Malakus 9 - Kaa n Kəzə̀ n fəghə mə

¹ Tə n ndòw n sə kə, dza tə̀ ghə nə̀, “N dza bə isəŋə tə̀ ghaa nə̀, ghə̂ a loʼ fa nə̀ ghə i kpu way nə̀ ghə ka koʼ fɔɔ u Kəzə̀ wə u bəghənə n daʼa kə.”

Yeso kweyyə kɔʼ koʼ i wi

² Ambə tsuʼu n tsəghə tsunə ntuubə, Yeso n ney kɔʼ Pita, Jems nsə Jɔn, nuu kɔʼ ndòw ghi ghə nə̀ ukaʼ. Ghə n loʼ fu n nəŋə ghə. Nghee ghə loʼnə fu, Yeso n kweyyə kɔʼ n sə kə ghə,

³ ndzə tə wi tə n nyiəllə tə̀ a loʼ tsə̀, tə n fəmmə sa, fəm tsəghə tsu ufə udzəm fa n mbi.

⁴ Ghə n dza i laalə, ghə n koʼ Elayja nsə Mushi bən shi kɔʼnə fu, zey ndow ni ghɔɔmənə ghi Yeso.

⁵ Pita n dza ndòw tə̀ Yeso nə̀, “Wù dii, i dzɔbənu nghee ghey loʼ fa. Ghey loʼ ni bəghə kɔʼ nfəə ntəghə tə̀ ghaa. Fəmɔʼ tə̀ wɔ, fəmɔʼ tə̀ Mushi, nsə fəmɔʼ tə̀ Elayja.”

⁶ Pita â buʼ khə way ghəə zey tə dzanə, n təŋkey ghə â loʼ nə itsəŋ.

⁷ Ghə n dza i koʼ, mbaʼ tə n bə tsəd bə ghə, dzə̀ i loʼ zə n shi bə fu tii dza nə̀, “À wən loʼ waa wuŋ u tsuʼu wə, zow na tə̀ wi!”

⁸ Ghə n tsaŋŋə laalə kaabə tsə təluʼu, ka kəm koʼ wù loʼ, a n loʼ kə ghə ghi Yeso.

⁹ Nghee tə̀ ghə dzəŋŋə tsuu bənə nə̀ ukaʼ, Yeso n fu tsu kəlaŋ tə̀ ghə nə̀ kə̂ ghə nə dzanə ghəə zən tə̀ wù loʼ ni ndòw kùm tsuʼ fey Waa Wù Sɔŋtsuʼ î zhəm dzəŋŋə bənə nə ivə.

¹⁰ Ghə n nyì naŋa ndòw ghə i tii zə n wû i ghə tə̀ tə â dzanə, kee kaʼ ni ghɔɔmə n wû i ghə dza nə̀, “Zhəm dzəŋŋə zə ivə zey baa dii nə̀ ngee.”

¹¹ Ghə n bəb ndòw tə̀ Yeso nə̀, “À loʼ kee ghə̂ a dii a kəlaŋ a dzanə nə̀ a i bəghə dzə Elayja isə tə wù wən tə khə ni bə i sə bəghə?”

¹² Yeso n dza ndòw tə̀ ghə nə̀, “Elayja teeli khə ni bə isə ni bə bayyə naŋa tsu aghəə. À kee nam loʼ kee ghə tɔ̀ɔ naŋanə n màʼlə K-a-zə̀ nə̀ Waa Wù Sɔŋtsuʼ khə ni koʼ ndəmə uchɔd, ghə i tuu maʼa wi ə?

¹³ N kee dza bə tə̀ ghaa nə̀, Elayja mâ bə, ghə̂ ghə n ghəŋə aghəə tə̀ wi tə̀ ghə ləghənə, ighələ tə̀ màʼlə K-a-zə̀ kə â dzanə kuum wi.”

Yeso baŋŋə waa u num wə zay kə bəbə kə loʼnə n kow wi

¹⁴ Ambə ghə dzəŋŋə tsu bənə nə ukaʼ, ghə n bə koʼ bə ngəd tə̀ loʼ tey, nə nɔɔ kə aghə̂ kə n dzəŋ tsəghə kɔʼ ghə nsə ghə̂ a dii a kəlaŋ a loʼ ghə, ghə ghɔɔmə ballənə.

¹⁵ Nghee tə̀ ghə̂ a koʼ ndòwnə Yeso, dzuu zə n zum ghə, ghə n nyəŋ ndow kpii ney bə wi.

¹⁶ Yeso n bəb ndòw tə̀ ngəd tə wi tə nə̀, “Ghaa baŋŋə ghɔɔmə kee fa ghi ghə ə?”

¹⁷ Wù loʼ n nɔɔ key n buʼ shi kɔʼ kəbɔŋ nə̀, “Wù dii wə, n mə ney bə waa wuŋ ni bə koʼ wɔ n təŋkey zay kə bwu kə loʼ n kow wi, kə ghəŋənə wi tə u way ni ghɔɔmə.

¹⁸ Nəŋə zey zay kə bwu key kwu tsunə wi, kə n mbvuŋə maʼa bə wi aghəd, tsəbə tə n kaʼ ni shi n dzuu i wi, tə n fəə asɔŋ, wû u wi wə tə̀ghə̀ doʼo kɔʼ. Mə u dza tsunə tə̀ ngəd tə tə̀ nə̀ ghə dzùm shi zay kə bwu key, ghə u dəm kìi tsunə.”

¹⁹ Yeso n dza ndòw tə̀ ghə nə̀, “Ghaa sey laʼa bəghəm i fə̀ŋ nə̀ a loʼ kee? Mə i kow fə̀ŋ ghi ghaa n ndow kuum ghee? Mə î boʼo doʼlə ghi ghaa ni ndòw kùm zeeli? Ney bə na waa tii fa.”

²⁰ Ghə n ney bə wi n səə Yeso. Nghee tə̀ zay kə bwu key koʼ tsunə Yeso, kə n mbvuŋŋə maʼa bə waa wey aghəd, tə n bəŋŋə kaabə tsə, tsəbə tə n shiəə n dzuu i wi.

²¹ Yeso n bəb ndòw tə̀ bày waa wey nə̀, “Ghəə a tii ghə â kaʼ zeeli?” Bày waa tii n dza nə̀, “Ghəə tii ghə â kaʼ nə̀ tə nam təbənu.”

²² Ndəmə tənəŋə, zay kə bwu key n maʼa wi nə uvəllə, nkee nə mmuu tə̀ tə kpu. Abə jìi loʼnə, kwɔɔlə sî zə n kow ghey, wə gaamə ghey.

²³ Yeso n dza tə̀ wi nə̀, “Wə bəb bə nə̀ ‘Abə n khənə jìi ə?’ Ghə i loʼ i way ni taw tsəghə wù wey tə khənə bəghəm i fə̀ŋ zə.”

²⁴ Bày waa wey n daŋŋə dza, “N khənu bəghəm i fə̀ŋ zə̀, kee gaamə mə nə̀ n ndəŋ keeli tsu.”

²⁵ Yeso n daŋŋə koʼ nə̀ nɔɔ kə aghə̂ kə nya kuʼu bənu, sey, tə n tsəʼlə tsu kəlaŋ tə̀ zay kə bwu key nə̀, “Wɔ zay kən wə ghəŋŋənə nə̀ waa wən kuʼ doʼo, tə doʼo soʼo kəmùʼ, bə tsəghə shi n kow wi, wə̀ nuu tən.”

²⁶ Zay key n buʼ shi kɔʼ kəbɔŋ, mbvuŋŋə maʼa bə waa wey aghəd, daŋŋə bə tsəghə shi n kow wi. Waa wey n nyə̀ŋ tə̀ tə kpu doʼonu. Ghə̂ ghə n kaʼ ni dza nə̀, “Tə n kpu!”

²⁷ Yeso n kwu tsu wɔɔ kə waa tii, ney nuu kɔʼ wi idəŋ, tə n təmi kɔʼ n fuu i wi.

²⁸ Ambə Yeso ghi ngəd tə wi tə nyi ndòwnə n ndaw, ngəd tə wi tə n bə tsɔŋ bəb bə tə̀ wi nə̀, “A kee loʼ kee ghey mə way ni dzùm shi zay kə bwu key ə?”

²⁹ Yeso n beeli ndòw ghə nə̀, “Ghə i loʼ i way wù loʼnə ni ghəŋə ni dzùm shi ndzoʼo zay kən, a may kə nə̀ tə ndəŋ gɔŋŋə tsunu, bam idzuu soʼo.”

Yeso ghɔɔmə kpiʼi kuum və i wi

³⁰ Yeso ghi ngəd tə wi tə n nuu tsu fu, tsəghə tɔɔlə ndow n mboʼo Galili. Yeso â ləghə way nə̀ ghə̂ a keeli luʼu key tə loʼnə tii,

³¹ boʼnə tə â bwey dii ndow ngəd tə wi n ghəə ghə n jìi dza nə̀, “Ghə i ney fuu tsəghə ndòw Waa Wù sɔŋtsuʼ tə̀ ghə̂ ghey ghə i weynə wi. A i bə nə ntsuʼu ntəghə, tə i zhəm dzəŋŋə bə nə ivə.”

³² Ngəd tə wi tə n ka kee zowkeeli ghəə zey i diinə, ghə n tsəŋə soʼo ni bəb tə̀ wi.

À tow kə loʼ ndee

³³ Ghə n ndòw bə n naʼ i Kapenum, ambə ghə nyi ndòwnə n ndaw, Yeso n bəb ndòw tə̀ ngəd tə wi tə nə̀, “Ghaa mə ghɔɔmə ballə kee n jìi ə?”

³⁴ Ghə n ləghə way ni beeli wi n təŋkey ghə â baŋŋə bə təfəghəm n jìi ni koʼ nə̀ a loʼ ndee tow kə n fəŋŋə kə ghə ə?

³⁵ Yeso n doʼo tsu aghəd, tɔŋɔ bə ngəd tə wi tey ighəm n ghii tə təbəghə, dza tə̀ ghə nə̀, “Wù wey tə ləghənə ni doʼo kətow n fəŋŋə kə ghaa, khə ni doʼo wù kəfwaʼ tə̀ ghaa adzəm.”

³⁶ Sey, tə n ney kɔʼ waa fə loʼ fə, teyyə naŋa bə wi n sə kə ghə. Tə n maŋŋə keeli tsəghə ndòw waa tii, dza tsu tə̀ ghə nə̀,

³⁷ “Wù wey tə kpii neynə waa tə̀ a loʼ u wən n zəd zuŋ, sey kpii ney mə. Wù wey tə kpii neynə mə, ka kad kpii ney dzə mə, tə kpii ney soʼo wù wey tə tûmnə mə̀.”

A loʼ ndee tə taʼanə ghi saa?

³⁸ Jɔn n dza tə̀ wi nə̀, “Wù dii, a mə koʼ wù loʼ tə dzùm shiənə zay u bwu wə n zəd zə, a u buu naŋa ndòwnə wi, n təŋkey tə way dzə ghi saa.”

³⁹ Yeso n dza ndòw tə̀ ghə nə̀, “Kə̂ ghaa nə buu naŋŋənə wi. N təŋkey, wù way dzə ni ghəŋə dzə nfaalə n zəd zuŋ, tə kəm kaʼ ni dza ghəə a bəbə ghə bòʼ mə.

⁴⁰ Kuum nə̀, wù wey tə zuulə baallə way ghi saa, sey taʼa ghi saa.

⁴¹ N kùm dza bə tə̀ ghaa nə̀, wù wey tə fuu kənə ghaa n mmuu n məə mə n zəd i Klisto, î teeli keelinu naamə kə wi kə.”

Ghəə ghən a ghəŋŋə nə̀ wù i ghəŋŋə bəb zə

⁴² Yeso n kəm dza tsu nə̀, “Wù wey tə ghəŋənə nə̀ wù umɔʼ n ghiinətəghə ghən ghə bəghəmnə tə̀ mə, nə̀ ghə bwù n ghəə a bəbə ghə, dzɔb loʼ tə wù tii nə̀ ghə baa kow kɔʼ tay i nii zə n mwey u wi, ghə maʼa nyi tsu wi n fə̀ŋ ə inyi.

⁴³ I loʼ soʼo nə̀, abə wɔɔ kə kə̀ ghəŋənə wɔ̀ nə̀ wə bwù n ghəə a bəbə ghə, khəə nuu kɔʼ wɔɔ kə tii kə. Dzɔb loʼ tə̀ wɔ̀ nə̀ wə keeli muu zə itsali n wɔɔ kə kəmɔʼ, tsəghəshi tə̀ wɔ̀ ni ndòw n vəllə u tsali wə n wɔɔ ghə ghə̀ abəghə.

⁴⁴ [Nyuŋŋə tey tə fəənə ghə̂ ghə fu, kpuu koʼo tsə way, vəllə wey fu, nəmmə koʼo tsə soʼo way.]

⁴⁵ Abə fuu kə kə̀ ghəŋənə wɔ̀ nə̀ wə bwù n bəghəm i fə̀ŋ zə, khəə nuu kɔʼ fuu kə tii kə. Dzɔb loʼ tə̀ wɔ nə̀ wə keeli muu zə itsali n fuu kə kəmɔʼ, tsəghəshi tə̀ wɔ ni ndòw n vəllə u tsali wə n fuu zə zə̀ ibəghə.

⁴⁶ [Nyuŋŋə tey tə fəənə ghə̂ ghə fu, kpuu koʼo tsə way, vəllə wey fu, nəmmə koʼo tsə soʼo way.]

⁴⁷ Abə sə̂ zə i ghəŋənə nə̀ wə bwù n bəghəm i fə̀ŋ zə, bɔʼi nuu kɔʼ sə̂ i tii zə. Dzɔb loʼ tə̀ wɔ nə̀ wə nyi n fɔɔ u Kəzə̀ n sə̂ zə imɔʼ, tsəghəshi tə̀ wɔ ni ndòw n vəllə u tsali wə n sə̂ ghə abəghə.

⁴⁸ Nyuŋə tey tə fəənə ghə̂ ghə fu, kpuu koʼo way, vəllə u tii u nəmmə way.

⁴⁹ Ghə̂ adzəm a khə ni tsəghə tɔɔlə nə uvəllə, tə̀ ghə ni doʼo dzɔb, ighələ tə̀ ghə kuu tsoʼ mə nə ufəzəə ni ghəŋŋə nə̀ u dzɔb.

⁵⁰ Tsoʼ n dzɔbənu, a kee loʼ nə̀ abə tsoʼ n kuŋ shi tsunə, n kəm way ni fwaʼ fwaʼ kə ntsoʼ. Ghaa khə ni tɔbə n wû i ghaa tə̀ a loʼ ntsoʼ, ghaa i muu nə ibuulə n wû i ghaa nsə ghə̂ ghə adzəm.”