1Time 5 - WƆŊ FƐ̀Ì EBÒ SÌÀŊ DAYÀA

Maŋ kpàŋ è kɔ̀ɔ̀ Timetè maŋ koɓɛ̀ anyuùŋ hààwe dàwiuŋ nyàŋ

¹ Ɓɔ̀ mùŋ gbuuyà wò nyuùŋ kàìŋ wɔ̀ŋ golà mie naanààŋ, kɛɛ wòò nyuùŋ kàìŋ e keì e ɓɛ̀ɛ̀jàa sùà mààŋ wo dèdaum. Kuwà aŋ kɔmɔŋjɔa bɔwɔ nyàŋ mààŋ aŋ wùìyaum,

² kuwà aŋ jɔùŋ nyuùŋ kàìŋ nyaŋ mààŋ aŋ yèyeum, aŋ jɔùŋ jɔa bɔwɔ nyàŋ, mààŋ aŋ jaaum, ke kpèè siaŋ sùà.

³ Tɔ̀ɔ̀ e ɓɛ̀ɛ̀jàa koɓɛ̀ aŋ jɔ̀ùnèèdàà nyaŋ yaà kùàŋ nyiìŋ bi nyàŋ.

⁴ Kɛɛ sèè wo jɔ̀ùŋèèdààa kɛɛnɛ̀ŋ aŋ jɔ̀à ɔ̀ɔ̀ aŋ jɔ̀ɛ̀ɛ, aŋ jɔ̀à nyɛɛ̀ŋ aŋ yɛmɛ̀ e kèè anyuùŋ kòmaŋ nyiŋ nyàŋ dììo sùà jiɛ̀ kɛ̀ àŋ yaà toomo wèè Dayà. Tɛɛ̀ do nàŋ nɔ̀ŋ e jìwààjɛ̀wɛ̀ siaŋ e weè nyiŋ yèè tɛɛ̀ nàŋ fà wo Dayà jii.

⁵ Wo jɔ̀ùŋèèdààa yaà wèè wuŋ bi wɔ̀, wo yèɔ kuwà nyuùŋ kpùùmauŋ wɔ̀, wò naŋ sìè ke jii tùliauŋ nɛɛ̀ŋ wo Dayà sùà yèè wò do nàŋ nɔ̀ŋ zoolo keleiŋ wò yaà dààwè Dayà wèè è kpùùmaŋ e dùùm yaà maŋ gɔɛ.

⁶ Kɛɛ wo jɔ̀ùŋèèdààa naŋ sìè wuŋ bi e gbana sùà wɔ, wò yaà e fàauŋ tɛ, jòòpɛɛ wò yaà wɔŋ nyiiŋ gèeɔ̀ sùà.

⁷ Kàà maŋ keì wòo mɛɛ̀ŋ anyùùŋ nyaŋ gbiŋ, wèè ɓɔ̀ àŋ nyɛ̀nɛ̀ŋ màŋ kpèè naanààŋ.

⁸ Kɛɛ sèè wo nyùùŋ gbiŋ go yɛ̀mɛ̀ ke kpoouŋ nɛɛ̀ŋ diɛŋ, ɓɔɔɓɔɔ ngèè aŋ yè nyaŋ yaà ke kpòò nyiiŋ biɛ̀ sùà nyaŋ, àŋ gììyà e hààweɛ̀ maŋhɛɛ, yèè àŋ nìàŋ anyuùŋ gò kùwìè hààwe nyàŋ.

⁹ Ɓɔ̀ nìŋ sìà è dèè wò jɔ̀ùŋèèdààa wo yèɔ gò hàì màŋ doa kpɛ̀ùŋ taai wɔ̀, wɔ̀ŋ fɛ̀ì màŋ dèè àŋ jɔ̀ùŋèèdààa nyaŋ sùà. E tòòyà tii nàŋ yaà, wo nɔ̀ŋ yèɔ naŋ wa gè wo felaa è guùŋ wɔ,

¹⁰ yèè wo nɔ̀ŋ wo nyùnɔ̀ɔŋ àŋ gboo tɛ̀ɛ̀ e nyaàiŋ euŋ dè wèè ke kpèè siaŋ wɔ̀. Wo nɔ̀ŋ wo jɔunɔ̀ɔŋ wo yèɔ naŋ gè aŋ jɔ̀àuŋ nyàŋ dìì tɛ̀ɛ̀ wɔ, wo yèɔ naŋ jàà aŋ nyùnèènyɛiŋ kùàŋ dìì ko gboo noo wɔ̀, wo nɔ̀ŋ nyùnɔ̀ɔŋ deeyà wuŋ bi e tòmò nɛɛmaŋ sùà wèè anyuùŋ hààwe joo wɔ̀, wo kpuumàŋ anyùùŋ nyaŋ yaà maŋ keì nyìnga sùà nyaŋ, yèè wò naŋ gbìɛ̀ŋ ke nyɛ̀nɛ̀uŋ nɛɛ̀ŋ gbiŋ e keì sìàŋ nyɛ̀nɛŋ maŋjɛ̀wɛ wɔ̀.

¹¹ Ɓɔ̀ nìŋ sìà màŋ dèè jɔ̀ùnèèdàà bɔwɔ wɔ̀ŋ fɛ̀ì màŋ dèè àŋ jɔ̀ùnèèdàà nyaŋ sùà, esaɓùɛ nàŋ yaà kɛ̀ e ɗèwe nyiŋ nɛ̀ nyɛ̀nɛ̀ŋ nyiìŋ wèè aŋ gè felaa, e kìlà àŋ kɛ̀ɛ̀ wo Jisɛ̀ Kulaì maŋjɛ̀wɛ,

¹² yèè e keì do nyiŋ nàŋ jeeè e gbài sùà wèè e ɗààhìì e hààweɛ̀ àŋ naŋ pɔɔ̀ ko nɛ̀ɛ̀uŋ niìŋ lɛ.

¹³ Àŋ gbeà e ɗèwè teenga nyiŋ nɛ̀ pɔ̀ɔ nààŋ àŋ kilià maŋ saaŋ dìì, kɛɛ e yèɛ naŋ tii nìè lɛ nàŋ yaà, àŋ gbeà ɗèwe anyuùŋ fìèfie yèè àŋ yaà anyuùŋ sìà woya anyùùŋ fèemàŋ, e kìlà àŋ yaà wòò maŋ keì maŋ fè màŋ keì wòo nyiŋ màŋ.

¹⁴ Weètii mìŋ do naŋ mɔ̀nɔ̀ŋ aŋ jɔ̀ùnèèdàà bɔwɔ nyàŋ aŋ gè aŋ felaa, aŋ kòmàŋ aŋ jɔ̀à, yèè aŋ yɛ̀mɛ̀ maŋ kpoo nyiŋ màŋ diɛŋ, wèè aŋ go nàŋ kìɛ̀ŋ àŋ joo wi nyàŋ e ɗeweɛ̀ wèè àŋ do wòò màŋ keì naanààŋ è weè wi.

¹⁵ Aŋ jɔ̀ùnèèdàà nyaŋ bà nyiŋ àŋ naàŋ kìlà wèè aŋ dè wo Sɛ̀tanàaŋ maŋjɛ̀wɛ.

¹⁶ Kɛɛ sèè wo jɔùŋ kɛ̀ɛ̀nɛ̀ŋ hààweɔ̀ ke gbòò anyuùŋ hààwe nyàŋ sùà naŋ kɛ̀ɛ̀nɛ̀ŋ aŋ jɔ̀ùnèèdàà ke kpoouŋ nɛɛ̀ŋ sùà, wo yɛmɛ̀ nyiŋ diɛŋ yèè ɓɔ̀ wò jàà kii nyiŋ nɛ̀ ànyuùŋ hààwe nyàŋ ɗì, wèè aŋ yɛmɛ̀ jɔ̀ùnèèdàà nyaŋ yaà wèè nyiìŋ bi nyàŋ diɛŋ.

¹⁷ Aŋ màmàŋkùmɛŋ nyàŋ tomàŋ tɛ̀ɛ̀ mààŋ aŋ sìèfeìŋ nyaŋ, jàaìŋ nyiŋ kùàŋ dìì e dɛ̀ɛ̀kɛ sùà wèè aŋ yɛmɛ̀ e jìwààjɛ̀wɛ̀ gbee, ɓɔɔɓɔɔ ngèè aŋ yè nyàŋ tomàŋ nyìnga ko gbùùyè ke mìè Dayàa yèè àŋ kaà nyìŋ nyaŋ.

¹⁸ Wɔŋ fɛ̀ì Dayàa naŋ woò wààŋ, “Ɓɔ̀ mùŋ dèkà wò dìiɔ̀ nyààŋ sèè mùŋ nɔ̀ɔùŋ tòòmo sùà wèè wo tììlà lè jɔɔ mɔ̀ɛ̀.” E kìlà “Niŋ kiɛ̀ŋ anyuùŋ tòmo nyàŋ e pààwa nyiŋ nɛ̀.”

¹⁹ Ɓɔ̀ mùŋ kumiàŋ è keìɛ àŋ naŋ wòò wo màmàŋkùmɛɔ̀ŋ dèè lɛ, sɔɔ̀ e yèɛ aŋ sèì tìyèe ɔ̀ɔ̀ aŋ yɛi nìàŋ àŋ hiàŋ lɛ.

²⁰ Gbùùyaà aŋ yè nyaŋ gbiŋ naŋ nyɛ̀nɛ̀ŋ jùumù ko ɓài nyàŋ, wèè e jùù nyɛ̀nɛ̀ŋ anyuùŋ gbànaŋ nyàŋ.

²¹ Ko fɛ̀ɛ̀fèìŋ Dayài yèè wo Jisɛ̀ Kulaì yaà aŋ màìkà nɛɛmaŋ tàeɗùù nyaŋ, mìŋ yààìŋ dàwe sùà wèè naŋ jɔ̀ɔ̀lɔ̀ maŋ keì wòo mɛɛ̀ŋ dìì e yèɛ fè hìàŋ è nyànge wèè è nɛ̀ɛ̀ŋ mùŋ naŋ nyɛ̀nɛ̀ŋ lɛ.

²² Ɓɔ̀ mùŋ jèlà ke jii wèè maŋ gbùwà wɔ̀ŋ kùàŋ è zòòlo wò nyùùŋ diɛŋ, wèè wo nɔ̀ŋ e tòmò kanaà Jisɛ̀ Kulaì lɛ sùà. Ɓɔ̀ mùŋ nɔ̀ŋ wò bàumbà wèè màŋ jùùmù nyuùŋ joo, nyɛnɛ̀ŋ muàŋ bi muŋ nɔ̀ŋ sengei.

²³ Ɓɔ̀ mùŋ tìà nɔŋ màŋ màì miìŋ guùŋ, kɛɛ tìa maŋ tala muaŋ jɔa tòloò wèè e sàaàŋ yaà ko sùà muìŋ lɛ.

²⁴ Maŋ jùùmù anyùùŋ nyaŋ bà nyiŋ hawa nɔŋ janjai e kìlà àŋ yɛmɛ̀ miìŋ, yèè maŋ jùumù nyiŋ màŋ yaà nyiìŋ feìŋ wèè e tèèngà gbàiɛ̀, kɛɛ maŋ jùùmù anyùùŋ nyaŋ bà nyiŋ màŋ nɔ̀ŋ ko nyɛɛnɛŋ yèè àŋ do miŋ wa nàwee nàŋ yɛmɛ̀ ko dòmàŋfeìŋ.

²⁵ Yɛi nɔŋ e ɗèwè guùŋ bi sùà, àŋ yɛmɛ̀ maŋ tòmo siaŋ nyiŋ màŋ janjai, yèè maŋ yè maŋ aŋ fè yɛmɛ̀ janjai màŋ, maŋ fè ɓɛ̀nɛ̀ŋ nɔ̀ŋ ko nyɛɛnɛŋ.