1 Kɔliìŋ 13 - WƆŊ FƐ̀Ì EBÒ SÌÀŊ DAYÀA

E mànaŋ kùwie

¹ Kà wɛ̀i ɓɛ̀nɛ̀ŋ gbòà maŋ kàìŋ nyuùŋkpùuŋ e kpùlìà maŋ jè aŋ màikà nyaŋ, kɛɛ sèè miŋ gò kùwìè è mànaŋ, e gbòaim mɛ̀ è yaà nɔŋ mààŋ wɔŋ kaì fàà ɓɔwɔɔ ɓùlìà nɛ̀ŋ, ɔ̀ɔ̀ ke ɓaɓaane kùwìè e giimè gbee.

² Kà wɛ̀i weè pɛɛ kuwìè e kìɛŋ wèè ka gbòà mààŋ wo wɛ̀ijì, ka kùwìè e jiikɛ̀ɛ wèè e nɛ̀ŋ gbiŋ nyìmaŋ, e kìlà ka jàà ke gbùnu gbiŋ jii, ka wɛ̀i pɛɛ kùwìè e hààweɛ̀ gbiŋ mìŋ manaŋ wèè ka gè wɔŋ toò e dìì, kɛɛ sèè miŋ gò kùwìè è mànaŋ, miŋ fè nɛ̀ŋ gbiŋ.

³ Ka wɛ̀i pɛɛ fè e nɛ̀ŋ kàme mɛ̀ gbiŋ e kìlà ka fè ke kpùnaŋ miɛ̀ŋ wèè aŋ nyiŋ sùàŋ, kɛɛ sèè miŋ gò kùwìè è mànaŋ, è yaà wèè foo.

⁴ E mànaŋ naŋ tɔumtɔ̀ùm, yèè è kuwìà nyùùŋ le siwè sìàŋ, e fè gè lè koo ɔ̀ɔ̀ e kɛ̀ɛ̀ màŋ nyongà ɔ̀ɔ̀ e ɓèmè tiŋ bi gbee.

⁵ E mànaŋ fè nɛ̀ŋ mànàŋ tɛɛ, yèè e kuwà kè jii bìa. E mànaŋ fè bànè è kèì nàànààŋ nyùùŋ ko hàa kè jiio sùà.

⁶ E mànaŋ e manàŋ kè nyɛ̀nɛŋ naanààŋ, kɛɛ è gè zɔlɔ̀ wèè e tɔ̀ɔ̀nyaàaŋ.

⁷ E mànaŋ fè soò, yèè e hààwe niŋ nɛ̀, e jii tùlia niŋ nɛ̀, yèè e tɔumtɔ̀ùm niŋ nɛ̀ e fè sɔ̀à.

⁸ E mànaŋ è yaà wèè julɔfɔ. Maŋ mìè gbòà wɛ̀ijì màŋ yaà, kɛɛ màŋ yaà nɔ̀ŋ wèè e teenga kpuu. Maŋ kìɛŋ màŋ yaà wèè nyùùŋ gbùùyà maŋ kaìŋ joo sùà, kɛɛ màŋ do nàŋ gɔ̀à dìì. E jiikɛ̀ɛ è yaà, kɛɛ è do nàŋ mààŋ.

⁹ E nyimààìŋ è nɛ̀ŋ gbiŋ e kìlà maŋ mìè gbòà wɛ̀ijì kòò màŋ dìò sùà,

¹⁰ kɛɛ sèè e yèɛ naŋ dìò sùà lɛ è hnàŋ, e yèɛ gò dìà sùà lɛ do nàŋ jɔɔnɔ̀ŋ.

¹¹ E teengaà mìŋ yaà wa wo jɔ̀àkàiŋ lɛ̀, mìŋ gboo wa mààŋ wo jɔ̀àkàiŋ, ka gongò mààŋ wo jɔ̀àkàiŋ, Ka jàà keì kùàŋ dìì mààŋ wo jɔ̀àkàiŋ. E teengaà mìŋ naŋ naàŋ kamàìŋ nɛ, kà dàngè maŋ tùwò jɔ̀àkàiŋ.

¹² E ɗeweɛ̀ è yààìŋ naàŋ yɛ̀ɛ̀mɛ̀ Dayà wèè wo nɔ̀ŋ lɛ, è yaà mààŋ wɔŋ miimiiŋ fà e fɛ̀ɛ̀ wɔŋ mɛ̀ɛ̀mɛ̀ɛ̀ŋ sùà, kɛɛ e teenga bà sùà, è doiŋ wuŋ nàŋ yɛmɛ̀ janjai. E nɛ̀ɛŋ mìŋ naŋ naàŋ nyìmè lɛ kòò è dìò sùà, kɛɛ è do nàŋ dìò sùà màànààŋ e jììkɛ̀ɛ̀ Dayàa naŋ dìò sùà wèè nyaàiŋ eim dè lɛ.

¹³ E tèèngà guùŋ bi diɛŋ, maŋ kèì ɗì taai mɛɛ̀ŋ nàŋ sia. E hààwe, ke jii tùlia, yèè e mànaŋ, kɛɛ e gbee gàtòɛ nàŋ yaà e mànaŋ.