1Tɛsè 5 - WƆŊ FƐ̀Ì EBÒ SÌÀŊ DAYÀA

Bànèbaneìŋ wo Kanaà do nàŋ hnè

¹ Esaɓù bà gbiŋ fè wèè kaiŋ sìngà wɔ̀ŋ fɛi nyɛ̀iŋ nààŋ wùìyaim nyàŋ, wèè è teengaà ɔ̀ɔ̀ kè ɗɔɔɛ̀ màŋ keì mɛɛ̀ŋ do nàŋ kaaìŋ nɛ.

² Nyɛ̀iŋ bi nàŋ nyìmàŋ kɛ̀ ke ɗɔ̀ɔ̀ e hnàŋ Kanaà Jisɛ̀ do nàŋ nɔ̀ŋ màànààŋ e ɗeweɛ̀ wo nyuùŋ wùa hnàŋ e fòòno sùà lɛ.

³ Sèè àŋ woà naàŋ nyààŋ, “E dìì naàŋ nɔ̀ŋ gìli ke jii fàa diɛŋ,” e teengaà lii kinɛiŋ e keì nyìnga do nyiŋ nàŋ foonò, mààŋ koɓɛ̀i e sùàhɛ̀ɛ̀ kòmaŋ foonàŋ yɛi wo jɔùŋ ne, yèè wo nyùùŋ gbiŋ naàŋ niìŋ fòlò dìì.

⁴ Kɛɛ nyɛ̀iŋ wùìyaim nyàŋ, niŋ fè kè nyìwìi sùà e kìlà ke ɗɔɔɛ̀ wo Jisɛ̀ do nàŋ hnè lɛ ɓɔ̀ è foonòiŋ màànààŋ wò anyuùŋ wùaà foonàŋ nyùùŋ nɛ.

⁵ Yàwi nààŋ nyuùŋ hààwe nyàŋ gbiŋ è nyɛ̀nɛ̀ìŋ e yèɛ yaà e tɔ̀ɔ̀nyaàŋ lɛ màànààŋ anyùùŋ nyaŋ nyɛnɛŋ niìsìaà sùà lɛ. E fèìŋ ànyuùŋ nyɛ̀nɛ̀ŋ màŋ keì naanààŋ mààŋ ànyùùŋ nyaŋ bà nyiŋ nyɛnɛŋ kè nyìwìɛ sùà lɛ.

⁶ Wèètii, ɓɔ̀ è nɔ̀iŋ màŋjàwè mààŋ ànyuùŋ gbànaŋ nyàŋ, jèè wiìŋ e fɛɛ̀ wòwò, yèè maŋ gòngo wi màŋ jilɛ̀ŋ.

⁷ E dùùm anyùùŋ jiwìà, yèè e dùùm maŋ mùàŋ kùwò nyiìŋ.

⁸ Kɛɛ yàwi nààŋ nyuùŋ hààwe nyàŋ, kuwa wèè eiŋ yɛ̀mɛ̀ yàwi bi diɛŋ mààŋ aŋ nyùùŋ nyaŋ wɔŋ niìsìaà sùà. E kìlà e hààwe wilɛ̀ yaà e mànaŋ wilɛ̀ e nɔŋ mààŋ wɔŋ kaì fàà ɓɔwɔɔɔ̀ wo kààlò ɗùàa gbuwo ke sɔɔ wo kà e ɗùà feìŋ wɔŋ. Ke jii tùliaà è kuwa kɛ̀ è doiŋ nàŋ yɛ̀mɛ̀ e jòèye lɛ̀, kè yaà mààŋ ke ɓɔ̀ɗì ɗùàa wo kààlò ɗùàa gbuwo ko ɗì wo kà e ɗùà feìŋ yɛ.

⁹ Wo Dayà gò wi wa tàeɗùù wèè wo mɔ̀ɔ̀nɛ̀ŋ è wuàuŋ nɛ̀, kɛɛ wèè eiŋ kùwìè e jòèye esàɓù Kana wiɔ̀ Jisɛ̀ Kulaì sùà,

¹⁰ wo yèɔ naŋ fɔ̀ weè wi e wèè wuŋ yèè yàwi nààŋ gbiŋ eiŋ nɔ̀ŋ koɓɛ̀ guùŋ eiŋ pɛɛ nɔ̀ŋ nyiiŋ gèeɔ̀ sùà, ɔ̀ɔ̀ eiŋ fà e teengaà wò hnàŋ wa nàwèè lɛ.

¹¹ Wèètii fèeìŋ aŋ dàwiiŋ nyàŋ maŋ jii nyingè, yèè niŋ kpuumàŋ e fèemàŋ màànààŋ nìŋ yaà yɛi nɔŋ nyinie le.

Maŋ mìè gòo dìàmaaŋ màŋ yaà maŋ zùùmo

¹² È yààìŋ dàwe sùà, nyɛ̀iŋ nààŋ wùìya wi nyàŋ Kanaà sùà, wèè naŋ fè aŋ kààmɔɔŋ nyàŋ yààìŋ tòòmò e tɛɛ nyàŋ e ɓɛ̀ɛ̀jàa, aŋ yè nyaŋ sìàìŋ feìŋ àŋ dèìŋ ke dòmaŋ diɛŋ yèè àŋ kiɛ̀ìŋ maŋ mìè gòo e nyaàìŋ dè wɔŋ nyììŋ gè anyuùŋ hààwe nyàŋ nìŋ yaà sùà wɔŋ.

¹³ Fèeìŋ nyiŋ e ɓɛ̀ɛ̀jàa gbee yèè e mànaŋ sàɓù e tòmoɛ̀ àŋ yaà nyinie lɛ̀. Nyɛ̀iŋ bi ke jii fàa nɔ̀iŋ fèemàŋ.

¹⁴ È yààìŋ pɔ̀wɔ sùà, wùìya wi nyàŋ, wèè naŋ fè anyuùŋ gànga wèè tòmo nyàŋ maŋ mìè gòo, niŋ sìà aŋ yè nyaŋ e jùù naŋ bìè nyɛ̀nɛŋ nyàŋ ke di, kpùùmaìŋ anyuùŋ nyaŋ manaŋ e kpùùmaŋ nyàŋ, kùwaìŋ jii wèè nyùùŋ gbiŋ.

¹⁵ Ɓɔ̀ nìŋ yɛmɛ̀ wò nyùùŋ gbiŋ wèè wo gììyà è kpàŋ keì naanààŋ wò dawiuŋ nɔɔ̀ŋ, kɛɛ e teenga gbiŋ sùà e gòngoiŋ nɛ̀ nɔ̀ŋ wèè naŋ nyìnìàŋ keì sìàŋ e fèemàŋ, yèè naŋ niŋ nyɛ̀nɛ̀ŋ koɓɛ̀ nyùùŋ gbiŋ.

¹⁶ Nɔ̀ɔìŋ e zɔlɔ̀ sùà e teenga gbiŋ.

¹⁷ Zòòloìŋ e teenga gbiŋ.

¹⁸ Gèeìŋ Dayà sɛ̀ e keì gbiŋ sùà. Tii nàŋ yaà e nɛ̀ɛŋ wò mànàìŋ sìwè wɔŋ nyiiŋ gèeiŋ nɔɔ̀ŋ sùà nààŋ nìŋ yaà aŋ bàiŋbà wo Jisɛ̀ Kulaìɛ sùà lɛ.

¹⁹ Ɓɔ̀ nìŋ kilìà wò Jìnàŋ Nɛɛmaàŋ kùàŋ feìŋ.

²⁰ Ɓɔ̀ nìŋ niingè kè mìè gbìàŋ wɛ̀ijì è fɛ̀ɛ̀.

²¹ E nɛ̀ŋ gbiŋ sɔɔ̀ naŋ niŋ tùàŋ maŋ nɔnɔŋ, e yèɛ siaŋ lɛ̀ naŋ niŋ ɓemè

²² yèè naŋ gbààè e keì naanààŋ kà tinàŋ gbiŋ wèè nyɛ̀nɛŋ.

²³ Tɔ̀ wo Dayàa naŋ wi fè jii fàa wɔ̀ wo nyɛ̀nɛ̀iŋ niŋ nɔ̀ŋ e nɛɛmaŋ sùà dòmaŋ nyaaŋ gbiŋ, yèè wo haà saɓù e tɔ̀mɛ gbiŋ ɓɔ̀ è nɔ̀ŋ è kpùnuiŋ nɛ̀, wò jinàiŋ nɔɔ̀ŋ, yaà kè kpùnaiŋ nɛɛ̀ŋ è teengaà wò Kana wiɔ̀ Jisɛ̀ Kulaì hnàŋ wa nàwèè lɛ.

²⁴ Wo nyùnùɔŋ naiŋ nyààŋ wɔ wò do niŋ nàŋ nyɛ̀nɛ̀ŋ esaɓù kɛ̀ wò yaà wo nyuùŋ tùlìà jii.

²⁵ Wùìya wi nyàŋ, zòòloìŋ weè wi yàwi pɛɛ.

²⁶ Zùùmoìŋ aŋ wùìya wi nyàŋ gbiŋ e nɛɛmaŋ sùà.

²⁷ Mìŋ yààìŋ pɔ̀wɔ sùà e yìwìà e gààŋ Kanaà Jisɛ̀ sùà wèè naŋ kpɛ̀nɛ̀ŋ wɔŋ fɛi wɛɛ̀ŋ koɓɛ̀ aŋ wùìya nyàŋ gbiŋ.

²⁸ Mìŋ zoolà wèè e tɛ̀ɛ̀tɛ̀ɛ̀ Kana wiɔ̀ Jisɛ̀ Kulaì eiŋ nɔ̀ŋ maŋjɛ̀wɛ.