Matyo 22 - Kaa n Kəzə̀ n fəghə mə

Ghɔɔmə i fənkəfən bòʼ zə̂ kə ney zə iwû

¹ Yeso n ghɔɔmə kpiʼi tsu tə̀ ghə n ghɔɔmə i fənkəfən dza nə̀,

² “Fɔɔ wə idəŋ u loʼ tə a loʼ də̀ŋ kə loʼ kə, kə â bayyənə zə̂ kə waa wi u num wə tə â neynə wey.

³ Tə n tûm shi ndòw ghə̂ a kəfwaʼ a wi nə̀ ghə ndòw tɔŋɔ bə ghə̂ ghey tə â naʼanə n zə̂ kə tii kə. Ghə̂ a tii ghə n tuu ni bə.

⁴ Sey tə n tûm kpiʼi tsu ghə̂ a kəfwaʼ a loʼ ghə dza tə̀ ghə nə̀, ‘Ndòw dza ndòw na tə̀ ghə̂ ghey n mə naʼanə ghə nə̀, mə n khəələ naŋa zə̂ kə, n wey tsɔm u təmbɔŋ nsə mbɔŋ tə kâa tə, fə̂ udzəm wə n doʼo, ghə bə zə̂ kə ney zə iwû kə waa wuŋ.’

⁵ Ghə̂ a tii ghə n ka tsəm kɔʼ say kətow, fədlə ghəŋŋə ndòw kə ghəə a ghə. Wù ghə umɔʼ n nuu soʼ ndòw n sum u wi, u loʼ wə n nuu ndòw n luʼu kə bikiwən kə wi,

⁶ ghə̂ a loʼ ghey n kwu tsu ghə̂ a kəfwaʼ ghey mɔm dzɔb tsu ghə nə nfən, wey maʼa tsu ghə.

⁷ Də̀ŋ key n fəələ nay ndòw n fə̀ŋ n ghəə a tii ghə, tûm ndòw sawgoʼ tə wi fu, ghə n ndòw weyyə maʼa tsu ghə̂ ghey ghə mə weyyənə ghə̂ a kəfwaʼ a wi ghə, kpəghə maʼa kɔʼ naʼ i ghə nə̀ uvəllə.

⁸ Sey tə n tɔŋɔ bə ghə̂ a kəfwaʼ a wi, dza ndòw tə̀ ghə nə̀, ‘Mə n khəələ naŋa zə̂ kə ney zə iwû kə waa wuŋ kə, ghə̂ ghey n mə naʼanə, ghə ka kɔʼ kpii dzə ni bə zə̂ fə̂ wuŋ.’

⁹ Sey, ndòw na n faabə tə̀ jìi tey inaʼ, ghaa tɔŋɔ bə ghə̂ ghey ghaa koʼnə, nə̀ ghə bə nə kəzə̂.

¹⁰ Ghə̂ a kəfwaʼ ghey n ndòw soʼo, tɔŋɔ bə ghə̂ ghey ghə â koʼnə. Ghə̂ a dzuŋu ghə nsə ghə̂ a bəbə ghə, ndaw kəzə̂ zey n luu tsu n wɔ ghə̂ ghə.

¹¹ Ambə də̀ŋ key bənə ni bə koʼ ghə̂ ghey ghə â bənə, tə n bə koʼ tsu wù loʼ nə̀ tə ka dzəŋə ndzə tə ney zə iwû tə.

¹² Tə n bəb ndòw tə̀ wi nə̀, ‘N fə, wə nyi n ngee fa nə̀ wə khə way ndzə tə ney zə iwû tə ə?’ Wù tii n zow doʼo ndòw kə mɔŋ, ka beeli.

¹³ Də̀ŋ key n dza ndòw tə ghə̂ a kəfwaʼ ghə nə̀, ‘Kòw kɔʼ na wi nə ubaʼ, nə awɔɔ nsə nə ifuu, ghaa maʼa ndòw wi bii nə kələm, tə i dey fu, fəə asɔŋ.’

¹⁴ N təŋkey, Zə̀ kə naʼlə ndəmə aghə̂, tə n sày shi bə kə sə̂ fə aghə̂ n fəŋŋə kə ghə.”

Ghə bəb Yeso n ghəə ghə bòʼ Màʼlə kə tsow kə

¹⁵ Sey, ghə̂ a tə Falasi ghə n nuu shi ndòw bii, ndòw saalə tsu nghee tə̀ ghə loʼnə ni kwu Yeso n ghɔɔmə i wi.

¹⁶ Ghə n tûm tsu tsətəndəghə tə ghə nsə ghə̂ a Helɔd a loʼ ghə. Ghə n bə koʼ bə Yeso, dza tə̀ wi nə̀, “Wù dii wə, ghey khənu nə̀ wə dza tsə kə isəŋə, wə dii ghɔɔmə i Kəzə̀ tə̀ i khə ni doʼo, wə saʼa way ghɔɔmə tə aghə̂ tə, n təŋkey, wə khə way nəŋə i wù zə.

¹⁷ Dza bə tə̀ ghey ghəə zey wə moʼlənə, laŋ kə diinu nə̀ ghey i tsow màʼlə kə tə̀ Siza mɔ laŋ kə dii way ə?”

¹⁸ Yeso n khə moʼlə tə ghə, sey, tə n dza tə̀ ghə nə̀, “Ghə nəb ityim ghən, a loʼ kee ghaa bii kaabənə mə ə?

¹⁹ Ney dii bə na khəə wey ghaa tsownə màʼlə kə tii.” Ghə n ney dii bə wi n khəə u fəngɔʼ wə.

²⁰ Tə n bəb tə̀ ghə nə̀, “À wən loʼ tûm usə̂ u ndee tii? À wən loʼ zəd i ndee tii?”

²¹ Ghə n dza, “À loʼ tum usə u Siza nsə zəd i Siza zə.” Sey tə n dza ndòw tə̀ ghə nə̀, “Fuu ndòw na fə̂ key kə loʼnə kə Siza kə tə̀ Siza, ghaa fuu ndòw soʼo fə̂ key kə loʼnə K-a-zə̀ kə tə̀ Zə̀ kə.”

²² Ambə ghə zow tsunə sey, dzuu zə n ngii zum ghə n jìi zey tə â beelinə ghə tii, ghə n zəghə tsu wi, nuu ndòw i ghə zə.

Ghə bəb Yeso n ghəə ghə bòʼ zhəm dzəŋŋə zə ivə

²³ Nghee tə̀ Yeso dza nə̀ ghə fuu tə Siza fə key kə loʼnə kə Siza kə, n tsuʼ fə tii fə kələ, ghə̂ a Sadusi ghey ghə dzanə nə̀ zhəm dzəŋŋə zə ivə i way, n bə n səə Yeso, bəb tə̀ wi nə̀,

²⁴ “Wù dii wə, Mushi â dza tə̀ ghey nə̀, abə wù kpuu tsunə nə̀ tə khə way waa ghə, waazə ə wi khə ni nyə̀ŋŋə̀ ndòw wey wi, tə ji fuu tsu wi n waa.

²⁵ Nya, waazə a loʼ ghə â loʼnu, tow ghə usəghəmbəghə, wù sə̂ isə wey n ney ndòw wey, bə kpuu nə̀ tə ka waa ji, naŋa sə̂ tsu wey tə̀ waazə.

²⁶ Zə n bɔɔmə bə shi kɔʼ soʼo nə̀ wù wey tə â dzûmə ndòwnə wi, bə kpuu kɔʼ nə̀ tə ka waa jii ghi wey kpusə wey tə nyəŋŋə ndownə. Zə n bə shi kɔʼ soʼo ighələ ghi waazə a loʼ ghey ni ndòw kùm tow ghə usəghəmbəghə.

²⁷ Wey kpusə wey n baa bə kpuu tsu soʼo.

²⁸ Nya, abə ghə i zhəm dzəŋŋə bənə nə̀ ivə, weyzən wey î baa loʼ wey ndee, ghə â sə ney tsəghə may ndòwnə wi tow ghə usəghəmbəghə ə?”

²⁹ Yeso n beeli ndòw ghə nə̀, “Ghaa n nyəŋ laʼ ni bəghəm nə̀ zhəm dzəŋŋə zə ivə i way n təŋkey, ghaa khə way ghəə zey ghɔɔmə i Kəzə̀ i diinə, ghaa khə soʼo way daʼa K-a-zə̀ kə.

³⁰ Abə ghə̂ a zhəm dzəŋŋə bənə nə ivə, ghə ney way wû zə, ghə a fuu soʼo way gheyzən ghə tə num ghə, ghə fəd muu tə a loʼ tsətəndəghə tə Kəzə̀ idəŋ.

³¹ Ghaa ka kam tɔŋɔ koʼ n màʼlə K-a-zə̀, ghəə ghey Zə̀ kə dzanə bòʼ zhəm dzəŋŋə zə ivə ə? Tə â dza,

³² ‘N loʼ Zə̀ kə Abraham, Zə̀ kə Ayzik, nsə Zə̀ kə Yakɔb kə.’ Tə way dzə Zə̀ kə ghə̂ a kpuu ghə, tə̀ loʼ Zə̀ kə ghə̂ ghey ghə loʼnə utaw.”

³³ Ambə Nɔɔ kə aghə̂ kə zow tsunə ghəə ghən, dzuu zə n zum ghə n jìi zey Yeso â diinə ghəə ghə tii.

Làŋ key kə tsəghəshinə laŋ wə udzəm

³⁴ Ambə ghə̂ a tə Falasi a zow tsunə nə̀ Yeso n fìi naŋa dzuu i ghə̂ a tə Sadusi ghə, ghə təmdzəŋi bə iwû,

³⁵ wù ghə umɔʼ, tə â loʼnə wù dii kəlaŋ n bəb ndow Yeso n ghəə zə ni mɔm koʼ wi nə̀,

³⁶ “Wù dii wə, a loʼ laŋ kə ghaa kə, kə tsəghəshinə laŋ wə udzəm ə?”

³⁷ Yeso n beeli ndòw wi nə̀, “I ləghə Mûkəbii, Zə̀ kə kə̀ n fə̀ŋ zə idzəm, n zay kə kə̀ kədzəm, nsə moʼlə tə tə̀ tədzəm.

³⁸ À wən loʼ laŋ kə sə isə kə, kə tsəghəshinə laŋ wə udzəm.

³⁹ Laŋ key kə dzûmə ndòwnə bɔɔmə loʼ soʼo tə a loʼ kə kən, kə dza nə̀, ‘I ləghə wù wey tə kuʼlə loʼnə n səə wɔ tə̀ wə ləghənə wû wə wə̀.’

⁴⁰ Laŋ udzəm nsə ghəə ghey tûm tə Kəzə̀ tə â diinə bɔɔmə tey n laŋ wən ubəghə.”

Ghə bəb aghəə tə̀ Yeso bòʼ Bəghəshi

⁴¹ Nghee tə̀ ghə̂ a tə Falasi a təmdzəŋi bənə, Yeso n bəb ndòw tə̀ ghə nə̀,

⁴² Ghaa moʼlə nə̀ ngee bòʼ wù wən Zə̀ kə â dza naŋa nə̀ i tûm bənu ə? Tə baa loʼ waa ndee? Ghə n beeli ndòw wi dza nə̀, “Tə loʼ waa Devid.”

⁴³ Tə n bəb ndòw tə̀ ghə nə̀, “À kee loʼ kee Zay kə Zow kə â ghəŋə nə̀ Devid tɔŋɔ wi nə a loʼ ‘Mûkəbii’ ə? Devid n dza,

⁴⁴ ‘Mûkəbii â dza tə̀ Mûkəbii wuŋ nə̀, Doʼo tsu n kpii kuŋ kə təmə kə, Tə̀ n ghəŋə nə̀ ghə̂ a təngəmə ghə a təm bə tənguʼ n tənə wɔ.’

⁴⁵ Abə Devid â tɔŋɔnə wi nə̀ a loʼ ‘Mûkəbii’, tə loʼ ngee ni loʼ waa Devid ə?”

⁴⁶ Wù umɔʼ ə ghə n tsəm way ni beeli kɔʼ wi. Ni zey tsu n nəŋə i tii zə, ndòw n sə kə, wù umɔʼ n ka kəm bəb kpiʼi wi n ghəə zə.