Roma 9 - Kaa n Kəzə̀ n fəghə mə

Ghə̂ ghən Zə̀ kə sày kɔʼnə nə̀ a loʼ ghə̂ a wi

¹ Ghəə ghən n dzanə, à loʼ isəŋə, n badla dzə way ghəə ghə n təŋkey n loʼ nə kəfə kəmɔʼ ghi Klisto. Zay kə Zow kən kə loʼnə n fə̀ŋ zuŋ tiilə dza bənu nə̀ n badla dzə way ghəə ghə.

² Isəŋə tii loʼ nə̀ n ngii mownu, fɔɔbə zey n khənə n fə̀ŋ zuŋ bòʼ ghə̂ ghuŋ, i may way.

³ N dza sey n təŋkey, abə a mə loʼ kə tə̀ mə, mə bəghəm nə̀ Zə̀ kə tsɔɔmə mə, kə dzawwə nuu shi bə mə ghi Klisto abə i loʼ dzə ni gaamə waazə ghuŋ ghən ghə ghə tuunə ni dzûmə Kəzə̀ nə̀ ghi ghə dzəŋi shinə nə inaʼ imɔʼ.

⁴ Ghə loʼ ghə̂ ghə Izree ghən Zə̀ kə â sàynə ghə nə̀ ghə doʼo waa a wi. Tə u dii bə kɔʼlə n wi mə tə ghə. Zə̀ kə â zə̂ nkaa ghi ghə, fuu ghə n laŋ u wi wə, ghəŋə nə̀ ghə i ngɔɔmə wi n jìi zey i kpiinə. À loʼ tə ghə, Zə̀ kə â təb naŋanə ghəə ghə n ndəm.

⁵ Ghə loʼ waa a waa ghə Abraham Ayzik nsə Yakɔb. Ghə â ji bə Klisto wən Zə̀ kə â dza naŋa nə̀ i tûm bənu n naʼ zə Izree tə a loʼ wù sɔŋtsuʼ. Tə loʼ Kəzə̀, à saʼa wi fə wə udzəm, saa ndzəm khə soʼo ni fuu wi n kɔʼləmə nəŋə tədzəm. Zə i loʼ sey.

⁶ N dza dzə way nə̀ təb kən Zə̀ kə â təb naŋanə, kə ka ney dzə bənə kə. N dza sey n təŋkey, à way dzə ghə̂ ghey adzəm ghə jinə ghə n naʼ zə Izree ghə ndzəm loʼnə ghə̂ a Kəzə̀ ghə.

⁷ À way dzə waa waa ghə Abraham adzəm ghə ndzəm loʼnə waa Kəzə̀ ghə. Zə̀ kə â təb naŋa tə̀ Abraham nə̀, “À loʼ kə n bam i Ayzik mə i neynə waa a waa ghə ghə̀ n taŋ.”

⁸ I sey dii nə̀ à way dzə waa ghən Abraham â jinə adzəm, ghə loʼnə waa a Kəzə̀ ghə. À fəd loʼ ghə̂ ghən ghə bəghəmnə n təb kən Zə̀ kə â təbnə tə Abraham, ghə loʼnə waa Kəzə̀ ghə.

⁹ N dza sey n təŋkey, n nəŋə zey Zə̀ kə a fuunə təb kə tii kə tə̀ Abraham, tə â dza nə̀, “Tə̀ mə ni kəm dzəŋŋə bə fa n ndzoʼo nəŋə i zən nə kənum, à i loʼ nə̀ Sara n waa u num u ji.”

¹⁰ A kad way tən kə way kə waa wən Zə̀ kə â təb naŋanə. Waa wən tɔŋɔ Ayzik bày bày saa n nyim i kɔʼ, ney ndow Rebeka, ghə n ji bə ghə ngɔŋbaa.

¹¹ Zə̀ kə mâ sày naŋa tən wù wən tə i doʼlənə tow kə n fəŋŋə kə ghə ngɔ̀ŋ ghən nə ghə ka ghə kam ji. Â loʼ nə̀ ghə ka kam ghəŋə soʼo ghə i dzuŋu i loʼ zə nkee ghə i bəbə zə. Zə̀ kə â ghəŋə sey ni dii bə nə̀ jìi zey tə sàynə ghə̂ a wi ghə tii.

¹² Tə sày dzə way wù a dza tə ghəŋə tsu ghə i loʼ zə, tə fədlə sày wù tə̀ tə ləghənə. À wey loʼ ghə i tii zə Zə̀ kə â dzanə tə Rebeka nə̀, “Waa wə u nyîmmə wə i fwaʼa n tənə winətəghə ə wi.”

¹³ I bɔɔmə loʼ tə i tɔ̀ɔ doʼonə n màʼlə K-a-zə̀ nə̀, “N ləghə Yakɔb, kee tuu maʼa Isaw.”

¹⁴ Saa loʼ ni dza tsu nə ngee nya? À loʼ nə̀ Zə̀ kə badlanu kpey wə ə? Ngaŋ! À ndɔm way dzə sey.

¹⁵ Zə̀ kə badla dzə way kpey wə n təŋkey, tə mâ dza tə Mushi nə̀, “Mə i kwɔɔlə isî n kow wù wey n tsəm kɔʼnə ni kwɔɔlə isî n kow wi, N mow soʼo tə wù wey n tsəm kɔʼnə ni mow tə wi.”

¹⁶ I loʼ nə̀, abə Zə̀ kə sàynə wù, tə sày dzə way wù a dza à ləghə kɔʼ wù tii nkee wù tii ghəŋə tsu ghə i loʼ zə, à fədlə tsəmə kɔʼɔ Kəzə̀ ni dìi sî i wi i kwɔɔlə zə.

¹⁷ À wey loʼ ghə i tɔ̀ɔ doʼo n màʼlə K-a-zə̀ nə̀ Zə̀ kə â dza tə̀ Ferɔ nə̀, “Zuŋ key mə sàynə wɔ nə̀ wə doʼo kədə̀ŋ â loʼ ni ney wɔ, n dii daʼa key n khənə, n ghəŋə soʼo nə̀ aghə̂ adzəm fa n mbi fuu zɔŋ wə n zəd zuŋ.”

¹⁸ I sey dii nə̀ Zə̀ kə kwɔɔlə isî n kow wù wey tə tsəm kɔʼnə ni kwɔɔlə isî n kow wi, à tsəmə soʼo wi wù wey tə ləghənə nə̀ tə i taw n tow kə.

Nəghə u Kəzə̀ u fəə wə nsə sî i wi i kwɔɔlə zə

¹⁹ Wù ghaa u loʼ wə i nam bəbə bə kənu tə mə nə̀, “Abə i loʼnə sey, à loʼ kee Zə̀ kə sə nam sɔʼɔ bə kə nə wɔɔ kə n kow saa? N khənu nə̀ wù loʼ way dzə tə loʼ ni tuu maʼa ghəə zey Zə̀ kə ləghənə.”

²⁰ À kee loʼ nə̀ wù loʼ way dzə tə khənə daʼa kə loʼ kə ni ghɔɔmə ballə ghi Zə̀ kə. Ghaa moʼlə nə̀ ndzəŋ fə loʼnu ni bəb ndow tə̀ wù wey tə bɔmnə ndzəŋ fə tii fə nə̀, “À loʼ kee wə bɔmnə mə n jii i zən ə?”

²¹ I loʼ nə̀, wù wey tə bɔmnə ndzəŋ tə, à khə wi daʼa kə n tsaʼ zey i loʼnə n wɔ wi. À loʼ wù wey tə bɔmnə ndzə̀ŋ tə, tə tsəmə kɔʼɔnə ni ney kɔʼ itsaʼ, tə bɔm kɔʼ fəndzə̀ŋ tii, tə naŋa ndow nə̀ a loʼ fə kùm ighəə fə, tə ney kɔʼ tsaʼ i mɔʼɔ zə, tə bɔm kɔʼ fəndzə̀ŋ tii, tə naŋa ndow nə̀ ghə i maŋa fwaʼa zeeli tii.

²² N jii i mɔʼɔ zə, nghee Zə̀ kə tsəm khə kə nə daʼa kə ni dii nəghə u wi u fəə wə tə dii soʼo daʼa kə wi, tə u tsəm kɔʼnə ni kow fə̀ŋ ghi ghə̂ ghey ghə ghəŋŋənə nə̀ tə i fəələ n nəghə wə, nə̀ a loʼ aghə̂ nə̀ i mə kpi ni buʼ ləŋi maʼa ghə.

²³ Zə̀ kə â dii sî i wi i kwɔɔlə zə tə̀ ghə̂ ghey tə â sàynə, ghəŋə nə̀ ghə keeli kɔʼlə n wi ni ghəŋə nə̀ aghə̂ adzəm a keeli nə̀ tə ngii khə sî i kwɔɔlə zə.

²⁴ Saa loʼ soʼonu n taŋ a ghə̂ ghey Zə̀ kə â say naŋa nə̀ ghə i keeli kɔʼlə mən, a kad way kə ghə̂ a Təjuu ghə i keelinə kɔʼlə n tii mə, ghə̂ ghən ghə way ghə̂ a Təjuu ghə keeli soʼonu kɔʼlə n tii mə.

²⁵ Zə̀ kə dza n màʼlə kə Hosia nə̀, “Ghə̂ ghey ghə way ghə̂ ghuŋ, Mə i tɔŋŋə ghə nə̀ a loʼ ghə̂ ghuŋ Naʼ zey mə â buʼu ləghə tsə way, Mə i ləghə ghə naʼ idzəm.”

²⁶ Zə̀ kə dza soʼo n màʼlə kə Hosia nə̀, “Luʼu tey mə̂ â dzanə tə ghə̂ ghə a tii nə̀, ‘Ghaa way dzə ghə̂ ghuŋ,’ Mə i tɔŋŋə ghə̂ ghey n luʼu tə tii tə nya nə̀ a loʼ waa a Zə̀ kən kə fuunə muu zə.”

²⁷ Wù tûm Kəzə̀ Ayzaya n dey shi bə n dzə̂ i taw zə bòʼ ghə̂ ghə Izree ghə nə̀, “Nghee tə ghə̂ ghə Izree a tsəm loʼ kə n ndəm tə a loʼ kəsəsay n nguŋ ə dzuu, À kee loʼ kə sə fə aghə̂ tii fə i keelinə bəghəshi zə,

²⁸ N təŋkey, Mûkəbii i bəəbə way nəŋə zə nə̀ tə ka kaʼ tən ndow ni chɔd ghə̂ a mbi ghən ghə loʼ nə̀ ghə n ghəŋə bəəbə.”

²⁹ À bɔɔmə loʼ nghee tə wù tûm Kəzə̀ Ayzaya â dzanə nə̀, “Abə Mûkəbii zaamə mbi â ka baʼ naŋa shi kɔʼ sə fə ghə̂ ghə inaʼ a saa a loʼ ghə, tə ghə â ləŋi maʼa soʼo saa tə̀ ghə â ləŋi maʼanə naʼ i Sodom zə nsə naʼ i Gomora zə.”

Gɔŋŋə i Pɔl tə ghə̂ ghə Izree ghə

³⁰ Saa loʼ ni dza tsu nə̀ ngee nya a? Ghə̂ ghən ghə way ghə̂ a Təjuu ghən ghə â dəmə way ni doʼo tsətsəghə n sə K-a-zə̀, ghə nya way tsətsəghə n sə K-a-zə̀ n bam i bəghəm i fə̀ŋ ə?

³¹ Ghə̂ ghə Izree ghey ghə â kee dəmənə ni doʼo tsətsəghə n sə K-a-zə̀ n bam i kəlaŋ, n dza ghə n dəm kìi ə?

³² À tsəm loʼ sey n təŋkey, ghə â dəmə doʼo tsətsəghə n sə K-a-zə̀ nə̀ ghə khə way bəghəm i fə̀ŋ zə, kee moʼlə kə nə̀ a loʼ n bam i kəfwaʼ. Sey ghə n taŋŋə bwu n “Tay zey i ghəŋŋənə nə̀ ghə̂ a bwu.”

³³ I loʼ tə i tɔ̀ɔ doʼonə n màʼlə K-a-zə̀ nə̀, “Koʼo, n naŋŋə tsu itay n naʼ i Zayɔn, i ghəŋŋənə nə ghə̂ a taŋŋə tii, N naŋa tsu kənaa kə i ghəŋŋə nə̀ ghə taŋŋə bwu tii. À kee loʼ nə̀ wù wey tə bəghəmnə tə Zə̀ kə, i keeli way tow kə dədlə kə.”