Matyo 19 - Kaa n Kəzə̀ n fəghə mə

Yeso dii aghə̂ kùm dzawwə zə iwû

¹ Nghee tə̀ Yeso dza may tsunə nghee tə̀ wù khənə ni neyzəə waazə tii, tə n nuu tsu fu n mboʼo Galili, nuu ndòw n mboʼo Judeya n nguŋ ə dzuu Jodan i loʼ zey.

² Nɔɔ kə aghə̂ kə n dzûmə ndòw wi fu, tə n baŋŋə ghə̂ ghey ghə â dzaŋanə fu n luʼu u tii wə.

³ Ghə̂ a tə Falasi a loʼ ghə n ndòw bə n səə Yeso ni bə mɔm koʼ wi, dza tə̀ wi nə̀, “Laŋ kə saa kə bəghəmnu nə̀ wù tuu maʼa wey wi abə ghə i loʼ i shi kɔʼnə, nkee abə tə ləghə tsunə ni ghəŋə sey ə?”

⁴ Yeso n beeli ndòw ghə nə̀, “Ghaa ka kam tɔŋɔ koʼ tsə n màʼlə K-a-zə̀ nə̀ nəŋə zey Zə̀ kə â bɔmnə mbi, tə n bɔm tsu aghə̂ weynum ghi weyzən ə?

⁵ Tə n dza tsu nə̀, à wən loʼ ghə i tii zə, weynum khə ni zəghə tsu bày wi ghi nay wi, tə təmdzəŋi ndòw ghi wey wi, tow ghə ubəghə, ghə i doʼo bə wù umɔʼ.

⁶ Ghə kəm way dzə aghə̂ abəghə, ghə nya loʼ tə̀ a loʼ wù umɔʼ. Sey, fə key Zə̀ kə təm naŋa dzəŋinə, kə̂ wù nə̂ dzawwənə.”

⁷ Ghə̂ a tə Falasi ghey ghə n bəb tə̀ wi nə̀, “À loʼ kee Mushi â kee dzanə nə̀ abə wù dza i tuu maʼa wey wi, tə khə ni teeli fuu dzə wi n màʼlə kə ni dii tsu nə̀ ghə n wû i dzawwə ə?”

⁸ Yeso n beeli ndòw ghə nə̀, “Mushi â bəghəm naŋa nə̀ ghaa loʼ ni dzawwə iwû ghi ghey a ghaa ghə n təŋkey, fə̀ŋ tə ghaa tə ngii tawnu. Zə â kee way dzə sey nə̀ nzeyyə.

⁹ N fa dza bə tə̀ ghaa nə̀, weynum wey tə tuu maʼanə wey wi, ney ndòw wey u nuu wə nə̀ a way nə̀ wey wi taa zaʼ wi, tə sey loʼ nə̀ tə n taa zaʼ.”

¹⁰ Ngəd tə wi tə n dza ndòw tə̀ wi nə̀, “Abə i loʼnə sey n doʼo i wù ghi wey wi, dzɔb loʼ nə̀ kə wù nə̀ baa neynə wey.”

¹¹ Yeso n fəd dza ndòw tə̀ ghə nə̀, “A way dzə aghə̂ adzəm ghə loʼnə ni zowkeeli ghəə zən, a may kə ghə̂ ghey ghə loʼ nə̀ Zə̀ kə n fuu ghə n tɔb u tii wə.

¹² Boʼnə zùŋ u loʼ n ndəm u ghəŋŋənə nə̀ ghə̂ a loʼ a ka ney ghey ghə. Ghə̂ a loʼ a way ni ney aghey nə̀ zùŋ kə tii kə loʼ nə̀ ghə â ji ghə sey, a loʼ ghə u way ni ney aghey nə̀ a ghəŋŋə aghə̂, a loʼ ghə u way ni ney aghey nə̀ a say kɔʼ ghə bòʼ ghəə a Fɔɔ wə idəŋ wə. Wù wey tə loʼnə ni bəghəm ghəə ghən, bəghəm kɔʼ.”

Yeso buulə aghinətəghə

¹³ Ghə̂ a loʼ ghə n ney bə aghinətəghə n səə Yeso nə̀ tə gaʼ tsu awɔɔ n tow u ghə, tə gɔŋŋə tə ghə. Ngəd tə wi tə n fəd kii ndòw ghə̂ a tii ghə.

¹⁴ Yeso n dza ndòw tə̀ ghə nə̀, “Zəghə na ghiinətəghə ghey ghə bə n səə mə, kə̂ ghaa nə buu naŋŋənə ghə, bòʼ nə̀, fɔɔ wə idəŋ u loʼ tə ghə̂ ghey ghə loʼ tə̀ a loʼ ghə.”

¹⁵ Ambə tə dza tsunə sey, tə n gaʼ tsu awɔɔ n kow ghə, buulə tsu ghə. Nghee tə mayyə tsunə, tə n zəghə tsu fu, nuu ndow.

Wù kuum wə nsə fɔɔ u Kəzə̀

¹⁶ Wù loʼ n ndòw bə n səə Yeso, bəb tə̀ wi nə̀, “Wù dii wə, a loʼ ghə i dzuŋu i ghaa zə n khənə ni teeli ghəŋə tə̀ mə ni keeli muu itsali zə.”

¹⁷ Yeso n beeli ndòw wi nə̀, “À loʼ kee wə̀ bəbənə mə n ghəə zə bòʼ ghəə zey i dzɔbənə ə? À loʼ kə wù umɔʼ tə loʼnə wù dzuŋu. Abə wə̀ dza i keeli muu zə itsali, i naŋŋə ndòw laŋ u Kəzə̀ wə.”

¹⁸ Wù tii n bəb tə̀ wi nə̀, “Laŋ u ghaa wə?” Yeso n dza, “Kə wə nə̀ weynə wù, kə wə nə̀ nyəŋinə ghi wey wù, kə wə nə̀ tsɔŋɔnə, kə wə nə̀ təminə tsəm ə wù,

¹⁹ i ngɔɔmə bày wə ghi này wə, nsə nə̀ wə i ləghə ghə̂ ghey n səə wɔ adzəm tə̀ wə ləghə soʼonə wû wə wə̀.”

²⁰ Wù wey n dza, “N naŋŋənu laŋ wən udzəm. À kəm loʼ ghə i ghaa zə i doʼo səənə tə mə ni ghəŋə ə?

²¹ Yeso n dza ndòw tə̀ wi nə̀, abə wə̀ ləghənə ni doʼo tsətsəghə, ndòw fìi may tsu fə wə wə̀ udzəm, wə ney kɔʼ khəə u tii wə, wə fuu ndòw tə̀ ghə̂ a laa ghə, wə i keeli ikum idəŋ, wə daŋŋə bə dzûmə bə mə.”

²² Ambə wù wən zow tsunə sey, tə n nuu ndòw n mow zə n fə̀ŋ, n təŋkey, tə â ngii kûmnu.

²³ Yeso n daŋŋə dza tə̀ ngəd tə wi tə nə̀, “N dza bə isəŋə tə̀ ghaa nə̀, i ngii tawnu tə̀ wù kûm wə ni nyi n fɔɔ wə idəŋ.

²⁴ N dza bə tə̀ ghaa nə̀, nyam zən ghə tɔŋŋə nə̀ à loʼ Kamel loʼnu ni zaŋŋə tsəghə tɔɔlə n sə̂ i fəsaʼ, tsəghəshi tə̀ wù kûm wə ni nyi n fɔɔ u Kəzə̀.”

²⁵ Ambə ngəd tə wi tə zow tsunə sey, dzuu zə n ngii zum ghə, ghə n bəb tə wi nə̀, “À kee baa loʼ ndee, tə loʼnə ni keeli ibəghəshi ə?”

²⁶ Yeso n laalə tsəghə ndòw ghə, dza tə̀ ghə nə̀, “Tə̀ wù sɔŋtsuʼ, ghə i tii i way ni ney kəbənə, a kee bə tə̀ Zə̀ kə, ghə i loʼ i way i taw tsəghəshiənə wi ni ghəŋə.”

²⁷ Sey, Pita n dza shi kɔʼ nə̀, “Koʼo, ghey n naŋa taʼa fə u ghey wə udzəm ni dzûmə wɔ. Ghey i kee keeli kee?”

²⁸ Yeso n dza ndòw tə̀ ghə nə̀, “N kuum dza bə tə̀ ghaa nə̀, abə Waa Weynum î doʼnə n kuu kə ufɔɔ kə wi kə nyiələ kə n mbi i fəghə zə, ghaa ghən ighəm n ghii ghə abəghə i doʼ soʼo fu n kuu u təfɔɔ, saʼa naʼa tə Izree tən ighəm n ghii tə təbəghə.

²⁹ Wù wey tə naŋa sənə ndaw tə wi tə, waazə a wi, bày wi, này wi, waa a wi, nkee sum u wi n zəd zuŋ, î keeli dzəŋŋə fə u tii wə nə nbɔm n mbi i zən, tə i keeli soʼo muu zə itsali.

³⁰ À kee loʼ nə̀, ndəmə ghə̂ ghey ghə loʼnə sə kə nya nə̂ bə doʼlə ibam, aghey ghə doʼo guŋŋənə nya, ghə nə̂ bə doʼo ghə̂ a kəsə̂.”