1 Kɔliìŋ 11 - WƆŊ FƐ̀Ì EBÒ SÌÀŊ DAYÀA

¹ Kpeiŋ kɛ̀ fɔ̀ɔ̀nɔŋ e tɔ̀ɔ̀màŋseìim mɛ̀, màànààŋ mìŋ fɔɔnɔ̀ŋ e tɔ̀ɔ̀màŋsèì Jisɛ̀ Kulaì lɛ.

E kèè maŋ ɗì dèka màŋ e zòòloɛ̀ sùà

² Mìŋ tɛnɛ̀ìŋ e fèfoo e teenga gbiŋ nìŋ jààìm jii, yèè naŋ dè e nɛ̀ɛŋ mìŋ naiŋ kaà lɛ maŋjɛ̀wɛ.

³ Kɛɛ mìŋ manaŋ wèè naŋ jàà jii kɛ̀ wo Jisɛ̀ Kulaì nàŋ yaà wo ɓɛ̀ è ɗì wèè felaa gbiŋ, wo felaa nàŋ yaà wo ɓɛ̀ è ɗì wèè wo jawèuŋ nɔɔ̀ŋ, yèè wo Dayà nàŋ yaà wo ɓɛ̀ è ɗì wèè wo Jisɛ̀ Kulaì.

⁴ Wo felaa gbiŋ wo yèɔ naŋ nɔ̀ŋ ko zoolo ɔ̀ɔ̀ ko wòò ke mìè gbìàŋ Dayà wò naŋ ɓùwò e ɗì wɔ, wò pɔ̀ɔ̀ Jisɛ̀ Kulaì ɓɛ̀ɛ.

⁵ Yèè wo jɔùŋ gbiŋ naŋ nɔ̀ŋ zoolo ɔ̀ɔ̀ wo nɔ̀ŋ ko wòò ke mìè gbìàŋ Dayàa ko ɓài e yèɛ e ɗìuŋ nɛ̀ fè ɓùwa niŋ wò pɔ̀ɔ̀ wo faniuŋ nɔɔ̀ŋ ɓɛ̀ɛ, e fèemàŋ gòòno gbiŋ fè è fèèmàŋ jɔùŋ wii yaà wò jɔunɔ̀ɔŋ naŋ dòò e ɗìuŋ nɛ̀ wɔ.

⁶ Sèè wo jɔùŋ gò dèkà è ɗìuŋ nɛ̀, kɛ̀ è yaà wèè tɛ̀ɛ̀ wo niŋ doò. Yèè nààŋ è yaà e kèì sàngè wèè wo jɔùŋ dòò e ɗì lɛ, wo ɓùwà e ɗìuŋ nɛ̀.

⁷ Wo felaa kuwà wèè wo ɓùwà è ɗìuŋ nɛ̀, e fèfoo wo Dayà nauŋ banè wèè wo tèènè Dayà yèè wo hìàŋ e jòòwo koɓɛ̀ Dayài. Kɛɛ sɔɔ̀ wo jɔ̀ùŋ tɔ̀ɔ̀ e jòòwo koɓɛ̀ felaa.

⁸ Wo jɔùŋ naŋ fòlò felaa sùà, wo felaa nààŋ gò fòlà jɔùŋ sùà.

⁹ Wo Dayà gò wa bànè felaa wèè jɔùŋ, wò naŋ wa bànè wo jɔùŋ esàɓù felaa sùà.

¹⁰ Wèè esàɓù tɛɛ̀, yèè esàɓù aŋ màikà nyaŋ sùà, wo jɔùŋ kuwa wèè wo ɓùwà e ɗìuŋ nɛ̀ wèè wo tɔɔ̀ kɛ̀ wò yaà e gààŋ faniuŋ nɔɔ̀ŋ dìì.

¹¹ Wɔŋ nyiiŋ gè wiɔ̀ sùà wo Kanaà maŋjɛ̀wɛ, wo jɔùŋ yaà felaa gò gòònò sùà àŋ yaà koɓɛ̀ guùŋ.

¹² Nààŋ nɔŋ wo jɔùŋ naŋ wa fòlò wo felaa e kɔɔo sùà, e ɗèwè guùŋ nii sùà nɔŋ wo jɔùŋ naŋ kòmò wo felaa, yèè wo Dayà nàŋ nyɛnɛŋ maŋ keì bi gbiŋ maŋ kaaìŋ.

¹³ Hàaìŋ e kiti wèè nyɛ̀iŋ bi sèè mààŋ è yaà tɛ̀ɛ̀ wèè wo jɔùŋ wo zoolò Dayà kò ɓài e yèɛ wo fè dèkà è ɗì lɛ.

¹⁴ Sɔ̀ɔ̀ è yaà kè kpèè naanààŋ yèè è kèì sàngè wèè wò felaa kùwìè è ɗì duum mùlò mulo?

¹⁵ Kɛɛ sèè è nɔ̀ŋ wèè jɔùŋ, è yaà e nɛ̀ŋ ɓùwìà e ɗì wèè e sìàŋ. Wo Dayà nauŋ niŋ fè wèè e nɔ̀ŋ wɔŋ deè ɓùwìà e ɗìuŋ nɛ̀.

¹⁶ Yɛi nɔŋ maŋ gbòò anyuùŋ hààwe nyàŋ gbiŋ ke gbòò Dayàa sùà nyɛnɛŋ. Yèè esaɓùɛ lɛɛ̀ wo nyùùŋ bà gbiŋ ɓɔ̀ wò gè màŋhɛɛ wèè è yèɛ mìŋ naŋ woò lɛ.

E nɛ̀ŋjè Kanaà

¹⁷ E ɗewe gbiŋ maŋ nyɛ̀nɛŋ gbànaŋ mɛɛ̀ŋ sùà, miŋ fèiŋ tɛnɛ̀ŋ, esaɓù kɛ̀ maŋ dèènè e zòòloiŋ màŋ sùà, nìŋ nyɛnɛŋ naanààŋ e nìàŋ e siaŋ sìàaŋ.

¹⁸ E jiɛ̀jiɛ̀ɛ nàŋ yaà, àim woò kɛ̀ ke gbòò anyuùŋ hààwe nyàŋ sùà, maŋ gboò sùmìàŋ fèemàŋ màŋ yaà e dèèneiŋ nɛ̀ sùà, yèè kà haawè kɛ̀ tɛɛ̀, e bàiŋ yaà e tɔɔɓaa.

¹⁹ E keì dììyè nyùùŋ jii gbiŋ fòo, e fèemàŋ gòòno kòò è yààìŋ wɛ̀i naàŋ e tɛɛ, wèè aŋ yɛmɛ̀ aŋ yè nyaŋ yaà e tɔ̀ɔ̀nyaàaŋ sùà àŋ naŋ jàà kùàŋ dìì nyaŋ janjai.

²⁰ Sèè nìŋ deenàŋ koɓɛ̀ guùŋ mààŋ ke gbòò, e nɛ̀ŋjè Kanaà nààŋ niŋ fè jè.

²¹ Nìŋ tɔɔtù ngèè pɛɛ e nɛ̀ŋje jèe paŋgàà anyùùŋ nyaŋ kpɛ̀ɛ̀yɛ̀ dèèneɛ̀ hnàŋ sùà, yèè nyɛ̀iŋ nààŋ bà nyiŋ nìŋ kɔà e jìè, aŋ bà nyiŋ àŋ tie.

²² Niŋ kuwà màŋ gboo kuaŋ màŋ yè maŋ nìŋ jiiyà nɛ̀ŋ e kìlà naŋ tìà nɛ̀ŋ lɛ? Nìŋ naŋ wùɔ̀ŋ ke gbòò anyuùŋ hààwè Dayà nyaŋ, e kìlà nìŋ manaŋ naŋ sìà anyuùŋ gò kɛ̀ɛ̀nɛ̀ŋ nɛ̀ŋ nyaŋ e sàngè? Tɔɔɓaa miŋ fèiŋ tɛnɛ̀ŋ.

²³ E kàaà mìŋ naŋ gè wo Kanaà Jisɛ̀ Kulaì sìwè lɛ, kàiŋ niŋ kpɛ̀ɛ̀yɛ̀ fèe. Tiŋ nàŋ yaà kɛ̀ wɔŋ dùmɔ̀ɔŋ àŋ nauŋ maàŋ wɔŋ, wò naŋ ɓèmè ke gbɔ̀u,

²⁴ yèè wò naŋ gè wo Dayà ke sɛ̀, wo nyiŋ nyime nyìmè nyɛ̀ɛ̀nyɛ̀ɛ̀. Kpeiŋ wò naŋ woò wààŋ, “Ke kpùnaŋ miɛ̀ŋ kɛɛ̀, nyɛ̀iŋ nàŋ kànàŋ nyiìŋ, nyɛ̀nɛìŋ tɛɛ̀ wèè niŋ jààim jii.”

²⁵ E ɗèwè guùŋ nɛɛ̀ sùà, nààŋ àŋ naŋ kpɛ̀ɛ̀yɛ̀ e nɛ̀ŋjè koyaà jèe, wò naŋ ɓèmè wɔŋ kpòò wààŋ, “Wɔŋ kpòò wɛɛ̀ŋ naŋ yaà maŋ sɛnìim màŋ yè maŋ naŋ hèè le fèè e mìèsùàgùùŋ jɛ̀ì Dayàa. E teenga gbiŋ nìŋ tìè miìŋ, nyɛ̀nɛìŋ niŋ ke jii jàa sùà weèim.”

²⁶ Tɛɛ̀ naŋ tɔɔ̀ kɛ̀ e teenga gbiŋ sùà nìŋ naŋ gbìlè ke gbɔ̀uɛ̀ yèè nìŋ naŋ tììyè wɔŋ kpòò wɛɛ̀ŋ sùà, nìŋ yaà wòo sùà e kèè e fà Kanaà e jèèsùà wo wa nàwèè hnàŋ.

²⁷ E yèɛ kuwa ke nyɛ̀nɛŋ yɛɛ̀ maŋjɛ̀wɛ lɛ̀ nàŋ yaà kɛ̀, sèè nyɛ̀iŋ nyɛɛ̀ŋ bà guùŋ wo gbìlà ke gbɔ̀ù Kanaà, ɔ̀ɔ̀ wo tììyà wɔŋ kpòòuŋ nɔɔ̀ŋ sùà e yèɛ gò hìàŋ è ɓɛ̀ɛ̀jàa kò nɛ̀ɛ̀uŋ niìŋ lɛ, wò ɓèmè e jùumù ke kpùnàŋ Kanaà yaà maŋ sɛnùuŋ màŋ diɛŋ.

²⁸ Wèètii, sɔɔ̀ maŋ yɛ̀mɛ̀ yɛ̀mɛ̀ muàŋ bi tɛ̀ɛ̀ kaiŋ jiɛ̀, yèèngàà mùŋ gbile ke gbɔ̀uɛ̀, e kìlà maŋ tììyà wɔŋ kpòòɔ sùà.

²⁹ Sèè muŋ gò nyìmàŋ è fasàìɛ wèè kè kpùnàŋ Kanaà tɛ̀ɛ̀, sèè mùŋ gbìlè nyiìŋ, yèè mùŋ tiiyà wɔŋ kpòòɔ sùà, màŋ hìàŋ e gbài muàŋ bi diɛŋ nààŋ nɔŋ mùŋ yaà nyiìŋ gbilie yèè mùŋ tie lɛ̀.

³⁰ Tɛɛ̀ naŋ nɔ̀ŋ esaɓù nyɛ̀iŋ nààŋ zimbgeiŋ nìŋ yaà siinyɛŋ, yèè nìŋ naŋ yɔkpɔ̀, e kìlà nyɛ̀iŋ nààŋ bàiŋ nìŋ fà.

³¹ Sèè eiŋ weè tùàŋ yàwi bi maŋ nɔnɔŋ tɛ̀ɛ̀ kaiŋ jiɛ̀, wo Dayà fè wi weè gbaaì.

³² Kɛɛ wo Kanaà gbaì wì, yèè wo wi nimilà wèè wo go wi nàŋ hèè kiti diɛŋ e kpùlìà anyùùŋ ɗuunyaŋ gbànaŋ nyàŋ.

³³ Wèètii nyɛ̀iŋ nààŋ wùìyaim nyàŋ, sèè nìŋ deenàŋ koɓɛ̀ guùŋ wèè naŋ jè e nɛ̀ŋjè Kanaà, fòlaìŋ aŋ dàwiiŋ nyàŋ.

³⁴ Sèè e jìè nɔ̀ŋ nyùùŋ gbiŋ jènɛ̀ŋ ko gboo moo, wèè wo Dayà goiŋ nàŋ gbaì nààŋ nìŋ deenàŋ kòɓɛ̀ guùŋ lɛ. Wèè maŋ keì gbànaŋ màŋ, mìŋ do miŋ nàŋ banebànè sèè mìŋ hnàŋ.