŋ bi.

⁶ E wèètii, è naŋ dàwè wo Taitɔ̀, wo yèɔ naŋ tɔ̀ɔ̀tù e tòmo lɛɛ̀ wɔ, wèè wo kunò niŋ kɔ̀à feìŋ e kìlà wo kpuumàiŋ wo kpɛɛyɛ̀ e tòmò tìtì e mànaŋ lɛɛ̀.

⁷ Kpeiŋ nààŋ nìŋ yaà naàŋ kɔ̀ɔ̀yɛ̀ feìŋ tɛ̀ɛ̀ manɛ̀ŋ maŋ gbiŋ sùà, e hààwe sùà, e gbòà kii sùà, e jiikɛ̀ɛ sùà, e wùànàŋ e kpùùmaiŋ nɛ̀ gbiŋ sùà, yèè e mànaàŋ nìŋ kuwa weè wilɛ̀. E wèètii e mànaiŋ nɛ̀ sùà ɓɔ̀ nìŋ nyìngà kò sìwè wèè è tòmò kìɛŋ lɛɛ̀.

⁸ Miŋ fè hàa sùà màŋ sàwà. Kɛɛ sèè mìŋ nɔ̀ŋ tɔ̀ɔ sùà e ɗeweɛ̀ anyùuŋ bà e wùànàŋ kpùùmaŋ yaà nyiìŋ nɛ, mìŋ yaà fɛ̀ɛ sùà wèè kaiŋ tùàŋ maŋ nɔnɔŋ wèè ka nyìmàŋ kɛ̀ dièsɔa nyɛ̀iŋ bi e mànaiŋ nɛ̀ è yaà.

⁹ Nàŋ nyìmàŋ e tɛ̀ɛ̀tɛ̀ɛ̀ Kana wiɔ̀ Jisɛ̀ Kulaìɛ, e kpulìà e bàneuŋ nɛ̀ gbiŋ, wò naŋ wa mììnè wuŋ bi wo nyuùŋ pɔ̀ɔ e weèiŋ, wèè wo nyɛ̀nɛ̀ŋ naŋ nɔ̀ŋ anyuùŋ banè esàɓù e pɔ̀ɔuŋ nɛ̀ sùà.

¹⁰ Kpeiŋ e keì lɛɛ̀ sùà, ke mìè gòo miɛ̀ŋ kɛɛ̀, è yaà tɛ̀ɛ̀ wèè naŋ kpɛ̀ɛ̀yɛ̀ e nɛ̀ɛŋ nìŋ naŋ tɔɔtù doa bà mɛ̀iŋ nɛ̀. Nyɛ̀iŋ nàŋ yaà mɛ̀iŋ aŋ jiɛ̀jiɛ̀ nyaŋ, e fè guùŋ nɔŋ wèè naŋ kiɛ̀ŋ, kɛɛ naŋ kùwìè e ɗèweɛ̀ wèè naiŋ nyɛ̀nɛ̀ŋ.

¹¹ Kɔ̀aìŋ niŋ feìŋ, niŋ kpɛɛyɛ̀ e tòmo kìɛɛ̀ŋ. Kùwieìŋ e wùànàŋ wèè niŋ kpɛ̀ɛ̀yɛ̀ e tòmo bi màànààŋ nɔŋ nìŋ heiŋ nàŋ ɗewè lɛ, nyɛ̀nɛìŋ niŋ e yìwìà e nɛ̀ɛŋ nìŋ kuwa lɛ̀ sùà.

¹² Sèè e wùànàŋ e kìɛŋ è nɔ̀ìŋ, wo Dayà do nàŋ jàà e kìɛiŋ nɛ̀ kùàŋ dìì e yìwìà e yèɛ nìŋ kuwa wèè naŋ kiɛ̀ŋ lɛ sùà, e fè wèè è yèɛ fèìŋ sìwè lɛ.

^13-14 Miŋ fè fɛ̀ɛ sùà wèè ka dàngè ànyùùŋ nyaŋ bà nyiŋ wèè kaiŋ jàà maŋ kale kò ɗì, kɛɛ nààŋ nyɛ̀iŋ nìŋ kuwa naàŋ zimgbe e teenga lɛɛ̀ sùà lɛ, è do nàŋ nɔ̀ŋ tɛ̀ɛ̀ wèè naŋ kpùùmàŋ anyùùŋ nyaŋ nɛ̀ŋ fè sìwè nyaŋ. Kpeiŋ, sèè niŋ gò kùwìè nɛ̀ŋ yèè àŋ kuwa zimgbe, kɛ̀ àŋ doiŋ nàŋ kpuumò. Sèè è kaaìŋ yɛ, kɛ̀ nàŋ seenè kpaŋ.

¹⁵ Nààŋ wɔŋ fɛi Dayàa naŋ woò lɛ, “Wo nyùnùɔŋ naŋ gbonogbònò wɔ, wo gò kùwìè zimgbe zìmgbè, yèè wo nyùnùɔŋ naŋ gbonogbònò tòloò wɔ wo gò kùwìè tùùfinè.”

Wo Taitɔ̀ yaà anyuùŋ tòmo dàwiuŋ nyàŋ

¹⁶ È naiŋ gè Dayà ke sɛ̀ wèè wò naŋ gbìɛ̀ŋ e wùànàŋ kpùùmaŋ wo Taitɔ̀ jiio sùà màànààŋ è yàà wì jiio sùà wèè eiŋ kpuumàŋ lɛ.

¹⁷ E fè nɔŋ wèè wò naŋ jàà è dàwe wilɛ̀ kùàŋ dìì lɛ, kɛɛ wò naŋ nyɛ̀nɛ̀ŋ e wùànàŋ wèè wo kpuumàŋ e yìwìà ke jìì nyìngè wuŋ biɛ̀ diɛŋ, yèè wò naŋ ɗewè wèè wo kà ko nɛ̀ɛ̀iŋ noo.

¹⁸ Wo wùìya kùwìè e ɓɛ̀ɛ̀jàa gbeeɔ̀ bà guùŋ maŋ gbòò anyuùŋ hààwe nyàŋ gbiŋ sùà wèè ke mìè gbìàŋ Ebò Siaàŋ wò gboo lɛ̀, wuŋ yaà Taitɔ̀ nàŋ yaà hinie.

¹⁹ Yèè eɓìèmàŋjɛ̀wɛ̀ tii, maŋ gbòò anyuùŋ hààwe nyàŋ àuŋ tàeɗùù yèè àuŋ ɓemè wèè wo nɔ̀ŋ wo nyuùŋ tòmoɔ̀ bà maŋjɛ̀wɛ wi ko nyìnìè e tòmò e mànaŋ lɛɛ̀ wèè esàɓù e jòòwò Kanaà sùà, yèè wèè eiŋ tɔɔ̀ kɛ̀ è manaŋ wèè eiŋ kpuumàŋ.

²⁰ È yààìŋ yɛ̀mɛ sùà yàwi bi diɛŋ wèè nyùùŋ gbiŋ go wi nàŋ sìè jii wèè è ɗeweɛ̀ è yààìŋ tòòmò è kèè è kìɛŋ lɛɛ̀ sùà lɛ.

²¹ Esaɓù wilɛ̀ nàŋ yaà wèè eiŋ nyɛ̀nɛ̀ŋ e yèɛ yaà tɔ̀ɔ̀nyaàŋ lɛ, yèè e fè nɔ̀ŋ wèè kò fɛ̀ɛ̀fèìŋ Kanaà wuŋ guùŋ, sɔɔ̀ ko fɛ̀ɛ̀fèìŋ nyuùŋkpùuŋ nyàŋ nyiŋ pɛɛ.

²² E wèètii, è yaà dàa sùà wo wùìya wiɔ̀ yaà nyiŋ. Èiŋ wuŋ gɛ̀ɛ̀ jɛ̀wɛ̀ e teenga zimgbe sùà èiŋ nyìmàŋ kɛ̀ e wùànàŋ zimgbe yàaùŋ wèè wo kpùùmaŋ.

²³ Sèè è nɔ̀ŋ wèè Taitɔ̀, wò yaà wo bàimbà yèè yàwiuŋ nàŋ tomàŋ ɓɛ̀ guùŋ wèè eiŋ kpuumàŋ, e wèè aŋ wùìya gbànaŋ nyàŋ yaàùŋ kɔ̀ɔ̀yɛ̀ maŋjɛ̀wɛ nyàŋ, àŋ yaà aŋ keela nyiŋ naŋ dè ɓɛ̀ŋ anyuùŋ hààwe nyaŋ, yèè àŋ hiàŋ e jòòwo koɓɛ̀ Jisɛ̀ Kulaìi.

²⁴ Tɔ̀ɔìŋ e mànaiŋ nɛ̀ ko nɛ̀ɛ̀ŋ nyiŋ niìŋ, wèè maŋ gbòò anyuùŋ hààwe nyàŋ aŋ yɛmɛ̀ niŋ, aŋ nyìmàŋ kɛ̀ è yaà e tɔɔɓaa wèè eiŋ kɛ̀ɛ̀ maŋ nyòngà weèiŋ.