Roma 6 - Kaa n Kəzə̀ n fəghə mə

Saa loʼ utaw abə saa loʼnə nə kəfə kəmɔʼ ghi Klisto

¹ Saa baa loʼ ni dza tsu nə̀ ngee nya a? Nə saa ndow kə n sə kə ni ghəŋŋə ghəə a bəbə ghə tə Zə̀ kə i ndəŋə dii bə saa n ndzuŋ ə wi ə?

² Ngaŋ! I way dzə ni doʼo sey n təŋkey saa nya loʼ tə̀ a loʼ ghə̂ a kpu ghə abə i bənə ni ghəŋə ghəə a bəbə ghə. Sey, saa way ni ney dzə muu i saa nə̀ saa i kəm ghəŋŋə ndow ghəə a bəbə ghə tii.

³ Ghaa mgbaŋ khənu nə̀ saa adzəm, saa ma ney mmuu n Kəzə̀ mə ni doʼo nə kəfə kəmɔʼ ghi Yeso Klisto. À loʼ ni dii tsu nə̀ saa mâ dzəŋi kpu ghi Klisto.

⁴ Mmuu n Kəzə̀ mən saa â neynə, a loʼ tə̀ ghə nə tsəllə dzəŋi ndownə saa ghi Klisto tə̀ a loʼ ghə̂ a kpu ghə. Zə̀ â shi sey ni ghəŋə nə̀ saa keeli muu i fəghə zə ighələ tə Klisto â keelinə n nəŋə zey Bày wi â zhəm dzəŋŋə bənə wi nə ivə n daʼa kə wi kə səŋə kə.

⁵ Nya wən i loʼ nə̀ saa n doʼo nə kəfə kəmɔʼ ghi Klisto nghee saa â kpunə dzəŋinə ghi wi, i sey dii nə̀ saa i zhəm dzəŋŋə bə soʼonu nə ivə tə̀ tə â zhəm dzəŋŋə bənə nə ivə.

⁶ Saa khənu nə̀ muu i wey zey saa â bùʼ khə tsənə mâ kpuu nuu ghi Yeso n zat kə fəkaʼ, sey nə̀, Zə̀ kə loʼ ni sow maʼa ghəə a bəbə ghən a fwaʼanə n kow saa. Zə̀ kə sow maʼa ghəə a bəbə ghən sey nə̀ kə saa nə kəm doʼlənə kɔd wə tə̀ ghəə a bəbə ghə.

⁷ I loʼ sey n təŋkey, abə wù kpu dzəŋinə ghi Klisto, Zə̀ kə n bəghəshi bə wi n ghəə a bəbə ghə.

⁸ Nghee i loʼ nə̀ saa mâ kpu dzəŋi ghi Klisto, saa khə bəghəm i fə̀ŋ nə̀ saa i muulə soʼonu ghi wi.

⁹ I loʼ sey n təŋkey saa khənu nə̀ nghee Zə̀ kə â zhəm dzəŋŋə bənə Klisto nə ivə, tə nə kəm kpu koʼ way. Və i kəm khə way daʼa kə n kow wi.

¹⁰ Sey, və zən tə â kpunə â loʼ ni wey maʼa tən daʼa kən ghəə a bəbə a khənə n kow saa. Muu zən tə muunə nya, a loʼ muu zey i kpiilənə tə̀ Zə̀ kə.

¹¹ N jii i mɔʼɔ zə, ghaa khə ni zowkeeli tsu nə̀ bəb i kəm khə soʼo way daʼa kə n kow ghaa. Muu zey ghaa muunə nya, loʼ muu zey i kpiilənə tə̀ Zə̀ kə n təŋkey ghaa loʼ nə̀ kəfə kəmɔʼ ghi Yeso Klisto.

¹² Sey, kə ghaa nə̂ bəghəmnə nə̀ ghəə a bəbə a kəm keeli kədaʼa n vən fə uwû fə ghaa, n jìi zey ghəə a bəbə ghə a loʼ ni ghəŋə nə̀ ghaa i ghəŋŋə ndow ghəə a bəbə ghey vən fə uwû fə ghaa fə ləghənə.

¹³ Kə ghaa nə̂ bəghəmnə nə̀ bad kə uwû kə ghaa kə loʼ kə ghəŋŋə nə̀ ghaa i ghəŋŋə ghəə ghey a kpiilə way. Ghaa fəd khə ni fuu nyi may ndow wû i ghaa tə̀ Zə̀ kə tə a loʼ ghə̂ ghey tə bəghəshi bənə ghə nə̀ ivə, fuu ghə n muu i fəghə zə. Ghaa fuu may ndow soʼo wû i ghaa tə Zə̀ kə tə̀ tə loʼ ni ghəŋə nə̀ ghaa i fwaʼa ndow ghəə ghey a loʼnə tsətsəghə n sə kə wi.

¹⁴ Bəb i kəm khə way daʼa kə loʼ kə n kow ghaa n təŋkey, ghaa kəm muu dzə way n tənə kəlaŋ, ghaa nya fəd muu bòʼ ndzuŋ ə Kəzə̀ zən tə dii bənə tə̀ ghaa.

Doʼo na kɔd wə ni ghəŋŋə ghəə ghey a loʼnə tsətsəghə

¹⁵ Saa loʼ ni dza nə̀ ngee nya a? Nghee tə ndzuŋ ə Kəzə̀ bəghəshi dzənə saa n wɔ kə Laŋ u Mushi, saa sey khə ni ndow kə n sə kə ni ghəŋŋə ghəə a bəbə ghə? Ngaŋ! A way dzə sey.

¹⁶ Ghaa khə way nə̀ abə ghaa fuu nyi ndownə wû i ghaa zə ni zow tə wù loʼ tə a loʼ ukɔd, ghaa sey loʼ kɔd u wi. I sey diinə, ghaa loʼ ni doʼo ukɔd tə bəb zə, i ney ndow ghaa nə ivə, nkee ghaa doʼo ukɔd tə Zə̀ kə, tə ghəŋŋə nə̀ ghaa doʼo bə tsətsəghə.

¹⁷ N fuu kəzɔŋŋə tə̀ Zə̀ kə nə̀ ghaa ghən ghaa â bùʼ loʼ tsənə tə a loʼ ukɔd ni ghəŋŋə ghəə a bəbə ghə, ghaa n fə̀ŋ tə ghaa tə kweyyə. Ghaa nay dzûmə isəŋə zey ghə â diinə tə̀ ghaa.

¹⁸ Zə̀ kə n ghaa bəghəshi n ghəə a bəbə ghə, ghaa nya loʼ ukɔd ni ghəŋŋə ghəə ghey a kpiilənə tə̀ Zə̀ kə.

¹⁹ N ghəə ghən ghɔɔmə bə n jìi zey ghaa loʼ ni zowkeeli n təŋkey, ghəə a loʼ a loʼnu a tawnə tə̀ wù sɔŋtsuʼ ni zowkeeli. Sə̂ i sə, ghaa â fuu may nyi ndow wû i ghaa tə a loʼ ukɔd ni ghəŋŋə ghəə a laŋŋə ghə, nsə ghəə a bəbə ghə. A loʼ ighələ ghaa khənə ni fuu may ndow soʼo wû i ghaa tə̀ a loʼ ukɔd ni ghəŋŋə ghəə ghey a loʼnə tsətsəghə sey nə̀ ghaa loʼ ni zow n sə K-a-zə̀.

²⁰ N nəŋə zey ghaa â loʼnə kɔd wə ni ghəŋŋə ghəə a bəbə ghə, ghəə i loʼ zə a way i loʼnə ni chim ghaa nə ghaa i ghəŋŋə ghəə ghey Zə̀ kə ləghənə.

²¹ Ghaa â keeli naamə kə ghaa kə n ghəə a tii ghə, ghaa sə̀ loʼ nə̀ ghaa nya buʼu dədlə n tow kə n ghəə a tii ghə? Ghaa koʼo way nə̀ ghəə ghən adzəm a ney bə ivə ə?

²² Nya wən Zə̀ kə bəghəshinə ghaa n ghəə a ghaa a bəbə ghə, ghaa u doʼo bənə kɔd u wi, naamə kə ghaa kə loʼ nə̀ ghaa nya loʼ ni muu muu zən i zownə tə̀ Zə̀ kə, sey nə̀ ghaa keeli muu zən i nə may way.

²³ I loʼ sey n təŋkey, fə̂ key wù keelinə abə tə ghəŋŋənə ghəə a bəbə ghə, loʼ ivə. Naamə key Zə̀ kə kee fuunə tə̀ wù wey tə loʼnə nə kəfə kəmɔʼ ghi Mûkəbii saa Yeso Klisto loʼ muu zən i nə may way.