1Pììlɛ 3 - WƆŊ FƐ̀Ì EBÒ SÌÀŊ DAYÀA

E fèèmàŋ aŋ felaa kɛ̀ɛ̀nɛ̀ŋ jɔùŋ nyaŋ yaà aŋ jawè nyiŋ nyàŋ

¹ Sèè mùŋ nɔ̀ŋ wo jɔùŋ kùwìè felaa, jɔ̀ɔ̀lɔɔ̀ wo faniŋ mɔɔ̀ŋ dìì. Sèè pɛɛ wo gò jɔ̀ɔ̀lɔ̀ kè mìè Dayàa dìì, e jɔ̀ɔ̀lɔ mɔ̀ɛ̀ ko nɛ̀ɛ̀uŋ niìŋ douŋ nàŋ nyɛ̀nɛ̀ŋ wo jɔɔlɔ̀, wo nyùùŋ gbiŋ naùŋ ɓɛìŋ gbòò kɔɔ wèètii.

² E fèfoo àŋ do nàŋ yɛ̀mɛ̀ e ɗeweɛ̀ e zɛ̀nɛ̀ŋ kiium mɔ̀ɛ̀ yèe e jùù yààùm wèè Dayà, e kìlà e tɔ̀mɛ fè è tùwò kiium mɔ̀ɛ̀ sùà lɛ.

³ Ɓɔ̀ mùŋ tulìà mànɛ̀ŋ siaŋ kè jii mààŋ maŋ gòoò jɔ̀ɔ̀ɔ e ɗì bàne ɔ̀ɔ̀ màŋ dèè kɔɔ nyìngà ɓaà wèè maŋ nyɛ̀nɛ̀ŋ è sìàŋ.

⁴ E siàum mɔ̀ɛ̀ e nɔ̀ŋ ke jii mɔɛ̀ŋ diɛŋ esaɓù kɛ̀ mùŋ siaŋ tùwo yèè mùŋ kuwa wo jinàŋ sìàŋ sìàŋ tùwo yèè wò naŋ tɔumtɔ̀ùm. E sìàŋ mààŋ tɛɛ̀ è yaà wèè julɔfɔ, yèè wo Dayà jàà niìŋ kùàŋ dìì.

⁵ Aŋ jɔ̀ùŋ nɛɛmaŋ nyàŋ wa e gɔuɛ̀ sùà àŋ kuwa wa ke jii tùlia wo Dayà sùà. Àŋ hewa nyɛ̀nɛ̀ŋ nyiŋ bi siàŋ sìàŋ koɓɛ̀ aŋ faiŋ nyiŋ nyàŋ esàɓù kɛ̀, àŋ jɔɔlɔ̀ wa aŋ faiŋ nyiŋ nyàŋ dìì.

⁶ Yɛi wo Sèèla yaà wa, wò naŋ wa jɔ̀ɔ̀lɔ̀ wo faiŋ Eɓulɔhɛɛ̀ŋ dìì yèè wò nauŋ nyààŋ wo kɛ̀ɛ̀nɛuŋ nɔɔ̀ŋ. Nyɛ̀iŋ nàŋ yaà naàŋ aŋ jɔ̀àuŋ nyàŋ sèè nìŋ nyɛnɛŋ keì sìàŋ e yèɛ niŋ gò dàngè è nɛ̀ŋ bà gbiŋ wèè eiŋ sìà è jùù.

⁷ Sèè mùŋ nɔ̀ŋ wo felaa kùwìè jɔùŋ, kùwiè e gòngo wèè jawè mɔɔ̀ŋ. Kùwiàuŋ e ɓɛ̀ɛ̀jàa, esaɓù màŋ nyìngà sùà màuŋ nìàŋ yèè wò yaà bàuŋbà wèè e tɛ̀ɛ̀tɛ̀ɛ̀ wɔŋ nyiiŋ gèeɔ̀ wo Dayà naiŋ kiɛ̀ŋ wɔŋ. Nyɛ̀nɛìŋ tɛɛ̀ wèè e nɛ̀ŋ gbiŋ go nàŋ kèèwè è zòòloiŋ nɛ̀ feìŋ.

E keì nyìnga kùwa wèè e tɔ̀ɔ̀nyaàŋ nyɛ̀nɛŋ

⁸ Ko diemeì nàŋ yaà, nyɛ̀iŋ nààŋ gbiŋ nɔ̀ɔìŋ mìèsùàguùŋ niŋ kuwìè ke jìì nyowo, yèè e mànaŋ wèè aŋ dàwiiŋ. Nyɛ̀nɛìŋ aŋ dàwiiŋ nyàŋ tɛ̀ɛ̀, yèè niŋ deeyè nyɛ̀iŋ bi koɓɛ̀ aŋ dàwiiŋ nyàŋ.

⁹ Ɓɔ̀ nìŋ giiyà è kpàŋ keì naanààŋ è keì naanààŋ ɔ̀ɔ̀ è kpàŋ gbòòno è gbòòno. Gììyaìŋ niŋ e zòòlo sùà esaɓù kɛ̀ e zòòlo nàŋ yaà e nɛ̀ɛŋ wo Dayà naŋ ɓèmè e ɗààhiì wèè woiŋ kiɛ̀ŋ nààŋ wò naiŋ nyààŋ.

¹⁰ Màànààŋ wɔŋ fɛ̀ì Dayàa naŋ woò lɛ, “Wo nyùnɔ̀ɔŋ manaŋ wèè wo jììkà wɔŋ nyiiŋ e kìlà wo yɛ̀mɛ̀ maŋ ɗɔɔ siaŋ wɔ̀, wo gèe maŋ miè naanààŋ gbòa kùàŋ sùà, yèè wo dàngè tòa.

¹¹ Wo gèe keì naanààŋ nyɛ̀nɛŋ kùàŋ sùà, wo nyɛ̀nɛ̀ŋ keì siaŋ sìàŋ ɓèmè ke jii mɔɛ̀ŋ muŋ kamè ke jii fàa.

¹² Wo Kanaà Dayà jàà anyùùŋ tɔ̀ɔ̀nyaàŋ nyaŋ e fɛ̀ɛ̀ diɛ̀ŋ yèè wò kumìàŋ maŋ mìè zòòlo nyiŋ màŋ kɛɛ wò giiyà anyùùŋ maŋ tùwo naanààŋ nyaŋ maŋhɛɛ.”

¹³ Ɓòò nàŋ yaào wèè woum jàà e keì keekèè sèè mùŋ haamìŋ wèè maŋ nyɛ̀nɛ̀ŋ keì siaŋ sìàŋ?

¹⁴ Kɛɛ sèè pɛɛ maŋ kà e keì nyìnga dìì wèè e tɔ̀ɔ̀nyaàŋ, wo Dayà doum nàŋ kpuumò. Wèètii ɓɔ̀ mùŋ dùàŋ nyùùŋ gbiŋ, yèè ke jii mɔɛ̀ŋ ɓɔ̀ kè sɛɛɛ̀ wèè è nɛ̀ɛŋ ànyùùŋ naŋ ɓɛ̀nɛ̀ŋ nyɛ̀nɛŋ lɛ̀.

¹⁵ Kɛɛ kùwieìŋ e ɓɛ̀ɛ̀jàa wèè Jisɛ̀ Kulaì maŋ jiiiŋ màŋ sùà, yèè niŋ joowòuŋ mààŋ wo Kana maŋ nyiiiŋ màŋ sùà. Nɔ̀ɔìŋ e bànèbaneiŋ e teenga gbiŋ sùà wèè naŋ fàsàì nyùùŋ gbiŋ wo yèɔ dawàìŋ wèè nauŋ fè ke jii gbài wèè ke jii tùliaà yààìŋ sùà lɛ.

¹⁶ Nyɛ̀nɛìŋ tɛɛ̀ e tùwo siaŋ diɛŋ, yèè e ɓɛ̀ɛ̀jàa sùà. Yèè maŋ jiiŋ màŋ nɔ̀ŋ sengei wèè kɛ̀ sèè àŋ pɔɔ̀ìŋ ɓɛ̀ɛ, anyùùŋ nyaŋ gboo naanààŋ wèè maŋ tùwo siaŋ sìàiŋ màŋ wo Jisɛ̀ Kulaì sùà nyaŋ e sàngè do nyiŋ nàŋ nyɛ̀nɛ̀ŋ wèè e nɛ̀ɛŋ àŋ woà lɛ.

¹⁷ È yaà tɛ̀ɛ̀ wèè maŋ kà e keì nyìnga dìì wèè e keì sìàŋ nyɛ̀nɛŋ sèè tii naŋ ɓɛ̀nɛ̀ŋ nɔ̀ŋ e ɗèweɛ̀ wèè Dayà, tii siaŋ e wèè e nɛ̀ɛŋ nyɛ̀nɛ̀ŋ naŋ nyɛ̀nɛ̀ŋ keì naanààŋ lɛ.

¹⁸ Wo Jisɛ̀ Kulaì naŋ fɔ̀ wèè maŋ jùumù è guùŋ kpò wèè maŋ gbiŋ, wo nyùùŋ tɔ̀ɔ̀nyaàŋ naŋ fɔ̀ wèè anyuùŋ gò haawè nyaŋ, wèè wo tɔɔ̀ nyiŋ ke dòmaàŋ koɓɛ̀ Dayà. Àŋ nauŋ jìwè e yìwìà maŋ kèìŋ maŋ sùà, kɛɛ wò naŋ nɔ̀ŋ wɔŋ nyiiŋ gèeɔ̀ sùà wo jinàaŋ sùà,

¹⁹ wo yèɔ naŋ kɔ̀ nyììŋ jinàaŋ sùà yèè wò naŋ gbòò koɓɛ̀ aŋ jinàŋ nyaŋ yaà wa ko sààŋ nyìwì nyaŋ.

²⁰ Aŋ jinàŋ nyɛɛ̀ŋ nàŋ yaà wa aŋ jìnàŋ anyùùŋ nyaŋ gò wa jɔ̀ɔ̀lɔ̀ Dayà dìì nààŋ wò naŋ wa kùwò ke jii wò yaà nyiìŋ fòla sùà e teengaà wo Nòa yaà wa bàne sùà wɔŋ meeèɔ lɛ̀. Anyùùŋ nɔɔnɔŋ lè taai nɔŋ naŋ wa jɔ̀ wɔŋ meeèɔ sùà, yèè nyiŋ nɔŋ naŋ wa jòèyè e yìwìà e wuiyè jòwaà sùà.

²¹ E wuiyè jòwaà naŋ wa nɔ̀ŋ e tɔ̀ɔ̀màŋsèì e gùò Dayàa, naiŋ naàŋ joeyè lɛ. E fè nɔŋ wèè maŋ gùà kèìŋ maŋ è ninaŋ, kɛɛ e ɗààhiìɛ nìŋ ɓemàŋ maŋ gòngò jii sengèì diɛŋ ko fɛ̀ɛ̀fèìŋ Dayà lɛ, esaɓù kɛ̀ wo Dayà naŋ gè Jisɛ̀ Kulaìɛ e fàa dìì,

²² wo yèɔ naŋ naàŋ kɔ̀ ko àìjɛnɛ̀ŋ wò jaa wɔŋ kùàŋ jìkà Dayàa, wò yaà nyìnìè maŋ tòmò gaàŋ gbeegbèè màŋ gbiŋ ko àìjɛnɛ̀ŋ e kìlà wò kuwa e gààŋ aŋ màìkà nyaŋ diɛ̀ŋ.