Roma 15 - Kaa n Kəzə̀ n fəghə mə

I ghəŋŋə ndow na ghəə ghey a kpiinə tə dzûmə tə Klisto tə loʼ tey

¹ Saa ghən bəghəm i fə̀ŋ i saa i loʼnə nə̀ zə n beyyə, saa khə ni kow tsuu fə̀ŋ ghi dzûmə tə Klisto tə loʼ tey bəghəm i fə̀ŋ i ghə i ka kam tɔʼ beyyə. Kə saa nə ghəŋŋənə ghəə ghey a dzɔbə kənə tə saa.

² Saa khə ni ghəŋŋə ndow ghəə ghey a dzɔbənə tə̀ dzûmə tə Klisto tə loʼ tey nə̀ ghə i loʼ nə iduʼlə, sey nə̀ saa loʼ ni bəghə kɔʼ bə bəghəm i fə̀ŋ i ghə.

³ N dza sey təŋkey, Klisto n wû u wi wə â ka ghəŋə dzə ghəə ghey a dzɔbə kənə tə wi. I loʼ tə i tɔ̀ɔ doʼonə n màʼlə K-a-zə̀ nə̀, “Kpaalə zən ghə̂ ghə â kpaalənə wɔ, À loʼ mə n boʼonə kpaalə i tii zə.”

⁴ Ghɔɔmə i Kəzə̀ zən ghə â tɔ̀ɔ naŋanə, â loʼ ni tsə̀ saa. Ghɔɔmə i tii zə â loʼ ni kuu fə̀ŋ tə saa, ghəŋŋə soʼo nə̀ saa i loʼ ni kow fə̀ŋ ni ləmə fə key Zə̀ kə â təb naŋanə tə̀ saa.

⁵ N gɔŋŋə nə̀ Zə̀ kən kə kuunə fə̀ŋ tə ghə̂ tə, ghəŋŋə soʼo nə̀ ghə̂ ghə i loʼ ni kow fə̀ŋ, kə ghəŋə nə̀ ghaa i loʼ ni khə ndzoʼo fə̀ŋ zey Klisto â khənə n fəŋŋə kə ghaa.

⁶ Abə ghaa ghəŋənə sey, ghaa i loʼ ni təmdzəŋi bə n dzə imɔʼ ni fuu ndow n kɔʼlə tə Zə̀ kə, tə loʼ Bày tə Mûkəbii saa Yeso Klisto.

Tûm i dzuŋu i loʼ soʼo tə̀ ghə̂ ghən ghə way ghə̂ a Təjuu ghə

⁷ I sey dii nə̀ ghaa khə ni bəghəm naŋa a waazu ighələ tə Klisto bəghəm naŋanə ghaa, ni ghəŋə nə̀ ghə̂ ghə i fuu kɔʼləmə tə̀ Zə̀ kə.

⁸ N ləghə nə̀ ghaa keeli tsu nə̀ Klisto â doʼo bə wù kəfwaʼ tə̀ ghə̂ a Təjuu ghə ni dii tsu nə̀ Zə̀ kə dza tsə kə isəŋə. Tə n ghəŋə nə̀ ghəə ghey tə â təb naŋanə tə̀ ghə bày bày a ghə ghə, a bə shi tə̀ tə â təb naŋanə.

⁹ Tə â bə soʼo ni ghəŋə nə̀ ghə̂ ghən ghə way ghə̂ a Təjuu a loʼ ni fuu nkɔʼlə tə̀ Zə̀ kə nghee tə kwɔɔlənə sî zə n kow ghə. I loʼ tə i tɔ̀ɔ doʼonə n màʼlə K-a-zə̀ nə̀, “Sey, mə i kali wɔ n fəŋŋə kə ghə̂ a Təjuu Mə i zhim təndzaŋa ni fuu nkɔʼlə n zəd zə.”

¹⁰ I tɔ̀ɔ doʼo soʼo n màʼlə K-a-zə̀ nə̀, “Ghaa ghən ghaa way ghə̂ a Təjuu ghə, Ghaa khə ni saŋŋə dzəŋi ghi ghə̂ a Kəzə̀ ghə.”

¹¹ Zə a tɔ̀ɔ doʼo soʼo nə̀, “Fuu na kali wə tə Mûkəbii ghaa ghən adzəm ghaa way ghə̂ a Təjuu ghə Aghə̂ adzəm khə ni fuu nkɔʼlə tə wi.”

¹² I tɔ̀ɔ doʼo soʼo n màʼlə kə wù tûm Kəzə̀ Ayzaya nə̀, “Wù i shiə bənu n sali i kəbii i Jese, Tə nə bə saʼa ghə̂ ghən ghə way ghə̂ a Təjuu ghə Ghə̂ ghən ghə way ghə̂ a Təjuu a nə laalə kɔʼɔ ndow kə tə wi.”

¹³ N gɔŋŋə nə̀ Zə̀ kən kə ghəŋŋənə nə̀ ghaa i ləmmə fə key tə â təb naŋanə tə ghaa, kə fuu ghaa n duʼlə zə nsə buulə zə nghee ghaa gaʼnə fə̀ŋ n kow wi, sey nə̀, n daʼa kə Zay kə Zow kə, ghaa i laalə kɔʼɔ ndow tə wi n fə̀ŋ tə ghaa tə tədzəm.

Ghəə zey i kuunə fə̀ŋ ə Pɔl nə̀ tə tɔ̀ɔ màʼlə kən

¹⁴ Waazə ghə, n ndzəm khənu nə̀ ghaa khənu fə̀ŋ i dzuŋu zə ni ghəŋŋə ghəə ghey Zə̀ kə ləghənə, ghaa u loʼ soʼo nə̀ Zə̀ kə n fuu ghaa n tɔb wə naʼ idzəm. Ghaa n ndzəm kɔʼ kpii ni dii tiilə wû i ghaa zə.

¹⁵ À kee loʼ nə̀ n màʼlə kən tɔ̀ɔ bə tə ghaa n fə̀ŋ zuŋ idzəm ni kəm tɔʼ zəŋŋə kpiʼi bə ghaa n ghəə a loʼ ghə. N khə fə̀ŋ ə tii ni tɔ̀ɔ bòʼ ndzuŋ zey Zə̀ kə fuunə tə mə.

¹⁶ Zə̀ kə n fuu mə n ndzuŋ nə̀ mə i loʼ wù kəfwaʼ ə Yeso Klisto tə ghə̂ ghən ghə way ghə̂ a Təjuu ghə. N fwaʼa tə a loʼ fɔɔngili ni naʼlə tûm i dzuŋu zən Zə̀ kə fuu bənə ni ghəŋə nə̀ ghə̂ ghən ghə way ghə̂ a Təjuu ghə, a doʼo bə maʼlə wən Zə̀ kə bəghəmnə, nə̀ a ghə sow naŋa kɔʼ Zay kə Zow kə tə̀ wi.

¹⁷ Nghee n loʼ dzənə nə kəfə kəmɔʼ ghi Yeso Klisto, n loʼnu ni kɔʼlə uwû n fwaʼ kən n fwaʼanə tə̀ Zə̀ kə.

¹⁸ N ndɔm way ni kɔʼlə uwû n ghə i loʼ zə tsəghəshiə way ghəə ghey Klisto ghəŋənə nə̀ n ghəŋə. Tə ghəŋə nə̀ ghə̂ ghən ghə way ghə̂ a Təjuu ghə i zow tə Zə̀ kə n tûm i dzuŋu zən n naʼlənə tə ghə nsə ghəə ghey n ghəŋŋənə n fəŋŋə kə ghə.

¹⁹ Tə â ghəŋə ghəə ghən n daʼa kə tsəə tən nsə faalə mən mə â diinə n fəŋŋə kə ghə nsə n daʼa kə Zay kə Zow kə. Sey, mə n naʼa ngəə tsəghə bə tûm i dzuŋu zə bòʼ Klisto ni ney nuu bə n Yerosalem bə taa bə nə Ilirikum.

²⁰ Dey zuŋ zə â loʼ ni naʼa ndow tûm i dzuŋu zən boʼ Klisto n luʼu tey wù loʼ ka kam naʼa koʼ tsə fuu, sey nə̀, kə n nə bəghənə n tsə kə ndaw nə̀ à səd naŋa wù nuu.

²¹ I loʼ tə i tɔ̀ɔ doʼonə n màʼlə K-a-zə̀ nə̀, “Ghə̂ ghey ghə ka kam dza koʼ tsə ighəə bòʼ wi, ghə i koʼonu wi, Ghə̂ ghey ghə ka kam zow koʼ tsə ighəə bòʼ wi ghə i zowkeelinu.”

²² À wən loʼ zuŋ key bə zuŋ tə ghaa zə a kəm sii ndow ghab kə.

Pɔl bayyə uwû ni bwey ndow n Rom

²³ Nghee i loʼ nə̀ mə n mayyə fwaʼ kuŋ kə n mboʼo tən, zə a loʼ soʼo nə̀ mə â dey kii ni bə koʼ ghaa n ndəmə tənum.

²⁴ N bayyə ni bə nyisa. N moʼlə ni bəŋ koʼo daŋa tsə ghaa, n dzə doʼo kəŋə bə ghi ghaa tə̀ fə̀ŋ zuŋ tsu kay tsu. Abə mə i dzə doʼo kəŋə bənə ghi ghaa, mə tsəghə ndow daŋŋə n Spen, ghaa i loʼ soʼo ni gaamə mə ni ndow fu.

²⁵ Nyisa wən, n loʼ n jii n ndownə n Yerosalem ni ndow fuu igaamə tə̀ ghə̂ a Kəzə̀ ghey fu.

²⁶ N dza sey n təŋkey, dzûmə tə Klisto tey n Masedonya nsə Akaya, ghə n tsow fə wə n fə̀ŋ tə ghə tə dzuŋu tə ni fuu tə a loʼ kənaamə tə ghə̂ a Kəzə̀ ghey ghə laanə n naʼ i Yerosalem

²⁷ Ghə â duʼlənu ni ghəŋə sey n təŋkey, ghə â koʼ tsu nə̀ ghə ndzəm khə ghə̂ a Təjuu n ndaŋ kə. Ghə â koʼ sey n təŋkey, tûm i dzuŋu zə â kaʼ nuu bə n wɔ ghə̂ a Təjuu ghə tə tûm tii ni bə tə̀ ghə̂ ghey ghə way ghə̂ a Təjuu ghə, ghə a loʼ dzɔbnə nya tə a loʼ ghə̂ a Kəzə̀. Nghee ghə loʼ dzɔbnə nya bòʼ ghə̂ a Təjuu, ghə a koʼ tsu nə̀ i dzɔbənu ni tsow tsu ufə ni gaamə ndow ghə̂ a Təjuu tii.

²⁸ Abə mə i mayyə kɔʼnə fwaʼ kən, fuu tsəghə ndow soʼo khəə wən ghə â tsowwə kɔʼnə tə ghə, mə i daŋŋə bə ni bə koʼ ghaa abə n ndownə n Spen.

²⁹ N khənu nə̀ abə mə i bənə, Klisto i buulənu saa naʼ idzəm abə mə i naʼlənə tûm i dzuŋu zə ghi ghaa.

³⁰ Waazə ghə, n buʼu bə kəwɔɔ tə ghaa nə̀ ghaa təmdzəŋi ni ngii gɔŋŋə tə̀ Zə̀ kə n tow kuŋ, nghee saa loʼnə nə kəfə kəmɔʼ ghi Mûkəbii saa Yeso Klisto, Zay kə Zow kə u ghəŋə soʼo nə̀ saa i ləghə wû i saa zə.

³¹ Ghaa gɔŋŋə nə̀ Zə̀ kə bəghəshi mə n wɔɔ kə ghə̂ a Judeya ghən ghə khə way bəghəm i fə̀ŋ zə. Ghaa gɔŋŋə soʼo nə̀ ghə̂ a Kəzə̀ ghey fu, ghə i loʼ ni bəghəm fə wən n ndownə n ghii wə ni fuu tə ghə, ghə bəghəm soʼo fwaʼ kuŋ.

³² Ghaa gɔŋŋə sey, sey nə̀ Zə̀ kə ghəŋə nə̀ n bə n səə ghaa nə iduʼlə, n zayyə daŋŋə soʼo n fəŋŋə kə ghaa abə n bənə.

³³ N gɔŋŋə nə̀ Zə̀ kən kə fuunə buulə zə i loʼ ghi ghaa adzəm. Zə i loʼ sey.