1Pììlɛ 4 - WƆŊ FƐ̀Ì EBÒ SÌÀŊ DAYÀA

Maŋ nyiiŋ màŋ vɔɔnɔ̀ŋ

¹ Wo Jisɛ̀ Kulaì naŋ mɔɔnɛ̀ŋ maŋ kèìŋ maŋ sùà. Weètii sɔɔ̀ nyɛ̀iŋ pɛɛ naŋ banebànè wèè naŋ mɔɔnɛ̀ŋ màànààŋ wò naŋ nyɛ̀nɛ̀ŋ lɛ, e fèfoo e mɔ̀ɔ̀nɛŋ tɔɔ̀ kɛ̀ nàŋ hɔ̀ànè maŋ jùumù nyɛ̀nɛŋ.

² Weètii, wɔŋ nyiiŋ gèe gbànaiŋ nɔɔ̀ŋ maŋ kèìŋ maŋ sùà, fè ɓɛìŋ è gòngò nyuùŋkpùuŋ dìi. Wɔ̀ŋ yaà naàŋ e gààŋ Dayàa dìì.

³ Nìŋ naŋ wa kòlò ko nyìnìè maŋ keì maŋ anyùùŋ nyaŋ fè àŋ Juùù nyaŋ manaŋ wèè nyɛ̀nɛŋ màŋ. Nìŋ yaà wa nyuùŋ naanààŋ nìŋ kuwa wa e ɗèwè maŋ keì naaŋ nààiŋ màŋ maŋjɛ̀wɛ. Nìŋ gèe wa kìlia ko tììyè maŋ mùàŋ yèè ko nyìnìè gbana, yèè ngèè, nìŋ yaà wa pɛɛ ko zòòlò maŋ gòò.

⁴ È do nàŋ fòònò anyuùŋ gò hààwè Dayà nyaŋ àŋ gè gòngo kɛ̀ wèè kiìŋ niŋ fè nyiìŋ ɓɛìŋ màŋjɛ̀wɛ nìŋ gè kìlia ko nyìnìè maŋ keì nàànààŋ guùŋ maŋ, wèètii àŋ fèìŋ maŋ mìè ɓɛ̀ɛ̀pɔ̀ɔ weè niŋ.

⁵ Kɛɛ àŋ do nàŋ fàsàì maŋ màaŋdàwè koɓɛ̀ Dayài, wo yèɔ naŋ banebànè wèè wo gbàì anyùùŋ nyaŋ kuwa nyiiŋ gèeɔ̀ nyaŋ yaà anyuùŋ fàa nyàŋ wɔ.

⁶ Wèè esaɓù lɛɛ̀, àŋ yaà wòò ebò siaàŋ koɓɛ̀ anyuùŋ fàa nyàŋ nyiŋ pɛɛ, wèè kɛ̀ sèè wo Dayà kpɛɛyɛ̀ nyiìŋ gbààì keì maŋ kèìŋ maŋ sùà wèè manɛ̀ŋ maŋ àŋ naŋ nyɛ̀nɛ̀ŋ nyiiŋ gèe nyiŋ màŋ sùà lɛ, aŋ jinàŋ nyiŋ nyàŋ do nàŋ nɔ̀ŋ nyiiŋ gèe sùà màànààŋ Dayà yaà lɛ.

Anyuùŋ yɛ̀mɛ̀ e kèì manɛ̀ŋ kìɛ̀ŋ Dayà maŋ dììo sùà nyaŋ

⁷ Ko dìaì wèè manɛ̀ŋ maŋ gbiŋ kò gbɛ̀ɛ̀. Weètii, sìaìŋ ke di yèè niŋ nɔ̀ŋ ɗìòsùà sengei niŋ zoolò.

⁸ Eɓìèmàŋjɛ̀wɛ̀ tii gbiŋ, kùwieìŋ e mànaŋ tiwìtiwì wèè aŋ dàwiiŋ nyàŋ e fèfoo, e mànaŋ ɓuwo maŋ jùumù zimgbe.

⁹ Jàaìŋ anyùùŋ kùàŋ dìì maŋ gbooiŋ màŋ sùà, yèè ɓɔ̀ nìŋ gulìà ɗìòsùà wèètii.

¹⁰ Wo ɓɔìjɔ̀àa yɛ̀mɛ̀ manɛ̀ŋ kìɛ̀ŋ Dayà maŋ diɛŋ wɔ̀, maŋ kìɛŋ titi maŋ wò naŋ gè Dayà sìwè maŋ sɔɔ̀ wo miŋ toomò wèè e tɛ̀ɛ̀tɛ̀ɛ̀ koɓɛ̀ anyuùŋ hààwe dàwiuŋ nyàŋ.

¹¹ Anyùùŋ nyaŋ kuwa e kìɛ̀ŋ gbòa nyàŋ, aŋ woò ke mìè gbìàŋ Dayàa. Aŋ yè nyaŋ yaà aŋ ɓɔìjɔ̀à tòmo nyàŋ, aŋ toomò e gàaŋ wo Dayà naŋ nyiŋ kiɛ̀ŋ lɛ. E wèè kɛ̀ e gbio sùà wo Dayà yɛmɛ̀ e ɓɛ̀ɛ̀jàa esàɓù Jisɛ̀ Kulaì sùà wo yèɔ e gààŋ yèè e jòòwo yaà weèuŋ wèè julɔfɔ yèè julɔfɔ wɔ̀. Àmiinàŋ.

Wo nyuùŋ hààwè Dayà kuwo e keì nyìnga

¹² Nyɛ̀iŋ nààŋ wùìya mànaim nyàŋ, e jèlaà wàà keì nyìngaà nìŋ yàà kɔ̀ɔ̀yɛ̀ dìì lɛ ɓɔ̀ è foonòiŋ, è doò nɔ̀ŋ mààŋ è kèì jii die nàŋ yaà kaaiŋ kò nɛ̀ɛ̀iŋ niìŋ.

¹³ Kɛɛ gèeiŋ zɔlɔ̀ kɛ̀ e keì nyìngaà wo Jisɛ̀ naŋ kɔ̀ɛ̀ sùà lɛ, nìŋ yaà e bàiŋbà, wèè niŋ dià zɔlɔ̀ sèè wo Jisɛ̀ Kulaì hnàŋ wa nàwèè wò tɔɔ̀ e jòòwo gbeeuŋ nɛ̀.

¹⁴ Sèè aiŋ diɛ̀ŋ esaɓù kɛ̀ nìŋ yaà anyùùŋ màŋjɛ̀wɛ̀ Jisɛ̀ Kulaì wo Dayà doiŋ nàŋ kpuumò. Tɛɛ̀ naŋ tɔɔ̀ kɛ̀ wo Jinàŋ kùwìè jòòwo gbeeɔ̀, tèènè mààŋ wò Jìnàŋ Dayàa, wò yààìŋ maŋjɛ̀wɛ.

¹⁵ Sèè nìŋ nɔ̀ŋ kɔ̀ɔ̀yɛ̀ keì nyìnga dìì, ɓɔ̀ è nɔ̀ŋ èsàɓù nyuùŋ jìwa sùà ɔ̀ɔ̀ è wùa ɔ̀ɔ̀ è kààkàà gbài ɔ̀ɔ̀ è woya sùà.

¹⁶ E ɗewe gbiŋ sùà, sèè nìŋ nɔ̀ŋ kɔ̀ɔ̀yɛ̀ keì nyìnga dìì esaɓù kɛ̀ nìŋ yaà anyuùŋ hààwe, e sàngè tii ɓɔ̀ è nyɛ̀nɛ̀iŋ. Kɛɛ fèeìŋ Dayà ɓɛ̀ɛ̀jàa wèè e dèè Jisɛ̀ Kulaìɛ jààìŋ nɛ.

¹⁷ E tèèngà e gbàiɛ̀ è haì, yèè è do nàŋ tɔ̀ɔ̀tù ko sààŋ Dayài jiɛ̀. Sèè è tɔɔtù wì diɛŋ, diè ko jèè e ɗìi do nàŋ nɔ̀ŋ wèè anyùùŋ nyaŋ gò hààwè kè mìè gbìàŋ Ebò Siaàŋ kè yèɛ yewe Dayà sìwè lɛ?

¹⁸ Nààŋ wɔŋ fɛ̀ì Dayàa naŋ woò lɛ, “È naŋ nyìngè wèè anyùùŋ tɔ̀ɔ̀nyaàŋ nyaŋ aŋ yɛ̀mɛ̀ e jòèyè, kɛ̀ kiìŋ nàŋ do nàŋ kaaìŋ koɓɛ̀ anyùùŋ maŋ jùumù nyaŋ yaà aŋ yè nyaŋ gò hààwè Dayà nyaŋ?”

¹⁹ Weètii, anyuùŋ hààwe nyàŋ kɔ̀à e keì nyìnga dìì esaɓù kɛ̀ tii wo Dayà manaŋ weè nyiŋ, aŋ nyɛ̀nɛ̀ŋ e tòmo siaŋ yèè aŋ kiɛ̀ŋ ke jii nyiŋ nɛɛ̀ŋ wo nyuùŋ bàne nyiŋ nɔɔ̀ŋ wo yèɔ nyɛnɛŋ e yèɛ wò naŋ ɓèmè e ɗààhiì wèè wo nyɛ̀nɛ̀ŋ lɛ.