Matyo 8 - Kaa n Kəzə̀ n fəghə mə

Yeso baŋŋə wù ukə̀m

¹ Ambə Yeso nuu shi tsu bənə nə ukaʼ, nɔɔ kə aghə̂ kə n dzûmə bə wi.

² Wù ukə̀m u loʼ wə n bə təm bə tənguʼ n tənə wi dza tə̀ wi nə̀, “Mûkəbii, abə wə̀ ləghənə, wə loʼ ni ghəŋə mə nə̀ n taw.”

³ Yeso n naalə shi ndòw kəwɔɔ mɔm tsu wù ukə̀m wey, dza tə̀ wi nə̀, “N ləghənu, taw kɔʼ!” Wù wey n daŋŋə taw i kɔʼ.

⁴ Yeso n dza ndòw tə̀ wi nə̀, “Kə̂ wə nə̀ dzanə ghəə zən tə̀ wù loʼ, ndòw dii ndòw wû wə wə̀ tə̀ fɔɔngili, wə fuu ndòw maʼlə wey Mushi â dzanə, ni dii tsu nə̀ wə n taw.”

Yeso baŋŋə wù kəfwaʼ a khəmndzughu ə təsawgoʼ

⁵ Nghee tə̀ Yeso nyi ndòwnə n naʼ i Kapenum, wù nii sàʼ kə təsawgoʼ kə Roma u loʼ wə n bə n səə wi, buʼ wi n wɔɔ kə nə̀,

⁶ “Mûkəbii, wù kəfwaʼ wuŋ nyəŋ n ndaw nə̀ wû u wi wə n kpu doʼo, tə ngii zow ifɔɔbə.”

⁷ Yeso n dza ndòw tə̀ wi nə̀, “N bə baŋŋənu wi.”

⁸ Wù nii u təsawgoʼ wey n dza tə̀ wi nə̀, “Mûkəbii, n ka kɔʼ kpii dzə tə̀ wɔ ni bə n ndaw zuŋ, maŋa tsəʼlə tsu kə laŋ kə, wù kəfwaʼ wuŋ i taw kɔʼ.

⁹ N təŋkey, mə soʼo, n loʼ n tənə daʼa kə wù tə tsəghəshi mə, mə u khə soʼonə sawgoʼ tə, tə fwaʼanə n tənə mə̀. N dza ndòw tə̀ wù ghə umɔʼ nə̀, ‘Ndòw!’ Tə n ndòw. Mə n dza tsu tə̀ u loʼ wə nə̀, ‘Bəghə fa!’ Tə n bɔɔmə bə. Mə n dza tsu tə̀ wù kəfwaʼ wuŋ nə̀, ‘Ghəŋə ndòw sa!’ Tə n bɔɔmə ghəŋə i ndòw.”

¹⁰ Ambə Yeso zow tsunə ghəə ghən, dzuu zə n ngii zum wi, tə n dza ndòw tə̀ ghə̂ ghey ghə â bəghənə n baa wi nə̀, “N kùum dza bə isəŋə tə̀ ghaa nə̀, n ka kam koʼ koʼ tsə wù tə khənə ndzoʼo bəghəm i fə̀ŋ zən n naʼ zə Izree.

¹¹ N dza bə tə̀ ghaa nə̀ ndəmə aghə̂ ghə i bəghənu, ghə nuu bənə n bad kə mbi key nyi i shiə kɔʼɔ bənə tii, nsə n bad key nyi i nyiə tsunə tii, ghə i bə doʼo bə nə kəzə̂ ghi Abraham, Ayzik, nsə Yakɔb n fɔ̀ɔ wə idəŋ wə.

¹² Ghə i fəd dzùm maʼa shi ghə̂ ghey ghə â bayyə naŋa fɔ̀ɔ wə tə ghə nə kələm a bii. Ghə i dey fu, fəə asɔŋ.”

¹³ Sey, Yeso n dza ndòw tə̀ wù nii u təsawgoʼ wey nə̀, “Ndow! I doʼo kə tə̀ bəghəm i fə̀ŋ zə i diinə.” Wù kəfwaʼ a wi wey n daŋŋə taw kɔʼ n nəŋə i tii zə.

Yeso baŋŋə ndəmə aghə̂

¹⁴ Ambə n tsuʼ fə loʼ fə, Yeso n ndòw n ndaw Pita, ndòw koʼ ndòw nəwey Pita tə nyəŋ n wû wə.

¹⁵ Tə n mɔm tsu wɔɔ kə wi, wû u tii wə n daŋŋə may tsu. Tə n nuu kɔʼ, khəələ fuu ndòw wi.

¹⁶ Ambə n nəŋə i fənə zə, ghə̂ ghə n ney bə ndəmə tə aghə̂, ghə̂ ghey zay u bwu wə â loʼnə n kow ghə. Yeso n dzùm shi zay u bwu wey, baŋŋə ghə̂ ghey ghə â dzaŋanə adzəm.

¹⁷ Tə â ghəŋə ghəə ghən ni luulə ghɔɔmə zey wù tûm ə Kəzə̀ Ayzaya â dza naŋanə nə̀, “Tə â ney nuu fə u zabə wə n kow saa, ney nuu dzaŋa tə saa.”

Ghə̂ ghey ghə i doʼlənə tsətənəghə tə Yeso tə

¹⁸ Ambə Yeso koʼ tsunə nə̀ ghə̂ ghə n ngii tsuŋ dzəŋ tsəghə kɔʼ wi, tə n dza tə ngəd tə wi tə nə̀ ghə daŋ shi ndòw n nguŋ ə inyi i loʼ zey.

¹⁹ Wù dii u kəlaŋ u loʼ wə n bə n səə wi, dza tə̀ wi nə̀, “Wù dii wə, mə î dzûmənu wɔ n luʼu kə ghaa key wə ndòwnə tii.”

²⁰ Yeso n dza ndòw tə̀ wi nə̀, “Kəŋ u khə ghə n bùʼ wə ni tyi nyì doʼo tii, nnən mə idəŋ mə a khənə ghə n ndaw tə, Waa weynum kee khə way luʼu kə ni doʼo zayyə.”

²¹ Wù loʼ n ndow bə kpiʼi, tə â loʼnə dzûmə ə Yeso, dza ndòw tə̀ wi nə̀, “Mûkəbii, zəghə maʼa tsu mə tə̀ n ndòw tsəllə bə dzə bày wuŋ.”

²² Yeso n fəd dza ndòw tə̀ wi nə̀, “Dzûmə bə mə̀, zəghə maʼa ghə̂ a kpuu ghə tə̀ ghə tsəllə ndòw ghə̂ a ghə a kpuu ghə.”

Yeso buu naŋa tuŋutuŋu tə inyi

²³ Yeso n nyi kɔʼ nə kəfən ghi ngəd tə wi tə, nuu ndow nə u daŋa wə.

²⁴ Ambə ghə ndòwnə, zəŋ i taw i loʼ zə n kaʼ ni tsəghə fu nə inyì, fə̀n kə n loʼ tə̀ kə i məllə. Yeso n fədlə bweeli i wi zə.

²⁵ Ngəd tə wi tə n ndòw zhim nuu kɔʼ wi, dza tə̀ wi nə̀, “Bəghəshi ghey a Mûkəbii, ghey i nay kənu!”

²⁶ Yeso n dza ndòw tə̀ ghə nə̀, “À loʼ kee ghaa tsəŋənə sa a? Ghaa loʼ ghə laʼ bəghəm i fə̀ŋ ə?” Tə n nuu kɔʼ, daŋŋə kə̀m ndow zəŋ zey nsə tuŋutuŋu tə dzuu tey, dzuu n bɔɔmə fuŋ doʼo ndòw mɔŋ.

²⁷ Dzuu zə n ngii zum ghə̂ ghey, ghə n bəbə nə̀, “À wən loʼ ndzoʼo wù ghaa wə? Zəŋ nsə tuŋutuŋu tə dzuu tə zow daŋŋə tə̀ wi!”

Yeso dzùm shi avəətsəə n kow ghə̂ ghə abəghə

²⁸ Ambə Yeso ndòw bənə n naʼ i Gadara, n nguŋ ə nyì i loʼ zey. Tə n kpii tsu ghi gheynum a loʼ ghə abəghə ghə â loʼnə n zay u bwu wə n kow ghə, ghə shiə bənə n dzuu a təsay. Ghə n tɔɔbə tənə sa, wù n way ni tsəghə jìi fu.

²⁹ Nghee tə̀ ghə koʼ tsunə Yeso, ghə n buʼ shi kɔʼ mmbɔŋ dza nə̀, “Wə ləghə kee n wɔ ghey ə Waa Kəzə̀? Wə n bə ni bə chɔd ghey nə̀ nəŋə i ka kam kpii ə?”

³⁰ Nɔɔ kə ufeelibu kə loʼ kə â kuʼlə loʼ fu, kə zəə kaabənə.

³¹ Zay u bwu wey n buʼ Yeso n wɔɔ kə dza nə̀, “Abə wə dza i dzùm shi ghey, tûm nyi ndòw ghey n kow feelibu wey.”

³² Yeso n dza ndòw tə̀ ghə nə̀, “Ndòw na.” Sey, ghə n zəghə tsu ghə̂ ghey, nuu nyi ndòw n kow feelibu wey. Nɔɔ kə ufeelibu kə tii kə kədzəm n kwɔ̀ɔ tsu ndòw nə ukaʼ, ndòw nyi ndòw nə inyi, kuŋ nay i ndòw.

³³ Ghə̂ ghey ghə â laalənə tə̀ feelibu u tii wə n nyəŋ nuu ndòw inaʼ, ndòw dza ndòw zəzəə fə tii fə nsə ghəə zey i shinə ghi ghə̂ ghey ghə â khənə zay u bwu wey tə̀ ghə̂ ghə.

³⁴ Sey ghə̂ ghə n nuu bə adzəm fu inaʼ, bə ni bə koʼ Yeso. Ambə ghə koʼ tsunə wi, ghə n buʼ wi n wɔɔ kə, dza nə̀ tə zəghə naʼ i ghə.