1 Kɔliìŋ 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pɔɔ̀ sìwè, wo yèɔ wo Dayà naŋ nyààŋ wèè wo nɔ̀ŋ wo keela tàeɗùù wèè Jisɛ̀ Kulaì wɔ, yèè wo wùìya wiɔ̀ Sòtinè

² naŋ yaà sìngìè wɔŋ fɛi wɛɛ̀ŋ koɓɛ̀ ke gbòò anyuùŋ hààwe nyàŋ yaà ko Kɔliìŋ yɛ. Nyɛ̀iŋ nyàŋ gbiŋ wo Dayà naŋ nyààŋ wèè naŋ nɔ̀ŋ anyùùŋ nɛ̀ɛ̀màŋ Dayà nyaŋ, aŋ yè nyaŋ yaà aŋ bà nyiŋ bà Jisɛ̀ɛ Kulaì sùà nyaŋ, e kpùlìà anyuùŋ gbànaŋ nyàŋ koɓɛ̀ gbiŋ àŋ naŋ nɔ̀ŋ, aŋ yè nyaŋ humo wo Kana wiɔ̀ Jisɛ̀ Kulaì nyaŋ, wo Kànà yàwi nààŋ gbiɔ̀ŋ.

³ Tɔ̀ wo Dayà wo Dèda wiɔ̀ yaà wo Kanaà Jisɛ̀ Kulaì kiɛ̀iŋ e tɛ̀ɛ̀tɛ̀ɛ̀ yèè ke jii fàa!

Maŋ zòòlo màŋ wo Kulaì sùà

⁴ E teenga gbiŋ mìŋ gè wo Dayà miɔ̀ŋ ke sɛ̀ weèiŋ, e fèfoo wèè e tɛ̀ɛ̀tɛ̀ɛ̀ɛ wò naiŋ fè esàɓù Jisɛ̀ Kulaì sùà lɛ.

⁵ Esàɓù e nɔ̀iŋ aŋ bàiŋbà wo Jisɛ̀ Kulaì sùà, nìŋ naŋ nɔ̀ŋ anyuùŋ bàne manɛ̀ŋ maŋ gbiŋ sùà, e kpùlìà maŋ mìè gbòa yaà e jiikɛ̀ɛɛ̀ gbiŋ.

⁶ Ke miè gbìaàŋ nyaàiŋ dè wo Jisɛ̀ Kulaì, kèiŋ naàŋ kùwà e kɔɔ tɛ̀ɛ̀tɛ̀ɛ̀ kaiŋ,

⁷ yèè esàɓù tɛɛ̀, kòò nìŋ ɓà è kìɛɛ̀ŋ bà guùŋ pɛɛ, nààŋ nìŋ yaà fùlìè wo kààmɔɔɔ̀ŋ Jisɛ̀ Kulaì wèè wo hnàŋ lɛ.

⁸ E kìlà wò doiŋ nàŋ yɛ̀mɛ̀ diɛŋ wo nyɛ̀nɛ̀ŋ naŋ nyìngà sùà e jèèsùà naŋ hàì ko dìaì, e wèè e tɔ̀mɛ goiŋ nàŋ nɔ̀ŋ kè ɗɔ̀ɔ̀ è hnàŋ Kanaà Jisɛ̀ Kulaìɛ diɛŋ.

⁹ Wo Dayà yaà wo nyuùŋ tùlìà jii, wo Dayàa naiŋ nyààŋ wèè naŋ nɔ̀ŋ ke gbòò anyuùŋ hààwe nyàŋ sùà nyɛ̀iŋ nààŋ Jɔ̀àuŋ nɔɔ̀ŋ Jisɛ̀ Kulaì wo Kana wiɔ̀ wɔ.

E tɛɛ gòònoɛ̀ ke gbòò anyuùŋ hààwe nyàŋ sùà

¹⁰ E yìwìà e gààŋ e dèè Kana wiɔ̀ Jisɛ̀ Kulaìɛ sùà, mìŋ yààìŋ dàwe sùà nyɛ̀iŋ nààŋ wùìyaim nyàŋ gbiŋ, wèè e nɛ̀ɛ̀ŋ nìŋ woà lɛ naiŋ jàà kùàŋ dìì, wèè e tɛɛ gòòno goiŋ nàŋ sɛ̀ɛ̀ è fèemàŋ. Nɔ̀iŋ koɓɛ̀ guùŋ, e gòngò guùŋ diɛŋ, yèè esàɓù guùŋ diɛŋ.

¹¹ Anyùùŋ bà e yìwìà ke kpòò Chilìòɛ sùà àim woò kpɛlɛmɛɛŋ nyɛ̀iŋ nààŋ wùìyaim nyàŋ, kɛ̀ e nyaàŋ tàaŋ èiŋ sɛ̀ɛ̀ e tɛɛ.

¹² Tɔ̀ miŋ woò niŋ e ɗewe kii lɛɛ̀ sùa, nyɛ̀iŋ nààŋ gbiŋ nìŋ yaà gbuuye gbàgbà. Wo nyùnɔ̀ɔŋ bà wààŋ, “Wo Pɔɔ̀ mìŋ yaà maŋjɛ̀wɛ.” Wo bàa wààŋ, “Wo Àpolò mìŋ yaà maŋjɛ̀wɛ.” Wo bà wààŋ, “Wo Sifɔ̀ mìŋ yaà maŋjɛ̀wɛ,” yèè wo bà wààŋ, “Wo Jisɛ̀ Kulaì mìŋ yaà maŋjɛ̀wɛ.”

¹³ Nàŋ gòònò Jisɛ̀ Kulaì e tɛɛiŋ. Wo Pɔɔ̀ àŋ naŋ wa jìwìè wɔŋ vànèkpaàa diɛŋ weèiŋ? Àŋ naiŋ wa gùò e dèè Pɔɔ̀ɛ diɛŋ?

¹⁴ Mìŋ naŋ gè wo Dayà ɓaikà wèè miŋ gò gùà nyɛ̀iŋ nyɛɛ̀ŋ bà gbiŋ sɔɔ̀ wo Kulesipɔ̀ yaà wo Gayɔ̀.

¹⁵ Wo nyuuŋ noo nyùùŋ, muŋ fè ɓɛ̀nɛ̀ŋ wòo mààŋ, mùŋ naŋ wa guò wèè maŋ nɔ̀ŋ wò nyùùŋ màŋjɛ̀wɛ̀im.

¹⁶ Hòoò hɛ̀ɛɛ̀ŋ, Mìŋ naŋ gùò wo Sìfanà yaà ke kpoouŋ nɛɛ̀ŋ nyiŋ pɛɛ, kɛɛ miŋ gò ɓɛìŋ jàà jii wèè ka ɓɛìŋ gùà nyùùŋ gbiŋ.

¹⁷ Wo Jisɛ̀ Kulaì gòim wa tùàŋ wèè ka gùà ànyùùŋ. Wò naim wa tùɔ̀ŋ wèè ka wòò ke mìè gbìàŋ Ebò Siaŋ, e yèɛ miŋ fè tòòmò wɔ̀ŋ kaìŋ kùwìè jììkɛ̀ɛ̀ nyuùŋkpùuŋ wɔ̀ŋ yèɔ naŋ ɓɛ̀nɛ̀ŋ nyɛ̀nɛŋ wèè è gààaŋ yaà wɔ̀ŋ vànèkpàà Jisɛ̀ Kulaìɔ sùà lɛ e go.

Wo Jisɛ̀ Kulaì nàŋ yaà e gààaŋ, yèè ke jììkɛ̀ɛ̀ Dayàa

¹⁸ Ke miè gbìaàŋ nyaàiŋ dè e fà Jisɛ̀ Kulaìɛ wɔŋ vànèkpaaà diɛŋ, è yaà e kèì ɓàaɓàa koɓɛ̀ anyùùŋ nyaŋ naŋ go nyàŋ, kɛɛ e wèè yàwi nyàŋ è naìŋ jòèyè nyaŋ, e gààŋ Dayàa le.

¹⁹ Wɔŋ fɛ̀ì Dayàa wààŋ, “Mìŋ do nàŋ pɔ̀ɔ̀pɔ̀ɔ̀ e jììkɛ̀ɛ̀ anyuùŋ kɛ̀ɛ̀jii nyàŋ Ka gɔ̀àgɔ̀à e jììkɛ̀ɛ̀ anyùùŋ nyaŋ naŋ gongò kɛ̀ àŋ naŋ nyìmè zimgbe nyàŋ sùà.”

²⁰ Kiìŋ naŋ kaaìŋ koɓɛ̀ anyuùŋ kɛ̀ɛ̀jii nyàŋ? Kiìŋ naŋ kaaìŋ koɓɛ̀ aŋ kààmɔ̀ɔ̀ŋ nyìmàŋ fɛi zimgbe nyàŋ? Kiìŋ naŋ kaaìŋ koɓɛ̀ aŋ yè nyaŋ kuwa e jii kɛ̀ɛ̀ maŋhɛɛ gèe zimgbe nyàŋ e ɗuunyaàŋ? Wo Dayà naŋ tɔɔ̀ kɛ̀ e jììkɛ̀ɛ̀ ɗuunyaŋ lɛɛ̀ è yaà nɔŋ e ɓàaɓàa.

²¹ Wo Dayà e jiikɛ̀ɛ̀uŋ nɛ̀ sùà wò naŋ nyɛ̀nɛ̀ŋ e nyìngà wèè anyùùŋ auŋ nyìmàŋ, e yìwìà e jììkɛ̀ɛ̀ nyiŋ bi lɛ̀ sùà. Kɛɛ, wo Dayà naŋ ɗewè wèè wo nɔŋ jòèyè anyùùŋ nyaŋ naŋ hààwè ke mìè gbìàŋ ɓàaɓàaà è woàìŋ lɛ.

²² Aŋ Juùù dawà wèè e tɔ̀ɔ̀màŋsèì e kèè mèè, yèè aŋ Guliì nyùùŋ nyàŋ kamàŋ e jiikɛ̀ɛ,

²³ Kɛɛ sèè è nɔ̀ŋ wèè yàwi, è woàìŋ kɛ̀ àŋ naŋ wa jìwìè wo Jisɛ̀ Kulaìɛ wɔŋ vànèkpaàa diɛŋ. Ke miè gbìaŋ bi zà nàŋ sie aŋ Juùù nyaŋ e wùàŋ, yèè koɓɛ̀ anyùùŋ nyaŋ fè àŋ Juùù nyaŋ àŋ gongà kɛ̀ è yaà e ɓàaɓàa,

²⁴ kɛɛ wèè anyùùŋ nyaŋ wo Dayà naŋ nyààŋ lɛ, aŋ Juùù yèè anyùùŋ nyaŋ fè àŋ Juùù nyaŋ, ke miè gbìaŋ bi nàŋ yaà Jisɛ̀ Kulaì ko nɛ̀ɛ̀ŋ nyiŋ niìŋ wo yèɔ yaà e gààŋ Dayàa, yèè e jììkɛ̀ɛ̀ Dayàa wɔ̀.

²⁵ E nɛ̀ɛŋ yaà mààŋ e ɓààɓàà Dayà lɛ̀, è kɛ̀ɛ̀jii è nìàŋ e jììkɛ̀ɛ̀ nyuùŋkpùuŋ, yèè e nɛ̀ɛŋ yàà mààŋ e zɔ̀kpɔ̀ Dayà lɛ, è nyìngà sùà è nìàŋ e gààŋ nyuùŋkpùuŋ.

²⁶ Nyɛ̀iŋ nààŋ wùìyaim nyàŋ, jaà jii e ɗeweɛ̀ nìŋ yaà wa pangàà wo Dayà naiŋ nyààŋ lɛ. E yìwìà e ɗeweɛ̀ maŋ kèìŋ nyuùŋkpùuŋ yɛmɛ̀ e keì dììo sùà lɛ, nyɛ̀iŋ nyɛɛ̀ŋ bà nyiŋ nìŋ kuwa wa è jiikɛ̀ɛ ɔ̀ɔ̀ e gààŋ ɔ̀ɔ̀ nìŋ naŋ fòlò maŋ kpoo kɛnɛ sùà yèè niŋ gò mùngà.

²⁷ E nɛ̀ɛŋ e ɗuunyaàŋ naŋ nyààŋ e ɓàaɓàa lɛ̀, tiŋ wo Dayà naŋ tàeɗùù titi wèè esaɓù, tiŋ nàŋ yaà wèè wo sìà anyuùŋ kɛ̀ɛ̀jii nyàŋ e sàngè, yèè wò naŋ ɓèmè e nɛ̀ɛŋ e ɗuunyaàŋ nyaaŋ e zɔ̀kpɔ̀ lɛ wèè wo sìà anyùùŋ gààŋ nyaŋ e sàngè.

²⁸ Wo Dayà naŋ ɓèmè e nɛ̀ɛŋ e ɗuunyaàŋ naŋ kɔ̀ɔ̀yɛ̀ fɛ̀ɛ̀ sùà àŋ gongà kɛ̀ e fè nɛ̀ŋ bà gbiŋ sùà lɛ, wèè wo pɔ̀ɔ̀pɔ̀ɔ̀ e nɛ̀ɛŋ e ɗuunyaàŋ gongà kɛ̀ e gbììŋ gbììŋ yaà sùà lɛ.

²⁹ Tɛɛ̀ naŋ tɔɔ̀ kɛ̀ wo nyùùŋ gbiŋ fè ɓɛ̀nɛ̀ŋ kɛ̀ɛ̀ màŋ nyòngà kò fɛ̀ɛ̀fèìŋ Dayài.

³⁰ Kɛɛ wo Dayà wòiŋ nyɛ̀nɛ̀ŋ nàŋ nɔ̀ŋ aŋ bàiŋbà Jisɛ̀ Kulaì sùà, yèè wo Dayà naŋ nyɛ̀nɛ̀ŋ wo Jisɛ̀ Kulaì wèè wo nɔ̀ŋ e jiikɛ̀ɛ wilɛ̀. Wuŋ naŋ wi nyɛ̀nɛ̀ŋ è naiŋ nɔ̀ŋ tɔ̀ɔ̀nyaàŋ koɓɛ̀ Dayài, yèè è naiŋ nɔ̀ŋ anyùùŋ nɛ̀ɛ̀màŋ Dayà nyaŋ, yèè wò naŋ wi joeyè wèè foo.

³¹ Nààŋ wɔŋ fɛ̀ì Dayàa naŋ woò lɛ, “Wo nyùnɔ̀ɔŋ gbiŋ manaŋ wèè wo kɛ̀ɛ̀ maŋ nyòngà wɔ, wo kɛ̀ɛ̀ maŋ nyòngà wèè e nɛ̀ɛŋ wo Kanaà naŋ nyɛ̀nɛ̀ŋ lɛ.”