Malakus 4 - Kaa n Kəzə̀ n fəghə mə

Ghɔɔmə i fənkəfən kuum wù usum

¹ Yeso n kaʼ kpiʼi ndòw ni dii aghəə n nguŋ ə nyi i Galili. Nɔɔ kə aghə̂ key kə â dzəŋi bənə n səə wi, kə â ngii downu, sey, tə n baa nyi doʼo kɔʼ nə kəfən n dzuu ə Galili. Nɔɔ kə aghə̂ key n loʼ n nguŋ ə inyi.

² Tə n dii ghə n ndəmə tə aghəə tə n ghɔɔmə i fənkəfən, imɔʼ n loʼ nə̀,

³ “Ghaa tɔʼ zəllə! Wù loʼ â soʼ ndownu ni ndòw təm ufə.

⁴ Nghee tə təmə ndownə, ndzoʼ tə loʼ tə n tsɔʼlə bə n jìi. Nnən mə n bə kumi fə nuu kɔʼ.

⁵ Tə loʼ tə n tsɔʼlə bə n luʼu kə atay, nə̀ zub tə basə way fu. Tə n luumə fòw i kɔʼ n təŋkey zub tə â basə way fu.

⁶ Ambə tsə shi bənə, zə n fɔbi maʼa kɔʼ ndzoʼ tə tii tə, tə n zum kɔʼ, n təŋkey, tə â khə way ghaŋ tə.

⁷ Tə loʼ tə n tsɔʼlə bə n luʼu key dzɔŋɔmgbay u loʼnə tii. Ambə tə shi kɔʼ bənə, nyiəmə, kaakaa wə n nyiəmə soʼo, nyim tsami maʼa kɔʼ ndzoʼ tə tii tə, sey ndzoʼ tə tii tə n ka bɔŋ.

⁸ Ndzoʼ tə loʼ tə n tsɔʼlə ndòw n zub tə dzuŋu tə. Tə n nyim dzɔb kɔʼ, bɔŋ i kɔʼ, keeli tsu ndəmə asə̂ n jìi zey tə loʼ â fuu bənə sə̂ ghə nghəm ntəghə, tə loʼ tə n fuu bə nghəm ntuubə, tə loʼ tə n loʼ asə̂ fəbɔm.”

⁹ Sey Yeso n dza tə̀ ghə nə̀, “wù wey tə khənə tuŋu wə, tə zow.”

Zuŋ kə ghɔɔmə tə fənkəfən tən

¹⁰ Ambə nɔɔ key nuu tsunə, ghə̂ ghey ghə â doʼo səənə ghi wi nsə ngəd tə wi tey ighəm n ghii ghə abəghə, n dza tə̀ wi nə̀ tə tiilə bə ghəə zey ghɔɔmə i fənkəfən zey diinə.

¹¹ Yeso n beeli ndòw ghə nə̀, “Zə̀ kə n ghəŋə nə̀ ghaa keeli sad i fɔɔ u Kəzə̀, a sə bə ghə̂ a loʼ ghey ghə way n fɔɔ u tii wə, n dii kə ghə n ghəə ghə n ghɔɔmə i fənkəfən. I loʼ sey n təŋkey i tɔ̀ɔ doʼo n maʼlə kə tûm Kəzə̀ Ayzaya nə̀,

¹² ‘Ghə i mgbaŋa laalə kə sa, Ghə i koʼo keeli way, Ghə i zəllə ghəə ghə, Zowkeeli way. Sey nə̀, kə ghə nə kweyyənə fə̀ŋ tə ghə tə, Tə̀ Zə̀ kə neyzəə ghəə a ghə a bəbə ghə.’”

Yeso tiilə dza ghɔɔmə i fənkəfən i wù usum

¹³ Yeso n bəb ndòw tə̀ ghə nə̀, “ghaa zowkeeli way ghɔɔmə i fənkəfən zən ə? Abə ghaa ka zowkeeli ghɔɔmə i fənkəfən zən, ghaa i sə̀ zowkeeli ngee tə loʼ tə ə?

¹⁴ À wən loʼ ghəə zey ghɔɔmə i fənkəfən zən diinə, wù usum wey təmə ndòw ghɔɔmə i Kəzə̀.

¹⁵ Ghə̂ a loʼ a loʼ tə̀ a loʼ ndzoʼ tey tə â tsɔʼlə bənə n jìi, abə ghə zow tsunə ghɔɔmə i Kəzə̀ zə, Satan n daŋŋə bə ney nuu kɔʼ ghɔɔmə i tii zə.

¹⁶ Ghə̂ a loʼ ghə a loʼ tə̀ a loʼ ndzoʼ tey tə â tsɔʼlə bənə n luʼu kə atay. Abə ghə zow tsunə ghɔɔmə i Kəzə̀ zə, ghə n daŋŋə bəghəm kɔʼ n fəŋ i dzuŋu zə.

¹⁷ Ghɔɔmə i tii zə n ka kee təmi taw dzə n fə̀ŋ tə ghə, n təŋkey i khə way ghaŋ tə. Ambə chɔd u bənə tii bòʼ ghɔɔmə i Kəzə̀, ghə n daŋŋə bwùlə doʼo i ndòw.

¹⁸ Ghə̂ a loʼ ghə a loʼ tə̀ a loʼ ndzoʼ tey tə â tsɔʼlə bənə nə udzɔŋɔmgbay. À wən loʼ ghə̂ ghey ghə zow tsunə ghɔɔmə i Kəzə̀ zə,

¹⁹ chɔd u mbi, ləghə zə ikum, nsə ləghə i fə u mbi wə n kee bə tsami maʼa kɔʼ ghɔɔmə i Kəzə̀ zey, ghɔɔmə i tii zə n way ni nyimmə n kow ghə.

²⁰ Ghə̂ a loʼ ghə a kee loʼ tə̀ a loʼ ndzoʼ tey tə â tsɔʼlə bənə n zub tə dzuŋu tə̀. À wən loʼ ghə̂ ghey ghə zow tsunə ghɔɔmə i Kəzə̀ zə, ghə n bəghəm kɔʼ n fə̀ŋ ə ghə idzəm, mə̂ bə utam. À loʼ ghə nghəm ntəghə, a loʼ ghə n nghəm ntuubə, a loʼ ghə n mə̂ bə utam fəbɔm.”

Kədaa nə kənyələ

²¹ Yeso n ndòw n sə kə, dza tə̀ ghə nə̀, “wù ney way daa kə tə n naŋa ndòw n tənə kəkhəə nkee n tənə ukay. Tə khəə naŋŋə kɔʼɔ nə kənyələ n sə̂ a zow ghə.

²² Boʼnə ghə i loʼ i way i nyi doʼonə, zə i bə shi way n mgbaŋ. Nkee, i tsəd doʼonə, zə i bə doʼo way təghə.

²³ Wù wey tə khə tuŋŋə wə tə zow.”

²⁴ Yeso n kəm dza ndòw tə̀ ghə nə̀, “Ney na ghə̂mə zə n ndzoʼo ghəə ghey ghaa zownə. N təŋkey ndzoʼo jìi zey wə neynə ni saʼ ghə̂ a loʼ ghə tii, a loʼ soʼo i ghi Zə̀ kə î neynə ni saʼwɔ. Tə i buʼu ney inəŋə ni saʼ wɔ tsəghəshi ghə̂ a loʼ ghey.

²⁵ Wù wey tə khənə fə wə ndəm, ghə i kuu kpiʼinu n fə u wi. Wù wey tə khə way fə kə, kasə̀ nyaŋi fey tə khənə ghə i ney nuu kɔʼ n wɔ wi.”

Ghɔɔmə i fənkəfən boʼ ndzoʼ i nyîmmənə

²⁶ Yeso n ndòw n sə kə dza nə̀, “Fɔɔ u Kəzə̀ u loʼ tə a loʼ ndzoʼ wù təmə ndòwnə nə təzub.

²⁷ Nghee tə təm tsunə, tə n fən bweeli doʼo tən bə i wi zə, ndzoʼ i tii zə n fòw kɔʼ, nyîmmə nə̀ tə buʼ khə way fə key kə ghəŋŋə nə̀ zə i nyîmmə.

²⁸ A loʼ ghəlikətsə, kə ghəŋŋə nə̀ ndzoʼ i tii i fòw, i nyim kɔʼ dzəə bə tə a loʼ fəkaʼ, i bɔŋ bə utam, tam u tii u bə beyyə tsu.

²⁹ Ambə fə u beyyə tsunə fu nə usum, wù tii n bə kɔy nuu fə u wi, n təŋkey nəŋə i kɔy zə n kpii.”

Ghɔɔmə i fənkəfən bòʼ sam i Mɔstad

³⁰ Yeso n ndòw n sə kə dza tə̀ ghə nə̀, “A baa loʼ ni dza nə̀ fɔɔ u Kəzə̀ u loʼ tə a loʼ kee. A loʼ ni baa ney ghɔɔmə i fənkəfən i ghaa zə ni tiilə ə?

³¹ Fɔɔ u Kəzə̀ u loʼ tə a loʼ sam i loʼ zə ghə tɔŋŋə nə̀ à loʼ Mɔstad. Sam i tii i təb tsəghə shi təsam tədzəm fa n mbi.

³² Abə wə kee zəghə tsunə, fə n nyim zaamə tsəghə tsu ndəmə ufə fu nə usum, bə doʼo kɔʼ fəkaʼ, n jìi zey nnən mə idəŋ n loʼ ni bə bəghə doʼo n kpìi tə tii tə.”

³³ Yeso n dza ndòw ghə n ndəmə tə aghəə tə n ghɔɔmə i fənkəfən, sey nə̀ ghə teeli zowkeeli tsu ghɔɔmə i Kəzə̀ zən.

³⁴ Nəŋə i loʼ i way Yeso â diinə ghə̂ ghə, nə̀ tə ka dza n ghɔɔmə i fənkəfən. Ambə tə loʼ kənə ghi ngəd tə wi tə, tə n tiilə dza ndòw tə̀ ghə ghəə zey i diinə.

Yeso buu naŋa zəŋ i taw zə

³⁵ N tsuʼ fə tii fə kələ, n nəŋə i fənə zə, Yeso n dza ndòw tə̀ dzûmə tə wi tə nə̀, “bəghə na tə̀ sa daŋ ndòw n nguŋ i loʼ zey.”

³⁶ Ghə n zəghə tsu nɔɔ kə aghə̂ key. Ngəd tə wi tə n nyi kɔʼ n fən key tə â loʼnə tii, nuu ndòw ghi wi. Fən u loʼ wə n loʼ soʼo fu.

³⁷ Ambə ghə ndownə, taw kə zəŋ kə n kaʼ ni tsəghə, mmuu mə n kaʼ ni nyi nə kəfən, luu kɔʼɔ bə n fən kə tii kə, fən kə tii kə n kaʼ ni məllə nyi tsu.

³⁸ Yeso n loʼ kə n baa kəfən, bweeli i wi zə nə̀ tə n gaʼ naŋa tow kə nə kətəghə. Ngəd tə wi tə̀ n bə zhim kɔʼ wi, dza tə̀ wi nə̀, “Wù dii, wə koʼo way nə̀ saa nya sa kuŋunu ə?”

³⁹ Yeso n zhəm kɔʼ, kəm ndòw zəŋ zey nsə dzuu zey dza nə̀, “Doʼo mɔŋ.” Zəŋ zey n bɔɔmə fuŋ doʼo ndòw mɔŋ. Tuŋutuŋu wə inyi wey n buulə doʼo dzəŋŋə bə ibam, mɔŋ.

⁴⁰ Sey Yeso n dza ndòw tə̀ dzûmə tə wi tey nə̀, “Ghaa sey ngii khə itsəŋ n fə̀ŋ nə̀ a loʼ kee? Ghaa sa kam khə way bəghəm i fə̀ŋ zə?”

⁴¹ Tsəŋ zə n kəm baa kwu tsu ghə, ghə n bəbə n wû i ghə nə̀, “Wù wən baa loʼ ndzoʼo wù ghaa wə ə, kasə̀ zəŋ nsə tuŋutuŋu tə dzuu tə n zow daŋŋə tə̀ wi.”