Matyo 17 - Kaa n Kəzə̀ n fəghə mə

Kòʼ i Yeso i kweyyə kɔʼnu

¹ Ambə tsuʼu n tsəghə tsunə ntuubə tə̀ Yeso dza tsunə nə̀ i khə ni fəghə, ghə wey wi, tə n ney kɔʼ Pita, Jeyms ghi waazə ə wi Jɔn, nuu kɔʼ ndòw n tow kə kaʼ u dabə u loʼ wə, ghə n loʼ fu n nəŋə ghə.

² Sey wû u Yeso wə n kweyyə kɔʼ n sə kə ghə, tûm usə̂ u wi wə n nyiələ tə̀ a loʼ tsə̀, ndzə̂ tə wi tə n fə̀mmə fùŋ tə a loʼ kədzəd.

³ Ghə n daŋŋə koʼ Mushi ghi Elayja ghə ghɔɔmənə ghi wi.

⁴ Sey Pita n dza ndòw tə̀ Yeso nə̀, “Mûkəbii, i dzɔbənu nghee ghey loʼnə fa. Abə wə ləghənə ghey loʼ ni khəm kɔʼ nfəə ntəghə fa, fəmɔʼ tə̀ wɔ, fəmɔʼ tə̀ Mushi, fəmɔʼ tə̀ Elayja.”

⁵ Nghee tə̀ tə nam ghɔɔmənə, mbaʼ tə fəmə tə n tsəd bə ghə, dzə̀ i loʼ zə n shi bə fu tii nə təmbaʼ dza, “À wən loʼ waa wuŋ u tsuʼu wə, à loʼ wi tə i ghəŋŋənə nə̀ mə i ngii duʼlə. I zow na tə̀ wi.”

⁶ Ambə ngəd tə wi tə zow tsunə dzə̀ zey, tsəŋ zə n kwu tsu ghə, ghə n bwu tsəd ndòw tum n təsə̂ n ghə aghəd.

⁷ Yeso n bə mɔm tsu ghə, dza nə̀, “Nuu kɔʼ na, kə̂ ghaa nə tsəŋənə.”

⁸ Sey, ghə n nuu bàŋ laalə kɔʼ ndòw idəŋ, koʼ tsu nə̀ à loʼ kə Yeso fu n nəŋə wi.

⁹ Nghee tə̀ ghə tsuu dzəŋŋə bənə, Yeso n dza tə̀ ghə nə̀, “Kə ghaa nə dzanə ghəə zey ghaa koʼnə tə̀ wù loʼ ni ndòw kùm n nəŋə zey Zə̀ kə i zhəm dzəŋŋə bənə waa weynum nə ivə.”

¹⁰ Ngəd tə wi tə n bəb ndòw tə̀ wi nə̀, “À loʼ kee ghə̂ a dii a kəlaŋ a dzanə nə̀ Elayja teeli khə ni bə dzə isə̂ tə̀ wù wey tə i bəghəshiənə ghə̂ ghə ni bə ə?”

¹¹ Yeso n beeli ndòw ghə nə̀, “Elayja ndzəm khə ni bə isə̂, tə bə bayyə naŋa tsu aghəə adzəm.

¹² Sey, n dza bə tə̀ ghaa nə̀, Elayja mâ bə, ghə n ka koʼ keeli wi. Ghə n fəd ghəŋə ndòw tə̀ wi ghəə ghey a dzɔbənə tə̀ ghə. À loʼ soʼo ighələ Waa weynum î fəʼlənə n wɔɔ kə ghə.”

¹³ Sey, ngəd tə wi tə n daŋŋə zowkeeli nə̀ tə sey ghɔɔmə tə̀ ghə bòʼ Jɔn wù fuu u mmuu n Kəzə̀ mə.

Yeso baŋŋə waa u loʼ wə zay kə bwu kə loʼnə n kow wi

¹⁴ Ambə ghə bə kwɔɔlə dzəŋŋə bənə nɔɔ kə aghə̂ kə, wù loʼ n ndòw bə, təm bə tənguʼ n tənə Yeso dza,

¹⁵ “Mûkəbii, kwɔɔlə sî zə n kow waa wuŋ, tə dzaŋa kəbwù, tə u ngii zow soʼonə fɔɔbə zə, n təŋkey, tə bəghə tə n bwù zeeli nə uvəllə nsə nə mmuu.

¹⁶ N mə ney bə wi n səə ngəd tə tə̀, ghə u dəm kìi tsunə ni baŋŋə wi.”

¹⁷ Yeso n beeli ndòw wi dza nə̀, “Ghaa ghə̂ a num tə tən, ghaa khə way bəghəm i fə̀ŋ zə, ghaa khə kə ghəə a bəbə ghə. Mə i boʼo muulə ghi ghaa ni ndòw kùm zeeli? Mə i kow fə̀ŋ ghi ghaa ni ndow kùm zeeli? Ney bə na waa tii fa.”

¹⁸ Nghee ghə ney bə waa tii, Yeso n kii ndòw zay kə bwu key, kə n nuu shi tsu n kòw waa u num wey, waa tii n daŋŋə taw i kɔʼ.

¹⁹ Ngəd tə Yeso tə n bə tsɔŋ bəb bə tə̀ wi ibam nə̀, “À loʼ kee ghey mə way ni dzùm shi zay kə bwu kə tii kə?”

²⁰ Yeso n beeli ndòw ghə nə̀, “À loʼ n təŋkey, bəghəm i fə̀ŋ i ghaa i ngii təbənu. N kuum dza bə tə̀ ghaa nə̀, abə bəghəm i fə̀ŋ i ghaa i təbənə tə̀ a loʼ sam i kaʼ fə Mɔstad, ghaa loʼnu ni dza tə̀ kaʼ u wən nə̀, ‘Nuu tsu fa n luʼu kən, wə ndow fey!’ Wə i bɔɔmə nuu tsu. Ghə i loʼ i way zə i loʼnə ni tsəghəshi ghaa.”

²¹ [À bɔɔmə may kə nə igɔŋŋə nsə dzuu i bam zə wù loʼnə ni dzùm shi ndzoʼo zay kə bwu kən.]

Yeso ghɔɔmə kpiʼi bòʼ və i wi

²² Ambə Yeso ghi ngəd tə wi tə bə təmdzəŋi bənə n naʼ i Galili, tə n dza ndòw tə̀ ghə nə̀, “Ghə i kuʼlə ney fuu tsəghə ndownu Waa Weynum n wɔɔ kə ghə̂ ghən fa n mbi,

²³ ghə i wey wi, a i bə nə ntsuʼu ntəghə, Zə̀ kə i zhəm dzəŋŋə bə wi nə̀ ivə.” Sey, ngəd tə wi tə n ngii khə imow n fə̀ŋ tə ghə.

Màʼlə kə tsow kə n Ndaw Kəzə̀ i nii zə n Yerosalem

²⁴ Nghee tə̀ Yeso ghi ngəd tə wi tə ndòw bənə n Kapenum, ghə̂ a kwɔɔ a màʼlə kə tsow kə n ndaw Kəzə̀ i nii zey n Yerosalem n bə bəb bə tə̀ Pita nə̀, “Wù dii ə ghaa tsow tsə way màʼlə kə n ndaw Kəzə̀ i nii zə nə̀ à loʼ kee?”

²⁵ Pita n beeli ndòw ghə nə̀, “Tə tsow tsənu.” Ambə Pita nyi ndòwnə n ndaw, Yeso n ghɔɔmə ndòw tə wi isə dza nə̀, “Wə̀ moʼlə nə̀ ngee a Shimun? Də̀ŋ wən fa mbi kwɔɔ màʼlə kə tsow kə n wɔ ghə ndee? À loʼ n wɔ ghə̂ ghə inaʼ a ghə ghə mɔ n wɔ ghə̂ a nuu ghə ə?”

²⁶ Pita n beeli ndòw wi dza nə̀, “À loʼ n wɔ ghə̂ a nuu ghə.” Yeso n dza tə wi nə̀, “I sey dii nə̀, ghə̂ ghə inaʼ a ghə a khə way ni tsow màʼlə kə tii kə.

²⁷ N ləghə way nə̀ ghə fəələ n fə̀ŋ ghi saa. Sey, ndòw nə inyi, wə̀ say ndòw saʼ fə kwɔɔ fə tətsəghə fə, tsəghə i sə̂ i sə zey wə î kwɔɔ kɔʼɔnə, wə i chi kɔʼ dzuu wi, wə koʼ tsu ukhəə tii wə i kpiinə ni tsow màʼlə kə nsə kə kuŋ kə. Wə i ney kɔʼ, wə fuu ndow tə̀ ghə tə̀ a loʼ tsow zə nsə i zuŋ zə.”