1 Kɔliìŋ 6 - WƆŊ FƐ̀Ì EBÒ SÌÀŊ DAYÀA

Wo nyuùŋ hààwe dàwi mɔɔ̀ŋ gbìàŋ ke sàwà

¹ Sèè nyɛ̀iŋ nyɛɛ̀ŋ bà guùŋ kùwìè ke jii sùlia wèè wùìyauŋ nɔɔ̀ŋ bà, wo gò zuwò wèè wouŋ kɔ̀à kè sàwà koɓɛ̀ anyuùŋ gò hààwè Dayà nyaŋ wèè gbài eɓìèmàŋjɛ̀wɛ̀ anyùùŋ nɛɛmaŋ nyàŋ.

² Niŋ nyimààŋ kɛ̀ ànyùùŋ nɛɛmaŋ nyàŋ nàŋ do wa nàwèè nàŋ gbààì e ɗuunyaàŋ? Sèè nyɛ̀iŋ nìŋ nɔ̀ŋ anyuùŋ gbààì e ɗuunyaàŋ maŋ sàwà, kɛ̀ niŋ fè ɓɛnɛ̀ŋ wèè naŋ gbàì màŋ sàwà nyɛɛnyɛ̀ɛ̀ mààŋ mɛɛ̀ŋ?

³ Niŋ nyimààŋ kɛ̀ yàwi nàŋ do nàŋ gbààì àŋ màikà nyaŋ? Kɛ̀ kiìŋ nàŋ yaà naàŋ maŋ kèì nyiiŋ wɛɛ̀ŋ niŋ fè ɓɛ̀nɛ̀ŋ gbài?

⁴ Sèè maŋ keì mààŋ mɛɛ̀ŋ màŋ folo, wèè kiìŋ nìŋ kɔà miìŋ ko fɛ̀ɛ̀fèìŋ anyùùŋ nyaŋ kuwà kò sìe gbiŋ kò sààŋ Dayài aŋ miŋ woò?

⁵ E sàngè yààìŋ. Tɔɔɓaa e pɛɛ nɔ̀ŋ wo nyùùŋ guùŋ kòò wò yààìŋ tɛɛ ke gboòiŋ nɛɛ̀ŋ sùà wò ɓɛnɛ̀ŋ wèè wo yɛ̀mɛ̀ e nɛ̀ŋ wòò aŋ wùìya nyàŋ è fèemàŋ.

⁶ Kɛɛ wo wùìyaà bà kɔà wo wùìya ko zɛ̀mɛ̀ɛ̀ŋ keì aŋ dàngè anyuùŋ gò hààwè Dayà nyaŋ aŋ nyiŋ gbààì keì.

⁷ Sèè wo nyùùŋ guùŋ gbààì wo bàa ko zɛ̀mɛ̀ɛ̀ŋ keì, nyɛ̀iŋ gbiŋ nàŋ go. È henàŋ nɔ̀ŋ tɛ̀ɛ̀ wèè naŋ nyìnìàŋ nyɛ̀iŋ bi e kàaɓì wèè naŋ kà ko zɛ̀mɛ̀ɛ̀ŋ keì.

⁸ Kɛɛ nyɛ̀iŋ bi nìŋ kaaɓì aŋ wùìya nyàŋ, nìŋ wuumàŋ aŋ dàwiiŋ nyàŋ yèè anyuùŋ hààwe joo bà pɛɛ, kɛ̀ wèè kiìŋ nìŋ kɔà naàŋ aŋ dàwiiŋ nyàŋ ko zɛ̀mɛ̀ɛ̀ŋ keì sèè àŋ jààìŋ nànàŋ?

⁹ Tɔ̀ɔ̀nyaàŋ, nàŋ nyìmàŋ kɛ̀ anyuùŋ naanààŋ gò kùwìè è hààwe nyàŋ, è Kànà Dayàa bà gbiŋ naàŋ wa nàwèè nàŋ nɔ̀ŋ weè nyiŋ. Ɓɔ̀ nìŋ zuwò nyɛ̀iŋ bi, anyùùŋ nyaŋ gbiŋ yaà e kèì nàànààŋ hmɔŋtu sùà, ɔ̀ɔ̀ àŋ zoolà maŋ gòò, ɔ̀ɔ̀ anyuùŋ ɓèmè aŋ jàwè nyùùŋ ɔ̀ɔ̀ aŋ fàìŋ nyùùŋ, ɔ̀ɔ̀ aŋ kpàkòò tìyèe nyɛ̀nɛ̀ŋ ke yɛ̀ɛ̀, ɔ̀ɔ̀ aŋ jɔùŋ tìyèe nyɛ̀nɛ̀ŋ ke yɛ̀ɛ̀

¹⁰ ɔ̀ɔ̀ wo nyùnɔ̀ɔŋ wuo wɔ̀, ɔ̀ɔ̀ wo nyùùŋ kèè nɛ̀ŋjè, ɔ̀ɔ̀ anyuùŋ tìà maŋ mùàŋ, ɔ̀ɔ̀ wo nyuùŋ nàànààŋ ko nyààŋ, ɔ̀ɔ̀ anyuùŋ wùa, e Kànà Dayàa bà gbiŋ naàŋ wa nàwèè nàŋ nɔ̀ŋ wèè àŋ bà gbiŋ.

¹¹ Yɛi nɔŋ nyɛ̀iŋ nààŋ bà nyiŋ nìŋ yaà wa. Kɛɛ sààngɛ naàŋ, e dèè Kanaà Jisɛ̀ Kulaìɛ yaà e gààŋ Jìnàŋ Dayàa èiŋ gùà e yìwìà maŋ jùumù sùà nìŋ yaà naàŋ anyùùŋ tɔ̀ɔ̀nyaàŋ yèè wo Dayà wòiŋ jàà kùàŋ dìì. Nìŋ yaà naàŋ anyuùŋ jàà ɓula titi e wèè Dayà.

Tòòmoìŋ e kɔɔiŋ nɛ̀ wèè e joowò Dayàa

¹² Wo nyùùŋ bà ɓɛ̀nɛ̀ŋ wòo wààŋ, “Wo Dayà naim gè nyààŋ diɛŋ wèè ka nyɛ̀nɛ̀ŋ nɛ̀ŋ gbiŋ.” Hɛ̀ɛɛ̀ŋ kɛɛ, e nɛ̀ɛŋ gbiŋ nààŋ fè tɛ̀ɛ̀ weèim.

¹³ Wo nyuùŋ joo bà do nàŋ woò wààŋ, “E nɛ̀ŋje yaà wèè ko sùà, yèè ko sùà yaà wèè e nɛ̀ŋje.” Hɛ̀ɛɛ̀ŋ kɛɛ, wo Dayà do nàŋ hìɛ̀ŋ tiŋ tìyèe ko dìa. Ke kpùnaàŋ fè nɛ̀ŋ tòòmo wèè è hmɔŋtu nyìniaŋ, sɔɔ̀ e tòmo wèè Kanaà, yèè wo Kanaà do nàŋ kìɛ̀ŋ ke kpùnaàŋ.

¹⁴ Wo Dayà naŋ gè wo Kanaà e fàa dìì, yèè wò do wi nàŋ gè e fàaà dìì e gaàuŋ nɛ̀ sùà.

¹⁵ Nàŋ nyìmàŋ kɛ̀ maŋ kpùnaiŋ màŋ, màŋ yaà maŋ bà miŋ bà koɓɛ̀ ke kpùnàŋ Jisɛ̀ Kulaìɛ. Miŋ ɓemè ke kpùnàŋ Jisɛ̀ Kulaìɛ bà miŋ nyinìàŋ nyiŋ ke kpùnàŋ jɔùŋ nyɛ̀nɛ̀ŋ e hmɔ̀ŋtù ke dòmaŋ diɛɔ̀ŋ bà? Tɛɛ̀ fè hɛɛnɛ̀ŋ.

¹⁶ Ɓàà zà niŋ nyimààŋ kɛ̀ wò felaaà jaanàŋ kè kpùnauŋ nɛɛ̀ŋ koɓɛ̀ kè jè jɔùŋ nyɛ̀nɛ̀ŋ è hmɔ̀ŋtù kè dòmaŋ diɛɔ̀ŋ wɔ nyiŋ tìyèe àŋ yaà màŋ kèìŋ guùŋ? Wɔŋ fɛ̀ì Dayàa naŋ woò janyai kɛ̀, “Nyiŋ tìyèe àŋ nɔ̀ŋ maŋ kèìŋ guùŋ.”

¹⁷ Kɛɛ wo nyùnɔ̀ɔŋ jàànè wuŋ bi koɓɛ̀ Kanaà wɔ, wuŋ yaà Kanaà àŋ nɔ̀ŋ ke kpùnàŋ guùŋ wo jinàaŋ sùà.

¹⁸ Duàŋ e kèì nàànààŋ hmɔŋtu nyɛ̀nɛŋ, e keì naanààŋ gbiŋ wo nyùùŋ naŋ nyɛ̀nɛ̀ŋ e fè mɔ̀ɔ̀nɛ̀ŋ kè kpùnauŋ nɛɛ̀ŋ, kɛɛ wo nyùnɔ̀ɔŋ naŋ gbèè e hmɔŋtu nyɛ̀nɛŋ wɔ, wò ɓemàŋ e jùumù ke kpùnàŋ wuŋ biɛ̀ diɛŋ.

¹⁹ Niŋ nyimààŋ kɛ̀ kè kpùnaiŋ nɛɛ̀ŋ nàŋ yaà kè sààŋ zòòlò Dayàa wèè wò Jìnàŋ Dayàa, yààìŋ sùà wɔ, wo yèɔ wo Dayà naiŋ kiɛ̀ŋ wɔ? Niŋ fè wèè nyɛ̀iŋ bi, nìŋ yaà wèè Dayà.

²⁰ Wo Dayà naiŋ dìnìè e ɓaà gbee. Wèètii, tòòmoìŋ ke kpùnaiŋ nɛɛ̀ŋ wèè niŋ kiɛ̀uŋ e ɓɛ̀ɛ̀jàa.