Matyo 15 - Kaa n Kəzə̀ n fəghə mə

Tsə̀ i ghə bày bày

¹ Ghə̂ a tə Falasi a loʼ ghə nsə ghə̂ a dii a kəlaŋ ghə, ghə â nuu bənə n Yerosalem, n bə n səə Yeso, bəb tə̀ wi nə̀,

² “À loʼ kee dzûmə tə tə̀ naŋŋə way laŋ wə inaʼ u ghey wən ghə bày bày a ghey ghə â səd naŋanə ə? Ghə sow way wɔ ghə tə laŋ kə diinə abə ghə dza i zə̂ nə̀ a loʼ kee?”

³ Yeso n dza ndòw tə̀ ghə nə̀, “À loʼ kee ghaa bwulə nə laŋ K-a-zə̀ kə, kee naŋŋə dzɔbə laŋ wə inaʼ u ghaa a?

⁴ Zə̀ kə mâ tsəʼlə laŋ kə nə̀, ‘Wù khə ni zow tə bày wi ghi này wi,’ nsə nə̀, ‘Wù wey tə ghɔɔmə bəəbənə n tow kə bày wi nkee này wi, tə khə ni kpu.’

⁵ Ghaa u kee dzanə nə̀ abə wù khənə fə kə ni gaamə bày wi nsə nay wi, tə ney naŋa kɔʼnə nə̀ a loʼ naamə K-a-zə̀,

⁶ tə kəm khə way ni gaamə bày wi nsə này wi. Sey ghaa baʼa naŋŋə ndòw ghɔɔmə i Kəzə̀, ghəŋŋə nə̀ ghə̂ ghə i dzûmə ndòw ghəə a laŋ kə inaʼ key ghaa diinə.

⁷ Ghə nəb ityim tə a loʼ ghaa! Wù Tûm Kəzə̀ Ayzaya â dza isəŋə kuum ghaa nə̀,

⁸ ‘Ghə̂ ghən ngɔɔmə kə mə nə idzuu, Fə̀ŋ tə ghə tə way dzə ghi mə̀.

⁹ Ghə ngɔɔmə mə kənunu, N təŋkey, ghə dii laŋ u mbi, dza nə̀ à loʼ laŋ wuŋ.’”

Ghəə ghey a dzəələnə wù

¹⁰ Yeso n daŋŋə tɔŋɔ naŋa bə nɔɔ kə aghə̂ n səə wi, dza tə̀ ghə nə̀, “Zəllə na, ghaa zowkeeli tsu ghəə zey n dza n dza bə.

¹¹ A way dzə fə key kə nyiə ndòwnə n dzuu i wù, kə ghəŋŋənə nə̀ tə i dzəə n sə̂ K-a-zə̀, a fəd loʼ fə key kə shiə bənə n dzuu i wi kə ghəŋŋənə nə̀ tə i dzəə.”

¹² Sey ngəd tə wi tə n bə n səə wi, bəb tə̀ wi nə̀, “Wə khənu nə̀ ghəə zey wə mə dzanə mâ bəəbə maʼa fə̀ŋ tə ghə̂ a tə Falasi ghə ə?”

¹³ Yeso n beeli ndòw ghə dza nə̀, “Fə key kə zəghə doʼonə nə à ka Bày wuŋ idəŋ zəghə, ghə î suulə maʼanu.”

¹⁴ Kə̂ ghaa nə̂ fəmmənə wû i ghaa zə bòʼ ghə, ghə maŋ loʼ ghə̂ a fəbə ghə, ghə tali ndòwnə ghə̂ a fəbə ghə. Abə wù fəbə taali ndòwnə wù fəbə u loʼ wə, ghə i dzəŋi bwu nyi tsu nə kəbuʼ.

¹⁵ Pita n dza tə̀ wi nə̀, “Tiilə dza bə ghɔɔmə i fənkəfən zey.”

¹⁶ Yeso n bəb ndòw tə̀ ghə nə̀, “Ghaa nam loʼ kə nə ghaa kam zowkeeli way ghəə ghən ə?

¹⁷ Ghaa khə way nə̀ abə a nyi ndow kə kee kə n dzuu i wù, kə tsuu ndòw nə unəghə, kə n tsəghəshi daŋŋə ndòw a bii ə?

¹⁸ Ghəə ghey a kee shiə bənə n dzuu i wù, a nuu bə n fə̀ŋ ə wi. À wey loʼ fə wey u dzəələnə wi.

¹⁹ N təŋkey, à loʼ n fə̀ŋ zə moʼlə tə bəbə tə shiə kɔʼɔ bənə ni ghəŋə aghəə tə̀ a loʼ, ni wey wù, ni taa zaʼ wey wə nkee num wə, ni ghəŋə ghəə a laŋŋə ghə, ni tsɔŋ, ni bad aghəə, nsə ni tsayyə wù.

²⁰ À wən loʼ ghəə ghey a ghəŋŋənə nə̀ wù i dzəə. Ni zə̂ n wɔɔ a dzəə ghə, tə̀ ghə dzanə, ghəŋŋə dzə way nə̀ wù i dzəə.”

Bəghəm i fə̀ŋ i weyzən ə Kanan u loʼ wə

²¹ Yeso n daŋŋə nuu tsu n Jenesalet, nuu nyi ndòw n mboʼo Tayra nsə Sidɔn.

²² Weyzən ə Kanan u loʼ wə tə â muunə n dəŋə kə tii kə n ndòw bə n səə Yeso, dey dza tə̀ wi nə̀, “Mûkəbii, Waa Devid, Kwɔɔlə sî zə n kow mə̀, zay kə bəbə kə loʼ kə fəmmə waa wuŋ u zən wə, tə way kədzuŋ.”

²³ Yeso n ka beeli dzə wi. Ngəd tə wi tə n bə dza tə̀ wi nə̀, “Dzùm nuu nyiə wən, tə dey buʼlə bə nbɔŋ n baa saa.”

²⁴ Yeso n dza ndòw tə weyzən wey nə̀, “Ghə tûm bə mə n səə ghə̂ ghə Izree ghey ghə loʼnə tə a loʼ njì tey tə nay doʼonə.”

²⁵ Weyzən ə tii n fəd bə təm bə tənguʼ n tənə Yeso, dza tə̀ wi nə̀, “Mûkəbii, gaamə mə.”

²⁶ Yeso n beeli ndòw wi nə̀, “I dzɔbə way ni ney fəzəə wə aghinətəghə, wə̀ fu ndòw tə̀ bvə tə.”

²⁷ Nyiə wey n beeli ndow wi nə̀, “À loʼ isəŋə a Mûkəbii, bvə tə nam loʼnu ni kummə zə̂ səghə tə ufəzəə tey tə tsɔʼlənə aghəd abə Mûkəbii ə ghə zə̂ənə.”

²⁸ Yeso n dza ndòw tə̀ wi nə̀, “How weyzən wən! Wə tɔʼ ngii khə bəghəm i fə̀ŋ! I bɔɔmə doʼo tə̀ wə ləghənə.” Sey, waa nyiə wey n daŋŋə taw kɔʼ kə n nəŋə i tii zə.

Yeso baŋŋə ndəmə aghə̂

²⁹ Yeso n zəghə tsu n dəŋə kə tii kə, nuu ndòw n nguŋ ə nyì i Galili. Tə n nuu kɔʼ ndow nə ukaʼ ndòw doʼo tsu fu.

³⁰ Nɔɔ kə aghə̂ kə n ndòw bə n səə wi ghi ghə̂ a dzaŋa ghə, ghə̂ ghey ghə ngɔdlɔ bweynə, ghə̂ a fəbə ghə, ukə̀ŋŋə, umùʼ, nsə ndəmə ghə̂ a dzaŋa a loʼ ghə, ghə n bə naŋŋə bə ghə n sə kə Yeso, tə n baŋŋə ghə.

³¹ Dzuu zə n zum aghə̂ ni koʼ nə̀ mùʼ u nya ghɔɔmənu, ghə̂ ghey ghə ngɔdlɔ bweynə nya bwey dzɔbənu, kə̀ŋŋə wə u taw doʼo bə, ghə̂ a fəbə ghə u koʼonə luʼu tə. Sey, ghə n fuu nkɔʼlə tə Zə̀ kə Izree kə.

Yeso fuu aghə̂ n fəzəə wə nə ghə n tsəghəshi kam tə təkaykə

³² Yeso n tɔŋɔ naŋa bə ngəd tə wi, dza tə̀ ghə nə̀, “Sî i kwɔɔ mə n kow ghə̂ ghən, bòʼ nə̀, ghə n doʼo ghi mə̀ nə ntsuʼu ntəghə, ghə kəm khə way fə kə zəə kə. N ləghə way ni zəghə nuu ndòw ghə n dzəŋ, n təŋkey, ghə loʼ ni ndòw mbvuŋŋə bwu n jii.”

³³ Ngəd tə wi tə n bəb tə̀ wi nə̀, “A nya ney bə ghee fəzəə wə fa n mbvən ə ntsaŋ, u loʼnə ni kpii ni chi ghə̂ ghən adzəm ə?”

³⁴ Yeso n bəb ndòw tə̀ ghə nə̀, “Ghaa khə ubaa usiʼi fey ə?” Ghə n dza, “Ubaa usəghəmbəghə nsə sə̂ fə tətsəghə fə.”

³⁵ Yeso n tsəʼlə tsu kəlaŋ nə̀ nɔɔ kə aghə̂ key doʼo tsu aghəd.

³⁶ Sey tə n ney kɔʼ baa wey usəghəmbəghə nsə tsəghə tey, fuu ndòw zɔŋŋə K-a-zə̀, boʼlə fu ndòw tə̀ ngəd tə wi tə nə ghə dzawwə fu ndow, ghə n dzawwə fu ndòw tə̀ ghə̂ ghey.

³⁷ Ghə n zə̂ kow i tsu ghə adzəm. Ghə n bɔŋŋə bə saʼ wə ifuʼ usəghəmbəghə n boʼo mey mə â doʼo səənə.

³⁸ Taŋ ə gheynum ghey ghə â zə̂nə n loʼ aghə̂ təkam təkaykə, nə ghə ka taŋ gheyzən ghə nsə ghiinətəghə ghə̀.

³⁹ Yeso n daŋŋə tûm zəghə ndòw ghə, nyi kɔʼ nə kəfən, nuu ndòw n mboʼo Magadan.