2 Kɔliìŋ 6 - WƆŊ FƐ̀Ì EBÒ SÌÀŊ DAYÀA

¹ E tòmò koɓɛ̀ guùŋ wilɛ̀ sùà yàwi nààŋ Dayà, è yààìŋ dàwe sùà nyɛiŋ nyàŋ nìŋ naŋ yɛ̀mɛ̀ e kèì sìàŋ Dayàa nyàŋ, ɓɔ̀ nìŋ dangè niŋ è doò pɔɔ̀ wèè foo.

² Kòmaìŋ e nɛ̀ɛŋ wo Dayà naŋ woò lɛ, “Nààŋ e teengaà naŋ haì wèè kaiŋ kpuumàŋ, Mìŋ naiŋ kumìè. Nààŋ e teengaà naŋ haì wèè kaiŋ joeyè, Mìŋ naiŋ kpuumò.” Jàaìŋ maŋ nùŋ e dìì, E teengaà lɛɛ̀ wèè wo nyùùŋ yɛ̀mɛ̀ e kpùùmàŋ Dayàa, nàaŋ ɗɔɔ yɛɛ̀ nàŋ yaà ke ɗɔɔ wèè wo nyùùŋ gbiŋ jòèyà.

³ E manàŋ wèè nyùùŋ gbiŋ kùwìè kè jii kpàŋ wèè è tòmo wilɛ̀, wèètii è fɛɛ wèè e keì nyìnga bà go nàŋ dè wò nyùùŋ gbiŋ gòlò dòmaŋ.

⁴ Kɛɛ, e nɛ̀ŋ gbiŋ è naŋ nyɛ̀nɛ̀ŋ, è tɔɔ̀ kɛ̀ è yààìŋ aŋ ɓɔ̀ìjɔ̀à Dayà esàɓù maŋ keì nyìnga kà dìì ke jii jùa diɛŋ, maŋ mɔ̀ɔ̀nɛŋ, yèè maŋ nimilà.

⁵ Àŋ naŋ wi ɓùlò, aŋ wi gbìàŋ sààŋ nyìwì, aŋ wi nɛɛmùŋ maŋ nyààŋ tààŋ faaŋ sùà, àŋ naŋ wi toomò eiŋ kpèèwù maŋ jàwè ɔ̀ɔ̀ eiŋ kùwà ke tɔùŋ.

⁶ E gòiŋ nyɛ̀nɛ̀ŋ kèì sàngè, yèè è naŋ kùwìè jiikɛ̀ɛ, è naŋ kùwò jii, e kìlà è naŋ nyɛ̀nɛ̀ŋ keì sìàŋ. Wo Jìnàŋ Dayàa naŋ wi nɔ̀ŋ maŋjɛ̀wɛ, yèè e mànaŋ wilɛ̀ naŋ nɔ̀ŋ e kɛnɛ niŋ,

⁷ esàɓù mìè gbìàŋ tɔ̀ɔ̀nyaàŋ wiɛ̀, yèè esàɓù e gààŋ Dayàa sùà. È kùwàìŋ e tɔ̀ɔ̀nyaàŋ tiŋ nàŋ yaà e kaì nɛ̀ŋ sùmiaŋ wilɛ̀, wèè eiŋ dàà ke gùuŋ, yèè wèè eiŋ yɛ̀mɛ̀ yàwi bi diɛŋ.

⁸ Àŋ joowà wì, e kìlà aŋ wi pɔ̀ɔ̀ɓɛ̀ɛ. Àŋ diɛ̀ŋ wì e kìlà aŋ wi tɛnɛ̀ŋ. Àŋ nyɛ̀nɛ̀ŋ wì mààŋ anyuùŋ tòa, kɛɛ è gbaì tɔ̀ɔ̀nyaàŋ.

⁹ Mààŋ anyùùŋ nyimààŋ wì, kɛɛ anyùùŋ nyaŋ gbiŋ àŋ wi nyìmàŋ. È yaà mààŋ èiŋ fà, kɛɛ nààŋ nìŋ yɛmɛ̀ lɛ è yààìŋ wɔŋ nyiiŋ gèeɔ̀ sùà. Jòòpɛɛ àŋ ngainɓù wì, kɛɛ aŋ fè wi jìwà.

¹⁰ Jòòpɛɛ ke nyowo nyɛ̀nɛ̀ŋ wì, kɛɛ e teenga gbiŋ è yààìŋ e zɔlɔ̀ sùà. È yaà mààŋ è naiŋ kɛ̀ɛ̀ sìwè, kɛɛ è nyɛ̀nɛ̀ìŋ anyuùŋ zimgbe aŋ banè. È yaà guùŋ mààŋ e kuwàìŋ è nɛ̀ŋ gbiŋ, kɛɛ tɔɔɓaa è kùwàìŋ manɛ̀ŋ maŋ gbiŋ.

¹¹ Èiŋ gbòà e kɔɔ janjai nyɛ̀iŋ nààŋ nyùùŋ Kɔliìŋ nyaŋ, yèè èiŋ yìlè maŋ jii wi màŋ gbòlòùŋ.

¹² Yàwi nààŋ gò wa yìlà màŋ jii wi màŋ kò nɛ̀ɛ̀iŋ niìŋ, nyɛ̀iŋ naŋ wa yìlè maŋ jiiiŋ màŋ gbàùŋ ko nɛ̀ɛ̀ŋ wiì.

¹³ Mìŋ yaà naàŋ ko gbuuye mààŋ nìŋ yaà aŋ jɔ̀à kòmaim, tɔ̀ɔìŋ wi ke jìì gunɛ̀ɛŋ nɔŋ è kuwa weèiŋ nɛ̀. Yìleìŋ maŋ jiiiŋ màŋ gbòlòùŋ.

Ke mìè gòo e nyaàiŋ dè anyuùŋ gò hààwè Dayà nyaŋ

¹⁴ Ɓɔ̀ nìŋ fɛ̀ɛ̀ wèè nyɛiŋ nààŋ nyuùŋ gò hààwè Dayà nyaŋ naŋ tòòmò kòɓɛ̀ guùŋ wèè e seenè, e fè ɓɛ̀nɛ̀ŋ hɛ̀ɛ̀nɛŋ. Dièsɔa e keì sìàŋ yaà e keì naanààŋ nɔ̀ŋ aŋ dàwi? Dièsɔa e gbolòùŋ yaà ke nyìwì nɔ̀ŋ koɓɛ̀ guùŋ?

¹⁵ Dièsɔa wo Jisɛ̀ Kulaì yaà wo Sɛ̀tanàŋ naŋ ɓɛ̀nɛ̀ŋ nyìmee koɓɛ̀ guùŋ? Kiìŋ wo nyuùŋ hààwè Dayà yaà wo nyuùŋ gò hààwè Dayà kpulìà?

¹⁶ Kiìŋ ke saaŋ zòòlò Dayàa kuwa wèè ke nyìnìàŋ aŋ dayà joo? Yàwi nàŋ yaà ke saaŋ zòòlò Dayàa wo yèɔ yaà wɔŋ nyiiŋ gèeɔ̀ sùà wɔ, mààŋ wo Dayà wuŋ bi naŋ woò lɛ, “Ko gboo miìŋ nàŋ do nàŋ nɔ̀ŋ anyunùim nyàŋ yèè ka nyiŋ nɔ̀ŋ e tɛɛ. Mìŋ do nàŋ nɔŋ wo Dayà nyiŋ nɔɔ̀ŋ, yèè àŋ do nàŋ nɔ̀ŋ anyunùim nyàŋ.”

¹⁷ E wèètii wo Kanaà wààŋ, “Sɔɔ̀ naŋ nyiŋ dangè yèè ɓɔ̀ nìŋ nɔ̀ŋ nyiŋ è fèemàŋ. Ɓɔ̀ nìŋ kuwìè è nɛ̀ŋ bà gbiŋ wèè naŋ nyìnìàŋ è nɛ̀ŋ gò zɛ̀nɛ̀ŋ, kɛ̀ mìŋ doiŋ nàŋ jàà kùàŋ dìì.

¹⁸ Mìŋ do nàŋ nɔ̀ŋ wo dèda ko nɛ̀ɛ̀ŋ niìŋ, yèè nìŋ do nàŋ nɔ̀ŋ aŋ jɔ̀àfelaa yaà aŋ jɔ̀àjɔùŋ wèè miàŋ. Wo Kànà Dàyà gaàŋ gbeeɔ̀ naŋ tɛɛ̀ woò.”