2 Kɔliìŋ 13 - WƆŊ FƐ̀Ì EBÒ SÌÀŊ DAYÀA

Maŋ mìè gòo dìàmaaŋ màŋ yèè maŋ zùùmo

¹ E teenga dìà è taaà lɛɛ̀ mìŋ yaà hìnìè kaiŋ jaamè. Wɔŋ fɛ̀ì Dayàa naŋ woò wààŋ, “Wo nyùùŋ gbiŋ naŋ kùwìè e keì wòo, wo kuwìè aŋ sèì tìyèe ɔ̀ɔ̀ taai.”

² Mìŋ manaŋ ka wòò nyɛ̀iŋ nyàŋ naŋ wa nyɛ̀nɛ̀ŋ maŋ jùumù e gɔuo sùà nyaŋ, yèè anyuùŋ gbànaŋ nyàŋ gbiŋ, kàiŋ woò è guùŋ e hnàaŋ dìà è tìyèe mɛ̀ sùà ko nɛ̀ɛ̀ŋ niìŋ, kɛɛ mìŋ yààìŋ ɓɛìŋ wòo sùà nààŋ miŋ fòò yɛi le, e hnàaàŋ mìŋ do nàŋ hnè lɛ wo nyùùŋ gbiŋ naàŋ fòlò è ngàìnɓuɛ̀ dìì.

³ Tɛɛ̀ do nàŋ tɔ̀ɔ̀ ko nɛ̀ɛ̀ŋ niìŋ kɛ̀ mìŋ gboo wèè Jisɛ̀ Kulaì. Sèè wò dèùm ke dòmaàŋ diɛŋ, wo fè niŋ nɔŋ nyɛ̀nɛ̀ŋ mààŋ wò nyùùŋ naŋ yɔkpɔ̀, wò tɔɔ̀ e gaàuŋ nɛ̀ e tɛɛiŋ.

⁴ Jòòpɛɛ wò yaà wa yɔ̀kpɔuŋ e teengaà àŋ nauŋ jìwè wɔŋ vànèkpaàa diɛŋ lɛ̀, kɛɛ esàɓù e gààŋ Dayàa sùà wò yaà wɔŋ nyiiŋ gèeɔ̀ sùà. È naiŋ yɔkpɔ̀ màànààŋ nɔŋ wo Jisɛ̀ Kulaì yaà wa lɛ̀, kɛɛ sèè è hnàìŋ nèè tɛɛ, è doiŋ nàŋ nɔ̀ŋ wɔŋ nyiiŋ gèeɔ̀ sùà esàɓù e gààŋ Dayàa sùà, nààŋ nɔŋ wo Jisɛ̀ Kulaì yaà lɛ.

⁵ Tùaìŋ nyɛ̀iŋ bi maŋ nɔnɔŋ niŋ yɛmɛ̀ sèè mààŋ nìŋ kuwa kai e hààweɛ̀ màŋ nyiiŋ gèeiŋ màŋ sùà. Tɔɔɓaa nàŋ nyìmàŋ kɛ̀ wo Jisɛ̀ Kulaì yaà maŋ nyiiŋ màŋ sùà? Sɔɔ̀ nɔŋ naŋ nɔŋ soò kpɛlɛmɛɛŋ.

⁶ Mìŋ kuwa ke jii tùlia kɛ̀ nìŋ do nàŋ nyìmè kɛ̀ e fèìŋ ànyuùŋ sòòo.

⁷ È zoolà Dayà wèè ɓɔ̀ nìŋ nyɛ̀nɛ̀ŋ keì naanààŋ. E fè yɛi zoolò wèè e tɔ̀ɔ̀ yàwi bi kɛ̀ è nyɛ̀nɛ̀ŋ tɛ̀ɛ̀, kɛɛ è yaà wèè naŋ nyɛ̀nɛ̀ŋ e keì tɔ̀ɔ̀nyaàaŋ àŋ jaa kùàŋ dìì lɛ jòòpɛɛ è yaà guùŋ mààŋ èiŋ soòò.

⁸ E nɛ̀ɛŋ gbiŋ è naiŋ ɓɛ̀nɛ̀ŋ nyɛ̀nɛŋ lɛ̀ nàŋ yaà wèè eiŋ dè e tɔ̀ɔ̀nyaàŋ maŋjɛ̀wɛ, kɛɛ e fè wèè eiŋ niŋ sumìàŋ.

⁹ È gèìŋ zɔlɔ̀ sèè è yɔkpɔ̀ìŋ, kɛɛ nyɛ̀iŋ e gààŋ yààìŋ . Yèè e wèètii è zoolàìŋ ɓɛìŋ wèè naŋ zɛ̀nɛ̀ŋ.

¹⁰ Esaɓùɛ lii miŋ gòiŋ gbɛ̀ɛ̀ kɛɛ mìŋ naiŋ sìngè wɔŋ fɛi wɛɛ̀ŋ, wɔ̀ŋ yaà wèè sèè mìŋ hnàŋ miŋ go nàŋ tòòmò è gààaŋ wo Kanaà naim kiɛ̀ŋ lɛ kaiŋ fè è keì nyìnga, wò naim niŋ kiɛ̀ŋ wèè kaiŋ nyɛ̀nɛ̀ŋ naŋ nyìngà sùà kɛɛ e fè wèè kaiŋ pɔ̀ɔ̀ jɛ̀i.

¹¹ E gbiŋ sùà, nyɛ̀iŋ nààŋ wùìyaim nyàŋ enììsìàiŋ. Nɔ̀ɔìŋ tɛ̀ɛ̀ yèè niŋ kuwìè e gòngo wèè maŋ keì maŋ mìŋ naiŋ woò maŋ. Fɛ̀ɛìŋ niŋ nɔ̀ŋ ɓɛ̀ guùŋ ke jii fàa sùà. Kɛ̀ wo Dayà kùwìè e mànaàŋ yaà ke jii fàa doiŋ nàŋ nɔ̀ŋ e kɔɔ.

¹² Zùùmoìŋ aŋ dàwiiŋ nyàŋ e ɓɛ̀ɛ̀jàà titi sùà. Anyùùŋ nɛ̀ɛ̀màŋ Dayà nyaŋ gbiŋ naiŋ tùɔ̀ŋ e zùùmo.

¹³ Mìŋ zoolà wèè wo Kanaà Jisɛ̀ Kulaì woiŋ kìɛ̀ŋ e tɛ̀ɛ̀tɛ̀ɛ̀. Tɔ̀ wo Dayà kpuumàiŋ e mànauŋ nɛ̀, e kìlà wo Jìnàŋ Nɛɛmaàŋ wo jaanè maŋ jiiiŋ màŋ koɓɛ̀ guùŋ.