1 Kɔliìŋ 8 - WƆŊ FƐ̀Ì EBÒ SÌÀŊ DAYÀA

Wɔŋ màaŋ dàwèɔ nyaàiŋ dè e nɛ̀ŋjè saàà

¹ Wɔŋ fɛi sìngaiŋ nɔɔ̀ŋ sùà nìŋ naim dàwè e kèì e nɛ̀ŋjè saàà kìɛ̀ŋ aŋ dayà joo. Yàwi nààŋ gbiŋ èiŋ nyìmàŋ e keì bà nyaàiŋ dè e keì lɛɛ̀. Kɛɛ e jiikɛ̀ɛ naŋ nyɛ̀nɛ̀ŋ è naiŋ ɓèmè yàwi bi gbee, yèè e mànaŋ naŋ wi nyɛ̀nɛ̀ŋ è kiɛ̀ìŋ aŋ dàwi wi nyàŋ e kpùùmaŋ.

² Anyùùŋ nyaŋ gongà kɛ̀ àŋ naŋ nyìmè e nɛ̀ŋ nyaŋ, aŋ nyimààŋ è nɛ̀ɛŋ gbiŋ àŋ henàŋ nyìmè lɛ.

³ Kɛɛ wo nyùnɔ̀ɔŋ manaŋ Dayà wɔ, wo Dayà wòuŋ nyìmàŋ.

⁴ Wèètii, e kèè e nɛ̀ŋjè sààà aŋ dayà joo nyɛɛ̀ŋ jèe, èiŋ nyìmàŋ kɛ̀ wo dayà joo wò yaà e nɛ̀ŋ gò gè nyiiŋ. È naiŋ nyìmè kɛ̀ wo Dàyà guùŋ kpò nɔŋ nàŋ yaà.

⁵ Manɛ̀ŋ zimgbe yaà ko àìjɛnɛ̀ŋ yèè e ɗuunyaŋ àŋ nyààŋ miìŋ aŋ dayà yèè aŋ kana, kɛɛ tɔɔɓaa, aŋ bà gbiŋ fè àŋ dayà yèè àŋ kana.

⁶ È kùwàìŋ nɔŋ wo Dàyà guùŋ kpò, wo Dèdaà, wo yèɔ naŋ bànè manɛ̀ŋ maŋ gbiŋ wɔ̀, yèè wèè wo yèɔ è yààìŋ e ɗuunyaŋ wɔ̀. E kìlà è kùwàìŋ nɔŋ wo Kànà guùŋ kpò, wo Kanaà Jisɛ̀ Kulaì wo yèɔ e saɓùuŋ nɛ̀ sùà manɛ̀ŋ maŋ gbiŋ naŋ wa yɛ̀mɛ̀ e bàne wɔ̀, yèè e saɓùuŋ nɛ̀ sùà è yààìŋ fuɔŋ.

⁷ Kɛɛ anyùùŋ nyaŋ gbiŋ nààŋ nyimààŋ è tɔɔɓaa lɛɛ̀. Aŋ dayà joo nyɛɛ̀ŋ àŋ naàŋ ɓɔlɛ̀ɛ̀ anyùùŋ nyaŋ bà nyiŋ è jèèsùà e teenga lɛɛ̀ pɛɛ sèè àŋ gbile e hòònɛ̀ŋ nɛ̀ŋje mààŋ tii, àŋ gongà nɔŋ kpɛ kɛ̀ è yaà e nɛ̀ŋjè dayà joo. E gòngo nyiŋ nɛ̀ naŋ yɔkpɔ̀, yèè è mɔɔnɛ̀ŋ nyiìŋ.

⁸ E nɛ̀ŋje jèe, e fè wi bɔ̀ɔ̀mɔ̀ŋ wò Dayà è kɔɔ, èiŋ niŋ jè e gòiŋ niŋ jè, è yaà wèè foo.

⁹ Kɛɛ yɛ̀mɛìŋ nyɛ̀iŋ bi diɛŋ, è gààŋ lɛɛ̀ ɓɔ̀ è nɔ̀ŋ esaɓù wèè wò nyùnɔ̀ɔŋ yèɔ naŋ yɔkpɔ̀ è hààweuŋ nɛ̀ sùà wɔ wo sɛ̀ɛ̀ maŋ jùumù sùà, esaɓù kɛ̀ nìŋ yaà nyaàŋ gè diɛiŋ wèè naŋ jè è nɛ̀ŋje gbiŋ lɛ̀.

¹⁰ Sèè wo nyùnɔ̀ɔŋ e gòngouŋ nɛ̀ naŋ yɔkpɔ̀ e keì lɛɛ̀ sùà wɔ, woum yɛmɛ̀ muàum yèɔ mùŋ kuwa e jììkɛ̀ɛ̀ keì lɛɛ̀ wɔ, mùŋ yaà jììyè e nɛ̀ŋjè saaà ko saaŋ dayà jooì, tɛɛ̀ douŋ nàŋ nyììnè jii wo jè e nɛ̀ŋjè sààà dayà joo.

¹¹ Kpeiŋ kɛ̀ wo wùìya yɔ̀kpɔum wɛɛ̀, wo yèɔ Jisɛ̀ Kulaì naŋ fɔ̀ weèuŋ wɔ̀, wò fà esaɓù e jiikɛ̀ɛum mɔ̀ɛ̀ sùà,

¹² Sèè mùŋ nɛɛmùŋ wo wùìya kùwìè e gòngo yɔ̀kpɔ mɔɔ̀ŋ, màuŋ ɓèèmè e jùumù diɛŋ, yèè màŋ ɓèmè e jùumù wo Jisɛ̀ Kulaì diɛŋ.

¹³ Wèètii, sèè e nɛ̀ŋje nyɛnɛŋ wo wùìya kùwìè e hààweɔ̀ sɛɛ̀ e jùumù sùà, kɛ̀ julɔfɔ miŋ naàŋ ɓɛìŋ gbìlè yilì, wèè miŋ go nàŋ nyɛ̀nɛ̀ŋ wo nyuùŋ kùwìè e hààweɔ̀ bà sɛ̀ɛ̀ jùumù sùà.