Malakus 7 - Kaa n Kəzə̀ n fəghə mə

Ghəə ghə inaʼ nsə laŋ u ghə̂ a Təjuu

¹ N tsuʼ fə loʼ fə, ghə̂ a tə Falasi nsə ghə̂ a dii a kəlaŋ a loʼ ghə, ghə â nuu bənə n Yerosalem, n bə zuŋŋə doʼo bə n səə Yeso.

² Ghə n koʼ ndòw ngəd tə Yeso tə loʼ tə ghə zəənə n wɔɔ a dzəə ghə tə laŋ kə ghə kə diinə.

³ Ghə̂ a tə̀ Falasi, nsə ghə̂ a Təjuu adzəm, ghə â zəə dzə way nə̀ ghə ka wɔɔ a ghə a sow tə̀ ghə â koʼ neynə n wɔ ngəd tə inaʼ tə ghə bày bày a ghə ghə̀.

⁴ Abə ghə zuu bənə fə kə n bikiwən, ghə way ni zə̂ nə̀ ghə ka sow. Ghə â dzûmə ndəmə ulaŋ u loʼ wə u diinə jìi zey wù khənə ni sow wɔ̀ɔ tə ghə tə, tətɔ̀ɔ, ngow, ukaŋ, nsə neeli wə.

⁵ Sey ghə̂ a tə Falasi nsə ghə̂ a dii a kəlaŋ ghə n bəb ndòw tə̀ Yeso nə̀, “A loʼ kee ngəd tə tə̀ dzûmə way laŋ u ngəd tə inaʼ tə ghə bày bày a saa ghə, ghə sə zəə n wɔɔ a dzəə ghə ə?”

⁶ Yeso n beeli ndòw ghə dza nə̀, “Wù tûm Kəzə̀ Ayzaya â khənu zuŋ kə ni dza nə̀ ghaa loʼ ghə nəb ityim, tə̀ i loʼnə n màʼlə K-a-zə̀ nə̀, ‘Ghə̂ ghən ngɔɔmə kə mə̀ nə idzuu, Fə̀ŋ tə ghə tə way dzə ghi mə̀.

⁷ Ghə ngɔɔmə mə kənunu, Ghə dii laŋ wə inaʼ u ghə dza nə̀ a loʼ laŋ wuŋ.’”

⁸ Yeso n ndow n sə kə dza nə̀, “Ghaa n baʼ naŋa laŋ u Kəzə̀, fədlə tɔʼlə naŋŋə kə ghəə ghə inaʼ a ghaa.”

⁹ Yeso n dza tə̀ ghə nə̀, “Ghaa tɔʼ khə jii tə utɔb ni baʼ naŋa laŋ u Kəzə̀, sey nə̀ ghaa i loʼ ni tɔʼ kwu keeli ghəə ghə inaʼ a ghaa.

¹⁰ N təŋkey, Mushi â dza nə̀, ‘Wə̀ khə ni ngɔɔmə bày wə ghi này wə’ nsə nə̀, ‘Ghə khə ni wey maʼa wù wey tə tsɔɔmənə bày wi ghi này wi.’

¹¹ Ghaa u kee dzanə nə̀ abə wù khənə fə kə ni gaamə bày wi nsə nay wi, tə ney naŋa kɔʼ nə̀ a khə Kəzə̀.

¹² Tə kəm way ni ney fə kə tii kə tə gaamə bày wi nsə này wi tii.

¹³ Sey, ghaa tuu maʼa ghɔɔmə i Kəzə̀ fədlə bəghəm naŋŋə ghəə ghə inaʼ a ghaa. Ndəmə ghəə a loʼ a loʼnu ghaa ghəŋŋənə n jìi tə tii tə.”

Ghəə ghey a ghəŋŋə nə̀ wù i dzəə n sə̂ K-a-zə̀

¹⁴ Sey, Yeso n kəm tɔŋɔ tsu nɔɔ kə aghə̂ key n səə wi, dza tə̀ ghə nə̀, “Zəllə tsu na ghəə ghən n dza n dza, ghaa zowkeeli tsu.

¹⁵ Fə kə loʼ kə way dzə wù zəə nyiə tsu ndòwnə nə unəghə, kə loʼ ni ghəŋŋə nə̀ tə i dzəə n sə̂ K-a-zə̀.”

¹⁶ [Wù wey tə khənə tuŋŋə wə, tə zow].

¹⁷ Ambə Yeso zəghə tsunə nɔɔ key, nyi ndòw n ndaw, ngəd tə wi tə n bəb ndòw tə̀ wi nə̀, “Ghɔɔmə i fənkəfən zey u mə dzanə dii nə̀ ngee.” Tə n bəb ndòw tə̀ ghə nə̀,

¹⁸ “Ghaa laʼlə soʼonu tə̀ a loʼ ghə̂ a loʼ ghey ə? Ghaa koʼo way nə̀ fə kə loʼ kə way dzə wù zəə nyiə tsuu ndòwnə n nəghə u wi, kə loʼnə ni ghəŋə nə̀ tə i dzəə n sə̂ K-a-zə̀ ə?

¹⁹ N təŋkey, kə nyiə dzə way n fə̀ŋ ə wi, kə ndòw n nəghə u wi, kə n shi daŋŋə.” (Tə â dza sey ni ghəŋə tsu nə̀ ghə keeli tsu nə̀ fəzəə udzəm u dzɔbənu tə̀ wù ni zə̂).

²⁰ Yeso n ndòw n sə kə dza tə̀ ghə nə̀, “À loʼ fə key kə shiə bənə n fə̀ŋ ə wù kə ghəŋŋənə nə̀ tə i dzəə n sə̂ K-a-zə̀.

²¹ N təŋkey, ghəə a bəbə ghən wù ghəŋŋənə adzəm shiə bə n fə̀ŋ ə wi tə̀ à loʼ moʼlə tə bəbə tə, ghəə a laŋŋə ghə, utsɔŋ, ni wey wù.

²² Ghəə a bəbə a loʼ a loʼ soʼonu tə̀ à loʼ ni tsìi ney wey wù, umə̂, ghəə a tsìi ghə, kəghoʼ, imbvəi, ghəə a tsayyə a wù ghə, wû u ghaŋŋə wə, ghəə a laʼlə ghə.

²³ Ghəə a bəbə ghən adzəm shiə bə n fəŋ ə wù, ghəŋŋə nə̀ tə i dzəə n sə̂ K-a-zə̀.”

Bəghəm i fə̀ŋ i zən ə kətûm

²⁴ Yeso n zəghə tsu fu, nuu ndòw n mboʼo Tayra. Tə n nyi ndòw n ndaw i loʼ zə, ləghə way nə̀ wù loʼ keeli nə̀ tə loʼ fu. Tə n nam way ni nyi doʼo.

²⁵ Weyzən u loʼ wə zay kə bwu kə â loʼnə n kow waa wi u zən wə n zow tsu nə̀ tə loʼ fu, daŋŋə ndòw bə fu tii n ndaw. Tə n bwù təm ndòw tənguʼ n tənə Yeso.

²⁶ Tə â way dzə zən ə Juu, â loʼ zən ə kətûm tə nuu bənə n mboʼo Fonisia n naʼ i Sirya. Tə n buʼ wi n wɔɔ kə nə̀ tə dzùm shi zay kə bwu key n kow waa wi.

²⁷ Yeso n fəd dza ndòw tə̀ wi nə̀, “Ghə dza tsə nə̀ ghə fuu tsə aghinətəghə n fəzəə wə isə̂, n tənkey, i dzɔbə way ni ney fəzəə u ghə, wə̀ fuu ndòw tə̀ bvə tə.”

²⁸ Nnyə tii n beeli ndòw wi dza nə̀, “Mûkəbii, n dza bvə tə ngəŋŋə kûmmə zəə bə sadla mey n tsɔʼlənə n wɔɔ kə aghinətəghə ə?”

²⁹ Sey Yeso n dza ndòw tə̀ wi nə̀, “Nghee wə beeli kɔʼnə sey, ndòw dzəŋŋə n ndaw zə, zay kə bwu key n nuu shi n kow waa wə.”

³⁰ Tə n nuu ndòw n ndaw wi, ndòw koʼ waa wi tə nyəŋnə nə ukay nə̀ zay kə bwu key n nuu shi n kow wi.

Yeso baŋŋə kəkuʼ

³¹ Yeso n nuu tsu n mboʼo Tayra i tii zə, tsəghə tɔɔlə ndòw n naʼ i Sidɔn, tsuu ndòw n nyì i Galili, ndòw nyi ndòw n mboʼo Dekapolis tɔŋŋə mboʼ zən Naʼa tə loʼnə fu tii Ighəm.

³² Ghə̂ a loʼ ghə n ney bə wù loʼ n səə wi nə̀ tə n kuʼ doʼo, ghɔɔmə dzɔbə soʼo way. Ghə n buʼ Yeso n wɔɔ kə nə̀ tə mɔm tsu kə wù tii n wɔɔ.

³³ Yeso n səŋ nuu tsu ghi wù wey, naŋa sə tsu nɔɔ key. Ambə ghə tey kə tow ghə ubəghə, tə n kuu nyi ndòw waa awɔɔ a wi n tuŋŋə u wù tii, tsə tsu ntəghə, mɔm ndòw nyim kə wù wey.

³⁴ Tə n laalə kɔʼ ndòw idəŋ, dəmi tsu, dza ndòw tə̀ wù tii n ghɔɔmə i ghə nə̀, “Efata”, i diinə nə̀, “Chi kɔʼ!”

³⁵ Tuŋŋə u wù wey wə n daŋŋə chi kɔʼ, nyim kə wi kə n zìi tsu, wù tii n zey ndòw ni ghɔɔmə dzɔb.

³⁶ Yeso n kii naŋa ndòw ghə̂ ghey nə̀ kə̂ ghə nə̂ dzanə ghə i tii zə tə̀ wù loʼ. Nghee tə kii kə nə ghə sey, ghə n fəd ndəmi ndòw isəŋ ni naʼa kaabə ghə i tii zə.

³⁷ Dzuu zə n ngii zum ghə, ghə n dza nə̀, “Tə faalə naŋŋə dzɔbə bə aghəə adzəm. Tə buʼu ghəŋŋə nə̀ kuʼ wə i zow tuŋŋə wə, ghəŋŋə soʼo nə̀ mùʼ wə i ghɔɔmə!”