Roma 14 - Kaa n Kəzə̀ n fəghə mə

Kə wə nə saʼanə wù n ghəə zey tə bəghəmnə tii

¹ Ghaa khə ni bəghəm naŋa dzûmə tə Klisto tey tə loʼ nə̀ ghə ka kam tɔʼ beyyə taw n bəghəm i fə̀ŋ i ghə. Kə ghaa nə baŋŋənə fəghəm tə ghi ghə n ghəə zey ghə moʼlənə nə̀ i kpiinu nkee i zey ghə moʼlənə nə̀ i kpiilə way.

² N dza sey n təŋkey wù wey tə loʼ nə̀ bəghəm i fə̀ŋ i wi zə n tɔʼ beyyə, bəghəm i fə̀ŋ i wi i dii tsu nə̀ tə loʼnu ni zə̂ ufə udzəm, tə wey tə kee loʼ nə̀ bəghəm i fə̀ŋ i wi i ka kam tɔʼ beyyə, kee sày fəə kə tow u fə.

³ Sey, wù wey tə zə̂ənə fə wə udzəm khə way ni koʼo kii wù wey tə zə̂ə way fə u tii wə udzəm tə a loʼ wi. Wù wey tə kee say fəə kənə tow u fə wə, khə soʼo way ni saʼ wù wey tə zə̂ənə fə wə udzəm n təŋkey, Zə̀ kə n ghə bəghəm.

⁴ Wə loʼ ndee tə wə i saʼa wù kəfwaʼ a wù nuu ə? À loʼ kə mûkəbii wi tə loʼnə ni dza nə̀ tə fwaʼa dzɔbənu nkee tə fwaʼa dzɔbə way. N daʼa K-a-zə̀, tə i fwaʼa dzɔbənu n təŋkey à loʼ Mûkəbii tə loʼnə ni ghəŋə wi nə̀ tə fwaʼ dzɔb.

⁵ À loʼ ighələ, ghə̂ a loʼ a loʼnu, ghə moʼlənə nə̀ tsuʼu n loʼ n loʼnu, à loʼnə tsuʼu n səŋi mə ni ngɔɔmə Kəzə̀ tii tsəghəshi tsuʼu n loʼ mey. Ghə̂ a loʼ ghə u kee khə n fə̀ŋ tə ghə nə̀ tsuʼu n dzəm loʼ kə ighələ. À khə kə kay wù ni sày tsuʼ fey tə moʼlə nə̀ fə kpiinu ni ngɔɔmə Kəzə̀ tii.

⁶ Wù wey tə sày naŋa kɔʼnə tsuʼ fə loʼ fə nə̀ a loʼ tsuʼ fə səŋi fə tə̀ wi, tə sey ghəŋŋə kə ni fuu kɔʼləmə tə Zə̀ kə. Wù wey tə zə̂ənə fə wə udzəm, ngəŋŋə fuu kə nkɔʼlə tə Mûkəbii n təŋkey tə zə̂ə sey, tə n fuu kəzɔŋŋə tə̀ Zə̀ kə. Wù wey tə sày zə̂ənə fə wə, tə sey ghəŋŋə soʼo ni fuu ingɔɔmə tə Mûkəbii, tə u fuu soʼonə zɔŋŋə kə tə̀ Zə̀ kə n fə wey tə zə̂ənə.

⁷ I loʼ sey n təŋkey, wù saa u loʼ u way dzə tə muunə n daʼa kə wi, u loʼ u way soʼo tə kpuunə n daʼa kə wi.

⁸ Abə saa muunə, saa muu ni fuu kɔʼləmə tə Mûkəbii, nə̀ saa kpuunu, saa kpuu ni fuu wi n kɔʼləmə. Sey, abə saa loʼnə utaw nkee saa kpuu kənu, muu i saa i loʼ kə ni fuu nkɔʼlə tə Mûkəbii.

⁹ Klisto â kpuu, kəm zhəm dzəŋŋə bə sey nə̀ tə i loʼ mûkəbii tə ghə̂ ghən ghə loʼnə utaw nsə ghə̂ ghən ghə kpuu dzənə.

¹⁰ Ghaa ghən ghaa say zə̂ənə fə wə, à loʼ kee ghaa saʼanə dzûmə tə Klisto tə loʼ tən ə? A kee bə ghaa ghən ghaa zə̂ənə fə wə udzəm, a loʼ kee ghaa koʼo kiinə dzûmə tə Klisto tə loʼ tən ə? I loʼ nə̀ saa adzəm, saa i doʼlə n tay i saʼ, Zə̀ kə i saʼ saa.

¹¹ I loʼ sey n təŋkey i tɔ̀ɔ doʼo n màʼlə K-a-zə̀ nə̀, Zə̀ kə dza nə̀, “Tə n loʼnə Zə̀ kə, Aghə̂ adzəm i təmə tənguʼ n tənə mə Aghə̂ adzəm i dza shi bə n dzuu a ghə ghə nə̀ n loʼ Kəzə̀.”

¹² À wey loʼ ghə i tii zə, saa adzəm saa i bəghənu n sə̂ K-a-zə̀ kay wù i taŋŋə dza kɔʼ bə nghee zə a loʼnə tii.

Kə wə nə ghəŋŋə nə̀ dzûmə Klisto u loʼ u ghəŋə bəəbə

¹³ I loʼ sey n təŋkey saa khə ni tsəm tsu n fə̀ŋ tə saa nə̀ saa i ghəŋə dzə way ghə i loʼ zə i loʼ ni ghəŋə nə̀ dzûmə Klisto u loʼ u bwu n ghəə a bəbə ghə.

¹⁴ Nghee n loʼnə nə kəfə kəmɔʼ ghi Mûkəbii Yeso, n ndzəm khənu nə̀ fəzəə u loʼ u way, u loʼ ni ghəŋə nə̀ wù i bəbə n sə K-a-zə̀. Abə wù loʼ kee moʼlənə nə̀ fəzəə u loʼ u loʼnu u ghəŋŋənə nə̀ wù i bəbə n sə K-a-zə̀, kə tə nə zə̂ənə fəzəə u tii wə n təŋkey abə tə zə̂nə fəzəə u tii wə, tə n sey ghəŋə bəəbə n fə̀ŋ ə wi.

¹⁵ Abə à loʼ nə̀ fə key wə zə̂ənə ghəŋŋə nə̀ dzûmə Klisto u loʼ wə i khə fəmmə kə n fə̀ŋ ə wi, à sey loʼ nə̀ wə dii dzə way ləghə zə tə wi nghee wə nam zə̂ə ndow kə fə kə tii kə. Kə wə nə ghəŋŋə nə̀ fə key wə zə̂ənə, kə bəəbə maʼa wù nə̀ Klisto mâ kpuu n tow kə wi.

¹⁶ Sey, kə wə nə ghəŋŋə nə̀ wù loʼ ghɔɔmə bəəbə n tow kə loʼ sey nə̀ ghəə zey wə mə ghəŋənə, u mə khə nə̀ a mgbaŋ loʼ ghə i dzuŋu zə, zə u fəd doʼo bənə ghə i bəbə zə tə wi.

¹⁷ N dza sey n təŋkey, ghəə a fɔɔ u Kəzə̀ à way dzə kə ghəə a zə̂ə ghə nkee ghəə a mə̂ə ghə, ghəə a tii a fəd loʼ nə̀ wə i zow ndow tə̀ Zay kə Zow kə, kə ghəŋŋənə nə̀ wə i ghəŋŋə ghəə ghən a kpiilənə tə̀ Zə̀ kə, muu nə ibuulə nsə ni muu nə iduʼlə.

¹⁸ Abə wə fwaʼanə tə Klisto n jii zən, Zə̀ kə n duʼlə, ghə̂ ghə n kali soʼo nə̀ wə loʼ wù dzuŋu.

¹⁹ À wey loʼ ghə i tii zə saa khə ni ghəŋŋə ghəə ghey ghə i ghəŋŋənə nə̀ saa i muu nə ibuulə, ghəŋŋə soʼo nə̀ dzûmə tə Klisto tə loʼ tən tə taw may kɔʼ bə n bəghəm i fə̀ŋ i ghə.

²⁰ Kə fə key wə zə̂ənə nə bəəbə maʼanə fwaʼ K-a-zə̀ n fəŋŋə kə dzûmə tə Klisto. À loʼ kənu isəŋə nə̀ nfəzəə n dzəm n dzɔbənu tə Zə̀ kə, à kee loʼ nə̀ i dzɔbə way tə wù ni zə̂ fə key kə i ghəŋŋə nə̀ dzûmə ə Klisto u loʼ u bwu səə n bəghəm i fə̀ŋ i wi.

²¹ Sey, i dzɔb tsəghəshi ni doʼo nə̀ wə fəə way nyam, məə way nlə mə, ghəŋŋə way ghəə ghey à loʼ ni ghəŋə nə̀ dzûmə Klisto u loʼ u bwu səə n bəghəm i fə̀ŋ i wi.

²² Ghəə zey wə bəghəmnə tii kuum ghəə ghən, i doʼotsu kə ghi wɔ nsə Zə̀ kə. Buulə i loʼ tə wù wey fə̀ŋ ə wi fəmmə way wi abə tə ghəŋŋə ndownə ghəə zey tə khə nə̀ i kpiinu.

²³ Wù wey tə kee səmənə abə tə dza i zə̂ kəfə, nə̀ tə zə̂ ndownu fə kə tii kə, Zə̀ kə n ney nə̀ wù tii n ghəŋə bəəbə n təŋkey, tə ka ghəŋə dzə ghəə zey i diinə nə̀ tə bəghəm tə̀ Zə̀ kə. Ghəə ghey adzəm wù ghəŋŋənə nə̀ a dii bə nə̀ wə ka bəghəm tə̀ Zə̀ kə, loʼ ghəə a bəbə ghə.