Roma 16 - Kaa n Kəzə̀ n fəghə mə

Pɔl tɔŋɔ zow ndow ghə̂ a wi

¹ N ləghə ni dza bə tə ghaa nə̀ waazə ə saa u loʼ wə, tɔŋŋə Febe, tə fwaʼanə n dzəŋi kə dzûmə tə Klisto n naʼ i Senkria, loʼ weyzən u dzuŋu wə.

² N dza nə̀ abə tə i bənə n səə ghaa, ghaa kpiiney wi n zəd i Mûkəbii n jii zey ghə̂ a Kəzə̀ a ghəŋŋənə tii. Ghaa fu wi n gaamə zey tə ləghənə n təŋkey, tə n gaamə ndəmə aghə̂, gaamə soʼo mə.

³ Tɔŋɔ zow ndow n na Prisila nsə Akwila. Ghə fwaʼa dzəŋi fwaʼ kə Yeso Klisto kən ghi mə.

⁴ Ghə kpu kìi bòʼ mə. A way tən kə mə n fuunə zɔŋŋə kə tə ghə, dzûmə tə Klisto tən tə loʼnə n naʼ i ghə̂ ghən ghə way ghə̂ a Təjuu ghə, ghə fuu soʼo zɔŋŋə kə ghə.

⁵ Tɔŋɔ zow ndow n na dzûmə tə Klisto tey tə nyiənə n ndaw ghə. Ghaa tɔŋɔ zow ndow soʼo wù fə wuŋ u dzuŋu wə tɔŋɔ Epenetus. Â loʼ wi wù sə̂ isə̂ n mboʼo Eshya ni bəghəm tə Klisto.

⁶ Ghaa tɔŋɔ zow ndow Maria, tə ngii fuu nyi ndownə wû u wi wə ni fwaʼ tə ghaa.

⁷ N tɔŋŋə zow bə soʼo Andronikus nsə Junia nsə waazə ghuŋ, ghə̂ a Təjuu ghən ghə â loʼ dzəŋinə ghi mə n ndaw tsaʼ. Wɔɔ a kəfwaʼ a ghə a loʼ n nəŋ n fəŋŋə kə ngəd tə Klisto. A sə kə â bəghəm ghə tə Klisto tə̀ mə ni bəghəm.

⁸ Tɔŋɔ zow ndow n na Ampliatus. Ghey ngii ləghə wû i ghey bòʼ Mûkəbii.

⁹ Tɔŋɔ zow soʼo Obanus wən tə fwaʼa dzəŋinə fwaʼ kə Klisto ghi saa nsə wù fə wuŋ u dzuŋu wə Stachis.

¹⁰ Tɔŋɔ zowtsu na Apeles wən tə dii shi bənə nə̀ tə n ndzəm bəghəm tə̀ Klisto. Ghaa tɔŋɔ zow ndow ghə̂ ghey n ndaw Aristobulus.

¹¹ Tɔŋɔ zow ndow waazə wuŋ tɔŋŋə Herodion. Ghaa tɔŋɔ zow ndow dzûmə tə Klisto tey n ndaw Nasisus.

¹² Tɔŋɔ zow ndow Trifina nsə Trifosa, ghə fwaʼanə fwaʼ kə Mûkəbii kə. Ghaa tɔŋɔ zow ndow soʼo wù wuŋ u dzuŋu wə, Pesis, tə loʼ weyzən nə̀ tə n ghəŋə ndəmə aghəə tə Mûkəbii.

¹³ Ghaa tɔŋɔ zow Rufus wən tə loʼ nə̀ ghə n ndzəm sày wi n fwaʼ kə Mûkəbii. Ghaa tɔŋɔ zow soʼo này wi wən tə â laalənə tə mə tə a loʼ waa wi.

¹⁴ N buʼu bə kəwɔɔ, fuu ndow tɔŋɔ zow zuŋ zə tə Asinkritus, Flegon, Hemes, Patrobas, Hemas nsə dzûmə tə Klisto tə loʼ tey tə təmə dzəŋinə ghi ghə.

¹⁵ Ghaa fuu ndow tɔŋɔ zow zuŋ tə Filologus, Julia, Nerus nsə waazə wi, Olimpas nsə ghə̂ a Kəzə̀ a loʼ ghey ghə təmə dzəŋinə ghi ghə.

¹⁶ Ghaa tɔŋɔ zow ndow wû i ghaa n ləghə i dzûmə tə Klisto. Dzəŋi u dzûmə tə Klisto udzəm u tûm bə itɔŋɔzow tə̀ ghaa.

Tsə̀ zən Pɔl fuu guŋŋənə

¹⁷ Waazə ghuŋ ghə, n buʼu bə kəwɔɔ nə̀ ghaa ney ighə̂mə ghi ghə̂ ghən ghə ghəŋŋə nə̀ ghə̂ ghə i tsɔɔbə kaabə tow wə, fwɔdlɔ aghə̂ nə kə ghə nə təminə bəghəm i fə̀ŋ i ghə, dii soʼo aghə̂ n ghəə a nuu ghə nə̀ a way ghəə ghey ghə â dii ghaa tii. Kə ghaa nə təmə dzəŋinə ndzoʼo ghə̂ ghən.

¹⁸ N dza sey n təŋkey ghə̂ ghey ghə ghəŋŋənə ndzoʼo ghəə a tii ghə, ghə fwaʼa way tə Mûkəbii saa Klisto, ghə fədlə fwaʼa tə̀ nəghə u ghə wə. Nyim kə ghə kə tsəghə dzɔbə nə idzuu, ghə a khə ghɔɔmə i tsìi zə ni nəb ghə̂ ghən ghə tɔʼ khə way ghəə ghə.

¹⁹ Ghə̂ adzəm keeli may nə̀ ghaa dzûmə i dzuŋu zən ghə diinə ghaa tii. Ghə i tii zə n ghəŋə nə̀ mə i duʼlə. N ləghə nə̀ ghaa tɔʼ chi kɔʼ sə̂ a ghaa ni keeli ghəə zey i dzɔbənə, khə soʼo way wɔɔ kə n ghəə zey i bəbənə.

²⁰ Zə̀ kən kə ghəŋŋənə nə̀ fə̀ŋ tə saa tə i loʼ nə ibuulə, i kuʼlə təmə zə̂ənu Satan, tə naŋa bə wi n tənnə fuu i ghaa. N gɔŋŋə nə̀ Mûkəbii saa tɔŋŋɔ Yeso Klisto dii ghaa n ndzuŋ ə wi.

²¹ Timoti wən tə fwaʼa dzəŋinə ghi mə tûm bə tɔŋɔ zow i wi tə ghaa. Ighələ tə Lusiɔs, Jason nsə Sosipata, ghə loʼnə waazə ghuŋ ghə, tɔŋŋə zow bənə.

²² Mə Tesius wən n tɔɔnə ghəə ghən Pɔl dzanə, tɔŋŋə zow bə ghaa n zəd i Mûkəbii.

²³ Gayɔs wən n muunə n ndaw wi, dzûmə tə Klisto tə nyiə soʼonə n ndaw wi tûm bə ghaa n tɔŋɔ zow zə. Erastus wən tə naŋŋənə mbəghə kə ukhəə kə inaʼ kə ghi waazə ə saa Kwatus tɔŋŋə zow bə ghaa.

²⁴ [N gɔŋŋə nə̀ Zə̀ kə dii ghaa adzəm n ndzuŋ ə wi n bam i Mûkəbii saa Yeso Klisto. Zə i loʼ sey.]

Gɔŋŋə zən Pɔl gɔŋŋə guŋŋə tsunə

²⁵ N gɔŋŋə nə̀ saa mə fuu nkɔʼlə tə̀ Zə̀ kə. Tə loʼ ni ghəŋə nə̀ ghaa təmi taw tsu, ghaa gaʼ soʼo fə̀ŋ n kow wi. A wey loʼ ghəə zey tûm i dzuŋu zey n naʼlənə kuum Yeso Klisto dzanə. Ghəə zey tûm i dzuŋu zən dzanə kuum Klisto â nyi doʼonu n nùm tə ibam tə.

²⁶ Zə̀ kə n chi dii bə ghə i tii zə tə saa nya, saa u loʼ soʼo ni koʼ aghəə nghee tə tûm tə Kəzə̀ tə â tɔɔ naŋa zeynə. Zə̀ kən kə loʼnə nəŋə tədzəm n ghəŋə nə̀ ghə̂ a naʼa tə mbi tədzəm a keeli ghə i tii zə, sey nə̀, ghə i loʼ ni bəghəm tə̀ Klisto, ghə i zow soʼo tə wi.

²⁷ À may kə Kəzə̀ kə khənə ghəə ghə adzəm. N gɔŋŋə nə̀ saa mə tsəghə n bam i Yeso Klisto ni fuu kɔʼləmə tə̀ wi nəŋə tədzəm. Zə i loʼ sey.