1Tɛsè 4 - WƆŊ FƐ̀Ì EBÒ SÌÀŊ DAYÀA

Wɔŋ nyiiŋ gèeɔ̀ wo Dayà manaŋ wɔ̀ŋ

¹ Nyɛiŋ nààŋ wùìya wi nyàŋ, ko jèè e ɗìi nàŋ yaà kɛ̀ nàŋ wi naàŋ gbèè ko sìwè nàŋ nyìmàŋ kɛ̀ diè nìŋ nɔ̀ŋ wɔŋ nyiiŋ gèeɔ̀ sùà wèè naŋ nyɛ̀nɛ̀ŋ wo Dayà ke jiiuŋ nɛɛ̀ŋ ke fà. Wɔŋ nyiiŋ gèe wiiŋ nɔŋ zà nìŋ yaà sùà. Kɛɛ è yààìŋ pɔ̀wɔ sùà yèè è dawàìŋ e dèè Kanaà Jisɛ̀ɛ diɛŋ wèè naŋ jɔɔlɔ̀ e tii nìàŋ.

² Nàŋ nyìmàŋ manɛ̀ŋ nyɛ̀nɛŋ màŋ è naiŋ fè wèè naŋ nyɛ̀nɛ̀ŋ e yìwìà e gààŋ Kanaà Jisɛ̀ɛ sùà lɛ.

³ Wo Dayà manaŋ wèè naŋ nɔ̀ŋ e nɛɛmaŋ sùà, e kìlà e kèì nàànààŋ hmɔŋtu nyɛ̀nɛŋ gbiŋ ɓɔ̀ è gbɛ̀ɛ̀iŋ kɔɔ.

⁴ Nyɛ̀iŋ nyɛɛ̀ŋ bà gbiŋ nìŋ kuwa naŋ yɛ̀mɛ̀ ke kpùnaŋ mɔɛ̀ŋ diɛŋ e nɛɛmaŋ yaà e ɓɛ̀ɛ̀jàa sùà.

⁵ È ɗèweiŋ nɛ̀ ɓɔ̀ è nɔ̀ŋ è gòngò hmɔŋtu nyɛ̀nɛŋ màŋjɛ̀wɛ mààŋ anyùùŋ nyaŋ nyimààŋ Dayà nyaŋ.

⁶ E keì lɛɛ̀ sùà, e fèèmàŋ felaa yaà jɔùŋ, wo bà gbiŋ ɓɔ̀ wò kaaɓì àŋ wùìya hààwè Dayà dàwiuŋ nyàŋ ɔ̀ɔ̀ wo nyiŋ nììngè fɛ̀ɛ̀. Èiŋ wa tɛɛ̀ woò gɔu, yèè è yààìŋ fè sùà e gòo nyìnga esaɓù kɛ̀ wo Kanaà Jisɛ̀ do nàŋ ngàìnɓù anyùùŋ nyaŋ nyɛnɛŋ maŋ keì miiŋ nyàŋ.

⁷ Wo Dayà gò wi wa nyààŋ wèè eiŋ nɔ̀ŋ è ninaŋ sùà, sɔɔ̀ wɔŋ nyììŋ nɛɛmaŋ sùà.

⁸ E wèètii, sèè wo nyùùŋ gbiŋ wo gè kùàŋ e kaà lɛ dìì, wo fè gèe sùà wò nyuùŋkpùuŋ kùàŋ dìì, sɔɔ̀ wo Dayà, wo yèɔ naiŋ fè wo Jìnàŋ Nɛɛmauŋ nɔɔ̀ŋ wɔ.

⁹ Esaɓù bà fè wèè eiŋ sìngà wɔ̀ŋ fɛi, è nyaàiŋ dè è ɗeweɛ̀ nìŋ mɔnɔŋ àŋ dàwiiŋ nyàŋ lɛ, esaɓù kɛ̀ nyɛ̀iŋ bi wo Dayà wòiŋ kàà e ɗeweɛ̀ nìŋ kuwìà e mànaŋ wèè aŋ dàwiiŋ nyàŋ lɛ,

¹⁰ yèè kòò nìŋ yaà nyìnìè maŋ kpèè mɛɛ̀ŋ koɓɛ̀ anyuùŋ hààwe nyàŋ gbiŋ maŋ kpàlàùŋ kpàlàùŋ maŋ gbiŋ sùà wɔŋ fàà ko Mɛ̀sèdonià. E wèètii nyɛ̀iŋ nààŋ wùìya wi nyàŋ, è yààìŋ dàwe sùà wèè naŋ nyɛ̀nɛ̀ŋ zimgbe e tii nìàŋ.

¹¹ Nyɛ̀nɛìŋ niŋ e kpàŋ è kɔɔiŋ e gbɔ̀ɔɔ ɓɔ̀ è nɔ̀ŋ maŋ nyiiŋ gèiŋ màŋ sùà, kùwieìŋ e gòngò e kèì nyɛ̀iŋ bi lɛ̀, yèè niŋ kamè e nɛ̀ŋjè nyaàiŋ nɛ̀, màànààŋ nɔŋ è naiŋ wa woò lɛ.

¹² Tɛɛ̀ nàŋ nyɛnɛŋ anyùùŋ nyaŋ kuwà è hààwe nyàŋ, aŋ kùwìè e ɓɛ̀ɛ̀jàa weèiŋ yèè e kìlà niŋ fè yɛ̀mɛ̀ wò nyùùŋ gbiŋ fɛ̀ɛ̀ wèè è nɛ̀ɛŋ nìŋ naŋ kpɛɛ̀ŋ weè niŋ lɛ̀.

E hnàŋ Kanaà Jisɛ̀ɛ

¹³ Nyɛ̀iŋ nààŋ wùìya wi nyàŋ, è manaŋ wèè naŋ nyìmàŋ e tɔɔɓaà nyaàiŋ dè anyùùŋ nyaŋ naŋ fɔ̀ nyaŋ, wèè ke nyowo goiŋ nàŋ nɔ̀ŋ nyinie mààŋ ànyuùŋ gò kùwìè kè jii tùlia.

¹⁴ È naiŋ haawè kɛ̀ wo Jisɛ̀ naŋ fɔ̀ yèè wò naŋ ɓɛìŋ yèwè e dìì, wèètii è naiŋ haawè kɛ̀ wo Dayà do nàŋ ɓèmè Jisɛ̀ e kpùlìà anyùùŋ nyaŋ gbiŋ naŋ jèè e hààweɛ̀ sùà àŋ naŋ fɔ̀ nyaŋ wo nyiŋ kɔà.

¹⁵ E nɛ̀ɛŋ è yààìŋ naàŋ kàa sùà lɛ, e kàa le e yìwìà Kanaà sìwè, yàwi nyàŋ doiŋ nàŋ nɔ̀ŋ wɔŋ nyiiŋ gèeɔ̀ sùà wo Kanaà Jisɛ̀ wa nàwèè hnàŋ nyaŋ, e naìŋ kɔ̀ feìŋ wèè eiŋ jòà ànyuùŋ fàa gɔu nyàŋ jɛ̀wɛ̀.

¹⁶ Ke miè kpàaŋ tɔ̀ɔ̀ ke nyɛ̀nɛŋ nàŋ do nàŋ fòlò, yaà ke mìè wo sìèfèìŋ aŋ màikàa, yèè e gììmè e pòtànàŋ Dayàa, kɛ̀ wo Kanaà Jisɛ̀ wuŋ bi do nàŋ dèyè e yìwìà ko àìjɛnɛ̀ŋ. Anyuùŋ hààwè Jisɛ̀ Kulaì nyaŋ naŋ wa fɔ̀ nyaŋ nyiŋ jiɛ̀ nàŋ yewe e dìì,

¹⁷ pangàà kɛ̀ yàwi nyàŋ kùwàìŋ nyiiŋ gèeɔ̀ e teenga lii sùà nyaŋ, èiŋ gbònògbònò koɓɛ̀ guùŋ ke nyili fuaà sùà wèè eiŋ mɛ̀ɛ̀ŋ wo Kanaà Jisɛ̀ ko fùùiŋ. Kpeiŋ kɛ̀ è doiŋ wa nàwèè naàŋ nàŋ nɔ̀ŋ koɓɛ̀ Kanaà Jisɛ̀i wèè julɔfɔ.

¹⁸ Tòòmoìŋ maŋ mìè gbòa mɛɛ̀ŋ e fèemàŋ niŋ sìà nyɛ̀iŋ bi ke di.