2 Kɔliìŋ 3 - WƆŊ FƐ̀Ì EBÒ SÌÀŊ DAYÀA

Aŋ kèèlà e ɗààhiì jɛ̀ìɛ

¹ Tɛɛ̀ yaà ɓɛìŋ mààŋ è yaà ko kìlìè maŋ nyongà wèè yàwi bi? È ɓɛ̀nɛ̀ŋ nɔ̀ɔŋ kɛ̀, màànààŋ anyùuŋ bà àŋ nyɛnɛŋ lɛ̀, wèè eiŋ gè maŋ fɛ̀ì nyaàŋ gè diɛŋ eiŋ hiàŋ ɔ̀ɔ̀ e yìwìà nyɛ̀iŋ sìwè?

² Nyɛ̀iŋ bi nàŋ yaà wɔŋ fɛiɔ̀ è kuwa wɔ̀ŋ, wɔ̀ŋ yaà e sìnga wuŋ maŋ jii wi màŋ diɛ̀ŋ wèè anyùùŋ nyaŋ gbiŋ aŋ wuŋ nyìmàŋ e kìlà aŋ wuŋ kpɛ̀nɛ̀ŋ.

³ È yaà sengei kɛ̀ wo Jisɛ̀ Kulaì wuŋ bi naŋ sìngè wɔŋ fɛi wɛɛ̀ŋ, yèè wò naŋ wi wuŋ fè wèè e wuŋ hiàŋ. Wo gò wuŋ sìngìà kè kuù sìngìà fɛi, wò naŋ wuŋ sìngìè wo Jìnàŋ Dayàa, wo yèɔ yaà wɔŋ nyiiŋ gèeɔ̀ sùà wɔ, yèè wo gò wuŋ sìngìà wɔ̀ŋ duò fàà diɛŋ, wò naŋ wuŋ sìngìè maŋ jìì kòmàŋ nyuùŋkpùuŋ màŋ diɛŋ.

⁴ È woà tɛɛ̀ esaɓù kɛ̀ è kuwa ke jii tùlia wo Dayà sùà esàɓù Jisɛ̀ Kulaì sùà.

⁵ E nɛ̀ŋ bà gbiŋ fè wì sùà wèè e wi gè nyààŋ diɛŋ eiŋ woò kɛ̀ èiŋ ɓɛ̀nɛ̀ŋ nyɛ̀nɛ̀ŋ tomo lɛɛ̀. E nɛ̀ɛŋ è kuwa wèè eiŋ nyɛ̀nɛ̀ŋ e tòmo lɛɛ̀ lɛ è yewe Dayà sìwè.

⁶ Wuŋ naŋ nyɛ̀nɛ̀ŋ è naiŋ ɓɛnɛ̀ŋ wèè eiŋ nɔ̀ŋ aŋ ɓɔìjɔ̀à tòmo wèè e mìèsùàguùŋ jɛ̀ìɛ, e yèɛ e fè kè sàwà sìnga, è yaà wèè Jinàaŋ. Ke sàwà sìngaà hiàŋ e fàa, kɛɛ wo Jinàaŋ kiɛ̀ŋ wɔŋ nyiiŋ.

⁷ Àŋ naŋ wa sìngìè ke sàwàa wɔŋ duò tàà fàà diɛŋ, yèè e jòòwò Dayàa nao hnè e teengaà àŋ yaà nyiìŋ kìɛŋ sùà lɛ. Jòòpɛɛ e gbolòùŋ nɛ yaà wa wɔŋ dèwà Mòòzeɔ̀ lɛ è yaà wa naàŋ fàa sùà e fɛ̀ɛ̀, kɛɛ è kuwa wa e gààŋ e jèèsùà anyùùŋ fùɔ̀ŋ Ezɔ̀ɛ̀ɔ nyaŋ fòuŋ wa ɓɛ̀nɛ̀ŋ yɛ̀mɛ̀ dewà. Sèè ke sàwàa, ke yèɛ hiàŋ e fàa sèè àŋ toomàŋ nyiìŋ sùà nɛ, ke hìàŋ e jòòwo mààŋ tii,

⁸ kɛ̀ e jòòwoɛ̀ yaà maŋ nyɛ̀nɛ̀ŋ Jinàaŋ sùà màŋ naŋ dɛɛ̀ gbee gàtò!

⁹ Sèè ke nyɛ̀nɛɛ̀ŋ hiàŋ e nìmìlà fàa lɛ̀ naŋ kùwìè e jòòwo, kɛ̀ ke nyɛ̀nɛɛ̀ŋ hiàŋ e jòèye lɛ̀ do nàŋ kùwìè e jòòwo gbee!

¹⁰ Èiŋ wɛ̀i ɓɛ̀nɛ̀ŋ wòo kɛ̀ esàɓù e jòòwo gbolòùŋ gbeeɛ̀ yaà e ɗààhiì jɛ̀ìɛ sùà lɛ, è nɔ̀ŋ saɓù e jòòwo gbolòùŋ nɛ yaà wa wèè ke sàwàa sùà lɛ̀ è jùà.

¹¹ Sèè e nɛ̀ŋ gò kòlà kuwìà e jòòwo, e yèɛ yaà wèè julɔfɔ lɛ̀ kuwìè è jòòwo gbee gàtò.

¹² Nààŋ è kùwàìŋ naàŋ ke jii tùlia yɛɛ̀ lɛ, è kuwa jii nyingè wèè gbòa,

¹³ E fèìŋ mààŋ wò Mòòze, wò yèɔ sɔɔ̀ wò naŋ wa ɓùwìè wɔŋ dewàuŋ nɔɔ̀ŋ wɔŋ dèè wèè anyùùŋ fùɔ̀ŋ Ezɔ̀ɛ̀ɔ nyaŋ go nàŋ yɛ̀mɛ̀ è gbòlòùŋ jòòwoɛ̀ wɔ̀ŋ dewàuŋ nɔɔ̀ŋ e fàa è fɛ̀ɛ̀ yèè e jɔɔnɔ̀ŋ.

¹⁴ Anyùùŋ nyaŋ naŋ wa nyìngè e ɗì nyaŋ, maŋ jii nyiŋ màŋ naŋ wa gbɔumgbɔ̀ɔ̀. E dìì màànàaŋ sèè àŋ nɔ̀ŋ wa ko kpìnìè wɔŋ fɛ̀ì e mìèsùàguùŋ gɔuɔ̀, wɔŋ dèè guùŋ wiiŋ àŋ ɓuwo wa ɗì wɔŋ, kòò wɔ̀ŋ ɓùùwà nyiìŋ nɔŋ maŋ jii komaŋ diɛ̀ŋ, nààŋ àŋ nɔ̀ŋ kpìnìè maŋ fɛ̀ì mìèsùàguùŋ gɔu màŋ. Sɔɔ̀ nɔŋ wo nyùùŋ sɛ̀ɛ̀ kè gbòò Jisɛ̀ Kulaìɛ sùà pangàà wɔŋ dèè bi fòloùŋ ɗì.

¹⁵ Maŋ niìsìa mɛɛ̀ŋ pɛɛ sùà nàaŋ, sèè àŋ kpɛnɛŋ ke sàwà Mòòzeɛ̀, wɔŋ dèè wiiŋ kòò wɔ̀ŋ gbuwa maŋ jii nyiŋ màŋ diɛŋ.

¹⁶ Kɛɛ wɔŋ dèè bi folo nyùùŋ jii diɛŋ, màànààŋ wɔŋ fɛ̀ì Dayàa naŋ woò nyaàiŋ dè Mòòze lɛ̀. “Wɔŋ dèèɔ folo ke jìì nyùùŋ diɛŋ sèè wò kile koɓɛ̀ Kanaà.”

¹⁷ Ke mìè gbòa yɛɛ̀ sùà, “Wo Kanaà” nàŋ yaà wo Jinàaŋ Dayàa. Koɓɛ̀i wo Jìnàŋ Kanaà yaà fɛɛ̀feìŋ lɛ, kuŋ e nyaàŋ gè diɛŋ è nɔ̀ŋ.

¹⁸ Yàwi nààŋ gbiŋ, maŋ dewà wi màŋ tɔɔ̀ e jòòwò Kanaà maŋ dewà gò ɓùwà sùà, yèè e jòòwò guùŋ bi è yewe wo Kanaà sìwè, wo yèɔ yaà wo Jinàaŋ wɔ̀, wò naŋ wi kìlè e ɗeweɛ̀ wò yaà lɛ sùà e jòòwo tɛ̀mɛ̀ɛ̀ gbee bà sùà.