Matyo 14 - Kaa n Kəzə̀ n fəghə mə

Və i Jɔn wù fuu u Mmuu n Kəzə̀ mə

¹ Ambə Helɔd, wù wey tə â loʼnə də̀ŋ kə n naʼ i Galili, zow tsunə zɔŋ u Yeso wə,

² tə n dza ndòw tə̀ ghə̂ a kəfwaʼ a wi ghə nə̀, “Wù wən sa loʼ Jɔn wù fuu u mmuu n Kəzə̀ mə, tə zhəm dzəŋŋə bənə nə ivə, à wey loʼ zuŋ key tə khənə daʼa kən ni ghəŋŋə faalə mə.”

³ Tə â dza sey bòʼ nə̀, â loʼ Helɔd n wû u wi wə̀ tə â tsəʼlənə laŋ kə nə̀ ghə kwu kùm naŋa ndòw Jɔn n ndaw tsaʼ. Tə â sey ghəŋə bòʼ nə̀ Helodias, wèy waa bày Filip, tə â tsìi neynə.

⁴ Helɔd â ghəə ghən ghəŋə tə̀ Jɔn, n təŋkey, Jɔn â dza tsə tə̀ wi nə̀, “Laŋ kə ka bəghəm dzə nə̀ wə tsìi ney wèy waazu.”

⁵ Sey, Helɔd n ləghə ni wey Jɔn, kee tsəŋə ghaʼa aghə̂, n təŋkey, ghə â khə Jɔn tə a loʼ Wù Tûm Kəzə̀.

⁶ Ambə n tsuʼ fey Helɔd zə̂ənə zə̂ tsuʼ fey ghə â jinə wi tii, waa Helodias u zən wə n ngii bən dzɔb tsu fu sa n sə̂ kə aghə̂, wû wə n ngii nyûmə nay ndow Herɔd tii,

⁷ tə n təb naŋa tsu tə̀ wi nə̀, “Mə n kàa tə̀ wɔ nə̀, abə wə bəb kənə fə kə ghaa kə, mə i fuunu tə̀ wɔ.”

⁸ Zə̂ n tsə̀ tsu waa nə̀ tə bəb ndòw tow kə Jɔn wù fuu u mmuu n Kəzə̀ mə, tə n dza tə bày nə̀, “Fuu bə mə nya sa n tow kə Jɔn wù fuu u mmuu n Kəzə̀ mə nə kəneeli.”

⁹ Wû wə n lɔŋi tsu də̀ŋ key, tɔŋŋə Helɔd. Nghee tə mə təb naŋa bəəbə dzənə ghəə ghən n sə̂ kə aghə̂, tə n tsəʼlə tsu kəlaŋ nə̀ ghə fu ndòw wi n fə key tə ləghənə.

¹⁰ Tə n tûm tsu aghə̂, ghə n ndòw gbòo tsu tow kə Jɔn n ndaw tsaʼ.

¹¹ Ghə n bə n ghii kə nə kəneeli, bə fuu bə tə̀ waa u zən wey, tə ndòw fuu ndòw tə̀ zə̂.

¹² Dzûmə tə Jɔn tə n bə boʼo nuu ndòw vən i wi, ndòw tsəllə i ndòw. Ghə n daŋŋə ndòw dza ndòw ghəə a tii ghə tə̀ Yeso.

Yeso fuu aghə̂ n fəzəə wə təkam tətaa

¹³ Ambə Yeso zow tsunə ghəə ghey a shinə tə̀ Jɔn wù fuu u mmuu n Kəzə̀ mə, Yeso n daŋŋə zəghə tsu fu nyi kɔʼ nə kəfə̀n, nuu ndòw n luʼu k-a-nyi, ni ndow doʼo fu tii n nəŋə wi. Ghə̂ ghə n nam keeli kənu luʼu key tə ndow ni ndow nyi doʼo tii. Sey, ghə n zəghə tsu inaʼ, dzûmə ndòw wi fu nə aghow.

¹⁴ Ambə Yeso shi tsunə nə kəfə̀n, koʼ ndòw nɔɔ kə aghə̂ key, tə n kwɔɔlə isî n kow ghə, sey, tə n baŋŋə kɔʼ ghə̂ ghey ghə â dzaŋanə.

¹⁵ N nəŋə i fənə zə, ngəd tə wi tə n bə n səə wi, bəb tə̀ wi nə̀, “Nəŋə zə n ngii ndòw, a fa loʼ soʼo n luʼu key ghə̂ a muu way tii. Dza nə̀ ghə̂ ghən nuu ndòw n naʼa mən n loʼnə fa tə̀ ghə ndòw zuu zə̂ n nəŋə ghə.”

¹⁶ Yeso n beeli ndòw ghə nə̀, “Ghə ndow way n luʼu kə loʼ kə, wû i ghaa, fuu na ghə n fə kə zəə kə.”

¹⁷ Ghə n dza ndòw tə̀ wi nə̀, “A khə kə ubaa utaa nsə tsəghə tə təbəghə.”

¹⁸ Tə n dza ndòw tə̀ ghə nə̀, “Bə̀ na n ghii wə.”

¹⁹ Tə n daŋŋə dza ndòw nə̀ ghə̂ ghey doʼo tsu nə ughìi. Yeso n ney kɔʼ baa wey utaa nsə tsəghə tey təbəghə, laalə kɔʼ ndòw idəŋ, buulə tsu. Tə n boʼlə fuu ndòw baa wey tə̀ ngəd tə wi tə nə̀ ghə dzawwə fuu ndòw tə̀ nɔɔ kə aghə̂ key.

²⁰ Ghə̂ adzəm ghə n zə̂, zə̂ kow i tsu. Ghə kumi luulə kɔʼ ukhəə ighəm n ghii wə ubəghə n boʼo mey mə â doʼo səənə.

²¹ Taŋ ə ghə̂ ghey ghə â zə̂nə â loʼ tə̀ a loʼ agheynum təkam tətaa, nə a ka taŋ gheyzən ghə nsə ghinətəghə ghə.

Yeso bwey n tow kə dzuu

²² Ambə ghə zə̂ may kɔʼnə, Yeso n daŋŋə kuu nyi kɔʼ ngəd tə wi nə kəfə̀n nə̀ ghə nuu daŋ ndòw n nguŋ inyi i loʼ zey, kee doʼo səə tsu ni sali maʼa nɔɔ kə aghə̂ key.

²³ Ambə tə sali maʼa tsunə nɔɔ kə aghə̂ key, tə n nuu kɔʼ ndòw nə ukaʼ n nəŋə wi ni ndòw gɔŋŋə. Tsuʼ wə n dzə kwɔɔlə tsu wi fu n nəŋə wi.

²⁴ À n loʼ nya nə̀ fə̀n key n zəghə n nguŋ inyi nuu nyi nay ndow n fə̀ŋ ə inyi, tuŋutuŋu tə dzuu tə n tənnə kaabə tsə fə̀n kə tii kə kuumnə zəŋ â ngii tsəghənu, zə n tənnə dzəŋŋə bə ghə.

²⁵ Ambə n zòw kə utsuʼ, Yeso n ndòw bə n səə ghə nə̀ tə bwey bə n tow kə dzuu.

²⁶ Ambə ngəd tə wi tə koʼ tsunə nghee tə̀ tə bwey bənə n tow kə dzuu, tsəŋ zə n kwu ghə, ghə n dza nə̀, “À loʼ avəətsəə!” Ghə n kaʼ ndow ni buʼlə shiə kɔʼɔ bɔŋ mə, nə à loʼ itsəŋ.

²⁷ Yeso n daŋŋə ghɔɔmə ndòw tə̀ ghə dza nə̀, “Kwu tsu na fə̀ŋ tə ghaa tə, a loʼ mə, kə̂ ghaa nə̂ tsəŋənə.”

²⁸ Pita n dza ndòw tə̀ wi nə̀, “Mûkəbii, abə a ndzəm loʼnə wɔ, tsəʼlə tsu laŋ kə nə̀ n bwey bə n tow kə dzuu, n bə n səə wɔ.”

²⁹ Yeso n dza nə̀, “Bəghə.” Sey Pita n shi tsu nə kəfə̀n, bwey ndòw n tow kə dzuu, ndow n səə Yeso.

³⁰ Ambə Pita kee koʼ tsu nə̀ zəŋ ngii tsəghənu, tsəŋ zə n kwu tsu wi, tə n kaʼ ndòw ni məllə nyi tsu ndow nə inyi. Tə sey daŋŋə nuu buʼ shi kɔʼnu bɔŋ kə idey kə dza nə̀, “Mûkəbii, bəghəshi mə.”

³¹ Yeso n daŋŋə naalə shi ndòw kəwɔɔ, kwu bə wi, dza tə̀ wi nə̀, “Bəghəm i fə̀ŋ zə i taw way, à loʼ kee wə mə kəm kaʼ tsunə ni səm ə?”

³² Ambə ghə nyi kɔʼnə nə kəfə̀n, zəŋ zey n bɔɔmə may i tsu.

³³ Ngəd tey tə â loʼnə tii nə kəfə̀n n ngɔɔmə ndòw wi dza nə̀, “Wə ndzəm loʼ Waa Kəzə̀.”

Yeso baŋŋə ghə̂ a dzaŋa ghə n Jenesalet

³⁴ Ambə Yeso ghi ngəd tə wi tə daŋ shi ndòwnə n nguŋ inyi i loʼ zey, ghə n shi tsu n naʼ i Jenesalet.

³⁵ Nghee tə ghə̂ ghey fu koʼ keeli tsunə wi, ghə n tûm tɔŋɔ bə ghə̂ a dzaŋa ghə adzəm n mboʼ i tii zə n səə wi.

³⁶ Ghə n buʼ wi n wɔɔ kə nə̀ ghə mə labi mɔm tsu kə ndzə̂ tə wi. Ghə̂ ghey adzəm ghə â mɔmnə wi n taw kɔʼ.