Roma 12 - Kaa n Kəzə̀ n fəghə mə

Jìi zey i kpiinə tə dzûmə tə Klisto tə ni muu tii tə̀ Zə̀ kə

¹ Waazə ghə, bòʼ sî i kwɔɔlə zən Zə̀ kə khənə n kow saa, n buʼu bə kəwɔɔ tə ghaa nə̀, ghaa fuu may ndow wû i ghaa tə Zə̀ kə tə a loʼ maʼlə wən u loʼnə utaw. Ghaa khə ni fuu may ndow wû i ghaa tə a loʼ maʼlə wən u zownə, dzɔbə soʼo tə̀ Zə̀ kə. À wən ndzəm loʼ jii zən i kpiinə tə̀ ghaa ni ngɔɔmə wi tii.

² Kə ghaa nə dzûmənə ghow kə ibwey kə ghə̂ a mbi ghən, fəd zəghə tsu n na nə̀ Zə̀ kə kweyyə kɔʼ fə̀ŋ tə ghaa. Abə ghaa ghəŋənə sey, ghaa i loʼ ni keeli ghəə zey Zə̀ kə ləghənə. Ghaa i khə ghəə zey i loʼnə ghə i dzuŋu zə tə Zə̀ kə, khə ghəə zey i loʼnə tsətsəghə, kpiilə soʼo tə̀ wi.

³ Nghee tə̀ Zə̀ kə diinə mə n ndzuŋ ni fuu mə n daʼa kə, n dza bə tə ghaa adzəm nə̀, kə ghaa nə kɔʼlə naŋŋənə wû i ghaa zə tsəghəshiə nghee ghaa khə ni kɔʼlə tii, ghaa khə ni fəd ney ighə̂mə n ghəə ghey ghaa sàynə ni ghəŋə. Kay wù khə ni ghəŋŋə ndow ghəə ghə tə̀ Zə̀ kə fuunə wi n bəghəm i fə̀ŋ zə.

⁴ N dza sey n təŋkey wû u wù u khə uzuŋ n ndəm, zuŋ u wû u tii wə u khənə fwaʼa tə ghə tə n nəŋ n nəŋ.

⁵ À loʼ ighələ ghi saa ghən saa bəghəmnə tə Klisto, nghee tə saa loʼ kənə n ndəm, saa dzəŋi loʼ tə a loʼ uwû umɔʼ, saa u dzəŋi gaamə tiilənə wû i saa zə.

⁶ I loʼ nə̀, nghee tə̀ Zə̀ kə khənə fə̀ŋ i dzuŋu zə, tə n fuu kay wù saa n naamə kə wi kə n nəŋ. Abə à loʼ nə̀ Zə̀ kə naamə wɔ n naamə kə ni naʼlə tûm Kəzə̀, wə khə ni teeli naʼlə ndow sey tə̀ Zə̀ kə fuunə wɔ n bəghəm i fə̀ŋ zə.

⁷ Abə Zə̀ kə fuu wɔ n naamə kə ni gaamə dzûmə tə Klisto, wə n gaamə ndow ghə n fə̀ŋ zə idzəm, nə̀ tə fuu wɔ n naamə kə ni dii dzûmə tə Klisto, wə n dii ndow n fə̀ŋ zə idzəm.

⁸ Abə Zə̀ kə fuunə wɔ n naamə kə ni kuu fə̀ŋ tə ghə̂ tə, wə n ghəŋə ndow sey n fə̀ŋ zə idzəm. Nə Zə̀ kə fuu wɔ n naamə kə ni buu n wɔɔ kə, wə n fuu ndow n fə̀ŋ zə idzəm. Abə Zə̀ kə fuunə wɔ n daʼa kə ni kwu keeli aghə̂, wə n kwu keeli ghə n wɔɔ a dzuŋu ghə. Nə Zə̀ kə fuu wɔ n naamə kə ni ghəŋŋə ndzuŋ, wə n ghəŋŋə ndow sey nə̀ iduʼlə.

⁹ Ghaa khə ni ndzəmə dii ndow ləghə zə tə ghə̂ ghə. Ghaa khə ni taw ndow kə ni ghəŋŋə ghəə a dzuŋu ghə, kee baa ghəə a bəbə ghə.

¹⁰ Ghaa khə ni ləghə tiilə wû i ghaa zə tə a loʼ dzûmə tə Klisto. Ghaa keeli zay ni ngɔɔmə waazu ghə tsəghəshiə tə ghaa ngɔɔmənə wû i ghaa zə.

¹¹ Ndəmi n na wû zə ni fwaʼ, kə ghaa nə doʼlənə ghə̂ a lay ghə. Ghaa khə ni khə zày ni fwaʼa ndow tə Mûkəbii n fə̀ŋ tə ghaa tə tədzəm.

¹² Ghaa khə ni duʼlə ni ləmə ghəə ghən Zə̀ kə təb naŋanə tə ghaa. Ghaa i kow fə̀ŋ abə ghaa loʼnə nə uchɔd, gɔŋŋə nəŋə tədzəm.

¹³ Ghaa khə ni buu n wɔɔ kə ni fuu ndow tə dzûmə tə Klisto tey tə laʼanə fə kə n fəŋŋə kə ghaa. Fuʼu n təndaw n ghaa n khə ni loʼ tən kə təghə tə̀ ghə̂ ghən ghə bwey bəghənə.

¹⁴ Ghaa i gɔŋŋə ndow tə Zə̀ kə nə̀ tə buulə ghə̂ ghey ghə ghəŋənə nə̀ ghaa i fəʼlə. Ghaa i dza ndow nə̀ Zə̀ kə buulə ghə, kə tə nə tsɔɔmənə ghə.

¹⁵ I duʼlə n na ghi ghə̂ ghey ghə duʼlənə, mow soʼo ghi ghə̂ ghey ghə mownə.

¹⁶ I muu n na nə kəfə kəmɔʼ ghi ghə̂ ghə adzəm. Kə ghaa nə kɔʼlənə wû zə, ghaa fəd tsuulə tsu wû i ghaa sey nə̀, ghaa i loʼ dzəŋi ghi ghə̂ ghə adzəm. Kə wù nə moʼlənə nə̀ tə khə aghəə adzəm.

¹⁷ Kə ghaa nə kuumənə bəb zə nə ibəb. Ndəmi tsu n na wû zə ni ghəŋŋə ndow ghəə ghey aghə̂ adzəm loʼ ni koʼ bə nə̀ a loʼ ghəə a dzuŋu ghə.

¹⁸ Ndəmi tsu na wû zə ni koʼ nə̀ abə jii loʼnə, ghaa i muu nə ibuulə ghi ghə̂ ghə adzəm.

¹⁹ Waazə ghuŋ a dzuŋu ghə, kə ghaa nə deynə ngəmə tə abə wù ghəŋə bəəbənə ghaa n ghəə zə, kee naŋa ndow na tə Zə̀ kə, tə i dey fu ngəmə tə ghaa, n təŋkey, i tɔ̀ɔ doʼo n màʼlə K-a-zə̀ nə̀ Zə̀ kə dza nə̀, “À loʼ mə ni dey təngəmə n kow ghə̂ ghey ghə ghəŋŋənə ghəə a bəbə ghə, n tsə dzəŋŋə ghə̂ ghey ghə fəmmənə ghə̂ a loʼ ghə.”

²⁰ Sey, kə wə nə deynə ngəmə tə, fədlə ghəŋə ndow ghəə ghey màʼlə K-a-zə̀ kə dzanə nə̀, “Fuu fəzəə wə tə wù təngəmə wə bə tə dey bənə dzəŋ, Wə fuu mmuu tə̀ wi abə fə̀ŋ ə mmuu zuʼlənə wi. Abə wə ghəŋŋənə sey, tə i ngii keeli tow kə dədlə kə.”

²¹ Kə ghaa nə bəghəm nə̀ ghəə a bəbə a taw tsəghə ghaa, ghaa fəd taw tsəghə ghəə a bəbə ghə n ghəə a dzuŋu ghey ghaa ghəŋŋənə tə̀ ghə̂ ghə.