1Pììlɛ 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pììlɛ sìwè, wo yèɔ yaà wo keela tàeɗùù wèè Jisɛ̀ Kulaì wɔ, nàŋ yaà sìngìè wɔŋ fɛi wɛɛ̀ŋ koɓɛ̀ anyùùŋ nyaŋ wo Dayà naŋ tàeɗùù wèè aŋ nɔ̀ŋ anyunùuŋ nyàŋ, yèè àŋ naŋ nɔ̀ŋ aŋ nyùnèènyɛiŋ àŋ naŋ ɓààyè maŋ kpàlàùŋ kpàlàùŋ maŋ gbiŋ sùà nyaŋ e yìwìà ko Pɔuŋtɔ̀, Gàlatìà, Kàpàdosìà, Eesìà, yèè ko Bɛ̀tenìà.

² Wo Dayà Dèda wiɔ̀ wa ɗewè gɔu wèè woiŋ tàeɗùù naŋ nɔ̀ŋ anyunùuŋ, yèè wo Jinàuŋ nɔɔ̀ŋ wòiŋ nyɛ̀nɛ̀ŋ naŋ nɔ̀ŋ anyùùŋ nɛɛmaŋ, wèè naŋ jɔ̀ɔ̀lɔ̀ wo Jisɛ̀ Kulaì dìì, yèè maŋ sɛnìuŋ màŋ nyɛ̀nɛ̀ŋ nàŋ zɛ̀nɛ̀ŋ. Tɔ̀ wo Dayà kiɛ̀iŋ e tɛ̀ɛ̀tɛ̀ɛ̀ yaà ke jii fàa dìa sùà.

Wɔŋ nyiiŋ gèe tùlìà jii

³ Gè wiìŋ wo Dayà ke sɛ̀ wo dèdà Kana wiɔ̀ Jisɛ̀ Kulaìɔ! Esàɓù ke nyowo gbeeuŋ nɛɛ̀ŋ sùà, wò naŋ wi kìɛ̀ŋ wɔŋ nyiiŋ gèe jɛi nààŋ wò naŋ gè wo Jisɛ̀ Kulaì e fàa dìì. Tɛɛ̀ naŋ wi dììyè wɔŋ nyiiŋ gèe tùlìà jii ko sùà,

⁴ weètii è yɛmɛ̀ìŋ ko dòmàŋfeìŋ wèè eiŋ kɛ̀ɛ̀nɛ̀ŋ maŋ kpùùmaŋ bàne màŋ wo Dayà naŋ bànè ko hàa wèè anyunùuŋ nyàŋ maŋ. Wò naŋ miŋ bànè hàa weèiŋ ko àìjɛnɛ̀ŋ, ko yèi maŋ fè hèwà ɔ̀ɔ̀ maŋ pɔɔ̀ ɔ̀ɔ̀ maŋ kùwìè è tɔ̀mɛ.

⁵ Nyɛ̀iŋ nàŋ kànà miìŋ maŋ yè maŋ esàɓù hààwe sùà wo Dayà do miŋ nàŋ yɛ̀mɛ̀ diɛŋ e gaàuŋ nɛ̀ sùà wèè e jòèyeɛ̀ e yèɛ yaà bànèbane niŋ wèè wo dàànè ebò niŋ ke ɗɔɔ dìàmaàŋ diɛŋ lɛ̀.

⁶ Gèeìŋ zɔlɔ̀ wèè tɛɛ̀, jòòpɛɛ è wɔ̀i naàŋ ɓɛ̀nɛ̀ŋ nɔ̀ŋ tɛ̀ɛ̀ wèè naŋ jɛ̀ì e jɛ̀ì ke nyowo sùà wèè e teenga kpàa sùà, esàɓù maŋ wàa kà tinàŋ zimgbe màŋ nìŋ naŋ mɔ̀ɔ̀nɛ̀ŋ dìì maŋ.

⁷ Esaɓù miŋ nɛ̀ nàŋ yaà wèè e tɔɔ̀ kɛ̀ e hààweiŋ nɛ̀ è yaà e hààwe kɛnɛ. E gòoòɛ pɛɛ, e yèɛ è pɔ̀ɔ lɛ, àŋ tùɔ̀ŋ niìŋ maŋ nɔnɔŋ ko hmɔ̀ɔ̀ŋ. Weètii e hààweiŋ nɛ̀, e yèɛ kuwa e zùlù zimgbe e nìàŋ e gòoò lɛ, tiŋ pɛɛ sɔɔ̀ aŋ niŋ tùàŋ màŋ nɔnɔŋ wèè e hààwe bi kà feìŋ. Kpeiŋ kɛ̀ nàŋ yɛ̀mɛ̀ e tɛ̀nɛŋ yèè e dɛ̀ɛ̀kɛ yaà e jòòwo ke ɗɔɔɛ̀ wo Jisɛ̀ Kulaì hnàŋ wa nàwèè lɛ.

⁸ Nìŋ kuwa e mànaŋ wèè Dayà jòòpɛɛ kòò nìŋ yɛ̀mɛùŋ, yèè nìŋ nauŋ haawè sùà, jòòpɛɛ niŋ fèeùŋ naàŋ yɛɛmɛ. Wèètii nìŋ gèe e zɔ̀lɔ̀ ɓɛ̀ɛ̀jàa gbee e yèɛ nyùùŋ fè ɓɛ̀nɛ̀ŋ wòò lɛ̀,

⁹ e fèfoo kɛ̀ maŋ nyiiiŋ màŋ yaà yɛ̀mɛ sùà e jòèye, e yèɛ do nàŋ hɛɛnɛ̀ŋ sàɓù hààweɛ̀ nìŋ nauŋ hààwè sùà lɛ.

¹⁰ È yaà wa wèè e jòèye lɛɛ̀, aŋ wɛ̀ijì nyaŋ naŋ wa gɔ̀àà e kɔɔ dìì, yèè àŋ naŋ niŋ tùɔ̀ŋ maŋ nɔnɔŋ tɛ̀ɛ̀. Àŋ naŋ woò e kèè e tɛ̀ɛ̀tɛ̀ɛ̀ lɛɛ̀ wo Dayà doiŋ nàŋ kiɛ̀ŋ lɛ.

¹¹ Àŋ naŋ fɛ̀ɛ̀ wèè aŋ nyìmàŋ kɛ̀ kiìŋ nàŋ do nàŋ nɔ̀ŋ e teengaà, yèè dièsɔa è do nàŋ hnè. Tɛɛ̀ nàŋ yaà wa e teengaà, e yèɛ wo Jìnàŋ Jisɛ̀ Kulaìɔ yàà nyiìŋ sùà wɔ, yaà wa tɔ̀ɔ sùà kiiyò, nààŋ wò yaà nyiìŋ wa wòò e kèì ko dòmàŋfeìŋ e nyaàiŋ dè e keì nyìngaà wo Jisɛ̀ Kulaì kuwa wèè wo kà dìì yèè e jòòwo gbeeɛ̀ doiŋ nàŋ dè maŋjɛ̀wɛ lɛ̀.

¹² Wo Dayà naŋ dàànè ebò koɓɛ̀ aŋ wɛ̀ijì nyɛɛ̀ŋ kɛ̀ aŋ fè wa toomo wèè è nàfà nyiŋ bi, sɔɔ̀ nyɛ̀iŋ nyàŋ, àŋ naŋ wòò maŋ keì maŋ nìŋ naŋ yaà kòmò e yìwìà aŋ keela nyàŋ naŋ dàànè Ebò Siaàŋ esàɓù e gààŋ Jìnàŋ Dayàa sùà e yìwìà ko àìjɛnɛ̀ŋ nyaŋ. Mɛɛ̀ŋ nàŋ yaà maŋ keì maŋ aŋ màikà nyaŋ kàìŋ nyaŋ pɛɛ hewa nàŋ mɔ̀nɔ̀ŋ wèè aŋ nyìmàŋ maŋ.

E nyààne wèè wɔŋ nyììŋ gèe nɛɛmaàŋ nɔ̀ŋ sùà

¹³ Wèètii maŋ gòngoiŋ màŋ nɔ̀ŋ bànèbane miŋ wèè ke nyɛ̀nɛŋ. Ɓɔ̀ nìŋ nyɛɛnɛ̀ŋ, yèè kùwieìŋ jii tùlia gbee e keì sìàŋ lɛɛ̀ sùà, e yèɛ wo Dayà doiŋ nàŋ kiɛ̀ŋ sèè wo Jisɛ̀ Kulaì hnàŋ wa nàwèè lɛ.

¹⁴ Jɔ̀ɔ̀lɔìŋ Dayà dìì, yèè ɓɔ̀ nìŋ dangè wèè màŋ nyiiŋ màŋ doò kɛ̀ɛ̀ màŋjɛ̀wɛ koɓɛ̀ màŋ ɗèwe gɔu màŋ nìŋ kuwa wa teengaà nìŋ yaà wa jii die sùà lɛ.

¹⁵ Kɛɛ, e nɛ̀ŋ gbiŋ nìŋ naŋ nyɛ̀nɛ̀ŋ, nɔ̀ìŋ e nɛɛmaŋ sùà màànààŋ nɔŋ wo Dayàa naiŋ nyààŋ wɔ wò yaà e nɛɛmaŋ sùà lɛ.

¹⁶ Wɔŋ fɛ̀ì Dayàa naŋ woò wààŋ, “Nɔ̀ìŋ e nɛɛmaŋ sùà e fèfoo miàŋ bi mìŋ yaà e nɛɛmaŋ sùà.”

¹⁷ Nìŋ nyaaŋ Dayà Dèda, sèè nìŋ nɔ̀ŋ zoolo, wo yèɔ gbaì e keì koɓɛ̀ anyùùŋ nyaŋ gbiŋ e ɗèwè guùŋ nɛ e yìwìà e tùwò kìì nyùùŋ gbiŋ sùà wɔ. Wèètii, e jùù nɔ̀iŋ kɔɔ sùà wèè Dayà maŋ nyiiŋ gèe gbànaiŋ màŋ sùà e ɗuunyaàŋ diɛŋ.

¹⁸ Nàŋ nyìmàŋ kɛ̀ kiìŋ wo Dayà naŋ paawà, wèè woiŋ dangè wèè foo e yìwìà maŋ nyiiŋ gèe foofòò maŋ aŋ nèwàènèweiŋ nyàŋ naiŋ jùùyè sùà maŋ. E fè wa è nɛ̀ŋ bà è yèɛ nyùùŋ naŋ ɓɛ̀nɛ̀ŋ pɔ̀ɔ lɛ̀, mààŋ è kaiŋ fua ɔ̀ɔ̀ è gòoò.

¹⁹ È yaà wa maŋ sɛ̀ìŋ nyìngà ɓàà Jisɛ̀ Kulaì maŋ wò naŋ gììyè saàà lɛ, wo yèɔ yaà wa mààŋ wo Ɓaawaa gò kùwìè è tɔ̀mɛ dòmaŋ nyaaŋ gbiŋ wɔ̀.

²⁰ Wo Dayà nauŋ wa tàeɗùù paŋgàà wò naŋ tɔ̀ɔ̀tù e ɗuunyaàŋ bàne, yèè wò naŋ dàànè ebòuŋ maŋ ɗɔɔ dìàmaŋ mɛɛ̀ŋ sùà, esaɓùiŋ nɛ̀ sùà.

²¹ Esàɓù Jisɛ̀ Kulaì sùà nìŋ naŋ hààwè Dayà, wo yèɔ nauŋ gèe dìì e yìwìà e fàa dìì, yèè wò nauŋ fè e jòòwo, wèètii e hààweiŋ nɛ̀ yèè ke jii tùliaiŋ nɛɛ̀ŋ yaà koɓɛ̀ Dayài.

²² Nààŋ nìŋ yaà naàŋ jɔ̀ɔ̀lɔ sùà e tɔ̀ɔ̀nyaàŋ dìì, e tɔ̀mɛ jùumù fè ɓɛìŋ màŋ nyiiiŋ màŋ, nàŋ naàŋ zɛ̀nɛ̀ŋ. Yèè nàŋ kùwìè e mànaŋ kɛnɛ wèè anyùùŋ hààwè dawiiŋ nyàŋ. Kùwieìŋ e mànaŋ e fèemàŋ e yìwìà maŋ jiiiŋ màŋ diɛŋ.

²³ Esaɓù ke mìè nyiiŋ gèe gò jùà Dayàa sùà, naŋ nyɛ̀nɛ̀ŋ nìŋ naŋ ɓɛìŋ nɔ̀ŋ e kòmaiŋ jɛ̀ì mààŋ aŋ jɔ̀à wo nyuùŋ kòmaàŋ wo yèɔ fè fà wɔ.

²⁴ Màànààŋ wɔŋ fɛ̀ì Dayàa naŋ woò lɛ wààŋ, “Maŋ kèìŋ nyuùŋkpùuŋ gbiŋ yaà mààŋ maŋ dɛɛ, yèè e siaŋ sìàŋ miŋ nɛ̀ è yaà mààŋ maŋ kùù fɛ̀ɛ̀ ɓie. Maŋ dɛɛ màŋ fuùù nɔŋ, e kuùfɛ̀ɛ̀ miŋ nɛ̀ è sɔ̀à,

²⁵ kɛɛ ke mìè Kànà Dayàa kè jeeyà wèè julɔfɔ.” Ke mìè yɛɛ̀ nàŋ yaà Ebò Siaàŋ àŋ naiŋ daanè lɛ.