1 Kɔliìŋ 9 - WƆŊ FƐ̀Ì EBÒ SÌÀŊ DAYÀA

E tɔ̀ɔ̀nyàŋ keela tàeɗùùɔ yèè maŋ tòmouŋ màŋ

¹ Mìŋ yaà wo nyuùŋ gè nyààŋ diɛŋ. Mìŋ yaà wo keela tàeɗùù. Kà yɛ̀mɛ̀ Jisɛ̀ wo Kana wiɔ̀. Miàŋ naiŋ dè ke dòmaŋ diɛŋ e hààwe sùà koɓɛ̀ Kanaà Jisɛ̀ Kulaì.

² Sèè pɛɛ anyùùŋ bà gòim jàà kùàŋ dìì wèè ka nɔ̀ŋ wò keela tàeɗùù, kɛɛ tɔɔɓaa nyɛ̀iŋ naim jàà kùàŋ dìì. Esàɓù maŋ nyiiŋ màŋ e nɔ̀ŋ miŋ bà miŋ bà wo Kanaà Jisɛ̀ sùà, yèè nyɛ̀iŋ bi nìŋ yaà aŋ seì wèè e tòmò keela tàeɗùù mɛ̀ wo Kanaà sùà.

³ E ɗeweɛ̀ lɛɛ̀ mìŋ dè gòlò jɛ̀wɛ̀ koɓɛ̀ anyùùŋ nyaŋ tùɔ̀ìm maŋ nɔnɔŋ nyàŋ.

⁴ Mìŋ dawà nyiìŋ sèè mààŋ miŋ kuwà è gààŋ wèè ka jènɛ̀ŋ yèè ka tìà nɛ̀ŋ?

⁵ Miŋ kuwà è tɔ̀ɔ̀nyaàŋ wèè ka fɔ̀ɔ̀nɔ̀ŋ e tɔ̀ɔ̀màŋsèì aŋ keela tàeɗùù bà yaà aŋ wùìyà Kanaà yèè wo Pììlɛ, wèè ka ɓèmè wo wùìya jɔùŋ kùwìè e hààweɔ̀ wo Jisɛ̀ Kulaì sùà è kàaiŋ mɛ̀ diɛŋ?

⁶ Ɔ̀ɔ̀ yàwi Bànaŋɓà nɔŋ nààŋ kuwà è tɔ̀ɔ̀nyaàŋ wèè e gè kùàŋ kèè nɛ̀ŋ kàme sùà wèè e kpùùmàŋ yàwi bi?

⁷ Ɓòò nàŋ tomàŋ mààŋ wo kààlò ɗùà e yìwìà e nɛ̀ŋ mààŋ wuŋ bi lɛ̀ sùà? Ɓòò nàŋ tomàŋ wɔŋ ɓù maŋ nɛ̀ŋje wo fè jè màŋ nɛ̀ŋjèò ɓù bi bà? Ɓòò nàŋ kɛɛnɛ̀ŋ ke gbòò aŋ dìi wo fè nyiŋ gè màŋ yaà màì nyiŋ màŋ bà?

⁸ Mìŋ yaà tɛɛ̀ woo e gààŋ nyuùŋkpùuŋ sùà? Ke sàwàɛ nààŋ gò wòò è kèì guùŋ bi?

⁹ È kpɛ̀nɛ̀ìŋ e yìwìà maŋ Sàwà Mòòze màŋ sùà kɛ̀, “Ɓɔ̀ mùŋ dèkà wò dìiɔ̀ nyààŋ sèè mùŋ nɔ̀uŋ tòòmo sùà wèè wo tììlà lè jɔɔ mɔ̀ɛ̀.” Wo Dayà naŋ kpɛɛ̀ŋ wèè dìi?

¹⁰ Tɔɔɓaa wo gò wa gbòà weè wi? Nààŋ wò naŋ woò kɛ̀, jòòpɛɛ tii yaà wa sìnga niŋ weè yàwi. Kɛ̀ wo nyuùŋ nyùàŋ maŋ nɛ̀ŋjeɔ̀ yèè wo nyuùŋ kpàà maŋ nɛ̀ŋjeɔ̀ wò kuwa wo nyɛ̀nɛ̀ŋ e tòmouŋ nɛ̀ ke jii tùlia sùà kɛ̀ àŋ douŋ nàŋ kìɛ̀ŋ maŋ nɛ̀ŋje bi bà.

¹¹ E teengaà è naiŋ wòò ke miè gbìaàŋ lɛ, è yaà wa mààŋ è naiŋ nyùɔ̀ŋ maŋ nɛ̀ŋje wo Jinàaŋ sùà. Wèètii e kuwàìŋ e tɔ̀ɔ̀nyaàŋ wèè eiŋ jàà e nɛ̀ŋ gbiŋ kùàŋ dìì ko siwèiŋ wèè maŋ jewi nɛ̀ŋje kpàa màŋ?

¹² Sèè anyùùŋ joo nɔ̀ŋ aŋ bà nyiŋ bà wèè e tɔ̀ɔ̀nyaàŋ lɛɛ̀ ko diɛiŋ, yàwi ngèè pɛɛ e kuwàìŋ è tɔ̀ɔ̀nyaàŋ gbee e nyiŋ nìàŋ? Kɛɛ kòò è tòòmòìŋ è tɔ̀ɔ̀nyaàŋ lɛɛ̀, e nɔ̀ŋ bàiŋbà wèè maŋ keì mɛɛ̀ŋ gbiŋ wèè e nɛ̀ŋ gbiŋ go nàŋ kìlìè Èbò Siaàŋ nyaàiŋ dè Jisɛ̀ Kulaì kùàŋ feìŋ.

¹³ Tɔɔɓaa nàŋ nyìmàŋ kɛ̀ anyùùŋ nyaŋ toomàŋ ko Saaŋ Zòòlò Dayài nyàŋ àŋ gè e nɛ̀ŋje nyiŋ nɛ̀ ko Saaŋ Zòòlò Dayài, yèè aŋ yè nyaŋ koà maŋ nɛ̀ŋjè saàa maŋ wɔŋ gbɛ̀gbɛ̀ zòòloɔ̀ diɛŋ nyàŋ, àŋ kanaŋ maŋ nɛ̀ŋjè saàà bi bà.

¹⁴ E kèì guùŋ bi wo Kanaà naŋ woò kɛ̀, wo nyùnɔ̀ɔŋ woà ke mìè gbìàŋ Ebò Siaàŋ wɔ, wò kuwa wo nyìnìàŋ wɔŋ nyiiŋ gèeɔ̀ nɔɔ̀ŋ e yìwìà ke mìè gbìàŋ Ebò Siaàŋ sùà.

¹⁵ Kɛɛ kòò mìŋ tòòmò màŋ tɔ̀ɔ̀nyaàŋ mɛɛ̀ŋ bà gbiŋ, yèè miŋ fè sìnga sùà tɛɛ̀ wèè ka naàŋ pɛɛ jàà màŋ kùàŋ wèè ka kɛ̀ɛ̀nɛ̀ŋ màŋ gààŋ mɛɛ̀ŋ wèè miàŋ bi naàŋ. Sɔɔ̀ ka fà jiɛ̀. Wo nyùùŋ gbiŋ naàŋ kìlè è gààŋ màŋ nyongà kɛ̀ɛ mɛ̀ koɓɛ̀ màŋ mìè gbòa foo.

¹⁶ Miŋ kuwà è tɔ̀ɔ̀nyaàŋ bà wèè ka kɛ̀ɛ̀ màŋ nyòngà èsaɓù kɛ̀ mìŋ woà kè mìè gbìàŋ Ebò Siaàŋ, e ɗewe gbiŋ, mìŋ yaà e gààŋ Dayàa dii wèè ka nyɛ̀nɛ̀ŋ e tòmo lɛɛ̀. Yèè è henàŋ nɔ̀ŋ naanààŋ sèè miŋ gò wòò kè mìè gbìàŋ Èbò Siaàŋ!

¹⁷ Sèè e tòmo lɛɛ̀ e yìwìà ke jii miàŋ biɛ̀ diɛŋ wèè kaiŋ nyɛ̀nɛ̀ŋ, kɛ̀ kà ɓɛ̀nɛ̀ŋ yɛ̀mɛ̀ e pààwa, kɛɛ sèè pɛɛ mìŋ go mànàŋ wèè ka niŋ nyɛ̀nɛ̀ŋ, wo Dayà naim tàeɗùù ke gbòòɛ sùà wèè ka nyɛ̀nɛ̀ŋ e tòmouŋ nɛ̀.

¹⁸ Kiìŋ nàŋ yaà e pààwa mɛ̀? Tiŋ nɔŋ nàŋ yaà, e gààaŋ mìŋ kuwa wèè ka wòò ke mìè gbìàŋ Ebò Siaàŋ lɛ, miŋ woò nyiŋ nɔŋ wèè foo, miŋ fè nyiŋ gè è tɔ̀ɔ̀nyaàŋ mɛ̀ gbiŋ kò sùà.

¹⁹ Jòòpɛɛ miŋ fè keì dìì kòɓɛ̀ gbiŋ, kɛɛ mìŋ naŋ gbìɛ̀ŋ miàŋ bi e keì dìì wèè anyùùŋ nyaŋ gbiŋ, wèè ka hìàŋ anyuùŋ zimgbe e kèì Dayàa sùà.

²⁰ E teengaà mìŋ yaà toomo wèè aŋ Juùù nyaŋ lɛ̀, mìŋ naŋ nyiŋ nɔ̀ŋ e tɛɛ mààŋ wo Juùù, wèè miŋ hiàŋ nyiŋ koɓɛ̀ Dayài. Jòòpɛɛ miàŋ bi miŋ fè màŋ Sàwà Mòòze màŋ dìì, mìŋ naŋ nɔ̀ŋ mààŋ mìŋ yaà miìŋ dìì sèè mìŋ nɔ̀ŋ tòòmò aŋ yè nyaŋ yaà miìŋ dìì nyaŋ tɛɛ, wèè aŋ mànàŋ Dayà.

²¹ E ɗèwè guùŋ bi sùà, sèè mìŋ nɔ̀ŋ tòòmò anyùùŋ nyaŋ nààŋ fè àŋ Juùù nyaŋ e tɛɛ, mìŋ nɔ̀ŋ wo nyuùŋ pɔ̀ɔ̀ maŋ sàwà, wèè miŋ hiàŋ nyiŋ koɓɛ̀ Dayài. Tɛɛ̀ gò tɔɔ̀ kɛ̀ miŋ fè jɔ̀ɔ̀lɔ̀ màŋ sàwà Dayà maŋ dìì. Tɔɔɓaa mìŋ yaà maŋ sàwà Jisɛ̀ Kulaì maŋ dìì.

²² Sèè mìŋ nɔ̀ŋ anyùùŋ nyaŋ naŋ yɔkpɔ̀ e hààweɛ̀ sùà nyaŋ e tɛɛ, mìŋ yɔkpɔ̀ mààŋ wo bà, wèè ka nyiŋ hiàŋ koɓɛ̀ Dayài. Wèètii kà nɔ̀ŋ e nɛ̀ŋ gbiŋ koɓɛ̀ anyùùŋ nyaŋ gbiŋ, wèè miŋ joeyè aŋ bà nyiŋ e ɗeweɛ̀ gbiŋ mìŋ naŋ ɓɛnɛ̀ŋ lɛ sùà.

²³ Mìŋ nyɛnɛŋ tɛɛ̀ gbiŋ esàɓù ke mìè gbìàŋ Ebò Siaàŋ sùà, wèè ka nɔ̀ŋ wo bà nyiŋ bà e kpùùmaŋ nyiŋ nɛ̀ sùà.

²⁴ Nàŋ nyìmàŋ kɛ̀ sèè anyùùŋ nɔ̀ŋ duunyɛŋ koɓɛ̀ guùŋ wo bà guùŋ nɔŋ nàŋ yɛmɛ̀ e jìwà jɛ̀wɛ̀ɛ e dùaàŋ sùà. Wèètii dùaìŋ wèè niŋ koà niŋ.

²⁵ Wo nyuùŋ kà maŋ gɔ̀ɔ̀yɛ zimgbe dììɔ wò tomàŋ wèè wo yɛ̀mɛ̀ ke ɓɔ̀ɗì kana ke yèɛ fè kòlà lɛ. Kɛɛ è nyɛnɛŋ tɛɛ̀ wèè eiŋ yɛ̀mɛ̀ ke ɓɔ̀ɗì kana wèè julɔfɔ.

²⁶ Wèètii mìŋ sià ɗeiŋ ka dùàŋ wèè ke dòmaàŋ ke jùà. Wèètii mìŋ yaà mààŋ wo nyuùŋ sòmàŋ ke gùùŋ maŋ ɓɔ̀taì wo yèɔ maŋ ɓɔ̀taìuŋ màŋ fè mààŋ wèè foo wɔ̀.

²⁷ Mìŋ banaŋ bànàŋ ke kpùnaŋ miɛ̀ŋ yèè ka nyiŋ yɛ̀mɛ̀ diɛŋ wèè miŋ go nàŋ go sèè mìŋ kpɛɛyɛ̀ gbòà kè mìè gbìàŋ Ebò Siaàŋ kòɓɛ̀ ànyùùŋ nyaŋ.