1Time 2 - WƆŊ FƐ̀Ì EBÒ SÌÀŊ DAYÀA

E zòòlò anyuùŋ hààwe nyàŋ

¹ E jiɛ̀jiɛ̀ nàŋ yaà, mìŋ yààìŋ dàwe sùà wèè naŋ zoolò wèè anyùùŋ nyaŋ gbiŋ. Dàweìŋ Dayà, yèè niŋ kiɛ̀ŋ ke sɛ̀ gèe wèè anyùùŋ Dayà nyaŋ gbiŋ.

² Zòòloìŋ wèè aŋ kana nyàŋ, yèè aŋ yè nyaŋ yaà e gààŋ sùà nyaŋ aŋ nɔ̀ŋ dìì tɔ̀ùŋ, yèè aŋ kuwiè maŋ jii fàa maŋ nyiiŋ gèe nyiŋ màŋ sùà, nààŋ è zoolàìŋ wo Dayà e tɔ̀ɔ̀nyaàaŋ sùà lɛ.

³ E zòòlo mààŋ tɛɛ̀ è yaà tɛ̀ɛ̀, yèè è fɔɔyɛ̀ wo Dayà wo Nyuùŋ Jòèye wiɔ̀ ke jii,

⁴ wo yèɔ manaŋ wèè wo nyùùŋ gbiŋ yɛ̀mɛ̀ e jòèye yèè wo nyìmàŋ e tɔ̀ɔ̀nyaàaŋ wɔ̀.

⁵ Wo Dayà yaà nɔŋ wo guùŋ, yèè wo nyùùŋ guùŋ nɔŋ nàŋ sia e fèèmàŋ wo Dayà yaà anyuùŋ kpùuŋ, wo nyùùŋ bi nàŋ yaà wo Jisɛ̀ Kulaì,

⁶ wo yèɔ naŋ wa kìɛ̀ŋ wuŋ bi wèè wo nɔ̀ŋ e nɛ̀ŋ saàà wèè wo bìlɛ̀ŋ anyuùŋ kpùuŋ nyàŋ gbiŋ. Kii nàŋ yaà wa ke mìè seìɛ naŋ hnè e teengaà diɛŋ lɛ̀ kɛ̀, wo Dayà manaŋ wèè wo nyùùŋ gbiŋ yɛ̀mɛ̀ e jòèye,

⁷ yèè wèètii wo Dayà naim tùɔ̀ŋ wèè ka nɔ̀ŋ wo keela tàeɗùùuŋ nɔɔ̀ŋ bà, yèè wo kààmɔɔŋ koɓɛ̀ anyùùŋ nyaŋ fè àŋ Juùù nyaŋ, wèè ka dàànè ebò ke mìè gbìaŋ e hààwe yaà e tɔ̀ɔ̀nyaàaŋ. Miŋ fè tòaà sùà, mìŋ yààìŋ wòò sùà e tɔ̀ɔ̀nyaàaŋ.

⁸ E zòòlò anyùùŋ hààwe gbiŋ sùà mìŋ manaŋ aŋ felaa nyàŋ aŋ zoolò, aŋ felaa nyàŋ naŋ sìè e hààwe nyiŋ nɛ̀ wo Dayà nɛɛmaàŋ sùà nyaŋ yèè àŋ joowà maŋ kùàŋ zòòlo gò kùwìè màŋ jii bìya e kìlà aŋ fè nyɛ̀nɛ̀ŋ nyaàŋ tàaŋ nyàŋ.

⁹ Mìŋ manaŋ ɓɛìŋ wèè aŋ jɔùŋ nyaŋ aŋ dèèyè nyiiŋ bi yèè aŋ kuwiè jiikɛ̀ɛ wèè maŋ dèè kɔɔ nyiŋ màŋ, yèè e kpàa kii nyiŋ nɛ̀ e nɔ̀ŋ tɛ̀ɛ̀, aŋ haà maŋ ɗì nyiŋ màŋ e ɓɛ̀ɛ̀jàa sùà, ɓɔ̀ aŋ sìà màŋ gòoò jɔ̀ɔ̀ɔ, ɓɔ̀ àŋ sìà màŋ dɔmɔŋ, ɓɔ̀ àŋ kpàà màŋ deè nyìngà ɓaà.

¹⁰ Kɛɛ e nɔ̀ŋ wèè maŋ kpèè siaŋ, maŋ yè maŋ yaà tɛ̀ɛ̀ wèè aŋ jɔùŋ nyaŋ naŋ ɓèmè e ɗààhiì wèè aŋ nɔ̀ŋ anyuùŋ hààwe nyàŋ.

¹¹ Aŋ jɔùŋ nyaŋ nɔ̀ŋ dìì tɔùŋ, e kìlà aŋ jɔɔlɔ̀ aŋ sìèfeìŋ anyùùŋ hààwe nyàŋ dìì.

¹² Miŋ gò nyiŋ gè nyààŋ diɛŋ wèè aiŋ kaà, ɔ̀ɔ̀ wèè aŋ kɛ̀ɛ̀nɛ̀ŋ è gààŋ àŋ felaa nyàŋ diɛŋ, aŋ nɔ̀ŋ dìì tɔùŋ.

¹³ Jàaìŋ jii kɛ̀, wo Adamàŋ jiɛ̀ wo Dayà naŋ wa bànè, yèèngàà wò naŋ bànè wo Màmaŋ Hàwa.

¹⁴ E kìlà wo Adamàŋ nààŋ wo Sɛ̀tanàŋ gò wa zuwò, wo jɔunɔ̀ɔŋ wò naŋ wa zuwò yèè wò naŋ pɔ̀ɔ̀ ke sàwà Dayàa.

¹⁵ Kɛɛ wo jɔùŋ do nàŋ yɛ̀mɛ̀ e jòèye esàɓù aŋ jɔ̀à nyaŋ wò naŋ kòmò nyaŋ. E kìlà sèè wo jèè e hààwe yaà e mànaŋ sùà, yèè wo nɔ̀ŋ nyùùŋ nɛɛmaŋ ko fɛ̀ɛ̀fèìŋ Dayài.