Matyo 1 - Kaa n Kəzə̀ n fəghə mə

Ghə bày bày a sali i kəbii i Yeso

¹ À wən loʼ màʼlə kən kə taŋŋə kɔʼ bənə ghə bày bày a Yeso Klisto wən tə â loʼnə waa sali i kəbii i fɔ̀ɔ Devid. Devid â loʼ waa sali i kəbii zə Abraham.

² Abraham â ji tsu Ayzik, Ayzik n ji tsu Yakɔb, Yakɔb n ji tsu Juda nsə waazə a wi ghə,

³ Juda n ji tsu Peres ghi Zera, này ghə â loʼnə Tama. Peres n ji tsu Hezrɔn, Hezrɔn n ji tsu Ram.

⁴ Ram n ji tsu Aminadab, Aminadab n ji tsu Nashɔn, Nashɔn n ji tsu Salmɔn.

⁵ Salmɔn n ji tsu Boaz wən nay wi â loʼnə Rahab. Boaz n ji tsu Obed wən này wi â loʼnə Rud. Obed n ji tsu Jese,

⁶ Jese n ji tsu Devid wən tə â loʼnə Də̀ŋ kə. Devid n ji tsu Solomun wən này wi â loʼnə Bashiba wey Yurya.

⁷ Solomun n ji tsu Rehobwam, Rehobwam n ji tsu Abijà. Abijà n ji tsu Asaf.

⁸ Asaf n ji tsu Jehoshafat, Jehoshafat n ji tsu Jehoram, Jehoram n ji tsu Uzya.

⁹ Uzya n ji tsu Jotam, Jotam n ji tsu Ahaz, Ahaz n ji tsu Ezekaya.

¹⁰ Ezekaya n ji tsu Manase, Manase n ji tsu Amɔn, Amɔn n ji tsu Jozaya.

¹¹ Jozaya n ji tsu Jekonaya nsə waazə a wi ghə. Ghə â ji ghə n nəŋə zey ghə â kwu nuu ndòwnə ghə̂ ghə Izree ghə n naʼ i Babilɔn.

¹² Nghee ghə̂ ghə Izree ghə â loʼnə n Babilɔn, Jekonaya n ji tsu Shiltyel, Shiltyel n ji tsu Zerubabel.

¹³ Zerubabel n ji tsu Abiud. Abiud n ji tsu Elyakim, Elyakim n ji tsu Azɔ.

¹⁴ Azɔ n ji tsu Zadɔk; Zadɔk n ji tsu Akim, Akim n ji tsu Elyud.

¹⁵ Elyud n ji tsu Elyaza, Elyaza n ji tsu Matan, Matan n ji tsu Yakɔb.

¹⁶ Yakɔb n ji tsu Yosef. Yosef â loʼ nùm Maliya, ghə n ji tsu Yeso n daʼa kə Zay kə Zow kə. Yeso wən loʼ wù wən Zə̀ kə â dza naŋa nə̀ i tûm bənu.

¹⁷ Sey, tsòʼo tə aghə̂ tə â loʼ ighəm n ghii tə təkaykə ni zey nuu tsu n tsòʼo kə Abraham kuum ndòw n tsòʼo kə fɔ̀ɔ Devid. Ni zey nuu tsu n nəŋə i fɔ̀ɔ Devid, bə kuum bə n nəŋə zey ghə â ney nuu ndownə ghə n naʼ i Babilɔn, à n loʼ tsoʼo tə aghə̂ ighəm n ghii tə təkaykə. Ni ney nuu tsu tə̀ ghə̂ ghə Izree ghə â loʼnə n Babilɔn, ndòw kuum ndòw n nəŋə zey ghə â jinə Wù wən Zə̀ kə â dza naŋa nə̀ i tûm bənu, à n loʼ soʼo tsoʼo tə aghə̂ ighəm n ghii tə təkaykə.

Ji i Yeso

¹⁸ À wən loʼ nghee tə̀ ji i Yeso Klisto zə â neynə bənə kə tii. Â loʼ nə̀ Yosef n bə nyi naŋa Maliya tɔŋŋə này Yeso n wey. Tə̀ ghə ni kee bə ney iwû, Maliya n kòʼ kə nə̀ tə nya loʼ nəghə u waa n daʼa kə Zay kə Zow kə.

¹⁹ Yosef, num wi â loʼ wù tsətsəghə, tə n ləghə way ni dədlə maʼa tow kə Maliya, sey tə n moʼlə tsu n fə̀ŋ ə wi nə̀ i tuu maʼa Maliya bam i bam.

²⁰ Nghee tə̀ tə moʼlənə ghəə a tii ghə̀, tsəndəghə ə Kəzə̀ n bə tə̀ wi nə ujim, dza tə̀ wi nə̀, “Yosef, waa Devid, kà tsəŋ dzə ni ney ndòw Maliya tə̀ a loʼ wey wə, kuum nə̀, waa wey tə khənə nə unəghə, tə bɔŋ n daʼa kə Zay kə Zow kə.

²¹ Tə i jiə bə waa u num wə, wə̀ i tsə̀ tsu zəd i wi nə̀ à loʼ Yeso, n təŋkey, tə i bəghəshiə ghə̂ a wi n ghəə a ghə a bəbə ghə.”

²² Ghəə ghən â shi ni ghəŋə nə̀ ghəə ghey Yawe â naʼa naŋanə tə̀ tûm tə wi tə, a bə shi isəŋə nə̀,

²³ “Weyzən, nə̀ tə ka kam nyəŋi koʼ tsə ghi weynum, î bɔŋɔ waa nə̀ tə ka nyəŋi ghi weynum. Tə̂ i ji bə waa ù nûm wə̀, Ghə i tɔŋŋə waa u num u tii wə nə̀ a loʼ Imanwe I dii tsunə nə̀, Zə̀ kə loʼ ghi saa.”

²⁴ Ambə Yosef zhəm kɔʼnə, tə n ghəŋə ndòw kə tə̀ tsəndəghə ə Kəzə̀ zey mə dzanə, ney ndòw Maliya n wey.

²⁵ Tə n ka kee nyəŋi dzə ghi wi tə̀ wi ni bə ji. Maliya n ji tsu waa u num wə, Yosef n tsə̀ tsu zəd i wi nə̀ a loʼ Yeso.