Matyo 18 - Kaa n Kəzə̀ n fəghə mə

Wù wey tə loʼ wù nii n Fɔɔ u Kəzə̀

¹ N nəŋə zey Yeso ghi ngəd tə wi tə â loʼnə n Kampenum, ngəd tə Yeso tə n bə n səə wi bəb tə̀ wi nə̀, “À loʼ ndee wù nii n fɔɔ wə idəŋ ə?”

² Ambə Yeso zow tsu sey, tə n tɔŋɔ bə winətəghə u loʼ wə, teyyə naŋa tsu wi n sə kə ghə,

³ dza tə̀ ghə nə̀, “N kuum dza bə tə̀ ghaa nə̀, a may kə nə̀ ghaa kwey kɔʼnu, doʼo tsu tə̀ a loʼ aghinətəghə, ghaa nə̂ way ni nyi n fɔɔ wə idəŋ.

⁴ Wù wey tə zûmmə tsunə wû u wi wə tə̀ a loʼ waa wən, a loʼ wi tə loʼnə wù nii n fɔɔ wə idəŋ.

⁵ Wù wey tə kpii neynə nyaŋi fə waa fə tə̀ a loʼ tə wən n zəd zuŋ, tə sey kpii ney soʼo mə̀.”

Ghəə ghey a chimmənə wù nə̀ tə ghəŋə bəb

⁶ Yeso n dza tə̀ ghə nə̀, “Abə wù loʼ kee chimmənə nyaŋi mə n waa mən n bəghəmnə tə̀ mə nə̀ n ghəŋə bəb, dzɔb loʼ nə̀ ghə ney kɔʼ tay i nii zə, ghə kow kɔʼ n mwey u wi, ghə maʼa nyi tsu ndòw wi n fə̀ŋ ə inyi tə kuŋ fu.

⁷ Ngoʼ loʼ fa n mbi bòʼ ghəə ghən a chimmənə ghə̂ ghə nə̀ ghə i ghəŋŋə bəb zə. Ghəə a tii a khə ni teeli shi, a kee loʼ nə̀, ngoʼ loʼ tə̀ wù wey tə chimmənə ghə̂ ghə nə̀ ghə ghəŋə ibəb.

⁸ Abə wɔɔ kə nkee fuu kə kə̀ chimmənə wɔ nə̀ wə̀ i ghəŋŋə ghəə a bəbə ghə, khə̀ə nuu kɔʼ, wə say maʼa ndow. I baa dzɔbə nə̀ wə keeli muu zə itsali nə̀ wə khə kəwɔɔ kəmɔʼ nkee kəfuu kəmɔʼ, tsəghəshi tə̀ wɔ ni keeli awɔɔ a bəghə nkee ifuu i bəghə, wə fəd nyi ndòw n vəllə wey u nəmmə tsə way.

⁹ Abə sə̂ zə i chimmənə wɔ nə̀ wə i ghəŋŋə ghəə a bəbə ghə, bɔʼi nuu shi bə, wə maʼa ndòw. I baa dzɔbə nə̀ wə zə̂ itsali nə̀ wə khə isə̂ imɔʼ tsəghəshi tə̀ wɔ ni keeli sə̂ ghə abəghə, wə̀ fəd nyi n luʼu key vəətsəə a chɔdlɔnə ghə̂ ghə fu nə̀ vəllə wey fu, u nəmmə tsə way.”

Ghɔɔmə i fənkəfən bòʼ njì zey zə â naynə

¹⁰ Yeso n dza kpiʼi ndow tə ngəd tə wi tə nə̀, “Kə̂ ghaa nə̂ koʼo kìinə nyaŋi mə awaa mən. N dza bə isəŋə tə̀ ghaa nə̀, tsətəndəghə tə ghə tə loʼ tən n səə Bày idəŋ.

¹¹ [Waa weynum bə ni bə bəghəshi ghə̂ ghey ghə laʼanə.]

¹² Ghaa moʼlə nə̀ ngee? Abə wù khənə njì tə fəbɔm, imɔʼ nay tsunə n njì tə tii tə. Tə î jiə tsu ngee? N dza tə î naŋŋə taʼa tsu tə loʼ tən nghəm ntaandzuu n ghii tə tətaandzuu nə ukaʼ, tə ndòw kəŋ ney bə i zey i naynə ə?

¹³ Abə tə ndòw koʼ tsunə, n kuum dza bə tə̀ ghaa nə̀ tə n duʼlə nay ndòw ghi njì i zən imɔʼ, tsəghəshi ghi njì tə loʼ tey nghəm ntaandzuu n ghii tə tətaandzuu tə mə ka nay.

¹⁴ À loʼ ighələ ghi Bày ghaa idəŋ, tə ləghə way nə̀ waa wi u loʼ u nay.”

Ghəə zey ndaw Kəzə̀ loʼ ni ghəŋə tə̀ wù wey tə ghəŋənə bəb

¹⁵ “Abə waazə wə ghəŋənə ghə i bəbə zə tə̀ wɔ, ndòw n səə wi, wə dza ndòw ghəə zey tə ghəŋə bəəbənə nə̀ ghaa loʼ kə tow ghaa ubəghə. Abə tə zownə ghɔɔmə zə zə̀, i sey dii nə̀ wə n keeli dzəŋŋə waazə wə.

¹⁶ Abə tə ka kee zəllə tə̀ wɔ, ney kɔʼ wù umɔʼ nkee aghə̂ abəghə wə ndòw ghi ghə n səə wi, sey nə̀, n ghɔɔmə zə, ghə̂ a doʼo tsu abəghə nkee atəghə ghə loʼnə ni təmi tiilə.

¹⁷ Abə tə ka nam zow tə̀ ghaa, ney ndòw ghə i tii zə tə̀ ghə̂ a Ndaw Kəzə̀ ghə, tə ghə saʼ bə. Abə tə ka nam zow tə̀ ghə̂ a Ndaw Kəzə̀ ghə, ney ndòw na wi tə̀ a loʼ wù wey tə ka bəghəm tə Zə̀ kə, nkee wù kwɔɔ u màʼlə kə tsow kə.”

Ghəə zey ghə bəghəmnə nsə i zey ghə ka bəghəm

¹⁸ Yeso n dza tə ngəd tə wi tə nə̀, “N kuum dza bə tə̀ ghaa nə̀, ghəə zey ghaa bəghəm naŋanə fa n mbi, ghə i bəghəm naŋŋə soʼonu idəŋ, i zey ghaa tuu maʼanə fa n mbi, ghə i tuu maʼa soʼonu idəŋ.

¹⁹ N kuum dza kpiʼi bə tə̀ ghaa nə̀, abə tow u ghaa ubəghə u bəghəm dzəŋi kɔʼnə ghəə zə a ghəlitsə, dza ndòw tə̀ Zə̀ kə nə igɔŋŋə, Bày wuŋ idəŋ i ghəŋŋənu ghə i tii zə tə̀ ghaa.

²⁰ Bòʼ nə̀, luʼu key ghə̂ a zuŋŋə doʼonə abəghə nkee atəghə n zəd zuŋ, mə n loʼ fu n fəŋŋə kə ghə.”

Wù kəfwaʼ wey tə neyzəə way bəb i wù zə

²¹ Pita n bə bəb bə tə̀ Yeso nə̀, “Mûkəbii, a loʼ tənəŋə tə siʼi n loʼnə ni neyzəə bəb i waazə wuŋ abə tə ghəŋənə mə n ghə i bəbə zə ə? A loʼ tənəŋə təsəghəmbəghə ə?”

²² Yeso n beeli ndòw wi nə̀, “N dza bə tə̀ wɔ nə̀ a way dzə tənəŋə təsəghəmbəghə, à loʼ nghəm n tənəŋə nsəghəmbəghə, nə tənəŋə təsəghəmbəghə.

²³ Sey, Fɔɔ u Kəzə̀ u loʼ tə̀ a loʼ də̀ŋ kə loʼ kə tə â ləghənə ni bayyə aghəə ghi ghə̂ a kəfwaʼ a wi ghə.

²⁴ Nghee tə̀ tə bɔɔmə kaʼ tsunə ni bayyə aghəə, ghə n ney bə wù kəfwaʼ a wi u loʼ wə tə â khənə Mûkəbii wi n bɔ̀m ndangaŋ nə kəndaŋ.

²⁵ Wù kəfwaʼ wey n khə way khəə wə ni tsə may ndaŋ kə wi, sey, də̀ŋ key n dza ghə fìi nuu ndòw wi tə̀ a loʼ kəkɔd, ghi wey wi, waa a wi nsə fə̂ u wi wə udzəm tə̀ ghə loʼ ni tsə ndaŋ kə tii kə.

²⁶ Wù kəfwaʼ wey n təm ndòw tənguʼ n tənə də̀ŋ key, buʼ wi n wɔɔ kə dza nə̀, ‘Fuu kpiʼi tsu mə n nyaŋi fə inəŋə fə a mûkəbii, mə i tsəə maynu wɔ.’

²⁷ Də̀ŋ key n kwɔɔlə tsu soʼo isî n kow wù kəfwaʼ wey, kàa maʼa tsu ndaŋ kə wi, zəghə maʼa ndow soʼo wi nə̀ tə ndow nuu.

²⁸ Wù kəfwaʼ u mɔʼɔ wey n nuu shi ndòw, kpiilə tsu ghi wù kəfwaʼ u loʼ wə ghə â dzəŋi fwaʼanə, tə â khə wi n ndaŋ kə nə təkam ighəm. Wù wey n fəd zən kɔʼ n mwey u wi, dza tə wi nə̀, ‘Tsə may bə ndaŋ kuŋ kə.’

²⁹ Wù wey tə â dzəŋi fwaʼanə ghi wi n nyaʼa ndow aghəd, buʼ wi n wɔɔ kə dza nə̀, ‘Zəllə tsu kənu, mə i tsəə dzəŋŋə bənu wɔ.’

³⁰ Tə n tuu, fəd ndòw fii naŋa ndòw wi n ndaw tsaʼ nə̀ tə teeli tsə may bə wi.

³¹ Ambə ghə̂ a kəfwaʼ a loʼ ghey koʼ tsunə ghəə ghən. Ghə n fəələ nay ndòw n fə̀ŋ, ndòw dza ndòw tə̀ mûkəbii ə ghə, ghəə zey i neynə bənə kə.

³² Mûkəbii wey n tɔŋɔ tsu wi dza tə̀ wi nə̀, ‘Wə tɔʼ loʼ wù kəfwaʼ u bəbə wə! N mə kàa maʼa ndaŋ kə n təŋkey, wə mə buʼ mə n wɔɔ kə nə̀ n kàa maʼa tsu.

³³ Wə mə khə ni mbɔŋ kwɔɔlə soʼo isî n kow wù kəfwaʼ wey, tə̀ n mə kwɔɔlənə sî zə n kow wɔ.’

³⁴ Ghə i tii zə n fə nay ndòw də̀ŋ key n fə̀ŋ, tə n ney fii naŋa ndòw wù kəfwaʼ wey n ndaw tsaʼ nə̀ ghə chɔd wi fu ni ndow kuum n nəŋə zey tə i tsəə maynə ndaŋ kə wi kə.”

³⁵ Yeso n daŋŋə dza nə̀, “À wən loʼ nghee Bày wuŋ idəŋ î ghəŋŋənə tii tə̀ ghaa abə ghaa neyzəə way ghəə a bəbə ghey waazə a ghaa a ghəŋŋənə tə̀ ghaa n fə̀ŋ tə ghaa.”