2 Kɔliìŋ 4 - WƆŊ FƐ̀Ì EBÒ SÌÀŊ DAYÀA

E tɔ̀ɔ̀nyaàaŋ ko wòò ke mìè gbìàŋ Ebò Siaàŋ

¹ E yìwìà ke nyòwò Dayàa sùà wò naŋ wi fè e tòmo lɛɛ̀ wèè e niŋ nyɛ̀nɛ̀ŋ, yèè wèètii e ɓɔ̀mɔ̀ fè wi wùìyà.

² È naŋ hèè maŋ gbùnu màŋ gbiŋ yèè maŋ kpèè sàngè maŋ gbiŋ e ɓula. E fè fɛ̀ɛ̀ wèè e zùwò nyùùŋ gbiŋ ɔ̀ɔ̀ e kàà kè mìè gbìàŋ Dayàa è tòa sùà. Wo Dayà yaà wo seì weè wi kɛ̀ e tɔ̀ɔ̀nyaàaŋ nɔŋ è woàìŋ, wèè anyuùŋ gbànaŋ nyàŋ aŋ gongò kɛ̀ wo Dayà wò wi ɓɛ̀nɛ̀ŋ tùlìà jii.

³ Sèè ke mìè gbìàŋ Ebò Siaàŋ è woàìŋ yɛ ke nɔ̀ŋ nyɛ̀ɛ̀nɛŋ nyiŋ, kɛ̀ kè yaà nɔŋ e nyɛ̀ɛ̀nɛŋ nyiŋ wèè anyùùŋ nyaŋ naŋ go nyàŋ.

⁴ E wèè wɔŋ fàà anyuùŋ gò kɛ̀ɛ̀nɛ̀ŋ è hààwe nyàŋ, wo dàyà ɗuunyaŋ lɛɛ̀ naŋ nyiŋ dììyè le fɛ̀ɛ̀ wèè ɓɔ̀ àŋ yɛmɛ̀ è gbolòùŋ nɛ yewe kè mìè gbìàŋ Èbò Siaàŋ sùà e nyaàiŋ dè e jòòwò Jisɛ̀ Kulaìɛ, wo yèɔ naŋ tèènè Dayà wɔ.

⁵ E fè wòò è kèè yàwi bi, è yààìŋ wòò e kèè Jisɛ̀ Kulaì mààŋ wo Kana, yèè e wèè yàwi, mààŋ aŋ ɓɔìjɔ̀àiŋ nyàŋ esàɓù Jisɛ̀ Kulaì sùà.

⁶ Wo Dayàa naŋ woò wààŋ, “E yìwìà ke nyìwìɛ sùà e gbolòùŋ do nàŋ mɛ̀ɛ̀ŋ wɔ,” wo Dàyà guùŋ bi nɔŋ naŋ nyɛ̀nɛ̀ŋ e gbolòùuŋ nɛ naŋ mɛ̀ɛ̀ŋ maŋ jii wi màŋ sùà wèè e wi hìàŋ koɓɛ̀ e jììkɛ̀ɛ̀ e jòòwò Dayàa e yèɛ yaà mɛ̀ɛŋ sùà wo Jisɛ̀ Kulaì dewà lɛ.

⁷ E ɗewe gbiŋ sùà yàwi nyàŋ è kùwàìŋ e bàne lɛɛ̀ jinàaŋ sùà nyaŋ, è yààìŋ mààŋ maŋ golà kpoò kpàna, wèè e tɔɔ̀iŋ kɛ̀ e gaàŋ kɛnɛɛ̀ è yaà wèè Dayà e fè weè wi.

⁸ È kùwòìŋ keì nyìnga kɛɛ aŋ fè wì hike hìkè. E teenga bà è nɔ̀ìŋ jii die sùà kɛɛ e fè niŋ gè ɗì dìì.

⁹ Aŋ joo nyàŋ naŋ gàŋ, kɛɛ wo nyuùŋ mɔ̀ɔ̀nɔŋ fè wi jùà sìwè, jòòpɛɛ e teenga bà àŋ dò wì, kɛɛ aŋ fè wi pɔɔpɔ̀ɔ̀.

¹⁰ E teenga gbiŋ è koàìŋ e fà Jisɛ̀ɛ maŋ kpùnaŋ wi màŋ sùà, wèè kɛ̀ aŋ yɛ̀mɛ̀ wɔŋ nyiiuŋ nɔɔ̀ŋ wuŋ pɛɛ maŋ kpùnaŋ wi màŋ sùà.

¹¹ Wɔŋ nyiiŋ gè wiɔ̀ gbiŋ sùà è sìàìŋ e kèì nyìngà fàa fɛɛ̀feìŋ esàɓù Jisɛ̀ɛ sùà e wèè kɛ̀ aŋ yɛmɛ̀ wɔŋ nyiiuŋ nɔɔ̀ŋ maŋ kpùnaŋ wi màŋ sùà.

¹² Tɛɛ̀ naŋ tɔɔ̀ kɛ̀ e fàa yaà wì sùà è yaà toomo, kɛɛ wɔŋ nyiiŋ yààìŋ sùà wɔ̀ŋ yaà toomo.

¹³ Wɔŋ fɛ̀ì Dayàa wààŋ, “mìŋ naŋ gbòò esaɓù kɛ̀ mìŋ kuwa e hààwe.” E hààwè guùŋ bi yàwi pɛɛ è kuwa nyiiŋ wi màŋ sùà wèètii è gboo.

¹⁴ Eiŋ nyìmàŋ kɛ̀ wo Dayà, wo yèɔ naŋ gè wo Kanaà Jisɛ̀ e fàaà dìì wɔ, wò do wi nàŋ gè dìì yàwi pɛɛ e kpùlìà Jisɛ̀, wo wi kɔà e hààwè nyɛ̀iŋ nààŋ gbiŋ diɛŋ ko fɛ̀ɛ̀fèìŋ wuŋ biì.

¹⁵ Tɛɛ̀ gbiŋ yaà wèè esaɓùiŋ nɛ̀ sùà, yèè nààŋ e tɛ̀ɛ̀tɛ̀ɛ̀ Dayàa yaà hài sùà anyuùŋ zimgbe, àŋ do nàŋ fè e zòòlò ke sɛ̀ gèe zimgbe koɓɛ̀ e jòòwo Dayàa.

Ko hàwè àìjɛnɛ̀ŋ muìŋ

¹⁶ E wèè esaɓù lɛɛ̀, e ɓɔ̀mɔ̀ŋ fè wi wùìyà, jòòpɛɛ e kɔɔ wilɛ̀ yaà yɔ̀kpɔ sùà, kɛɛ wo Dayà sie wo jinàŋ wiɔ̀ e gààŋ niìsìa gbiŋ.

¹⁷ Maŋ keì nyìnga nyɛɛ̀ mɛɛ̀ŋ wèè e teenga kpuu, màŋ yaà wì bànèbane sùà wèè e jòòwo gò jùà. E yèɛ do nàŋ nyɛ̀nɛ̀ŋ maŋ keì nyìnga wi màŋ gbiŋ maŋ nɔ̀ŋ mààŋ maŋ fè è nɛ̀ŋ bà gbiŋ sùà lɛ.

¹⁸ E gòiŋ jàà fɛ̀ɛ̀ dìì wèè mànɛ̀ŋ maŋ è yɛmɛ̀ìŋ maŋ, sɔɔ̀ maŋ yè maŋ e fèiŋ yɛmɛ̀ maŋ. Manɛ̀ŋ maŋ àŋ yɛmɛ̀ maŋ, màŋ yaà nɔŋ wèè e teenga kpuu, kɛɛ maŋ yè maŋ aŋ fè yɛmɛ̀ maŋ, màŋ yaà wèè julɔfɔ.