Roma 4 - Kaa n Kəzə̀ n fəghə mə

Zəzəə fə Abraham fə dii bə fə key bəghəm i fə̀ŋ i ghəŋŋənə

¹ Saa loʼ ni dza tsu nə̀ ngee kuum Abraham tɔŋŋə bày bày saa a? Tə a loʼ wù sɔŋtsuʼ, à loʼ ghə i ghaa zə zə â shinə tə wi ni dii bə nghee wù doʼlənə tsətsəghə n sə K-a-zə̀ ə?

² Abə à mə loʼ nə̀ Abraham â doʼo tsətsəghə sə K-a-zə̀ bòʼ ghə i dzuŋu i loʼ zə tə â ghəŋənə, tə mə loʼ ni tsɔbə fə̀ŋ tii, tə mə kee khə way ghə i loʼ zə ni tsɔb fə̀ŋ tii n sə K-a-zə̀.

³ I tɔ̀ɔ doʼo n màʼlə K-a-zə̀ nə̀, Abraham â bəghəm tə Zə̀ kə, bəghəm i fə̀ŋ i wi zə n ghəŋə nə̀ Zə̀ kə ney naŋa wi nə̀ tə loʼ wù wey tə loʼnə tsətsəghə.

⁴ Abə wù fwaʼ tsunə, ghə n tsə tsu wi. Fə key ghə tsəənə wi tii, ghə ney dzə way nə̀ a loʼ kənaamə, a fəd loʼ fə key tə fwaʼ tsunə.

⁵ À kee loʼ nə̀ ghə̂ a doʼlə dzə way tsətsəghə n sə K-a-zə̀ bòʼ fwaʼ key ghə fwaʼanə, à fəd loʼ bòʼ bəghəm i fə̀ŋ zey ghə khənə n kow Zə̀ kən kə neyzəənə bəb i ghə̂ a bəbə ghə.

⁶ Fɔɔ Devid â bɔɔmə tiilə dza soʼo ghə i mɔʼɔ zə nə̀ wù wey Zə̀ kə neynə nə̀ tə loʼ tsətsəghə khə ibuulə n təŋkey tə̀ ka fwaʼ dzə fə kə loʼ kə ni doʼo tsətsəghə. Tə â dza nə̀,

⁷ “Buulə i loʼ tə ghə̂ ghən Zə̀ kə neyzəə dzənə ghəə a ghə a bəbə ghə, Kàa maʼa soʼo ghəə a ghə a bəbə ghə.

⁸ Buulə i loʼ tə wù wən Mûkəbii kəm ney way bəb i wi zə n taŋ.”

⁹ À loʼ nə̀ buulə zən loʼ kə tə ghə̂ ghən ghə səghə dzənə tyi u ghə wə mɔɔ i loʼ soʼonu tə ghə̂ ghən ghə ka kam səghə tyi u ghə ə? Ngaŋ, buulə zən loʼ soʼonu tə ghə̂ ghən ghə ka kam səghə tyi u ghə. Saa mgbaŋa dza tsənu nə̀ Abraham â doʼo tsətsəghə n sə K-a-zə̀ bòʼ bəghəm i fə̀ŋ zey tə â khənə n kow Zə̀ kə.

¹⁰ Zə̀ kə â ney nə̀ Abraham loʼ tsətsəghə nə̀ ghə n səghə tyi kə wi kə mɔɔ â loʼ nə̀ ghə ka kam səghə tyi kə wi kə ə? Tə â ney wi nə̀ ghə ka kam səghə tyi kə wi kə â way dzə nə̀ ghə n səghə tyi kə wi kə.

¹¹ Ghə â wɔ səghənu tyi kə Abraham kə. Ghə â səghə tyi kə wi tə a loʼ tsəə ni dii tsu nə̀ tə â bəghəm tə̀ Zə̀ kə nə̀ ghə ka kam səghə tyi kə wi kə. Zə̀ kə n ney ndow wi nə̀ tə loʼ wù wən tə loʼnə tsətsəghə bòʼ bəghəm i fə̀ŋ zey tə khənə n kow wi. Sey, Abraham loʼ bày tə ghə̂ ghən adzəm ghə bəghəmnə tə Zə̀ kə, Zə̀ kə a ney soʼonə ghə nə̀ ghə loʼ tsətsəghə abə ghə tsəm loʼ kə nə̀ ghə ka kam səghə tyi u ghə wə.

¹² Abraham loʼ soʼo bày tə ghə̂ ghən ghə loʼ nə̀ ghə n səghə tyi u ghə wə. Ghə səghə tyi u ghə n fə̀ŋ, à kad way kə a bii. Ghə a bəghəm soʼo tə̀ Zə̀ kə nghee tə̀ bày saa Abraham â bəghəmnə tə̀ wi nə̀ ghə ka kam səghə tyi kə wi kə.

Zə̀ kə fuu fə key tə â təb naŋanə n bam i bəghəm i fə̀ŋ i saa

¹³ Zə̀ kə â təb naŋa tə Abraham ghi waa a waa a wi ghə nə̀ à i keeli ghə mbi zən. Â way dzə nə̀ tə â tɔʼɔ ngii naŋŋə laŋ K-a-zə̀, â fəd loʼ n təŋkey, tə â bəghəm tə Zə̀ kə, Zə̀ kə n ney ndow wi nə̀ tə loʼ tsətsəghə.

¹⁴ Abə i mə loʼnə nə̀ fə kən Zə̀ kə â təb naŋanə, loʼ kə tə̀ ghə̂ ghən ghə naŋŋənə laŋ kə, tə bəghəm i fə̀ŋ zey ghə khənə n kow Zə̀ kə, nsə təb key Zə̀ kə â təb naŋanə mə maŋ loʼ kənunu.

¹⁵ I loʼ sey n təŋkey, luʼu key laŋ kə loʼnə tii, Zə̀ kə n dii nəghə u wi fəə wə n kow ghə̂ ghey ghə bwuulə maʼanə laŋ kə tii kə. Luʼu key laŋ kə way, wù way dzə ni zow nə̀ wù bwu kəlaŋ fu.

¹⁶ À wey loʼ ghə i tii zə à may kə bəghəm i fə̀ŋ zən wù khənə n kow Zə̀ kə, i ghəŋŋənə nə̀ tə keeli fə key Zə̀ kə â təb naŋanə. Zə̀ kə i dii fə̀ŋ ə wi i dzuŋu zə tə̀ waa a waa ghə Abraham ghə adzəm ni luulə ghəə zey tə â təb naŋanə tə Abraham. Zə̀ kə i kad dii kə way fə̀ŋ ə wi i dzuŋu zə tə ghə̂ ghən ghə khənə laŋ kə, tə i dii soʼonu tə̀ ghə̂ ghey ghə bəghəmnə tə̀ wi tə̀ Abraham â bəghəmnə. I loʼ sey n təŋkey, Abraham loʼ bày tə ghə̂ ghey adzəm ghə bəghəmnə tə̀ Zə̀ kə.

¹⁷ I loʼ sey n təŋkey i tɔ̀ɔ doʼo n màʼlə K-a-zə̀ nə̀, Zə̀ kə â dza tə Abraham nə̀, “Mə n ghəŋə nə̀ wə doʼo bày tə̀ naʼa tə n ndəm.” Tə loʼ bày saa n sə̂ K-a-zə̀, Zə̀ kən tə â bəghəmnə tə̀ wi. À loʼ Kəzə̀ kə fuunə muu zə tə ghə̂ ghən ghə kpu dzənə, ghəŋŋə soʼo nə̀, fə wən u ka kam doʼo koʼ tsə, nə̀ u doʼo bə.

¹⁸ Abraham â ləmmə tənə kə n bəghəm i fə̀ŋ nə̀ Zə̀ kə i ghəŋŋənu ghəə zey tə â təb naŋanə nghee tə zuŋ kə â tsəm kəm way tə wi ni ləmə. Ghəə zən n ghəŋə nə̀ Zə̀ kə naŋa wi nə̀ tə loʼ bày tə naʼa tə n ndəm, ighələ tə̀ Zə̀ kə â təb naŋanə tə wi nə̀, “Waa a waa ghə, ghə i loʼ n ndəm tə a loʼ nsəghəbələ idəŋ.”

¹⁹ Nghee tə̀ Abraham â tsəmə kɔʼɔ ndow kə num tə fəbɔm, wey wi Sara n loʼ soʼo nə̀ tə n dən n jìi zey tə way ni kəm ji waa, tə n ka tsəm ney dzə wû u wi wən u dən doʼonə n taŋ. Tə â nam khə kə bəghəm i fə̀ŋ n kow Zə̀ kə nə̀ Zə̀ kə i ghəŋŋənu ghəə zey tə â təb naŋanə tə wi.

²⁰ Abraham â ka tsəm səm dzə ni bəghəm tə Zə̀ kə nə̀ tə i ghəŋŋənu ghəə zey tə â təb naŋanə tə̀ wi. Tə â kee kuu tsu kə fə̀ŋ, mgbaʼi khə kə bəghəm i fə̀ŋ n kow Zə̀ kə, fuu soʼo wi n kɔʼləmə.

²¹ Abraham â khə tən n fə̀ŋ ə wi nə̀ Zə̀ kə khənu daʼa kə tii kə ni ghəŋə ghəə zey tə â təb naŋanə.

²² À loʼ bòʼ bəghəm i fə̀ŋ zən Abraham â khənə n kow Zə̀ kə, Zə̀ kə â neynə wi nə̀ tə loʼ tsətsəghə.

²³ Ghɔɔmə zən i tɔ̀ɔ doʼo n màʼlə K-a-zə̀ nə̀, “Ghə bəghəm naŋa wi nə̀ tə loʼ tsətsəghə.” Â kad way tən kə tə̀ Abraham.

²⁴ Ghə â tɔ̀ɔ soʼo tə saa, ghən Zə̀ kə nə neynə saa nə̀ saa loʼ tsətsəghə n təŋkey saa bəghəm tə̀ wù wey tə â zhəm nuu dzəŋŋə bənə Mûkəbii saa Yeso nə ivə.

²⁵ Yeso wən Zə̀ kə â fuu tsəghə ndownə nə̀ ghə wey bòʼ ghəə a saa a bəbə ghə, Zə̀ kə n zhəm dzəŋŋə bə wi nə ivə ni ghəŋə nə̀ saa doʼo bə tsətsəghə n sə K-a-zə̀.