1Pììlɛ 5 - WƆŊ FƐ̀Ì EBÒ SÌÀŊ DAYÀA

Ke mìè gòo koɓɛ̀ anyuùŋ hààwe nyàŋ

¹ Miàŋ bi, mìŋ yaà wo màmàŋkùmɛŋ, mìŋ yaà dàwè sùà aŋ màmàŋkùmɛŋ nyàŋ e tɛɛiŋ. Mìŋ yaà wo sèì Jisɛ̀ Kulaì wèè maŋ keì nyìnga màŋ wò naŋ kɔ̀ dìì maŋ. Yèè e jòòwoɛ̀ do nàŋ hnè lɛ, wuŋ nàŋ kànaìŋ yèè mìŋ do nàŋ nɔ̀ŋ bà nyiŋ bà.

² Nààŋ nɔŋ anyuùŋ yɛ̀mɛ̀ aŋ ɓaawaa diɛŋ nyàŋ yɛmɛ̀ aŋ ɓaawaa nyiŋ nyàŋ diɛŋ lɛ̀, mìŋ yààìŋ dàwe sùà wèè naŋ nɔ̀ŋ anyuùŋ yɛ̀mɛ̀ aŋ ɓààwàà Dayà nyaŋ gbiŋ wò naiŋ sèèlè e kii nyiŋ feìŋ nyaŋ diɛŋ. Nyìniàìŋ niŋ ke jii siaŋ diɛ̀ŋ màànààŋ wo Dayà manaŋ wèè naŋ nyɛ̀nɛ̀ŋ lɛ. Ɓɔ̀ nìŋ nyinìàŋ niŋ kè jii kpàaŋ diɛŋ. Nyɛ̀nɛìŋ e tòmoiŋ nɛ̀ ɓɔ̀ è nɔ̀ŋ wèè pààwa, kɛɛ e yiwìàiŋ jii wèè nyɛ̀nɛŋ.

³ Ɓɔ̀ nìŋ fɛ̀ɛ̀ wèè naŋ kìlìà kana ànyùùŋ nyaŋ yaà è gaàiŋ nɛ̀ dìì nyaŋ diɛ̀ŋ, kɛɛ nɔ̀iŋ e tɔ̀ɔ̀màŋseì koɓɛ̀ aŋ ɓààwàà Dayà nyaŋ.

⁴ Kpeiŋ sèè wo kànà anyuùŋ yɛ̀mɛ̀ aŋ ɓaawaa diɛɔ̀ŋ tèènè mààŋ wò Jisɛ̀ Kulaì wò hnàŋ, nìŋ do nàŋ yɛ̀mɛ̀ ke ɓɔ̀ɗì e jòòwo ke yèɛ e zɛ̀nɛŋ nyiŋ nɛ̀ fè go lɛ̀.

⁵ E ɗèwè guùŋ bi sùà nyɛ̀iŋ nààŋ nyuùŋ bɔwɔ nyàŋ sɔɔ̀ naŋ jɔ̀ɔ̀lɔ̀ àŋ màmàŋkùmɛŋ nyaŋ dìì. Nyɛ̀iŋ nààŋ gbiŋ, wo nyùùŋ gbiŋ ɓɔ̀ wò ɓemè wuŋ bi gbee. Màànààŋ wɔŋ fɛ̀ì Dayàa naŋ woò wààŋ, “Wo Dayà giiyà wo nyùnɔ̀ɔŋ ɓemàŋ wuŋ bi gbee wɔ̀ maŋhɛɛ, kɛɛ wò kiɛ̀ŋ wo nyùnɔ̀ɔŋ fè ɓèmè wuŋ bi gbeeɔ̀ e keì sìàŋ.”

⁶ Dèèyeìŋ nyɛ̀iŋ bi wɔŋ kùàŋ gààŋ gbèè Dayàa dìì, kɛ̀ wò doiŋ nàŋ joowò e tèèngà sìàŋ wuŋ biɛ̀ diɛŋ.

⁷ Jùùya nìuŋ maŋ haamiiŋ màŋ gbiŋ esaɓù kɛ̀ wò naŋ kpɛɛ̀ŋ weèiŋ.

⁸ Ɓɔ̀ nìŋ nyɛɛnɛ̀ŋ, yɛ̀mɛìŋ nyɛ̀iŋ bi diɛ̀ŋ yèè niŋ nɔ̀ŋ fɛɛ̀ wòwò! Wo jooiŋ nɔɔ̀ŋ wo Dɛwìɔ, kòò wò gèe gììne wò kilià mààŋ wo nyàà e wùàŋ, wò yaà kààmè nyùùŋ wèè wo gbìlà.

⁹ Nyìngaìŋ e hààweiŋ nɛ̀ sùà niŋ giiyàuŋ maŋhɛɛ, esaɓù nàŋ nyìmàŋ kɛ̀ ke gbòò aŋ wùìya nyàŋ e ɗuunyaàŋ gbiŋ sùà, àŋ yaà kɔ̀ɔ̀yɛ̀ maŋ kèì nyìngà guùŋ mɛɛ̀ŋ dìì.

¹⁰ Sèè nìŋ kɔɛ̀ maŋ keì nyìnga mɛɛ̀ŋ sùà wèè e teenga kpuu sùà, wo Dayàa kuwa maŋ tɛ̀ɛ̀tɛ̀ɛ̀ maŋ gbiŋ wɔ̀, wo yèɔ naiŋ nyààŋ wèè wo goonòiŋ e jòòwò nyiiŋ gèe gò jùà ke gbòò Jisɛ̀ Kulaì sùà wɔ, wuŋ bi doiŋ nàŋ nyɛ̀nɛ̀ŋ sengei yèè woiŋ fè e kɔɔ nyingè, woiŋ sìà e gààŋ woiŋ jàà ko tɔɔtu tùlìà jii.

¹¹ E gààŋ nɔ̀uŋ wèè julɔfɔ yèè julɔfɔ! Àmiinàŋ.

E zùùmo dìàmaàŋ

¹² Wo Sailɔ̀ naim kpuumò mìŋ naŋ sìngè wɔŋ fɛi kpuu wɛɛ̀ŋ ko nɛ̀ɛ̀ŋ niìŋ, wo yèɔ mìŋ naŋ ɓemè wèè wo nɔ̀ŋ wo wùìya hààwè tɔ̀ɔ̀nyaàŋ wɔ. Mìŋ yààìŋ sìa sùà ke di kɛ̀ tɛɛ̀ nàŋ yaà e kìɛ̀ŋ tɔ̀ɔ̀nyààŋ Dayàa nyììneìŋ sùà niŋ nɔ̀iŋ sùà.

¹³ Anyùùŋ màŋjɛ̀wɛ̀ Kanaà Jisɛ̀ nyaŋ wo Dayà naŋ tàeɗùù ko Ɓaɓelɔ̀ùŋ, yèè wo jɔ̀àim Mài, àŋ dawàìŋ.

¹⁴ Zùùmoìŋ aŋ dàwiiŋ e kpùùwò mànàŋ sùà. Ke jii fàa nɔ̀ŋ nyɛ̀iŋ nààŋ gbiŋ nìŋ yaà Jisɛ̀ Kulaì sùà nyaŋ.